?Taem Yu Lanem Trutok Long Saed Blong Hel, Samting Ya i Mekem Wanem Long Yu?

OLGETA we oli tijim se hel i wan ples blong harem nogud, oli no stap leftemap Jeova God mo ol gudfala fasin blong Hem. I tru, Baebol i talem se God bambae i spolem ol rabis man. (2 Tesalonaeka 1:6-9) Be kros blong God we i stanap long stret fasin, i no stamba fasin blong Hem.

Jeova i no wan God blong spolem man mo hem i no wan God we i gat tingting ya blong givimbak. Hem i bin askem se: “?Yufala i ting se mi mi glad blong luk man nogud i ded?” (Esikel 18:23) Sipos God i no glad blong luk we man nogud i ded, ?olsem wanem hem i save glad blong wajem olgeta oli stap harem nogud blong olwe?

Bigfala fasin blong God hemia lav. (1 Jon 4:8) Baebol i talem se: “MASTA i mekem i gud long evriwan, hem i gat sore long olgeta samting we hem i bin wokem.” (Ol Sam 145:9, The Holy Bible). Mo tu, God i wantem we yumi lavem hem wetem fulhat blong yumi.—Matiu 22:35-38.

Fraet Long Hel, No Lavem God—?Weswan i Pusum Yu?

Tijing ya we sol i stap safa long hel i mekem se ol man oli fraet nogud long God. Defren olgeta, wan man we i lanem trutok long saed blong God mo i lavem Hem, bambae hem i gat wan gudfala fraet long God. Ol Sam 111:10 (New American Bible) i eksplenem se: “Fasin blong fraetgud long MASTA, hem i stamba blong waes; olgeta we oli gat fasin ya oli waes.” Fraet ya long God, i no wan fraet we i bitim mak, olsem we yumi seksek se God i save mekem i nogud long yumi, nogat. Fraet ya i min se yumi gat bigfala ona mo respek long Man we i Wokem yumi. Tingting ya nao i pusum yumi blong fraetgud blong no wantem mekem wan samting we i mekem God i harem nogud.

Tingbaot olsem wanem trutok we Kathleen i lanem long saed blong hel, i gat paoa long hem. Kathleen i gat 32 yia mo hem i wan woman blong tekem drag. Oltaem long laef blong hem, hem i joen long ol pati, i mekem raf fasin, hem i no laekem hem wan, mo i mekem ol rabis fasin long saed blong seks. Hem i talem se: “Mi lukluk smol gel blong mi we i gat 1 yia mo mi stap tingting se, ‘!Man, mi mi stap mekem wanem long hem ya! Bambae mi bon long faea from samting ya.’” Kathleen i traehad blong no moa tekem drag, be hem i no save stopem fasin ya. Hem i talem se: “Mi wantem kam wan gudfala woman, be evri samting long laef blong mi mo long wol ya i mekem mi harem nogud tumas. I olsem se i no gat wan gudfala risen blong mi kam wan gudfala woman.”

Biaen, Kathleen i mitim ol Witnes blong Jeova. Hem i talem se: “Mi lanem se i no gat helfaea. Baebol i talem klia samting ya. Taem mi lanem se bambae mi no stap bon long faea, samting ya i mekem mi harem gud tumas.” Be Kathleen i lanem ol promes blong God tu se ol man oli save laef foreva long wan wol we i no moa gat ol rabis man. (Ol Sam 37:10, 11, 29; Luk 23:43) Hem i eksplenem se: “!Naoia mi gat wan trufala hop, hemia blong laef long Paradaes!”

Naoia we Kathleen i no moa fraet long helfaea, ?yu ting se hem i naf blong lego drag? Kathleen i eksplenem se: “Taem mi harem we mi wantem tumas blong tekem drag, mi prea long Jeova God, mi askem strong long hem blong i halpem mi. Mi tingbaot tingting we Jeova i gat long ol nogud fasin olsem, mo mi no wantem blong mekem Hem i harem nogud. Hem i ansa long ol prea blong mi.” (2 Korin 7:1) Fasin blong Kathleen blong fraet blong mekem God i kros, i givhan long hem blong lego drag.

Yes, sipos yumi wokem lav long God mo fraetgud long hem—i no long helfaea—samting ya i save pusum yumi blong mekem samting we God i wantem, nao bambae yumi save haremgud blong olwe. Man blong raetem Sam i se: “Ol man we oli stap [“fraetgud long Jeova,” NW] mo we oli stap folem ol tok we hem i putum, bambae oli save harem gud.”—Ol Sam 128:1.

[Bokis/Foto blong pija long pej 9]

?HU BAMBAE I KAMAOT LONG HEL?

Sam translesen blong Baebol oli mekem tingting blong man i fasfas. Hemia from we oli tanem tufala Grik tok ya Geʹen·na mo Haiʹdes i kam “hel.” Long Baebol, tok ya Geʹen·na i minim se man i lus blong olwe, hem i no moa gat hop blong laef bakegen long fiuja. Defren olgeta, man we i go long Haiʹdes no Hades, hem i save laef bakegen long ded long fiuja.

Taswe, afta we Jisas i ded mo i laef bakegen, aposol Pita i talem long ol man we oli lesin long hem se God i no livim sol blong Jisas “long hel.” (Wok 2:27, 31, 32; Sam 16:10, King James Version) Grik tok we oli tanem i kam “hel” long vas ya hemia Haiʹdes. Jisas i no go long wan ples blong faea. Hades no “hel” i minim gref nomo. Be i no Jisas nomo we God i tekemaot hem long Hades.

Blong mekem i laenap wetem laef bakegen, Baebol i talem se: “Ded mo hel i letem ol dedman blong olgeta oli kamaot.” (Revelesen 20:13, 14, KJ) “Hel” we i emti i minim se ol man we God i jajem se oli stret blong kasem laef blong olwe, oli laef bakegen. (Jon 5:28, 29; Wok 24:15) !Hemia i wan nambawan hop blong fiuja, taem bambae yumi luk olgeta we yumi lavem olgeta oli kamaot bakegen long beregraon! Jeova, God ya we i gat bigfala lav bambae i mekem samting ya.