Japta Twanti Wan

Stamba Tingting Blong Jeova i Kamtru Long Nambawan Fasin

1, 2. (a) ?Wanem stamba tingting blong Jeova long saed blong ol enjel mo ol man? (b) ?Hu olgeta we oli stap insaed long famle ya we i joengud blong wosipim God?

STAMBA tingting blong Jeova we i gat lav, hemia se, olgeta man wetem ol enjel tu, oli joengud tugeta blong wosipim hem nomo we i trufala God. Hem i wantem tu we, olgeta evriwan oli harem gud long fasin fri we i kamaot from we oli ol pikinini blong God. Ol man we oli lavem stret fasin oli wantem samting ya tumas.

² Jeova i stat mekem stamba tingting ya blong hem i kamtru taem hem i wokem olgeta laef samting. Faswan samting we hem i wokem, hemia Pikinini blong hem, we naoia hem “i olsem laet ya we i saenaot i kam long yumi. Hem i stret pija blong God, we i stap soemaot prapa fasin blong hem.” (Hibrus 1:1-3) Pikinini ya i spesel, from we God hem wan nomo i wokem hem. Biaen, from Pikinini ya nao, olgeta narafala samting oli gat laef: fastaem, ol enjel long heven, mo biaen, ol man long wol ya. ( Job 38:7; Luk 3:38) Olgeta ya evriwan oli mekemap wan bigfala famle we i joen, nomata we sam i stap long heven mo sam i stap long wol. Long lukluk blong olgeta ya, Jeova i God, i Haefala Rula Blong heven Mo Wol, mo i Papa blong olgeta.

 3. (a) ?Wanem samting we yumi kasem from faswan papa mama blong yumi? (b) ?Jeova i mekem wanem blong givhan long ol pikinini blong Adam?

³ Taem faswan papa mama blong yumi i jus blong mekem sin mo God i panisim tufala blong tufala i ded, tufala i no moa save stap long Iden mo tufala i no moa stap olsem fren blong God. Tufala i no moa pat blong famle blong God. ( Jenesis 3:22-24; Dutronome 32:4, 5) Yumi evriwan i pikinini blong tufala ya, taswe yumi bon wetem sin. Be Jeova i save se sam pikinini blong Adam mo Iv bambae oli laekem stret fasin. From samting ya, Jeova i wokem rod blong mekem we olgeta ya oli save kam ‘fri olgeta, olsem ol pikinini blong God.’—Rom 8:20, 21.

Isrel i Lusum Gudnem We Hem i Gat Fored Long God

 4. ?Wanem spesel janis we Jeova i givim long ol man Isrel bifo?

⁴ Samwe 2,500 yia afta we Adam i laef long wol ya, Jeova i givim spesel janis long sam man blong oli kam ol gudfala fren blong Hem. Hem i jusum ol man Isrel blong oli kam ol pipol blong hem mo i givim Loa blong hem long olgeta. ( Jenesis 12:1, 2) Hem i mekem olgeta oli kam wan bigfala nesen mo i yusum olgeta blong mekem stamba tingting blong hem i kamtru. (Dutronome 14:1, 2; Aesea 43:1) Be, oli stap yet long paoa blong sin mo ded, mo from samting ya oli no fri fulwan olsem Adam mo Iv fastaem.

 5. ?Olsem wanem nesen blong Isrel i lusum spesel janis we hem i bin gat blong fren wetem God?

⁵ Nating se i olsem, ol man Isrel oli spesel long ae blong God. Mo tu, oli mas respektem Jeova olsem Papa blong olgeta mo wok folem stamba tingting blong hem. Jisas i soemaot klia se hemia wan impoten samting we oli mas mekem. (Matiu 5:43-48) Be, nesen blong Isrel i no mekem olsem. Nating se ol man Jiu ya oli talem se ‘God nomo i Papa blong olgeta,’ be Jisas i talem se ol wok blong olgeta mo tingting we oli folem, i soem se oli giaman nomo. ( Jon 8:41, 44, 47) Long yia 33 K.T., God i finisim Loa, mo Isrel i lusum spesel janis we hem i bin gat blong fren wetem God. ?Be hemia i min se ol man bambae oli neva save fren wetem God samtaem?

Hivimap “Olgeta Samting Long Heven”

 6. ?Wanem bigfala tingting biaen long “plan” ya we Pol i tokbaot long Efesas 1:9, 10?

⁶ Aposol Pol i soemaot se sam man bambae oli gat wan spesel fasin fren wetem God. Eksampol, tingbaot plan we Jeova i wokem blong mekem se olgeta man we oli soem bilif long hem oli save kam memba blong famle blong hem. Pol i raetem se: “[God] i harem gud blong soemaot long yumi, plan blong hem we fastaem i samting blong haed. Hem i tingbaot finis we bambae hem i wokem olgeta samting blong plan ya blong hem long Kraes. Mo long stret taem blong hem, bambae hem i mekem plan ya i kamtru. Long plan ya, hem i wantem se olgeta samting we hem i mekem, bambae oli kam joen wanples. Hem i wantem we olgeta samting long heven mo long wol bambae oli kam joen long Kraes.” (Efesas 1:9, 10) Jisas Kraes nao i bigfala man insaed long “plan” ya. From Jisas, ol man oli save kam olsem stret man fored long God. Smol namba blong man oli gat hop blong go long heven. Be bigfala namba blong man bambae oli laef blong olwe long wol ya.

 7. ?Hu ya “olgeta samting long heven”?

⁷ Long Pentekos 33 K.T., God i stat fastaem blong hivimap “olgeta samting long heven,” hemia olgeta man we bambae oli joen wetem Kraes blong rul long Kingdom blong heven. Ol man ya oli soemaot bilif long sakrefaes blong Kraes, taswe oli olsem stret man finis long fes blong God. (Rom 5:1, 2) Taem i pas, nao ol man Jiu mo ol man blong ol narafala kantri tugeta oli mekemap grup ya, mo namba blong “olgeta samting long heven” i kasem 144,000. (Galesia 3:26-29; Revelesen 14:1) Wan smol haf nomo blong grup ya, i stap yet long wol.

Hivimap ‘Olgeta Samting Long Wol’

 8. ?Hu ya ‘olgeta samting long wol,’ mo oli olsem wanem long ae blong Jeova?

⁸ Semfala plan ya blong God i stap hivimap ‘olgeta samting long wol’ tu. God i stap hivimap plante milian man naoia blong oli kasem laef we i no save finis long wol ya. Olgeta ya oli joen wetem smol grup blong ol man ya we bambae oli go long Kingdom, nao olgeta evriwan oli leftemap nem blong Jeova mo oli wosipim hem. (Aesea 2:2, 3; Sefanaea 3:9) Bigfala hip blong ol man ya oli singaot Jeova se “Papa” from we oli luksave hem olsem stamba blong laef. Mo God i agri long olgeta from we oli soemaot bilif long blad blong Kraes. (Revelesen 7:9, 14) Be from we olgeta ya oli sin man yet, long fiuja nomo, bambae oli jes kam ol pikinini blong God fulwan.

 9. ?Wanem promes we Rom 8:21 i mekem long ol man?

⁹ Olgeta we oli gat hop blong laef long wol, oli stap wet long taem ya we olgeta man bambae “oli fri olgeta, we bambae oli no moa mekem sin.” (Rom 8:21) Bambae oli fri olsem afta we Kraes mo ol ami blong hem long heven oli mekem faet blong Amagedon we bambae i finisim taem blong bigfala trabol. Long taem ya, rabis wol blong Setan bambae i lus olgeta, mo ol man we oli laef bambae oli kasem plante blesing long Taosen Yia Rul blong Kraes long Kingdom blong hem.—Revelesen 19:17-21; 20:6.

10. ?Wanem singsing blong presem Jeova we ol man blong Hem bambae oli singim?

¹⁰ Ol man blong Jeova long wol ya bambae oli joen tugeta blong talemaot bigbigfala glad we oli gat, olsem olgeta long heven we oli singaot se: “Hae God, Masta blong mifala, yu yu gat olgeta paoa. Ol wok blong yu oli bigwan olgeta, mo oli gudfala tumas. Yu yu King blong olgeta kantri, mo ol fasin blong yu oli stret gud, oli tru. Hae God. ?Hu man i no save ona long yu? ?Hu man i no save leftemap nem blong yu? Yu nomo yu tabu. Bambae ol man blong olgeta kantri oli save kam blong mekem wosip long yu, from we yu yu soemaot finis ol stret fasin blong yu.” (Revelesen 15:3, 4) Yes, olgeta man blong Jeova bambae oli joen tugeta blong wosipim trufala God. Ol dedman tu, bambae oli laef bakegen mo bambae oli kasem janis ya blong joen wetem olgeta we oli stap presem Jeova.—Ol Wok 24:15.

Wan Nambawan Taem Blong Fri

11. ?Ol man we oli laef tru long bigfala trabol, bambae oli harem gud long wanem nambawan fasin fri?

¹¹ Afta long bigfala trabol, we faet blong Amagedon bambae i makem en blong hem, bambae i no moa gat rabis fasin long wol ya, mo Devel Setan bambae i no moa stap olsem “god blong wol ya.” Ol man we oli wosipim Jeova bambae oli no moa nid blong faet agensem rabis paoa blong Setan. (2 Korin 4:4; Revelesen 20:1, 2) Bambae i no moa gat ol giaman skul we oli sakem doti long nem blong God mo we oli mekem ol man oli seraot. Bambae ol man blong God oli no moa safa mo harem nogud long han blong ol gavman blong wol ya. !Tru ya, hemia wan nambawan taem blong fri!

12. ?Olsem wanem olgeta man bambae oli fri long sin mo ol nogud frut we sin i karem?

¹² Jisas Kraes, “smol sipsip blong God, we hem bambae i tekemaot sin blong olgeta man long wol,” i yusum paoa blong sakrefaes blong hem blong tekemaot sin blong ol man. ( Jon 1:29) Taem Jisas i stap long wol ya hem i fogivim sin blong sam man, mo blong pruvum samting ya, hem i hilim ol man ya long sik blong olgeta. (Matiu 9:1-7; 15:30, 31) Long sem fasin, Jisas Kraes, olsem King long Kingdom Blong God long heven, bambae i hilim ol blaen man wetem ol man we oli no save toktok mo ol man we sora blong olgeta i fas, bambae hem i hilim ol man we wan haf blong bodi blong olgeta i nogud, mo ol man we oli sik long tingting blong olgeta, mo ol narafala sikman tu. (Revelesen 21:3, 4) Olgeta man we oli obei bambae oli no moa “slef blong fasin blong sin” mekem se olgeta tingting mo fasin blong olgeta bambae oli gud long fes blong God mo bambae oli harem gud long olgeta wan. (Rom 7:21-23) Long en blong Wan Taosen Yia, olgeta man bambae oli stret gud olgeta, nao bambae oli rili ‘tekem fasin blong God.’—Jenesis 1:26.

13. ?Kraes bambae i mekem wanem long en blong Wan Taosen Yia Rul, mo wanem frut bambae i kamaot from?

¹³ God i givim paoa long Jisas Kraes blong mekem olgeta man oli stretgud bakegen. Nao taem hem i mekem wok ya finis, bambae hem i givimbak paoa blong rul i go long Papa blong hem: “Kraes bambae i spolem ol jif blong ol devel we oli stap olbaot long wol ya, mo ol gavman blong olgeta, wetem olgeta we oli gat paoa, nao bambae oli lus olgeta, mo bambae hem i finis long king, i givimbak olgeta paoa blong hem long God, Papa blong hem. . . . Kraes i mas rul fastaem, gogo God i winim olgeta enemi blong Kraes, i putum olgeta oli stap daon, aninit long leg blong Kraes.” (1 Korin 15:24, 25) Wan Taosen Yia Rul blong Kingdom bambae i kasem fulwan mak we God i wantem. Taswe, biaen bambae i no moa nidim gavman ya blong rul bitwin Jeova mo ol man. Mo from we bambae i no moa gat sin mo ded, mo Kraes i pemaot ol man long sin finis, wok blong Jisas olsem man blong pemaot yumi bambae i finis. Baebol i eksplenem se: “Nao biaen, Kraes ya we i Pikinini blong God, hem nomo bambae i putum hem i stap aninit long paoa blong God ya we fastaem i putum olgeta samting oli stap aninit long paoa blong hem. Nao God bambae i holem paoa bakegen, blong i rul long olgeta samting.”—1 Korin 15:28.

14. ?Olgeta man we oli kam stretgud olgeta bambae oli pastru long wanem, mo from wanem?

¹⁴ Biaen long samting ya, olgeta man we oli stretgud finis bambae oli kasem janis blong soemaot se oli wantem mekem wok blong trufala God blong olwe. Taswe, bifo we Jeova i tekem olgeta oli kam olsem ol pikinini blong hem, bambae hem i mas letem olgeta oli pastru long wan laswan traem. Setan mo ol nogud enjel blong hem bambae oli aot long kalabus. Samting ya bambae i no save spolem ol man we oli rili lavem Jeova. Be olgeta we oli no stap tru long God mo oli letem Setan mo ol rabis enjel ya oli pulum olgeta blong mekem stronghed, bambae oli go lus blong olwe wetem olgeta ya.—Revelesen 20:7-10.

15. ?Olgeta enjel mo man blong Jeova bambae oli harem gud bakegen long wanem samting?

¹⁵ Olgeta stretfala man ya we oli sapotem hae rul blong God long laswan traem ya bambae Jeova i tekem olgeta oli kam ol pikinini blong hem. Stat long taem ya i go, bambae oli pat blong famle blong God mo bambae oli harem gud fulwan long fasin fri we i blong ol pikinini blong God. Olgeta enjel blong heven mo olgeta man long wol bambae oli joen tugeta bakegen blong wosipim trufala God. !Stamba tingting blong Jeova bambae i jes kamtru long nambawan fasin! ?Yu yu wantem stap long famle ya we i hapi mo we bambae i stap blong olwe? Sipos yes, mifala i leftemap tingting blong yu blong tinghevi long wanem we Baebol i talem long 1 Jon 2:17 se: “Wol ya wetem ol samting we ol man blong hem oli wantem, oli stap lus. Be man we i stap mekem ol samting we God i wantem, hem bambae i no save lus samtaem.”

Tingtingbak

• ?Bifo we Adam mo Iv tufala i agensem God long garen blong Iden, olgeta enjel mo man we oli wosipim Jeova oli joen olsem wanem?

• ?Wanem wok i stap long han blong ol man blong God?

• ?Hu i gat janis yet blong kam olsem pikinini blong God, mo olsem wanem samting ya i laenap wetem stamba tingting blong Jeova blong joenem olgeta man blong wosip long hem nomo?

[Tok blong pija long pej 190]

Ol man we oli gat fasin obei bambae oli harem gud long wan paradaes we i kavremap wol