Wan Kwestin

?Wetaem i stret blong wan Kristin woman i kavremap hed blong hem?

Aposol Pol i talem se: “Sipos wan woman i prea long fes blong ol man, no i talemaot tok we God i givim long hem, be i no kavremap hed blong hem, fasin ya bambae i mekem sem long man blong hem.” ?From wanem fasin ya i wan sem? From rul we God i putumap se: “Man, hem i hed blong woman blong hem.” Man nao i mas prea mo i mas prij insaed long Kristin kongregesen. Taswe, taem wan Kristin woman i mas tekem ples blong man blong hem no wan man we i baptaes finis, blong mekem wan wok we i joen wetem wosip, woman ya i mas kavremap hed blong hem.—1 Korin 11:3-10.

Samtaem wan Kristin woman i mas kavremap hed blong hem insaed long famle blong hem. Eksampol, taem wan famle i joen tugeta blong stadi long Baebol no blong kakae, i wok blong hasban blong tijim famle no mekem prea blong olgeta. Be sipos hasban ya i no bilif, ale maet waef blong hem i mekem wok ya blong tij mo prea. Taswe, taem Kristin sista ya i toktok wetem bigfala voes blong mekem prea blong hem wan mo blong ol narafala, no taem hem i stadi Baebol wetem ol pikinini mo hasban blong hem i stap, i stret we Kristin sista ya i kavremap hed blong hem. Sipos hasban blong hem i no stap, hem i no nid blong kavremap hed blong hem from we God i givim raet long hem blong tijim ol pikinini.—Ol Proveb 1:8; 6:20.

?Olsem wanem nao sipos i gat wan yang boe long famle we i givim laef blong hem i go long Jeova God mo i baptaes? Pikinini boe ya i wan memba blong kongregesen, taswe ol man long kongregesen nao oli mas tijim hem. (1 Timoti 2:12) Sipos papa blong hem i bilif, hem nao i mas tijim boe blong hem. Be sipos papa i no stap mo mama i mas stadi long Baebol wetem yangfala boe ya we i baptaes finis mo ol narafala pikinini, ale, mama blong hem i mas kavremap hed blong hem. Long saed blong prea, mama nomo bambae i mekem disisen sipos hem i wantem se pikinini boe ya we i baptaes finis, i mekem prea taem oli stadi no kakae tugeta. Maet mama i harem se boe ya i no naf yet, mo i moa gud sipos hem i mekem prea. Sipos hem i jusum blong prea, nao hem i mas kavremap hed blong hem.

Samtaem, ol Kristin woman oli mas kavremap hed blong olgeta taem oli joen long wok blong kongregesen. Eksampol, long miting blong prij we oli holem long wik, maet i gat sam Kristin sista nomo i stap, no maet i gat ol man i stap be oli no baptaes yet. No sam narafala taem bakegen maet i no gat wan brata, no man we i baptaes, i stap long miting blong kongregesen. Sipos wan sista i mas mekem wok blong wan brata long miting blong kongregesen no long miting blong prij, hem i mas kavremap hed blong hem.

?Ol Kristin woman oli mas kavremap hed blong olgeta taem oli tanem tok no oli yusum saen lanwis blong transletem tok blong wan brata, no taem oli ridim ol haf long wan buk we i tokbaot Baebol long wan miting blong kongregesen? Oli no nidim blong mekem olsem from we ol sista we oli mekem wok ya oli no stap lidim no tijim kongregesen. Long sem fasin, oli no nid blong kavremap hed blong olgeta taem oli mekem wan pleplei, talem ekspiriens, no givim tok long Tiokratik Ministri Skul.

Wok blong tij insaed long kongregesen, hem i wok blong ol man nomo we oli baptaes. Be ol man wetem ol woman tu oli mas prij mo oli mas tij afsaed long kongregesen. (Matiu 24:14; 28:19, 20) Taswe, taem wan Kristin woman i go prij wetem wan man we i Witnes blong Jeova, mo woman ya i storian long Tok blong God wetem ol man we oli no bilif, hem i no nid blong kavremap hed blong hem.

Be i defren sipos sista ya i gat wan stadi we hem i mekem oltaem long wan haos, nao hem i tekem wan man we i baptaes i go mekem stadi ya wetem hem. Stadi i wan plan we oli mekemrere finis blong tijim man, mo hemia we i mekem stadi ya hem i gat wok blong lidim stadi ya. From samting ya stadi ya i olsem wan narafala haf blong ol wok long kongregesen. Sipos wan sista i stap lidim stadi ya fored long wan brata, hem i mas kavremap hed blong hem. Be oltaem, brata nomo i mas prea. Wan sista bambae i neva mekem wan prea sipos wan brata i stap. Maet wan spesel risen nomo i save blokem brata blong hem i no prea, eksampol, sipos hem i lusum voes blong hem.

Samtaem, wan Kristin sista i save go mekem wan stadi wetem wan man we i talemaot Kingdom finis be i no baptaes yet. Sipos sista i wantem, hem i save askem long man ya blong lidim stadi. Be from we man ya i no save prea long Jeova long ples blong sista ya we i baptaes finis, i stret we sista i mekem prea long stadi ya. Sipos sista i mekem stadi mo i prea long taem olsem, hem i mas kavremap hed blong hem. Nating se man ya i no baptaes yet, be long ae blong ol narafala man hem i joen wetem kongregesen from we hem i stap prij finis.

Aposol Pol i raetem se: “I stret nomo blong woman i kavremap hed blong hem blong soemaot long ol enjel, we hem i stap long han blong man blong hem.” Yes, ol Kristin sista oli gat wan nambawan janis blong soem gudfala eksampol long ol milian enjel we oli gohed blong stap tru long Jeova mo stap aninit long paoa blong hem. !I stret nomo we ol woman we oli laekem God oli tinghae long fasin blong kavremap hed blong olgeta long prapa taem blong hem!

[Tok blong pija long pej 26]

Woman we i kavremap hed blong hem i soem respek long man we i hed blong hem