Stap Glad Long Ol Samting We Yu Hadwok Long Hem

1-3. (a) ?Wanem tingting blong plante man long saed blong wok blong olgeta? (b) ?Baebol i pulum yumi blong gat wanem tingting long saed blong wok? ?Wanem ol kwestin we bambae yumi tokbaot long japta ya?

LONG wol blong yumi, wok i no wan samting we plante man oli harem gud long hem. Oli wok plante aoa evri dei long wan wok we oli no rili laekem, hemia i mekem se oli no glad nating blong go long wok evri dei. ?Wanem samting i save pusum ol man we oli gat tingting olsem, blong oli intres long wok blong olgeta, mo blong stap glad long wok ya?

² Baebol i givhan long yumi blong gat gudfala tingting long saed blong wok. Hem i talem se wok mo ol frut blong hem oli karem blesing long yumi. Solomon i raetem se: “I gud yumi evriwan i gohed, yumi stap kakae, mo yumi stap dring, mo yumi stap glad long ol samting ya we yumi stap hadwok long hem, from we ol samting ya oli kam long God nomo.” (Prija 3:13) Jeova we i lavem yumi, oltaem hem i wantem mekem i gud long yumi. Taswe hem i wantem we yumi laekem wok blong yumi mo yumi harem gud long frut blong hem. Blong stap oltaem we hem i lavem yumi, yumi mas folem ol tingting mo rul blong hem long saed blong wok.—Prija 2:24; 5:18.

³ Long japta ya bambae yumi tokbaot fo kwestin: ?Olsem wanem yumi save stap glad long ol wok we yumi mekem? ?Wanem kaen wok we i no stret blong ol trufala Kristin oli mekem? ?Olsem wanem blong mekem se yumi no bitim mak long wok blong winim mane, nao yumi no spenem naf taem long ol wok we oli joen wetem wosip blong yumi? ?Mo wanem wok nao we i moa impoten i bitim ol narafala wok? Bifo we yumi ansarem ol kwestin ya, bambae yumi luk eksampol blong Jeova God mo Jisas Kraes, we tufala i wok had moa i bitim ol narafala man long heven mo wol.

4, 5. ?Olsem wanem Baebol i soemaot se Jeova i mekem plante gudfala wok?

⁴ Jeova nao i Wokman we i hae olgeta. Jenesis 1:1 i talem se: “Bifo we bifo olgeta, God i mekem skae mo graon wetem olgeta samting we i stap long tufala.” Taem God i finisim wok blong hem blong mekem wol ya, hem i talem se wok ya i “gud tumas.” (Jenesis 1:31) Hemia i min se hem i glad long olgeta wok we hem i mekem long saed blong wol ya. Jeova “i stap harem gud oltaem,” taswe yumi save se hem i glad taem hem i luk frut blong wok blong hem.—1 Timoti 1:11.

⁵ God blong yumi i stap wok oltaem, hem i no save les. Longtaem afta we hem i finisim wok ya blong mekem wol, Jisas i talem se: “Oltaem Papa blong mi i stap wok.” (Jon 5:17) ?Hem i stap mekem wanem wok? Wan wok we hem i mekem taem hem i stap long ples blong hem long heven, se hem i stap lidim ol man long wol mo i stap lukaotgud long olgeta. Mo tu, hem i stap mekem samfala oli kam ol “niufala man,” hemia ol Kristin we hem i makemaot olgeta wetem tabu spirit blong bambae oli rul wetem Jisas long heven. (2 Korin 5:17) Jeova i stap wok had blong mekem stamba tingting blong hem i kamtru, mo samting ya bambae i mekem se olgeta we oli lavem hem oli save kasem laef we i no save finis long niufala wol. (Rom 6:23) Jeova i glad long frut blong ol wok ya we hem i mekem. Plante milian man oli lesin finis long gud nius blong Kingdom. God i pulum olgeta oli kam long hem, mo oli stap jenisim ol fasin blong olgeta blong oli save stap oltaem we hem i lavem olgeta.—Jon 6:44.

6, 7. ?Olsem wanem Jisas i wok had longtaem finis i kam?

⁶ I stat longtaem finis i kam, Jisas tu i wok had. Bifo we hem i kam long wol, hem i “nambawan man blong wok” blong God, nao hem i givhan long God blong wokem ol samting “long heven mo long wol.” (Ol Proveb 8:22-31, NW; Kolosi 1:15-17) Taem Jisas i kamdaon long wol, hem i gohed blong wok had. Fastaem, hem i lanem wok blong kapenta, mo ol man oli singaot hem se “man blong wokem haos.”a (Mak 6:3) Wok ya i strong mo i nidim we man i gat gudhan long plante samting. Antap moa, long taem bifo, i no gat ol ples blong katem timba, ol stoa blong pem samting, mo ol tul we oli wok wetem lektrik. Traem tingbaot we Jisas i mas go long bus, katem wud, mo karem wud ya i go long ples we hem i stap wok long hem. Afta, blong wokem wan haos, hem i mas katem ol timba, putum ol rafta blong sapotem ruf, mo wokem ol doa. Ating hem i wokem ol tebel, jea, kabod, mo bed. I klia se Jisas i savegud olsem wanem man i save glad taem hem i wok had mo i mekem gudfala wok.

⁷ Mo tu, Jisas i wok had oltaem long wok blong prij. Long tri yia haf, hem i bisi long impoten wok ya. Hem i wantem talemaot gud nius long olgeta man, taswe hem i girap eli long moning, mo i wok fuldei gogo kasem let long naet. (Luk 21:37, 38; Jon 3:2) Hem i wokbaot i go ‘long olgeta taon mo vilej, i stap prij, mo i stap talemaot gud nius blong kingdom blong God.’ (Luk 8:1, NW) Jisas i wokbaot plante handred kilometa long leg nomo, long ol rod we oli fulap long das, blong karem gud nius i go long ol man.

8, 9. ?Olsem wanem Jisas i stap glad long ol samting we hem i hadwok long hem?

⁸ ?Olsem wanem? ?Jisas i glad long wok blong prij we hem i stap hadwok long hem? !Yes! Hem i sakem sid blong trutok blong Kingdom, mo taem hem i aot long wol ya, hem i livim wan bigfala garen we kakae blong hem i rere finis. Wok blong God i givim paoa long Jisas, i mekem hem i strong, taswe hem i rere blong lego kakae blong hem blong i save finisim wok ya we God i givim long hem. (Jon 4:31-38) Tingbaot olsem wanem hem i harem gud long en blong laef blong hem long wol ya, taem hem i save talem wetem fulhat blong hem long Papa blong hem se: “Mi mi leftemap nem blong yu long wol ya, mo mi finisim ol wok ya we yu givim long mi blong mi mekem.”—Jon 17:4.

⁹ Tru ya, Jeova mo Jisas tufala i beswan eksampol blong ol man we oli stap glad long ol samting we oli hadwok long hem. From we yumi lavem Jeova, yumi traehad blong “folem fasin blong hem.” (Efesas 5:1) Mo from we yumi lavem Jisas, yumi traehad oltaem blong “biaen long hem.” (1 Pita 2:21) Ale, bambae yumi luk olsem wanem yumi tu yumi save stap glad long ol samting we yumi hadwok long hem.

10, 11. ?Wanem i save halpem yumi blong holem gudfala tingting long saed blong wok blong yumi?

¹⁰ I stret nomo we ol trufala Kristin oli wok blong kasem mane blong laef. Yumi wantem harem gud mo stap glad long wok we yumi mekem. Be i no isi blong harem gud taem yumi no laekem wok blong yumi. ?Sipos i olsem, olsem wanem yumi save stap glad long samting we yumi hadwok long hem?

¹¹ Holem gudfala tingting long saed blong wok blong yumi. Maet yumi no save jenisim wok blong yumi, be yumi save jenisim tingting blong yumi. Sipos yumi tingting dip long tingting blong God long saed blong wok, ale yumi save gat wan gudfala tingting long saed blong wok blong yumi. Olsem nao, sipos yu yu hed blong famle, yu save tingbaot se wok blong yu i rod blong yu yu kasem ol samting we famle blong yu i nidim, nating se wok ya i no wan wok we i hae mo i no pulum intres blong yu. God i tinghae long fasin blong yu blong lukaotgud long famle blong yu. Tok blong hem i talem se man we i no givim ol samting we famle blong hem i nidim, “hem i stap longwe moa long God, i winim man we i no bilif nating.” (1 Timoti 5:8) Sipos yu luksave se wok blong yu i givhan long yu blong lukaot long famle blong yu olsem we God i wantem, ale samting ya i save halpem yu blong gat wan tingting we i defren long ol man we yu wok wetem olgeta. Yu save harem gud mo yu no harem se yu stap westem taem.

12. ?Olsem wanem yumi kasem blesing taem yumi no les mo yumi no stil long ples blong wok?

¹² No les mo no stil. Sipos yumi wok had mo yumi lanem blong mekemgud wok blong yumi, yumi save kasem plante blesing. Plante masta oli tinghae long ol wokman we oli wok had mo oli wok gud. (Ol Proveb 12:24; 22:29) Yumi ol trufala Kristin, yumi mas wok stret, i min se yumi no stilim mane, olting, mo taem long masta blong yumi. (Efesas 4:28) Olsem yumi luk long laswan japta, man we i no giaman mo i no stil hem i kasem plante blesing. Wan wokman we i gat gudnem from we i no giaman mo i no stil, masta i save trastem hem. Nating sipos masta blong yumi i no luksave gudfala eksampol blong yumi blong wok had, be yumi save harem gud from we ‘tingting blong yumi i klin gud’ long fes blong God, mo yumi save se yumi stap mekem God ya we yumi lavem hem i glad.—Hibrus 13:18; Kolosi 3:22-24.

13. ?Wanem i save kamaot from gudfala fasin blong yumi long ples blong wok?

¹³ Luksave se fasin blong yumi i givim ona long God. Taem yumi mekem ol gudfala Kristin fasin long ples blong wok, ol narafala bambae oli luk. ?Wanem i save kamaot from? Yumi “leftemap tok blong God ya we i sevem yumi, long fes blong ol man.” (Taetas 2:9, 10) Yes, gudfala fasin blong yumi i save mekem sam narafala oli luk se wosip blong yumi i gud tumas, mo oli save laekem wosip ya. !Tingbaot filing blong yu sipos wan man we yu wok wetem hem i intres long trutok from gudfala eksampol we yu yu soemaot long ples blong wok! Mo tu, samting we i moa impoten blong tingbaot hemia: I no gat wan samting we i save mekem yumi harem gud moa, i bitim we yumi save se gudfala fasin blong yumi i givim ona long Jeova mo i mekem hem i glad tumas.—Ol Proveb 27:11; 1 Pita 2:12.

14-16. ?Taem yumi mas jusum wan wok, wanem tufala kwestin we yumi mas tingbaot?

¹⁴ Baebol i no talem evri wok we i gud blong mekem, mo evri wok we i nogud. Be hemia i no min se yumi save tekem enikaen wok nomo. Baebol i givhan long yumi blong jusum wok we i gat gudfala frut, we i no stilim narafala, mo we God i glad long hem. Mo Baebol i halpem yumi blong stap longwe long wok we God i no glad long hem. (Ol Proveb 2:6) Taem yumi tekem desisen long saed blong wok, i gat tu impoten kwestin we yumi mas tingbaot.

¹⁵ ?Sipos mi tekem wok ya, bambae mi mas mekem sam fasin we Baebol i agensem? Tok blong God i talem klia se i rong blong stil, giaman, mo wokem ol aedol. (Eksodas 20:4; Ol Wok 15:29; Efesas 4:28; Revelesen 21:8) Sipos yumi mas mekem ol fasin ya long wan wok, i no stret we yumi tekem wok ya. From we yumi lavem Jeova, yumi no save tekem wan wok we i joen wetem ol fasin we oli brekem ol loa blong hem.—1 Jon 5:3.

¹⁶ ?Sipos mi tekem wok ya, bambae mi soemaot se mi mi agri long wan nogud fasin, mo bambae mi pulum ol narafala blong joen long wan nogud fasin? Tingbaot sipos yu wok olsem wan woman blong ansarem telefon long wan ofis. Wok ya i gud nomo. ?Be olsem wanem sipos wan Kristin i gat janis blong kasem wan wok olsem long wan spesel klinik blong ol mama we oli wantem kilim pikinini long bel blong olgeta? I tru, bambae Kristin ya i no joen blong mekem wok ya blong kilim pikinini long bel. Nating se i olsem, wok we hem i mekem oltaem bambae i sapotem wan klinik we i stap mekem samting we i agensem Tok blong God, hemia kilim pikinini long bel blong mama blong hem. (Eksodas 21:22-24, NW) From we yumi lavem Jeova, yumi no wantem go klosap nating long ol fasin ya we Baebol i agensem.

17. (a) ?Wanem ol samting we yumi mas skelem taem yumi jusum wan wok? (Lukluk bokis long pej 177.) (b) ?Olsem wanem voes blong hat blong yumi i save givhan long yumi blong tekem desisen we God i glad long hem?

¹⁷ Plante desisen long saed blong wok oli save kam klia sipos yumi tingting gud long tufala kwestin ya long haf 15 mo 16. Antap long hemia, i gat sam narafala samting we yumi mas skelem.b Yumi no mas ting se grup ya we i olsem slef we i stret mo waes bambae i talem wan rul blong yumi folem long evri samting long laef blong yumi. Nogat. Yumi wanwan i mas naf blong luksave. Olsem yumi tokbaot finis long Japta 2 blong buk ya, yumi mas stadi long Tok blong God mo mekem i wok long laef blong yumi evri dei. Olsem nao, bambae yumi tijim mo trenem voes blong hat blong yumi blong i lidimgud yumi. Sipos yumi “traehad longtaem” blong trenem yumi blong “jusumaot wanem fasin i gud mo wanem fasin i nogud,” voes blong hat blong yumi bambae i lidim yumi blong tekem ol desisen we God i glad long olgeta, mo we oli save halpem yumi blong stap long laef ya we oltaem God i lavem yumi.—Hibrus 5:14.

18. ?From wanem i no isi blong tekem ol desisen we oli mekem Jeova i glad?

¹⁸ Long “ol las dei” ya we “laef i strong mo i had blong winim ol trabol,” i no isi nating blong tekem ol desisen we oli mekem Jeova i glad. (2 Timoti 3:1, NW) Plante taem i hadwok tu blong faenem mo holemtaet wan wok. Yumi ol trufala Kristin, yumi luksave se i impoten blong wok had blong kasem ol samting we famle blong yumi i nidim. Be sipos yumi no lukaotgud, wok blong yumi we i pulum yumi tumas mo tingting blong wol blong ronem mane, tufala i save spolem wosip we yumi mekem i go long God. (1 Timoti 6:9, 10) Naoia bambae yumi luk olsem wanem yumi save skelemgud ol samting, mo luksave ‘wanem fasin we i stret gud blong yumi jusumaot.’—Filipae 1:10.

19. ?From wanem i stret nomo we yumi trastem Jeova fulwan? ?Sipos yumi trastem hem olsem, bambae yumi blokem wanem fasin?

¹⁹ Trastem Jeova fulwan. (Ol Proveb 3:5, 6) I stret nomo we yumi trastem Jeova fulwan, from we hem i stap tingbaot yumi oltaem. (1 Pita 5:7) Hem i save moa bitim yumi wanem samting we yumi nidim, mo han blong hem i no sot. (Ol Sam 37:25) Taswe i gud yumi lesin long Tok blong God taem i talem se: “I nogud yufala i laekem mane tumas. Sipos yufala i gat wanem samting, be yufala i mas harem gud long hem, from we God i talem se, ‘Bambae mi mi no save livim yu yu stap yu wan. Bambae mi mi no save lego yu samtaem.’” (Hibrus 13:5) Plante man mo woman we oli mekem wok blong God fultaem, oli save talem olsem wanem God i stap givim evri samting we oli nidim long laef. Sipos yumi trastem Jeova fulwan se bambae hem i lukaotgud long yumi, yumi no save wari bitim mak long ol samting we famle blong yumi i nidim. (Matiu 6:25-32) Bambae yumi no save letem wok blong yumi i blokem yumi, blong yumi no mekem gud evri samting long saed blong wosip blong yumi, olsem talemaot gud nius mo go long ol miting.—Matiu 24: 14, NW; Hibrus 10:24, 25.

20. ?I minim wanem se ae blong yumi i mas klia gud? ?Olsem wanem yu save mekem ae blong yu i stap klia gud oltaem?

²⁰ Oltaem ae blong yu i mas stap klia gud. (Matiu 6:22, 23, NTB) Ae blong yumi i mas klia gud, i min se yumi no fulumap laef blong yumi wetem plante tumas samting we i mekem se i fasfas. Wan Kristin we ae blong hem i klia gud, i stap lukluk i go long wan samting nomo, hemia blong mekem samting we God i wantem. Sipos ae blong yumi i fas long samting ya nomo, bambae yumi no tingting tumas blong faenem wan wok we i givim bigfala pei long yumi mo mekem laef blong yumi i kam flas tumas. Bambae yumi no bisi tumas blong ronem ol laswan mo beswan samting. Ol bisnesman oli stap talem se yumi mas pem olgeta, no sipos no, bambae yumi no glad long laef blong yumi. ?Olsem wanem yu save mekem ae blong yu i stap klia gud oltaem? Yu no mas mekem ol bigfala kaon. Yu no mas pem tumas samting we oli kakae taem mo paoa blong yu. Yu mas folem advaes blong Baebol blong harem gud long ‘kakae mo klos we oli naf’ nomo. (1 Timoti 6:8) Traehad blong mekem se laef blong yu i kam klia moa, i no fasfas.

21. ?From wanem yumi mas jusumaot ol samting we oli moa impoten? ?Wanem samting i mas stap long fasples long laef blong yumi?

²¹ Putum ol samting long saed blong wosip oli stap long fasples, mo holemtaet fasin ya. From we yumi no gat naf taem blong mekem evri samting long laef, yumi mas jusumaot ol samting we oli moa impoten. Sipos yumi no mekem olsem, ol samting we oli no impoten tumas bambae oli kakae taem blong yumi, nao yumi no moa gat taem blong mekem ol samting we oli moa impoten. ?Wanem samting i moa impoten i bitim ol narafala samting? Plante man blong wol oli ting se hae edukesen i impoten bitim evri samting, from we hem i rod blong kasem wan gudfala wok. Be Jisas i talem long ol man blong hem blong ‘gohed blong lukaot kingdom fastaem.’ (Matiu 6:33, NW) Yes, yumi ol trufala Kristin, yumi putum Kingdom blong God long fasples long laef blong yumi. Fasin blong laef blong yumi, i min se ol jus blong yumi, ol mak we yumi traehad blong kasem, mo ol wok blong yumi, oli mas soemaot se ol samting long saed blong Kingdom mo ol samting we God i wantem, oli impoten moa long tingting blong yumi i bitim mane, ol sas samting, mo ol narafala samting we wol i save givim.

22, 23. (a) ?Wanem faswan wok blong ol trufala Kristin? ?Olsem wanem yumi save soemaot se wok ya i impoten long yumi? (Lukluk bokis long pej 180.) (b) ?Long saed blong wok blong winim mane, yumi strong blong holem wanem tingting?

²² Yumi save se yumi stap klosap tumas long en blong rabis fasin blong wol ya. Taswe yumi mas putum tingting blong yumi i stap strong long faswan wok blong ol trufala Kristin, hemia blong prij mo pulum ol man oli kam disaepol blong Kraes. (Matiu 24:14, NW; 28:19, 20) Olsem Jisas we i Bigfala Eksampol blong yumi, yumi mas stap bisi oltaem long wok ya blong sevem laef blong ol man. ?Olsem wanem yumi save soemaot se wok ya i impoten long yumi? Bighaf blong ol man blong God oli mekem wok blong prij wetem fulhat blong olgeta olsem ol pablisa long kongregesen. Sam narafala oli jenisim sam samting long laef blong olgeta blong oli kam paenia mo misinari. Plante papa mama we oli luksave se i impoten blong traem kasem ol gudfala mak long wok blong Jeova, oli leftemap tingting blong ol pikinini blong olgeta blong mekem wok blong prij fultaem. ?Olsem wanem? ?Olgeta we oli wok had blong talemaot Kingdom oli stap glad long samting ya we oli hadwok long hem? !Yes! Mekem wok blong Jeova wetem ful laef blong yumi, hemia rod we i sua blong givim glad, mekem man i haremgud, mo givim fulap blesing.—Ol Proveb 10:22.

²³ Plante long yumi oli mas wok plante aoa evri dei blong kasem naf mane blong pem ol samting blong famle blong olgeta. Rimemba se Jeova i wantem we yumi stap glad long samting we yumi hadwok long hem. Sipos yumi mekem ol tingting mo aksen blong yumi oli laenap wetem tingting blong God, yumi save harem gud long wok blong yumi. Be yumi mas holem strong tingting blong no letem wok blong winim mane, i pulumaot yumi long faswan wok blong yumi, hemia blong talemaot gud nius blong Kingdom blong God. Sipos yumi mekem wok blong prij i kam impoten moa i bitim ol narafala wok long laef blong yumi, yumi soemaot se yumi lavem Jeova. Long rod ya, yumi stap long laef ya we oltaem hem i lavem yumi.