Baebol i Talem Wanem

?Ol Kristin Oli Mas Sem Mak Blong Oli Save Joengud?

I LUK olsem we ol skul tede oli no save joengud. Insaed long wan jos nomo, ol man oli save gat ol defdefren tingting long saed blong ol tijing mo ol fasin we oli mas folem. Wan man blong raetem ol buk i tokbaot samting ya, i se: “I had blong faenem tu man we tufala i bilif long semfala God. I luk olsem we tede, ol man wanwan oli gat prapa bilif blong olgeta long saed blong God.”

Fasin ya i defren olgeta long hemia we aposol Pol i talem se yumi mas gat. Long faswan handred yia, hem i talem long ol Kristin long Korin se, ‘tingting blong olgeta i mas kam wan nomo,’ mo ‘oli mas joen gud we oli gat wan tingting nomo, mo we fasin blong olgeta i wan nomo.’ (1 Korin 1:​10) Tede, samfala oli tok agens long advaes ya blong Pol. Oli talem se: ‘Ol man oli defdefren, taswe i rong blong talem se olgeta Kristin oli mas gat sem tingting mo sem fasin.’ ?Olsem wanem? ?Pol i rili minim se yumi evriwan i mas olsem ol mesin nomo, we yumi mekem evri samting long sem fasin stret? ?Baebol i letem yumi, blong yumi mekem sam samting long fasin we yumi laekem?

Yumi Joengud, Be Yumi No Sem Mak

Long wan narafala leta we Pol i raetem, hem i talem long ol Kristin se oli mas mekem wok blong God wetem ‘tingting blong olgeta.’ (Rom 12⁠:​1, NW ) Taswe, i sua se hem i no stap traem blong mekem ol memba blong kongregesen long Korin oli kam olsem ol mesin we oli no yusum tingting blong olgeta. ?Be, from wanem hem i talem long olgeta se ‘oli mas joen gud we oli gat wan tingting nomo, mo we fasin blong olgeta i wan nomo’? Pol i givim advaes ya from we i gat wan bigfala trabol i stap long kongregesen blong Korin. Samfala oli girap, oli talem se Apolos i lida blong olgeta, sam narafala oli talem se Pol no Pita i lida blong olgeta, mo samfala bakegen oli talem se Kraes nomo i lida blong olgeta. Hemia wan bigfala trabol, we i mekem se i no moa gat pis long kongregesen.

Pol i wantem se ol Kristin long Korin oli mas folem sem fasin we hem i talem long ol Kristin long Efesas samtaem biaen, hemia se oli mas ‘holem pis ya [we tabu spirit i givim], blong oli save joen gud oltaem.’ (Efesas 4⁠:⁠3) Hem i stap pulum ol brata blong oli joengud blong folem Jisas Kraes, oli no mas seseraot long ol smosmol grup we oli raorao no we oli folem wan man nomo. Olsem nao, bambae oli stap long pis, mo oli gat wan tingting. (Jon 17⁠:22) Taswe, advaes we Pol i givim long ol man Korin i blong stretem tingting blong olgeta mo i blong pulum olgeta blong joengud, be i no blong mekem olgeta oli kam sem mak long evri samting.​—⁠2 Korin 13:​9, 11.

I impoten tu blong gat wan tingting long saed blong ol tijing. Ol man we oli folem Jisas oli luksave se i gat “wan bilif nomo,” olsem we i gat ‘wan God nomo, we hem i Papa blong olgeta man.’ (Efesas 4:​1-6, NW ) Taswe, ol Kristin oli mas meksua se ol bilif blong olgeta oli laenap wetem trutok blong Baebol long saed blong God mo ol stamba tingting blong hem. Oli mas gat wan tingting long saed blong God, se hem i hu, mo wanem samting we hem i wantem yumi blong mekem. Mo tu, oli mas obei long ol klia loa blong Baebol long saed blong ol fasin blong olgeta. (1 Korin 6:​9-​11) Long rod ya, ol Kristin oli save joengud long saed blong ol tijing mo fasin.

Taem Tufala Kristin i Gat Defdefren Tingting

Samting ya i no min se skul i talem long ol Kristin wanem samting stret we oli mas tingting, mo wanem samting stret we oli mas mekem, long evri samting long laef blong olgeta. Bighaf blong ol samting long laef blong yumi, yumi nomo i jusum. Traem tingting bakegen long ol Kristin long Korin long faswan handred yia. I no olgeta evriwan we oli wantem kakae mit we maet ol man oli bin yusum long wan haos prea blong wosip long narafala god. Samfala oli bilif strong se sipos oli kakae mit ya, bambae oli joen long wosip blong narafala god ya. Be sam narafala oli ting se i oraet blong kakae mit ya, nating se oli bin yusum olsem wanem fastaem. Blong stretem trabol ya, Pol i no putum wan rul we ol Kristin oli mas folem. Nogat. Hem i luksave se ol man oli gat raet blong tekem ol defdefren disisen long bisnes ya.a​—⁠1 Korin 8:​4-​13.

Tede, olgeta Kristin oli no mekem semfala disisen long saed blong wok, helt, pleplei, no wan narafala samting we olgeta wanwan oli gat raet blong jusum. Be maet samfala oli no glad we wanwan man oli tekem ol defdefren disisen olsem. Maet oli ting se ol defdefren tingting ya oli save mekem rao i kamaot insaed long kongregesen no maet ol Kristin oli save seseraot from. Be i no nid blong samting ya i hapen. Tingbaot: Ol man we oli wokem miusik oli no gat plante defdefren saon blong yusum. Be oli joejoenem ol saon ya long ol defren rod, nao oli mekem plante kaen gudfala miusik. Long sem fasin, taem ol Kristin oli tekem disisen, oli obei long ol rul blong God. Be long saed blong plante samting long prapa laef blong olgeta, olgeta nomo oli gat raet blong jusum.

?Olsem wanem ol Kristin oli save holem fasin joengud, be long semtaem, respektem raet blong narafala blong mekem sam samting long rod we hem i jusum? Bigfala samting hemia lav. Lav we yumi gat long God i mekem se yumi wantem folem ol loa blong hem. (1 Jon 5⁠:⁠3) Lav we yumi gat long ol narafala man, i mekem se yumi respektem raet we oli gat blong tekem disisen we tingting blong olgeta i no jajem olgeta from, long saed blong prapa bisnes blong olgeta. (Rom 14:​3, 4; Galesia 5:​13) Pol i givim wan gudfala eksampol blong samting ya. Long saed blong wan tijing, hem i obei long rul we hed kampani i putumap long faswan handred yia. (Matiu 24⁠:​45-​47; Ol Wok 15:​1, 2) Be hem i talem tu se, long prapa bisnes blong ol wanwan man, ol Kristin oli mas respektem raet blong narafala blong tekem disisen we tingting blong hem i no jajem hem from.​—⁠1 Korin 10⁠:25-​33.

I klia se, yumi no mas jajem narafala man taem hem i tekem wan disisen we i no agensem ol rul blong Baebol mo we tingting blong hem i no jajem hem from. (Jemes 4:​12) Be sipos disisen ya bambae i mekem tingting blong ol narafala i trabol no i mekem se kongregesen i no moa joengud, ale Kristin we i stap tru long God, bambae i no strong blong mekem samting we hem i gat raet blong mekem. Mo tu, ol Kristin oli no mas ting se oli gat raet blong mekem samting we Tok blong God i putum tabu long hem. (Rom 15⁠:1; 2 Pita 2:​1, 19) Lav we yumi gat long God i mas pulum yumi blong mekem tingting blong yumi i laenap wetem tingting blong God. Nao bambae yumi joengud oltaem wetem ol Kristin brata sista blong yumi.​—⁠Hibrus 5:​14.

[Futnot]