Tok Blong Jeova i Wan Samting We i Laef

Ol Bigfala Poen Long Ol Leta Long Ol Man Korin

APOSOL POL i wari bigwan long bilif blong ol Kristin long kongregesen blong Korin. Hem i harem nius se ol brata long Korin oli stap raorao from we oli gat ol defdefren tingting. Oli letem man we i gohed blong mekem rabis fasin long saed blong seks i stap long kongregesen. Kongregesen tu i bin raetem leta i go long Pol blong askem sam samting long hem. Taswe, samwe long yia 55 K.T.,a taem Pol i stap long Efesas long namba tri misinari trip blong hem, hem i raetem faswan leta blong hem i go long ol Kristin long Korin.

I luk olsem se hem i raetem seken leta blong hem sam manis nomo afta long faswan. Long seken leta ya, Pol i gohed long toktok blong hem we hem i bin raetem long faswan leta. Plante samting we oli hapen insaed mo afsaed long kongregesen blong Korin long taem blong faswan handred yia, i sem mak long ol samting we oli hapen long taem blong yumi. From samting ya, wanem we Pol i raetem long ol leta we i go long ol Kristin long Korin, i save givhan bigwan long yumi tu.—Hib. 4:12.

‘LUKAOT GUD, STANAP STRONG, MO KASEM PAOA’

(1 Kor. 1:1–16:24)

Pol i givim advaes ya se: “Tingting blong yufala i mas kam wan nomo.” (1 Kor. 1:10) Ol Kristin fasin oli stanap long “Jisas Kraes, we hem i olsem fandesen” blong olgeta “mo i no gat narafala fandesen bakegen.” (1 Kor. 3:11-13) Pol i tokbaot wan man long kongregesen we i stap mekem rabis fasin long saed blong seks, i se: “Man we i stap mekem sin oltaem, yufala i mas putumaot hem, blong hem i no moa save stap wetem yufala.” (1 Kor. 5:13) Hem i talem se: “Bodi blong yumi i no blong yumi ronem woman, i blong yumi ona long Masta blong yumi.”—1 Kor. 6:13.

Blong Pol i ansa ‘long ol kwestin we olgeta oli raetem’ i go long hem, hem i givim ol gudfala advaes long saed blong mared mo man we i no mared. (1 Kor. 7:1) Hem i tokbaot ol rul blong man i hed long famle mo Kristin kongregesen, nid blong mekem ol Kristin miting long fasin we i gat oda, mo olsem wanem yumi save sua fulwan long laef bakegen. Ale biaen, Pol i givim advaes ya se: “Yufala i mas lukaot gud, yufala i no slip, mo yufala i mas stanap strong long bilif blong yufala. Yufala i . . . [“mas gohed olsem strong man mo kasem paoa,” NW].”—1 Kor. 16:13.

Ansa Blong Sam Kwestin Long Saed Blong Baebol:

1:21—?I tru se Jeova i yusum toktok we i “krangke” blong sevem olgeta we oli bilif long hem? No, hem i no mekem olsem. Be, from we “ol man oli no save yusum waes blong olgeta nomo blong save [God],” long tingting blong olgeta, rod we God i yusum blong sevem ol man i krangke.—Jon 17:25.

5:5 (NW)—?I minim wanem blong “putum [rabis man] long han blong Setan, blong spolem sin, mo blong mekem se spirit i sef?” Taem wan man i gohed blong mekem sin mo i no tanem tingting blong hem, kongregesen i putumaot hem. Long taem ya, hem i kam haf blong rabis wol blong Setan bakegen. (1 Jon 5:19) Taswe, Baebol i talem se i olsem we kongregesen i putum man ya long han blong Setan. Kongregesen i karemaot mo i stopem nogud paoa we man ya i gat long medel blong ol man blong God taem kongregesen i putumaot hem. Ale, samting ya i protektem spirit no gudfala tingting we i stap long kongregesen.—2 Tim. 4:22.

7:33, 34—?Wanem “ol bisnes blong wol” we ol mared man mo woman oli stap tingbaot? Pol i stap tokbaot ol samting we ol mared Kristin oli mas tingbaot evri dei, ol samting olsem kakae, klos, mo ples blong slip. Be long ples ya Pol i no minim ol nogud samting blong wol ya we ol Kristin oli no mas laekem nating.—1 Jon 2:15-17.

11:26—?Yumi mas mekem lafet blong ded blong Jisas hamas taem long wan yia? ?Mo yumi mekem “gogo” kasem wetaem? Pol i no stap talem se yumi mas mekem lafet blong ded blong Jisas plante taem long wan yia. Nogat. Hem i stap talem se evri “taem” ol Kristin we tabu spirit i makemaot olgeta, oli kakae bred mo dring waen blong Memoriol, oli stap “soemaot ded blong Masta blong yumi.” Oli mekem samting ya wan taem nomo evri yia, long Nisan 14. Oli mekem lafet ya “gogo [Jisas] bambae i kambak bakegen,” hemia i minim taem ya we hem i welkamem ol tabu Kristin we oli laef bakegen long heven.—1 Tes. 4:14-17.

13:13—?From wanem lav i big moa, bitim bilif mo fasin ya blong putum tingting blong yumi i stap strong long ol promes blong God? “Olgeta samting ya we yumi stap putum tingting blong yumi i strong long hem” mo we yumi sua se “oli tru,” taem oli kamtru, yumi no moa nidim blong bilif tumas long ol samting ya, mo blong putum tingting blong yumi i strong long olgeta, from we oli kamtru finis. (Hib. 11:1) Lav i blong stap olwe, taswe hem i big moa, bitim we yumi bilif mo putum tingting blong yumi i strong long wan promes.

15:29—?I stret we samfala oli “tekem baptaes long bihaf blong ol dedman”? Translesen ya i rong. Pol i no stap talem se ol man we oli laef oli mas tekem baptaes long bihaf blong ol dedman we oli no bin baptaes. Nogat. Long vas ya, Pol i stap tokbaot wan kaen baptaes ya we i stat taem tabu spirit i makemaot wan Kristin, nao hem i gohed blong stap tru long God long ful laef blong hem gogo hem i ded, mo biaen hem i laef bakegen olsem wan spirit man. Hemia nao from wanem long New World Translation, vas ya i talem se oli “tekem baptaes blong kam ol dedman.”

Ol Lesen Blong Yumi:

1:26-31; 3:3-9; 4:7. Taem yumi gat tingting daon mo yumi tokflas from samting we Jeova i mekem, be i no samting we yumi mekem, hemia i givhan long kongregesen blong joengud.

2:3-5. Taon ya Korin i wan stamba ples blong bilif mo lanem waes blong ol man Gris. From samting ya, taem Pol i prij long ples ya, maet hem i wari sipos toktok blong hem i save pulum ol man Korin blong oli bilif, no nogat. Nating se i olsem, Pol i no letem fraet mo eni slak fasin we hem i gat i blokem hem, blong hem i no gohed blong mekem wok we God i givim long hem. Long sem fasin, yumi tu yumi no mas letem eni samting we i had, no eni samting we yumi no lan long hem, i blokem yumi, blong yumi no gohed blong talemaot gud nius blong Kingdom blong God. Olsem Pol, yumi save lukluk i go long Jeova blong i halpem yumi.

2:16. Yumi gat “tingting blong Kraes,” hemia i min se yumi save fasin blong hem blong tingting mo from wanem hem i tingting olsem, yumi tingting olsem hem, yumi kasemsave gud long ol fasin blong hem mo yumi folem eksampol blong hem. (1 Pita 2:21; 4:1) !Yes, i impoten tumas we yumi stadigud long laef blong Jisas mo wok we hem i mekem!

3:10-15; 4:17. Yumi mas skelem fasin blong yumi blong tijim ol man mo blong pulum olgeta oli kam disaepol, ale yumi mas traehad blong kam gud moa long wok ya. (Mat. 28:19, 20) Sipos yumi no gat gudhan blong tijim narafala, maet studen blong yumi i no naf blong stanap strong taem samting i kam traem bilif blong hem. Ale, samting ya i save mekem yumi harem nogud tumas from we yumi lusum wan samting we i sas tumas. Bambae God i sevem yumi, be bambae yumi harem olsem wan man we “faea i bonem haos blong hem wetem olting blong hem, hem nomo i laef.”

6:18. Blong “no moa mekem fasin nogud wetem woman,” i min se yumi no mekem ol nogud fasin we long lanwis blong Gris oli kolem por·neiʹa. Be i no hemia nomo, i minim tu se yumi mas stap longwe long ol doti pija, doti fasin mo doti tingting long saed blong seks, yumi no pleplei wetem filing blong narafala mo mekem eni samting we i save pulum yumi blong mekem rabis fasin long saed blong seks.—Mat. 5:28; Jem. 3:17.

7:29. Man mo woman we oli mared oli mas lukaot blong no putum tingting blong olgeta i stap nomo long mared blong olgeta, ale oli putum ol wok blong Kingdom long seken ples long laef blong olgeta.

10:8-11. Jeova i no glad nating taem ol man Isrel bifo oli tok smosmol agens long Moses mo Eron. Taswe, yumi waes sipos yumi blokem fasin ya blong tok smosmol agens long narafala.

16:2. Sipos yumi plan gud mo yumi makem wan stret taem blong givim mane blong givhan long wok blong Kingdom, bambae yumi sua blong gat samting blong givim oltaem.

“GOHED BLONG STRETEM FASIN BLONG YUFALA”

(2 Kor. 1:1–13:14)

Pol i talem long ol Kristin long Korin se taem oli stretem wan man we i mekem nogud fasin, nao man ya i tanem tingting blong hem, olgeta oli mas ‘fogivim hem mo leftemap tingting’ blong hem. Faswan leta blong Pol i mekem ol Kristin long Korin oli harem nogud. Be nating se i olsem, Pol i talem se hem i glad from we taem ‘oli harem nogud, oli tanem tingting blong olgeta.’—2 Kor. 2:6, 7; 7:8, 9.

Ol Kristin long Korin oli “rij tumas long olgeta samting” we oli gat, taswe Pol i leftemap tingting blong olgeta blong oli ‘glad blong givhan bigwan moa’ long narafala. Afta we Pol i givim ansa long ol man we oli agensem hem, hem i givim advaes long olgeta Kristin evriwan. Hemia laswan taem blong hem blong givim advaes long olgeta, hem i se: “Yufala i mas traehad blong kasem fasin we i stret gud olgeta [“Gohed blong stretem fasin blong yufala,” NW]. . . . Yufala evriwan i mas gat wan tingting nomo, mo yufala i mas gat pis wetem yufala.”—2 Kor. 8:7; 13:11.

Ansa Blong Sam Kwestin Long Saed Blong Baebol:

2:15, 16—?From wanem yumi olsem “smok blong insens ya we i gat gudfala smel, we Kraes i stap bonem”? Hemia from we yumi folem ol tok blong Baebol mo yumi talemaot wanem we Baebol i talem. Maet long tingting blong ol rabis man, laef ya i olsem wan “smel” we i nogud tumas. Be long Jeova mo ol man we hat blong olgeta i stret, hem i olsem wan “smel” we i gud tumas.

5:16—?I minim wanem se ol tabu Kristin oli “no moa save makem ol man long fasin blong man nomo”? Oli no lukluk narafala wetem tingting blong man, hemia i min se oli no mekem i gud moa long narafala from we hem i rijman, no from kala blong skin blong hem, no from laen no kantri blong hem. Long tingting blong olgeta, samting we i impoten, hemia fasin fren long saed blong spirit we oli gat wetem ol Kristin brata sista.

11:1, 16; 12:11—?I tru se Pol i mekem fasin blong man we i krangke long ol Kristin long Korin? No, hem i no mekem olsem. Maet samfala oli ting se hem i tok flas mo i mekem fasin blong krangke man, be hemia from we olgeta nomo oli pulum hem blong toktok olsem, blong pruvum se hem i wan trufala aposol.

12:1-4—?Wanem Paradaes ya we Pol i luk long wan vison? I luk olsem se hemia paradaes long saed blong spirit, we long taem blong “en blong wol ya,” Kristin kongregesen i haremgud blong stap long hem.—Dan. 12:4.

Ol Lesen Blong Yumi:

3:5. Tingting we i stap long vas ya i givhan long yumi blong luksave se wetem Tok blong Jeova, tabu spirit blong hem mo ogenaesesen blong hem long wol, Jeova i mekem se yumi naf blong joen long wok blong prij. (Jon 16:7; 2 Tim. 3:16, 17) Yumi mas stadigud long Baebol mo ol buk mo magasin we oli stanap long Baebol, yumi mas gohed blong prea oltaem from tabu spirit, mo joen oltaem long ol Kristin miting mo tekpat long olgeta.—Sam 1:1-3; Luk 11:10-13; Hib. 10:24, 25.

4:16. “Evri dei” Jeova i stap “mekem tingting blong [yumi] i niuwan bakegen.” From samting ya, i gud we oltaem yumi yusum ol samting we Jeova i givim long yumi, mo yumi no letem wan dei i pas we yumi no mekem sam samting blong kam klosap moa long Jeova.

4:17, 18. Sipos yumi tingbaot we “ol trabol we yumi kasem oli smol nomo, mo oli no save stap longtaem,” samting ya i save givhan long yumi blong stap tru long Jeova taem yumi kasem traem.

5:1-5. !Pol i talem ol naesfala toktok long saed blong filing we ol tabu Kristin oli gat long hop blong olgeta blong laef long heven!

10:13 (NW). Sipos ol elda oli no mekem sam spesel plan blong yumi go prij long wan ples we i nidim moa man blong prij, yumi mas prij long teritori blong kongregesen blong yumi nomo.

13:5 (NW). Blong ‘jekemap sipos yumi holem yet fasin blong bilif,’ yumi mas skelem sipos ol fasin blong yumi oli laenap wetem wanem we yumi stap lanem long Baebol. Blong ‘pruvum se yumi wanem kaen man’ yumi mas skelem fasin fren blong yumi wetem Jeova, blong luk se fasin ya i strong olsem wanem, mo blong luk sipos yumi nafgud blong “jusumaot wanem fasin i gud mo wanem fasin i nogud,” mo sipos yumi stap mekem plante defdefren kaen wok blong soemaot bilif blong yumi. (Hib. 5:14; Jem. 1:22-25) Sipos yumi folem nambawan advaes blong Pol, yumi save gohed blong wokbaot long rod blong trutok.

[Futnot]

[Tok blong pija long pej 10]

?Wanem mining blong toktok ya “taem we yufala i kakae bred ya, mo yufala i dring long kap ya”?—1 Kor. 11:26