Baebol i Talem Wanem

?Wanem Ya Dei Blong Jajmen?

Baebol i talem se God “i putum dei finis we bambae hem i save jajem olgeta man long wol.” (Ol Wok 17:31) Plante man oli no laekem nating taem oli tingbaot se oli mas pastru long wan jajmen. ?Yu yu harem olsem tu?

SIPOS yes, ale bambae yu harem gud moa taem yu save se Dei blong Jajmen i wan rod blong soem lav we bambae i karem plante blesing i kam long olgeta man wetem olgeta we oli ded finis. (Matiu 20:28; Jon 3:16) ?From wanem i mas gat Dei blong Jajmen? ?Wanem bambae i hapen long “dei” ya?

?From Wanem i Mas Gat Dei Blong Jajmen?

Taem God i putum ol man long wol, hem i no gat tingting ya se wol bambae i kam wan ples blong traem man blong luk sipos oli naf blong go laef long wan narafala ples long fiuja. Nogat. Hem i wokem man blong oli laef olwe long wol. Nating se faswan man mo woman tufala i stret gud olgeta long bodi mo tingting, be tufala i girap agensem God. From samting ya, tufala i lusum janis blong tufala blong laef olwe, mo tufala i karem sin mo ded i kam long ol pikinini blong tufala.​—Jenesis 2:15-17; Rom 5:12.

Dei blong Jajmen hem i wan taem we bambae i gohed blong wan taosen yia, mo long taem ya ol man bambae oli gat janis blong kasembak samting we Adam mo Iv tufala i lusum.a Tingbaot tok blong Ol Wok 17:31 antap, we i talem se Dei blong Jajmen bambae i kasem “olgeta man long wol.” Olgeta we God i jajem olgeta se oli stret man, bambae oli kasem laef we i no save finis mo we i stret gud olgeta, long wol. (Revelesen 21:3, 4) Taswe Dei blong Jajmen bambae i givhan blong mekem stamba tingting blong God long saed blong ol man mo wol ya i kamtru.

Jisas Kraes hem i Jaj we God i putumap. Baebol i talem se Jisas bambae i ‘jajem olgeta man, olgeta we oli laef, wetem olgeta we oli ded.’ (2 Timoti 4:1) ?Hu ya ‘olgeta we oli laef’ we bambae oli kasem jajmen? ?Olsem wanem ol man we oli ded finis bambae oli laef bakegen long “wol” ya?

Jisas Bambae i Jajem ‘Olgeta We Oli Laef’

Yumi stap kam klosap moa long taem we bambae fasin blong laef blong wol ya i lus. Long taem ya, God bambae i spolem evri samting long wol ya we man i stanemap mo we i fulap long kruked fasin, mo bambae hem i rutumaot ol rabis man. Ol man we oli laef tru long taem ya, hemia nao “olgeta we oli laef” we bambae oli kasem jajmen.​—Revelesen 7:9-14; 19:11-16.

Long taem blong jajmen ya, we bambae i gohed blong 1,000 yia, Jisas Kraes wetem ol 144,000 man mo woman we oli laef bakegen long heven, bambae oli rulum wol. Bambae oli wok olsem ol king mo pris. Bambae oli yusum ransom sakrefaes blong Jisas blong blesem ol man, mo mekem we, sloslo, olgeta we oli stap tru long God bambae oli kam stret gud olgeta long bodi mo tingting blong olgeta.​—Revelesen 5:10; 14:1-4; 20:4-6.

Long Dei blong Jajmen, Setan mo ol rabis enjel bambae oli no moa gat paoa antap long ol samting we ol man oli stap mekem. (Revelesen 20:1-3) Be, taem Dei blong Jajmen i finis, Setan bambae i traem olgeta man long saed blong fasin blong olgeta blong stap tru long God. Olgeta we oli stap tru bambae oli winim traem we Adam mo Iv tufala i no winim. Bambae God i jajem olgeta se oli stret gud blong kasem laef we i no save finis long wol ya we i kam paradaes bakegen. God bambae i kilim i ded ol man we oli jusum blong rebel agensem hem. Hemia semfala samting we bambae i hapen long Setan mo ol rabis enjel.​—Revelesen 20:7-9.

Jajem ‘Olgeta We Oli Ded’

Baebol i talem se long Dei blong Jajmen, ol dedman bambae oli “stanap.” (Matiu 12:41) Jisas i talem se “aoa i stap kam we ol dedman we oli stap long ol gref blong olgeta, bambae oli harem voes blong hem, nao bambae oli kamaot. Olgeta we oli mekem ol gudfala samting, oli girap bakegen blong kasem laef. Mo olgeta we oli mekem ol rabis samting, oli girap bakegen blong bigfala kot bambae i jajem olgeta.” (Jon 5:28, 29, NW) Vas ya i no stap tokbaot wan spirit we i kamaot long bodi blong ol man we oli ded, from we ol man we oli ded finis oli no moa save wan samting mo oli no gat wan spirit we i aot long bodi blong go laef samples. (Prija 9:5; Jon 11:11-14, 23, 24) Jisas bambae i mekem ol man we oli slip long ded oli laef bakegen long wol.

?Olsem wanem? ?Bambae oli jajem ol man we oli laef bakegen from ol samting we oli mekem bifo we oli ded? Nogat. Baebol i tijim se “taem wan man i ded, man ya i no moa stap aninit long paoa blong fasin blong sin, hem i fri.” (Rom 6:7) Taswe, ol man we oli laef bakegen long wol ya mo ol man we oli laef tru long taem we ol samting blong wol ya i lus, olgeta ya evriwan bambae oli kasem jajmen folem “ol samting we olgeta wanwan oli mekem” long Dei blong Jajmen. (Revelesen 20:12, 13, NW) Fasin we oli mekem i impoten tumas. Sipos oli obei long Jeova bambae oli kasem laef we i no save finis. Sipos oli no obei bambae oli lus blong olwe. Plante man we oli laef bakegen bambae i faswan taem blong olgeta blong oli save Jeova God mo ol samting we hem i wantem se olgeta oli mekem long laef blong olgeta. Oli gat janis ya blong mekem laef blong olgeta i laenap wetem ol samting we God i wantem mo kasem laef we i no save finis long wol ya.

Yumi No Nid Blong Fraet

Dei blong Jajmen i no taem blong kasem ol tijing nomo blong God, be bambae i wan taem tu blong ol man we oli laef oli mekem ol samting we oli lanem i wok long laef blong olgeta mo harem gud long ol blesing we bambae i kamaot. !Traem tingbaot glad blong yu taem yu joen bakegen wetem ol famle blong yu we oli laef bakegen long ded, mo yufala evriwan i kam stret gud tugeta!

Taem Dei blong Jajmen i finis, God i letem Setan i traem ol man blong hem bakegen, blong luk sipos bambae oli stap tru no nogat. Be yumi no nid blong wari mo fraet. Taem Dei blong Jajmen i finis, evri man we oli laef, bambae oli rere finis blong fesem laswan traem. Dei blong Jajmen bambae i wan haf blong ol samting we God i wantem mekem blong finisim ol nogud samting we i kamaot from fasin stronghed long garen blong Iden bifo.

[Futnot]

?YU YU BIN TINGBAOT?

● ?Wanem ya Dei blong Jajmen?​—Ol Wok 17:31.

● ?Hu olgeta we bambae oli kasem jajmen?​—2 Timoti 4:1.

● ?Dei Blong Jajmen bambae i longfala olsem wanem?​—Revelesen 20:4-6.

[Tok blong makem poen pija long pej 13]

Traem tingbaot glad blong yu taem yu joen wetem ol famle blong yu we oli laef bakegen

[Tok blong pija long pej 12]

Aninit long rul blong Kraes, olgeta we oli ded bambae oli laef bakegen long wan wol we i paradaes