“Ol Kil We Wan Fren i Givim”

LONG faswan handred yia, Aposol Pol i luksave se hem i mas stretem sam Kristin blong Galesia. Blong meksua se oli no harem nogud long tok blong hem, hem i askem se: “?Be olsem wanem? ?Naoia, from we mi mi stap tok tru long yufala, ating mi kam olsem badfren blong yufala?”—Galesia 4:16.

Pol i no kam enemi blong olgeta taem hem i “tok tru” long olgeta. Hem i mekem samting we i laenap wetem rul ya blong Baebol se: “Ol kil we wan fren i givim oli gud tumas.” (Ol Proveb 27:6, King James Version) Pol i save se samfala we oli mekem i rong, bambae oli harem nogud from toktok blong hem. Be tu, hem i save se sipos hem i no givim advaes blong stretem olgeta, i olsem we hem i blokem rod blong Jeova blong soem lav long ol man ya. (Hibrus 12:5-7) Taswe, Pol i olsem wan fren we i stap tru mo i kea gud long kongregesen. Hem i no fraet blong givim advaes long olgeta.

Tede, ol Witnes blong Jeova oli stap “go long ol man long olgeta ples long wol, . . . mo oli mas tijim olgeta blong oli folem olgeta tok ya we Jisas Kraes i givim finis long olgeta.” Taem ol trufala Kristin oli stap mekem wok ya, oli no fraet blong talemaot ol trutok blong Baebol we oli soemaot klia ol rong tijing mo ol fasin we i no laenap wetem ol tijing blong Jisas. (Matiu 15:9; 23:9; 28:19, 20, NW; 1 Korin 6:9, 10) Wok we oli stap mekem blong talemaot ol trutok ya i soem se oli wantem frengud wetem narafala, be i no blong kam enemi wetem olgeta.

God i givim waes long man blong raetem Ol Sam, nao hem i talem se: “Sipos wan stret man i kilim mi, fasin ya i kaen gud long mi. Mo sipos hem i tok strong blong stretem mi, fasin ya i gud tumas olsem oel long hed, we bambae hed blong mi i no save blokem.”—Ol Sam 141:5, NW.