Yumi Nidim “Olgeta Klos Blong Faet” We God i Givim

21. ?Olsem wanem Pol i soemaot se yumi nidim ol klos blong faet long saed blong spirit?

²¹ Yumi tokbaot finis, sam long ol trik blong Setan mo yumi luk se i impoten we yumi stanap strong taem hem i agensem yumi. Be naoia i gud yumi tokbaot wan narafala samting we i save halpem yumi blong winim faet blong yumi blong holem bilif. Taem aposol Pol i raetem leta i go long ol man Efesas, hem i tokbaot wan impoten samting we i save halpem yumi blong stanap strong agensem ol trik blong Setan. Hem i tokbaot samting ya tu taem, mo hem i talem se samting ya i save halpem yumi blong winim faet blong yumi agensem ol rabis enjel. Pol i raetem se: “Yufala i mas kasem paoa blong God, we i olsem olgeta samting [“klos,” NW ] blong faet we i blong blokem ara. Nao taem Setan i stap wokem ol giaman trik blong hem, be bambae yufala i save stanap strong. . . . Yufala i mas kasem paoa blong God we i olsem olgeta samting blong faet. Nao taem dei blong faet long Setan i kam, be bambae yufala i save stanap strong. Long fasin ya, bambae yufala i save faet long ol enemi gogo kasem en blong hem, nao biaen, bambae yufala i save stanap strong yet.”​—Efesas 6:​11, 13.

22, 23. (a) ?Wanem ya ol klos blong faet long saed blong spirit? (b) ?Bambae yumi tokbaot wanem long nekis stadi?

²² Yes, yumi mas ‘putum olgeta klos blong faet’ ya we God i givim. Taem Pol i raetem leta ya i go long ol man Efesas, hem i stap long kalabus, mo i gat wan soldia blong Rom we i stap gad long hem. Ating sam samtaem soldia ya i werem fulwan klos blong faet blong hem. Be tabu spirit blong God i pulum Pol blong tokbaot ol narafala klos blong faet, hemia ol klos long saed blong spirit we olgeta man blong Jeova oli nidim tumas.

²³ Klos ya blong faet we God i givim, hem i sam fasin we ol Kristin i mas wokem, mo hem i ol samting long saed blong spirit we Jeova i givim blong halpem yumi. Long nekis stadi bambae yumi tokbaot ol wanwan haf blong klos ya blong faet long saed blong spirit. Samting ya bambae i givhan long yumi blong luksave sipos yumi reregud from faet ya long saed blong spirit. Long semtaem, bambae yumi luk olsem wanem nambawan eksampol blong Jisas Kraes i save halpem yumi blong winim Devel Setan.

Putum ‘Olgeta Klos Blong Faet’ We God i Givim

“Yufala i mas kasem paoa blong God, we i olsem olgeta samting [“klos,” NW ] blong faet we i blong blokem ara. Nao taem Setan i stap wokem ol giaman trik blong hem, be bambae yufala i save stanap strong.”​—EFESAS 6:11.

1, 2. Long prapa tok blong yu, talem ol wanwan haf blong klos blong faet ya we ol Kristin oli mas putum.

LONG faswan handred yia K.T.,a paoa blong gavman blong Rom i kasem fulmak blong hem. Ami blong Rom i bigwan mo i strong taswe Rom i holem plante kantri blong wol long taem ya i stap aninit long rul blong hem. Wan man we i stadi long histri i talem se ami blong Rom hem i “winim moa ples i bitim ol narafala ami longtaem bifo.” Ol soldia long ami blong Rom oli mas folem ol rul oltaem mo oli stap kasem strong trening. Be wan samting we i mekem se ami ya i strong mo i win plante taem hemia gudfala klos blong faet we oli gat. Aposol Pol i yusum klos blong faet blong ol soldia blong Rom olsem wan pijatok blong soemaot ol impoten tul long saed blong spirit we ol Kristin oli nidim blong winim faet agensem Devel Setan.

² Long Efesas 6:​14-17 yumi save ridim ful toktok long saed blong klos blong faet ya long saed blong spirit. Pol i raetem se: “Yufala i mas stanap rere blong faet. Oltaem yufala i mas talem trutok. Fasin ya i olsem strap we yufala i taetem finis long bel blong yufala. Mo yufala i mas holem stret fasin. Hemia i olsem klos blong faet we oli wokem long aean, blong ara i no save kasem [“jes blong,” NW ] yufala. Mo yufala i mas holem fasin ya we yufala i rere blong talemaot gud nius blong pis. Hemia i olsem but blong yufala blong wokbaot. Mo oltaem yufala i mas bilif strong long God. Fasin ya i olsem [“bigfala,” NW ] sil, we yufala i save yusum blong blokem ol ara ya blong Setan, we faea i laet long hem. Mo yufala i mas savegud we God i sevem yufala finis. Hemia i olsem hat blong faet blong yufala. Mo yufala i mas holem ol tok blong God. Tok ya i olsem naef blong faet we Tabu Spirit i givim finis long yufala.” Ol klos blong faet ya we Pol i tokbaot, oli impoten samting long wan soldia blong Rom from we oli save sevem laef blong hem. Nambawan tul we soldia i karem, hemia naef blong faet we hem i yusum blong faet agensem ol enemi blong hem.

 3. ?From wanem yumi mas obei long ol oda blong Jisas Kraes mo folem eksampol blong hem?

³ I tru se ami blong Rom i strong from we hem i gat ol gudfala tul blong faet mo from we hem i kasem nambawan trening, be i no hemia nomo. Ami ya i stap win from we olgeta soldia oli obei mo folem komanda blong olgeta. Long sem fasin, ol Kristin oli mas obei long Jisas Kraes, we Baebol i talem se hem i “komanda blong ol man blong ol narafala kantri.” (Aesea 55:4) Mo tu, hem i “hed blong kongregesen.” (Efesas 5:​23, NW ) Jisas i givim ol oda we yumi mas folem long faet blong yumi long saed blong spirit, mo hem i soem nambawan eksampol tu long saed blong fasin blong putum ol klos ya blong faet long saed blong spirit. (1 Pita 2:21) Ol fasin blong Kraes oli klosap sem mak long ol defdefren haf blong klos ya. Taswe Baebol i givim advaes ya se yumi mas “tekem” semfala tingting ya we Kraes hem i gat, mo yusum tingting ya olsem wan tul blong faet. (1 Pita 4:1) Taswe, taem yumi tokbaot ol wanwan haf blong klos ya blong faet long saed blong spirit, bambae yumi yusum eksampol blong Jisas blong soemaot from wanem klos ya i impoten mo olsem wanem i save halpem yumi.

Protektem Bel, Jes, Mo Leg Blong Yumi

 4. ?Strap i givhan olsem wanem long ol soldia bifo? ?Mo hem i pija blong wanem?

⁴ Trutok i olsem strap we yumi taetem long bel blong yumi. Long taem we ol man oli raetem Baebol, ol soldia oli werem ol bigfala strap we oli wokem long skin blong buluk. Saes blong strap ya i save bigwan olsem 5 sentimita kasem 15 sentimita. Strap we soldia i putum, i blokem bel blong hem, mo i wan gudfala ples blong hangem naef blong hem long hem. Taem wan soldia i putum strap blong hem, samting ya i soem se hem i stap mekemrere blong go faet. Pol i yusum strap blong soldia olsem wan pijatok blong soemaot se trutok blong Baebol i mas lidim laef blong yumi. Olsem strap we yumi taetem i goraon long bel blong yumi, trutok i wan samting we yumi laef wetem evri dei, i min se yumi mekem trutok i wok long laef blong yumi oltaem mo yumi rere eni taem blong toktok blong sapotem trutok. (Ol Sam 43:3; 1 Pita 3:15) Blong mekem olsem yumi mas stadi Baebol oltaem mo tingting dip long ol samting we yumi ridim. Jisas i ‘holem tok blong God oltaem long tingting blong hem.’ (Ol Sam 40:8) Taswe, taem ol man oli askem kwestin blong agensem Jisas, hem i save gud wanem vas blong Baebol we hem i save yusum blong ansa long olgeta.​—Matiu 19:​3-6; 22:​23-32.

 5. Eksplenem olsem wanem ol advaes blong Baebol oli save halpem yumi long taem blong trabol no traem.

⁵ Taem yumi letem trutok blong Baebol i lidim yumi, trutok ya i save blokem yumi long ol rong tingting mo i save halpem yumi blong tekem ol disisen we oli waes. Taem yumi kasem ol traem, ol advaes blong Baebol oli save mekem tingting blong yumi i strong moa blong wantem mekem samting we i stret. Yes, i olsem we yumi luk Jeova we hem i Bigfala Tija blong yumi, mo i olsem we yumi harem hem i stap talem se: “Hemia rod. Yufala i folem.”​—Aesea 30:​20, 21.

 6. ?From wanem yumi mas lukaotgud long hat we i minim ol dip filing mo tingting blong yumi? ?Olsem wanem stretfasin i save lukaot gud long hat ya?

⁶ Stret fasin i olsem klos blong faet we oli wokem long aean blong blokem jes blong yumi. Klos ya blong faet we oli wokem long aean i protektem wan impoten samting we i stap insaed long jes blong soldia​—samting ya hemia hat. Yes, i impoten tumas blong yumi protektem hat blong yumi​—hemia i minim ol dip filing mo tingting blong yumi—​from we i isi nomo blong hem i pulum yumi i go long sin. (Jenesis 8:21) Taswe, yumi mas kasem save ol stretfala rul blong Jeova mo yumi mas lanem blong laekem ol rul ya. (Ol Sam 119:​97, 105) Taem yumi lavem stret fasin bambae yumi sakemaot ol tingting blong wol we oli save pulum yumi blong no akseptem mo blong no folemgud ol advaes mo rul blong Jeova we oli klia. Mo tu, taem yumi lavem samting we i stret mo yumi no laekem nating samting we i rong, yumi no mekem ol fasin mo disisen we oli save spolem laef blong yumi. (Ol Sam 119:​99-101; Amos 5:15) Jisas i soem wan gudfala eksampol long saed ya, from we Baebol i tokbaot hem se: “Yu yu laekem ol fasin we i stret, be ol fasin we i nogud yu agens long olgeta.”​—Hibrus 1:9.b

 7. ?From wanem ol soldia blong Rom oli nidim ol gudfala but? ?Ol but ya oli pija blong wanem?

⁷ Ol but oli olsem fasin ya we yumi rere blong talemaot gud nius blong pis. Ol soldia blong Rom oli nidim ol gudfala but no sandel we oli strong from we long trening blong olgeta, plante taem oli mas wokbaot 30 kilometa evri dei we long semtaem oli karem samwe long 27 kilo blong ol tul blong faet mo klos blong faet blong olgeta. I stret nomo we Pol i yusum pijatok blong ol but blong minim fasin we yumi rere blong talemaot gud nius blong Kingdom long evri man we oli wantem lesin. Hemia wan impoten samting from we ol man bambae oli no gat rod blong save Jeova sipos yumi no rere mo yumi no wantem blong prij.​—Rom 10:​13-15.

 8. ?Olsem wanem yumi save folem eksampol blong Jisas olsem wan man blong talemaot gud nius?

⁸ ?Wanem wok we i impoten moa long laef blong Jisas? Hem i talem long Ponjes Paelet we hem i hedgavman blong Rom, se: ‘Mi mi bon, mi kam long wol ya blong talemaot ol tok we i tru.’ Jisas i prij long eni man we i rere blong lesin, mo hem i laekem tumas wok blong prij, mekem se wok ya i moa impoten long hem i bitim ol samting we bodi blong hem i nidim. (Jon 4:​5-34; 18:37) Sipos yumi gat tingting olsem Jisas, we yumi wantem talemaot gud nius, bambae yumi faenem plante rod blong serem gud nius ya wetem ol narafala. Antap long hemia, taem yumi bisi long wok blong prij, samting ya i halpem yumi blong stap strong long saed blong spirit.​—Ol Wok 18:5.

Sil, Hat, Mo Naef Blong Faet

 9. ?Bigfala sil i protektem ol soldia blong Rom olsem wanem?

⁹ Bigfala sil ya blong bilif. Grik tok ya we long sam Baebol oli tanem i kam “bigfala sil” i minim wan sil we i bigwan naf blong kavremap klosap fulwan bodi. Hemia wan gudfala samting from we hem i save blokem wan man long ol ‘ara ya we faea i laet long olgeta,’ olsem Efesas 6:16 i tokbaot. Long taem we oli raetem Baebol, ol soldia oli yusum ol smosmol ara we oli wokem long wud we i tintin olsem bambu, mo i gat wan smol ples long en blong hem we oli save fulumap bensin long hem nao faea i save laet long hem. Wan man we i stadi long saed blong ol tul blong faet i talem se smosmol ara ya “i wan tul we i denja moa i bitim ol nara tul blong faet we oli yusum bifo.” Sipos wan soldia i no gat wan bigfala sil blong protektem hem long ol ara ya, hem i save kasem bigfala kil no i save ded from.

10, 11. (a) ?Wanem kaen ‘ara we faea i laet long hem’ we Setan i yusum blong kilimdaon bilif blong yumi? (b) ?Olsem wanem eksampol blong Jisas i soem se bilif i wan impoten samting long taem blong traem?

¹⁰ ?Wanem kaen ‘ara we faea i laet long hem’ we Setan i stap yusum blong spolem bilif blong yumi? Hem i save pulum ol man long famle, long wok, no long skul blong oli mekem trabol long yumi no oli agensem yumi. Sam Kristin oli lego trutok from we oli stat wantem tumas blong gat mane mo plante sas samting, mo oli letem nogud fasin long saed blong seks i pulum olgeta. Blong blokem yumi long ol denja ya, ‘oltaem yumi mas bilif strong long God, fasin ya i olsem bigfala sil.’ Yumi kasem bilif taem yumi kasem moa save long Jeova, taem yumi toktok wetem hem oltaem long prea, mo taem yumi luksave olsem wanem hem i stap protektem yumi mo blesem yumi.​—Josua 23:14; Luk 17:5; Rom 10:17.

¹¹ Taem Jisas i stap long wol, hem i soemaot se i impoten tumas blong gat bilif we i strong long taem blong trabol. Hem i trastem olgeta disisen we Papa blong hem i tekem mo hem i glad tumas blong mekem ol samting we God i wantem. (Matiu 26:​42, 53, 54; Jon 6:38) Nating se Jisas i harem nogud tumas long garen blong Getsemane, hem i talem long Papa blong hem se: “Yu no mekem olsem we mi mi wantem, yu mekem olsem we yu nomo yu wantem.” (Matiu 26:39) Jisas i neva fogetem se samting we i moa impoten hemia blong fasgud long Papa blong hem mo mekem Hem i glad. (Ol Proveb 27:11) Sipos yumi trastem Jeova long sem fasin ya, bambae yumi no letem ol tok jik we man i sakem no trabol we man i mekem agensem yumi i mekem bilif blong yumi i kam slak. Defren olgeta, bilif blong yumi bambae i kam strong moa sipos yumi dipen long God, yumi soem se yumi lavem hem, mo yumi holem ol loa blong hem. (Ol Sam 19:​7-11; 1 Jon 5:3) Ol gudgudfala samting we mane i save pem mo ol pleplei we oli save mekem yumi harem gud blong smoltaem, oli nating nomo klosap long olgeta blesing we Jeova bambae i givim long ol man we oli lavem hem.​—Ol Proveb 10:22.

12. ?Hat i blokem wanem impoten pat blong bodi? ?From wanem i impoten blong blokem pat ya blong bodi?

¹² Hat we i minim hop se God bambae i sevem yumi. Wan hat i protektem hed blong soldia mo bren blong hem tu, ples we tingting i stap long hem. Hop we ol Kristin oli gat, i olsem wan hat from we hop ya i protektem tingting blong yumi. (1 Tesalonaeka 5:8) Taem yumi kasem stret save blong Baebol yumi bin jenisim tingting blong yumi i kam niuwan. Nating se i olsem, yumi sinman yet mo yumi gat ol slak fasin yet. Taswe tingting blong yumi i save kam doti, isi nomo. Ol samting we ol man blong wol ya oli stap traehad blong kasem, i save pulum tingting blong yumi i gowe long hop we God i givim long yumi mo i save tekem ples blong hop ya. (Rom 7:18; 12:2) Devel Setan i bin traem blong pulum Jisas i go long nara rod taem hem i talem se bambae i givim “olgeta kantri long wol ya wetem ol gudgudfala samting we oli gat” long Jisas. (Matiu 4:8) Be tingting blong Jisas i no hafhaf. Hem i sakemaot presen ya we Setan i wantem givim long hem. Pol i tokbaot Jisas i se: “Taem [Jisas] i go blong i ded long [“pos,” NW ], hem i luksave finis we bambae i save harem gud. Nao from samting ya, hem i no moa tingbaot se [“pos,” NW ] ya bambae i mekem bigfala sem long hem, hem i gohed nomo. Mo naoia, hem i stap sidaon long raet saed blong God we hem i King, i stap sidaon long bigfala jea blong hem long heven.”​—Hibrus 12:2.

13. ?Olsem wanem yumi save holemtaet bilif we yumi gat long hop blong fiuja?

¹³ Tras ya we Jisas i gat long God i no wan samting we i kam otomatik nomo. Nogat. Sipos yumi wantem gat tras ya long God, i nogud yumi fulumap hed blong yumi wetem ol drim blong wol ya mo ol plan we wol ya i stap traehad blong kasem. Sipos yumi no putum tingting blong yumi i stap long hop blong yumi long fiuja, bilif blong yumi long ol promes blong God bambae i kam slak. Ale sloslo maet bambae yumi lusum hop ya fulwan. Defren olgeta nao, sipos yumi tingting dip oltaem long ol promes blong God, bambae yumi stap glad oltaem long hop ya we yumi gat.​—Rom 12:12.

14, 15. (a) ?Wanem ya naef blong faet blong yumi, mo yumi save yusum naef ya olsem wanem? (b) Eksplenem olsem wanem naef blong faet ya i save halpem yumi blong blokem ol traem.

¹⁴ Naef blong faet we tabu spirit i givim. Tok blong God, we i stap long Baebol, i olsem wan naef we i sap tu saed. Hem i save katemaot ol giaman tijing mo i save halpem ol man we hat blong olgeta i stret blong oli kamfri long ol giaman tijing ya. (Jon 8:32; Hibrus 4:12) Mo tu, naef ya i save givhan long yumi taem ol samting oli kam blong traem bilif blong yumi no taem ol man blong apostasi oli talem samting blong spolem bilif blong yumi. (2 Korin 10:​4, 5) !Yumi gat bigfala tangkiu se ‘olgeta tok blong Baebol oli kamaot long God mo oli mekem we yumi save kam waes long olgeta samting, nao bambae yumi savegud ol rod blong mekem ol gudfala wok.’!​—2 Timoti 3:​16, 17.

¹⁵ Taem Setan i traem Jisas long draeples, Jisas i yusumgud naef ya blong spirit blong blokem ol rong tingting mo trik we Setan i yusum blong traem hem. Long evri tok we Setan i sakem blong traem hem, hem i ansa se: “Baebol i talem se.” (Matiu 4:​1-11) David, wan Witnes blong Jeova long Spen, i luksave tu se Baebol i halpem hem blong winim ol traem. Taem hem i gat 19 yia, wan naesfala yang woman we i wok wetem hem long kampani blong klinim ol haos, i askem hem blong tufala i gat “gudtaem tugeta.” David i talem ‘no’ long woman ya mo i askem bos blong hem blong i putum hem long wan nara ples blong wok from we hem i no wantem fesem traem ya bakegen. David i talem se: “Mi tingbaot eksampol blong Josef. Hem i talem ‘no’ long woman we i wantem slip wetem hem mo kwiktaem nomo hem i ronwe long hem. Mi mi mekem sem mak.”​—Jenesis 39:​10-12.

16. ?Talem from wanem yumi mas trenem yumi wan blong ‘tijim trutok long fasin we i stretgud’?

¹⁶ Jisas i yusum naef blong faet long saed blong spirit blong halpem ol narafala blong oli ronwe long paoa blong Setan. Hem i se: “Ol tok ya we mi stap tijim ol man long hem, oli no blong mi nomo, oli kamaot long God we i sanem mi mi kam.” (Jon 7:16) Blong folem gudfala fasin blong Jisas blong tijim man, yumi mas trenem yumi wan. Man Jiu ya Josephus, we i raetem ol samting we oli hapen long histri, i tokbaot ol soldia blong Rom i se: “Ol soldia oli kasem trening evri dei. Mo trening ya i no olbaot. Oli mekem olsem se oli rili stap long taem blong faet. Hemia nao i mekem we oli naf blong stanap strong long taem blong faet.” Long faet blong yumi long saed blong spirit, yumi mas yusum Baebol. Mo tu, yumi mas ‘traehad long evri rod, blong yumi kam prapa man blong wok we God i stap harem gud long yumi we long fes blong hem, yumi no gat sem long wok blong yumi. Yumi mas kam man we yumi stap tijim ol man long trutok blong God long fasin we i stret gud.’ (2 Timoti 2:15) !Tru ya, yumi glad tumas, taem yumi yusum Baebol blong ansa long kwestin blong wan man we i hanggri blong save trutok!

Prea Oltaem

17, 18. (a) ?Olsem wanem prea i save halpem yumi blong agensem Setan? (b) Givim wan eksampol we i soemaot se prea i wan impoten samting.

¹⁷ Afta we Pol i tokbaot ol wanwan klos blong faet long saed blong spirit, hem i givim wan advaes we i impoten tumas. Taem ol Kristin oli stap agensem Setan, oli mas ‘prea mo askem long God blong i givhan long olgeta.’ ?Oli mas mekem samting ya hamas taem? Pol i raetem se: “Oltaem nomo yufala i mas prea long paoa blong Tabu Spirit.” (Efesas 6:18) Taem yumi fesem ol traem, ol trabol, mo tingting i foldaon, prea i save givhan bigwan blong mekem yumi strong bakegen. (Matiu 26:41) Jisas “i stap prea long God, i stap askem ol samting long hem, i stap krae bigwan, we wota blong ae blong hem i stap ron. God i gat paoa blong sevem hem blong hem i no ded, mo from we tingting blong Kraes i stap daon, God i harem hem.”​—Hibrus 5:7.

¹⁸ Wan woman we nem blong hem Milagros i lukaot long hasban blong hem we i sik blong bitim 15 yia. Hem i talem se: “Taem tingting blong mi i foldaon, mi lukluk i go long Jeova long prea. I no gat man i save givhan long mi moa i bitim Jeova. Yes, i gat sam taem we mi harem olsem se bambae mi no moa save gohed. Be, bakegen mo bakegen, mi prea long Jeova mo afta mi harem se paoa blong mi i kambak bakegen mo mi harem gud.”

19, 20. ?Yumi nidim wanem blong winim faet ya agensem Setan?

¹⁹ Devel Setan i save se taem blong hem i sot, mo hem i wok strong moa blong traem winim yumi. (Revelesen 12:​12, 17) Yumi mas agensem enemi ya blong yumi we i gat bigfala paoa mo yumi mas “faet long gudfala faet ya blong bilif.” (1 Timoti 6:​12, NW ) Blong mekem olsem, yumi nidim paoa we i bitim paoa blong yumi. (2 Korin 4:7) Yumi nidim we tabu spirit blong God i halpem yumi taswe yumi mas prea blong kasem paoa ya. Jisas i talem se: “Nating we yufala i man nogud, be yufala i save givim ol gudgudfala samting long ol pikinini blong yufala. Be Papa blong yufala long heven, fasin blong hem i gud moa i winim fasin blong yufala. Mo hem i save givim Tabu Spirit long ol man we oli askem long hem.”​—Luk 11:13.

²⁰ Yes, yumi luksave klia se yumi nidim klos blong faet ya we Jeova i givim. Blong putum klos ya long saed blong spirit yumi mas wokem ol fasin we God i stamba blong olgeta, olsem bilif mo stret fasin. I minim tu se yumi lavem trutok olsem we yumi fasem hem i goraon long bel blong yumi. I minim se yumi rere oltaem blong talemaot gud nius long enitaem. Mo i minim se yumi no mas fogetem hop we i stap long fiuja. Mo tu, yumi mas kam naf blong yusumgud naef blong faet ya long saed blong spirit. Taem yumi putum olgeta klos blong faet ya we God i givim, bambae yumi save winim faet ya agensem ol rabis enjel mo yumi save leftemap nem blong Jeova we i tabu.​—Rom 8:​37-39.

[Ol Futnot]