Ol Man Oli Save Laef Olwe From We Jisas i Laef Bakegen

JESUS i laef bakegen long ded. Hemia i no wan samting blong bifo nomo, be hem i gat bigfala mining tu long yumi tede. Aposol Pol i soemaot samting ya taem hem i talem se: “Kraes ya, God i mekem hem i laef bakegen finis. Long olgeta we oli ded finis, hem i faswan we i laef bakegen. Hem i olsem fas kakae ya we i rere long garen. Ded i wan samting we wan man nomo i tekem i kamtru long wol, mo long sem fasin, fasin ya we man i laef bakegen long ded, hem tu i wan samting we wan man nomo i tekem i kamtru. Olgeta man we oli joen long Adam oli save ded, mo long sem fasin, olgeta man we oli joen long Kraes oli save laef bakegen long ded.”—1 Korin 15:20-22.

Jisas i laef bakegen long Nisan 16, long yia 33. Long Nisan 16, ol man Jiu oli stap givim ol fas kakae blong garen i go long Jehova God, long yad blong haos tempol long Jerusalem. Taem Pol i talem se Jisas i olsem fas kakae blong garen, hem i wantem soemaot se bambae i gat sam narafala man tu we bambae oli laef bakegen.

Long nekis tok blong Pol, hem i eksplenem samting we i kamaot from we Jisas i laef bakegen. Hem i talem se: “Ded i wan samting we wan man nomo i tekem i kamtru long wol, mo long sem fasin, fasin ya we man i laef bakegen long ded, hem tu i wan samting we wan man nomo i tekem i kamtru.” Adam i pasem sin long yumi evriwan, taswe yumi stap ded. Be taem Jisas i givim laef blong hem we i stret gud olgeta olsem wan sakrefaes, hem i openem rod blong ol man oli save laef bakegen, mo oli kam fri long sin mo ded. Blong mekem poen ya i kliagud, Pol i talem long Rom 6:23 se: “Ol man we oli stap mekem sin, pei blong olgeta, bambae oli ded from, be ol man we oli joen long Jisas Kraes, Masta blong yumi, presen we God i stap givim i go nomo long olgeta, hemia laef ya we i no save finis.”

?Taem Jisas i ded mo i laef bakegen, samting ya i mekem wanem long yumi? Jisas i eksplenem se: “Mi mi Pikinini blong Man, bambae ol man oli leftemap mi, blong olgeta we oli bilif long mi bambae oli save kasem laef we i no save finis. God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.”—Jon 3:14-16.

!Yu traem tingbaot se bambae yumi laef olwe, yumi no moa harem nogud, yumi no moa safa mo yumi no moa krae! (Revelesen 21:3, 4) !Hemia wan nambawan blesing! Wan man blong stadi i talem se: “Taem yu luk ol gref, yu tingbaot se laef i sot, be taem yu tingbaot laef bakegen, yu trastem se ded i blong sot taem nomo.” Yes, ol man oli save laef olwe from we Jisas i laef bakegen.