Stadi Yu Wan i Mekem Yu Yu Rere Blong Tijim Narafala

“Yu mas mekem ol wok ya, mo yu mas putum tingting blong yu i stap strong blong mekem olgeta samting ya, blong bambae olgeta man oli save luk we yu stap gohed gud long laef blong yu mo long wok blong yu. Yu mas lukaot gud long fasin blong yu, mo long ol tok we yu stap tijim ol man long hem.”—1 TIMOTI 4:15, 16.

 1. ?Wanem samting i tru long saed blong taem blong yumi blong stadi?

LONG Prija 3:1 (NW ) Baebol i talem se: ‘I gat wan stret taem blong evri samting.’ Hemia i tru long saed blong stadi yu wan. Plante long yumi i faenem i had blong putum tingting blong yumi i stap strong long ol samting long saed blong spirit, sipos taem mo ples i no stret. Traem tingbaot: ?Sipos yu wokhad fuldei, yu kakae bigwan long sava, nao yu slakem yu long wan jea long fored blong televisin, yu ting se bambae yu wantem stadi? Nogat. ?Ale, wanem rod i stret? I klia se yumi mas jusum wan taem mo ples blong stadi we bambae i givhan long yumi blong kasem gudfala frut from hadwok blong yumi.

 2. ?Plante man oli faenem se wanem taem nao i gud blong stadi?

² Plante oli faenem se beswan taem blong stadi hemia long eli moning, taem tingting i klia. Sam narafala oli stadi blong smoltaem long dina. Traem luklukgud long ol vas biaen, mo makem wanem taem oli tokbaot blong mekem ol impoten samting long saed blong spirit. King Deved long Isrel bifo i raetem se: “Mi mi putum tingting blong mi i stap strong long yu. Evri moning, plis yu soemaot long mi bakegen we oltaem yu yu lavem man tumas. Oltaem prea blong mi i stap go antap long yu. Plis yu soemaot rod long mi, blong mi mi folem.” (Ol Sam 143:8) Profet Aesea tu i soemaot se hem i tinghae long stadi, i se: “Hae God i Masta blong mi, mo hem i tijim mi finis long ol tok we hem i wantem blong mi mi talem, blong mi save mekem olgeta we oli slak oli strong bakegen. Evri moning, hem i stap mekem mi mi rere gud blong harem ol tok we hem i wantem tijim mi long hem.” Nomata wanem taem blong dei i stret long yumi, bigfala samting se yumi mas stadi mo toktok long Jeova taem tingting blong yumi i kliagud.—Aesea 50:4, 5; Ol Sam 5:3; 88:13.

 3. ?Yumi mas jusum wanem kaen ples blong stadigud?

³ Blong stadigud, wan narafala samting se, yumi no mas sidaon long jea we i sofsof tumas no we yumi save lei long hem. Hemia i no rod blong stap wekapgud. Taem yumi stadi, tingting blong yumi i mas wokgud. Sipos yumi slakem yumi long wan jea we i sofsof gud, yumi wantem slip nomo. Mo tu, blong stadi mo tingting dip, i moa gud we ples i kwaet mo i no gat samting i stap raonabaot long yumi we i save pulum ae mo tingting blong yumi. Sipos yumi traem stadi taem radio no televisin i toktok, no taem ol pikinini oli wantem storian long yumi, bambae yumi no save kasem gudfala frut. Taem Jisas i wantem tingting dip, hem i wokbaot i go long wan ples we i kwaet. Mo hem i talem se i gud tu blong faenem wan kwaet ples taem yumi wantem prea.—Matiu 6:6; 14:13; Mak 6:30-32.

Stadi Wanwan We i Mekem Yumi Reregud Blong Ansa

4, 5. ?Olsem wanem buklet ya Wanem i save givhan long man?

⁴ Yumi haremgud blong stadi yumi wan, sipos yumi yusum ol buk we oli eksplenem Baebol blong faenemaot moa save long saed blong wan poen, antap moa, sipos yumi lukaot save ya blong givim ansa long wan gudfala kwestin we man i askem. (1 Timoti 1:4; 2 Timoti 2:23) Faswan buk we yumi stadi wetem plante man, hemia ?Wanem Samting We God i Wantem Yumi Blong Mekem?,a we i stap long 261 lanwis finis. Buk ya i isi, i klia, mo i stanap fulwan long Baebol. Hem i save givhan long ol man blong oli kasem save kwiktaem long samting we God i wantem olgeta blong mekem, blong oli wosip long hem long trufala fasin. Be, buk ya i smol nomo, taswe i no gat ples blong eksplenem plante poen long ol wanwan haf blong hem. ?Sipos man we yu stadi wetem hem i askem sam kwestin long ol haf ya, olsem wanem yu save faenemaot moa save long Baebol blong ansa long ol kwestin ya?

⁵ Samfala we oli gat kompiuta, oli save yusum Watchtower Library long CD-ROM long prapa lanwis blong olgeta. Hem i givim fulap save long plante defdefren kwestin. ?Be olsem wanem long ol man we oli no gat kompiuta? Bambae yumi tokbaot tu poen long buklet ya Wanem, mo bambae yumi luk olsem wanem blong kasem moa save long saed blong tufala ya, blong yumi save eksplenem gud long ol man. Tufala kwestin ya hemia: ?God hem i hu? mo ?Jisas i olsem wanem?—Eksodas 5:2; Luk 9:18-20; 1 Pita 3:15.

?God Hem i Hu?

6, 7. (a) ?Wanem kwestin we i stanap long saed blong God? (b) ?Wanem bigfala mastik we wan lida blong skul i mekem long toktok blong hem?

⁶ Stadi 2 long buklet ya Wanem i givim ansa long impoten kwestin ya, ?God Hem i Hu? Hemia faswan samting we ol man oli mas kasem save long hem. Oli no save wosip long trufala God sipos oli no save Hem no sipos oli no bilif fulwan se Hem i stap. (Rom 1:19, 20; Hibrus 11:6) Ol man long olgeta ples blong wol oli gat plante defdefren bilif long saed blong God. (1 Korin 8:4-6) Evri skul oli talem ol defdefren ansa long kwestin ya, se God hem i hu. Plante skul blong Krisendom oli stap talem se God i wan Triniti. Bigfala lida blong wan jos long Amerika i givim wan tok long saed blong kwestin ya “?Yu Yu Save God?”. Long tok ya, hem i yusum sam vas long Oltesteman no Hibru haf blong Baebol, be hem i no talem nem blong God nating. Hem i ridim ol vas ya long wan Baebol we i singaot God se “Masta” nomo. Be tok ya i save gat plante mining mo i no wan stret nem tu. Jeova no Yawe we i prapa nem blong God, man ya i no talem nating.

⁷ Lida blong skul ya i mestem wan bigfala poen taem hem i ridim Jeremaea 31:33, 34 we i talem olsem: “ ‘Bambae i no moa gat wan long yufala we i save go tijim man ples blong hem se, ‘Yu mas save Masta blong yumi,’ [Hibru, “Save Jeova”] mo bambae i no gat man we i save go talem tok ya long brata blong hem, from we yufala evriwan bambae i save mi, i stat long ol haeman, gogo kasem olgeta we oli no gat nem. Mi mi Masta blong yufala, mo hemia tok blong mi [Hibru, Jeova].” Long Baebol we hem i yusum, i no gat prapa nem blong God, Jeova.—Ol Sam 103:1, 2.

 8. ?Wanem i soemaot se i impoten tumas blong yusum nem blong God?

⁸ Ol Sam 8:9 (NW ) i soemaot from wanem i impoten blong yusum prapa nem blong God, i se: “Jeova, yu yu Masta blong mifala. !Long olgeta ples blong wol, nem blong yu i hae we i hae!” Traem skelem vas ya wetem narafala Baebol ya we i talem olsem: “!MASTA, Masta blong mifala, nem blong yu i nambawan long olgeta ples blong wol!” (King James Version; mo The New American Bible, The Holy Bible—New International Version, Tanakh—The Holy Scriptures) Olsem yumi tokbaot finis long faswan stadi, sipos yumi letem laet we i kamaot long Tok blong God i saen i kam long yumi, bambae yumi kasem mak we yumi ‘savegud God.’ ?Be weswan buk we i givim ol gudfala save blong Baebol, blong pruvum se nem blong God i impoten?—Ol Proveb 2:1-6.

 9. (a) ?Wanem buk i save givhan long yumi blong eksplenem se i impoten blong yusum nem blong God? (b) ?Olsem wanem plante man we oli tanem Baebol i go long ol defdefren lanwis oli no bin soem respek long nem blong God?

⁹ Traem tekem smol buk ya The Divine Name That Will Endure Forever, we oli tanem i kam long 69 lanwis finis.b Haf ya “God’s Name—Its Meaning and Pronunciation” (Nem Blong God—Mining Mo Stret Wei Blong Talem) (pej 6 kasem 11) i soemaot klia se ol fo Hibru leta we oli minim nem blong God, oli stap klosap 7,000 taem long ol olfala Hibru hanraet. Nating se i olsem, sam lida mo man blong transletem Baebol long Krisendom mo skul blong ol man Jiu, oli tekemaot nem blong God long plante Baebol we oli wokem.c ?Olsem wanem oli save talem se oli save God mo oli fren wetem hem, sipos oli no wantem singaot hem long nem blong hem? Sipos yumi yusum prapa nem blong God, samting ya i mekem rod blong yumi kasem save long ol stamba tingting blong hem mo kasem save se hem i hu. ?Sipos i tabu blong yusum nem blong God, from wanem Jisas i tijim yumi blong prea se ‘Papa blong mifala we yu stap long heven, nem blong yu i tabu’?—Matiu 6:9, NW; Jon 5:43; 17:6.

?Hu Ya Jisas Kraes?

10. ?Yu save mekem wanem blong kasem save long laef mo minista wok blong Jisas?

¹⁰ Stadi 3 long buklet ya Wanem i tokbaot “?Hu Ya Jisas Kraes?” Long sikis haf blong hem, hem i storian smol nomo long saed blong Jisas, se hem i kamaot wea, mo from wanem hem i kam long wol ya. Be, sipos yu wantem save plante samting long saed blong laef blong hem, i gat stori blong ol Gospel long Baebol, mo antap long hemia, i gat nambawan buk ya Man We i Hae Moa Long Olgeta Man, we i stap long 111 lanwis finis.* Buk ya i tokbaot ol samting we oli hapen folfolem olgeta long laef blong Jisas Kraes, mo i tokbaot ol tijing blong hem, olsem ol fo Gospel oli talem. Ol 133 japta blong buk ya oli eksplenem laef mo minista wok blong Jisas. Sipos yu wantem save moa long ol wanwan haf blong laef blong hem, yu save ridim buk ya Insight, Buk 2, long haf ya “Jisas Kraes.”

11. (a) ?Olsem wanem bilif blong ol Witnes blong Jeova long saed blong Jisas i defren long ol narafala skul? (b) ?Wanem sam vas blong Baebol we oli soemaot klia se Triniti i no stret, mo wanem buk i save givhan blong eksplenem samting ya?

¹¹ Ol skul blong Krisendom, oli raorao long kwestin ya se: ?Jisas i “Pikinini blong God” mo “God” tu? Yes, oli raorao from samting we Catechism of the Catholic Church i kolem “bigfala tok haed blong Kristin bilif,” no Triniti. Be ol Witnes blong Jeova oli defren long ol skul blong Krisendom. Ol Witnes oli bilif se God i wokem Jisas, be oli no bilif se Jisas hem i God. Wan buk we i eksplenem gud poen ya, hemia Should You Believe in the Trinity?, we oli tanem i go long 95 lanwis finis.d Hem i talem plante vas blong soem se Triniti i no stanap long Baebol. Tu long ol vas ya, hemia Mak 13:32 mo 1 Korin 15:24, 28.

12. ?Wanem narafala kwestin we yumi mas ansarem?

¹² Ol save ya we yumi jes tokbaot long saed blong God mo Jisas Kraes i blong soemaot long yumi, olsem wanem yumi wanwan i save stadi, blong bambae yumi reregud blong givim stret save long ol man we oli no save trutok blong Baebol yet. (Jon 17:3) ?Be olsem wanem long olgeta we oli bin joen long Kristin kongregesen blong plante yia finis? Oli gat plante save finis long Baebol. ?Oli nidim yet blong stadi wanwan long Tok blong Jeova?

?From Wanem Yumi Mas “Lukaot Gud”?

13. ?Wanem rong tingting we samfala oli gat long saed blong stadi wanwan?

¹³ Samfala we oli bin joen long kongregesen plante yia finis, maet oli foldaon long fasin ya we oli dipen long ol save blong Baebol we oli bin kasem long ol faswan yia we oli joen wetem ol Witnes blong Jeova. I isi blong ting se: “Mi mi no nidim blong stadi plante olsem olgeta we oli jes harem trutok. Long ol yia we oli pas, mi mi ridim Baebol plante taem finis, wetem ol buk we oli eksplenem Baebol tu.” Hemia i olsem we yu talem se: “Mi mi no nidim blong lukaotgud long ol samting we mi stap kakae naoia, from we mi mi kakae plante taem finis long ol yia we oli pas.” Yumi save se sipos yumi wantem we bodi blong yumi i stap strong mo i wokgud, yumi mas kakae gud oltaem, mo mekem kakae ya i reregud. !Samting ya i tru moa long saed blong spirit, sipos yumi wantem stap strong mo wokhad!—Hibrus 5:12-14.

14. ?From wanem yumi nidim blong lukaotgud?

¹⁴ Taswe, nating se yumi stadi Baebol longtaem finis no nogat, yumi evriwan i mas lesin long advaes we Pol i givim long Timoti. Long taem ya, Timoti i wan elda mo wan bigman finis long ol Kristin fasin. Nating se i olsem, Pol i talem long hem se: “Yu mas lukaot gud long fasin blong yu, mo long ol tok we yu stap tijim ol man long hem. Oltaem yu mas mekem olgeta fasin ya. Sipos yu mekem olsem bambae yu save sevem yu, wetem ol man we oli stap lesin long yu.” (1 Timoti 4:15, 16) ?From wanem yumi mas harem advaes ya blong Pol? Tingbaot we Pol i bin talem se yumi mas faet agensem ‘ol giaman trik blong Setan,’ mo “agens long ol devel we oli stap olbaot long wol ya.” Mo aposol Pita tu i givim woning se Setan i “stap lukaot man blong i kakae.” Maet “man” ya i save minim eniwan long yumi. Sipos yumi ting se yumi oraet nomo mo yumi no nid blong lukaotgud, maet hemia nao janis we Setan i stap wet long hem blong winim yumi.—Efesas 6:11, 12; 1 Pita 5:8.

15. ?Olsem wanem yumi save blokem Setan, mo olsem wanem blong meksua se ol tul blong faet long saed blong spirit oli stapgud oltaem?

¹⁵ ?Ale, olsem wanem yumi save blokem Setan? Aposol Pol i talem se: “Yufala i mas kasem paoa blong God we i olsem olgeta samting blong faet. Nao taem dei blong faet long Setan i kam, be bambae yufala i save stanap strong. Long fasin ya, bambae yufala i save faet long ol enemi gogo kasem en blong hem, nao biaen, bambae yufala i save stanap strong yet.” (Efesas 6:13) Blong faet strong long saed blong spirit, i no naf we ol tul blong faet oli gud taem yumi stat, be oli kam nogud biaen. Yumi mas meksua se ol tul blong faet ya oli stapgud oltaem. Taswe, wan long ol tul ya we God i givim blong faet, hemia ol niufala save long saed blong Tok blong Hem. I impoten we yumi kasem gud ol niufala trutok we Jeova i stap soemaot tru long Tok blong hem mo slef we i stret mo waes. Blong mekem se ol tul blong faet oli stapgud, yumi wanwan i mas stadi oltaem long Baebol mo ol buk we oli eksplenem Baebol.—Matiu 24:45-47, NW; Efesas 6:14, 15.

16. ?Yumi save mekem wanem blong meksua se ‘bilif blong yumi we i olsem wan sil’ i stap strong gud?

¹⁶ Pol i talem se wan impoten tul blong faet, hemia ‘strong bilif we i olsem wan sil.’ Yumi save yusum sil ya blong blokem ol ara blong Setan we faea i laet long olgeta, hemia ol giaman tok mo tijing blong ol man we oli agensem yumi, mo ol man we oli lego trufala bilif. (Efesas 6:16) Taswe i impoten blong jekem bilif blong yumi we i olsem wan sil, blong luk sipos hem i strong gud. Mo i impoten blong jekem sipos yumi stap mekem ol samting we oli givhan long bilif blong yumi, blong i stapgud mo i kam strong moa. Maet yu save skelem yu wan olsemia: “?Evri wik, mi mi stap mekem rere from stadi blong Baebol we yumi mekem long Wajtaoa olsem wanem? ?Mi mi stadi naf blong givim ol gudfala ansa long miting we oli save ‘mekem narafala i strong blong lavem ol man, mo blong mekem ol gudfala fasin’? ?Mi mi tekem Baebol mo ridim ol vas we oli no raetem tok blong olgeta fulwan long Wajtaoa? ?Mi mi leftemap tingting blong ol narafala, taem mi soemaot se mi glad blong joen fulwan long ol miting?” Yumi stap tekem strong kakae long saed blong spirit, taswe yumi mas tantanem gud kakae ya blong kasem ol gudfala samting blong hem.—Hibrus 5:14; 10:24.

17. (a) ?Setan i stap yusum wanem posen blong traem spolem yumi long saed blong spirit? (b) ?Wanem meresin we i save winim posen blong Setan?

¹⁷ Setan i savegud ol slak fasin blong ol sinman, mo hem i save wokem ol giaman trik blong hem long rod we yumi no luksave. Wan rod we hem i yusum blong spolem plante man, se hem i mekem i isi blong oli lukluk ol rabis pija blong seks long televisin, Internet, ol video kaset, mo long sam buk. Sam Kristin we oli kam slak blong blokem Setan, oli bin letem posen ya i spolem olgeta, nao oli lusum gudfala wok we oli stap mekem long kongregesen, mo samfala oli kasem panis we i strong moa. (Efesas 4:17-19) ?Wanem meresin i save winim posen ya blong Setan? Yumi no mas kam slak blong stadi Baebol wanwan, go long ol Kristin miting, mo holem olgeta tul blong faet we God i givim. Sipos yumi mekem olgeta samting ya, bambae yumi naf blong luksave wanem i stret mo wanem i no stret, mo bambae yumi no laekem nating ol samting we Jeova i no laekem nating.—Ol Sam 97:10; Rom 12:9.

18. ?Olsem wanem ‘naef blong faet we tabu spirit i givim long yumi’ i save halpem yumi blong faet long saed blong spirit?

¹⁸ Sipos oltaem yumi folem wan plan blong stadi Baebol, stret save we yumi kasem long Tok blong God bambae i mekem yumi strong blong blokem Setan. Antap long hemia, bambae yumi naf blong yusum ‘Tok blong God we i olsem naef blong faet we tabu spirit i givim long yumi,’ blong faet agens long Setan. Tok blong God ya “i sap we i sap i winim naef blong faet ya we i sap tu saed. Hem i save go insaed long ples we tingting blong man i joen long laef blong hem, olsem we naef blong faet i save go insaed olgeta long bun, i kasem wota blong hem. Tok blong God i save jajem olgeta tingting blong man, mo ol samting we man i wantem long tingting blong hem.” (Efesas 6:17; Hibrus 4:12) Sipos yumi gat gudhan blong yusum “naef blong faet ya,” ale taem yumi kasem traem, bambae yumi naf blong katemaot mo sakem samting we i save pulum yumi mo spolem yumi. Bambae yumi luksave klia se hemia wan trap blong Setan we i blong givim ded nomo. Save we yumi gat long Baebol mo stret mining blong hem, bambae i givhan long yumi blong tanem baksaed long ol rabis fasin mo mekem fasin we i stret. Taswe, yumi evriwan i mas askem se: ‘?Naef blong faet blong mi i sapgud, no i rosta? ?Mi mi faenem i had blong tingbaot sam vas blong Baebol we oli save mekem mi mi strong blong agensem Setan?’ Yumi wanwan i mas gohed blong folem wan gudfala plan blong stadi Baebol, olsem nao, bambae yumi naf blong blokem Setan.—Efesas 4:22-24.

19. ?Wanem gudfala frut we yumi save kasem sipos yumi stadi wanwan?

¹⁹ Pol i raetem se: “Olgeta tok blong Baebol oli kamaot long God fastaem. Hem i putum long tingting blong ol man ya bifo, nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin, mo blong tijim yumi long ol stret fasin. Ol tok ya, God i givim blong bambae yumi ol man blong hem yumi save kam waes long olgeta samting, nao bambae yumi savegud ol rod blong mekem ol gudfala wok.” Sipos yumi folem tok ya we Pol i raetem long Timoti, yumi save kam strong long saed blong spirit mo bambae yumi karem moa frut long wok blong prij. Ol elda mo ol man blong givhan we oli strong long saed blong spirit, bambae oli givhan moa long kongregesen, nao bambae yumi evriwan i stap strong long bilif.—2 Timoti 3:16, 17; Matiu 7:24-27.

[Ol Futnot]

?Yu Yu Rimemba?

• ?Yumi mas jusum wanem ples mo taem blong stadigud?

• ?Wanem mastik long saed blong nem blong God we i stap long plante Baebol?

• ?Wanem sam vas we yu save yusum blong soemaot se Triniti i no stret?

• ?Yumi mas mekem wanem blong no foldaon long ol giaman trik blong Setan, nating se yumi wan trufala Kristin blong plante yia finis?

[Tok blong pija long pej 19]

Blong stadigud, yu mas faenem wan kwaet ples we i no gat plante samting blong pulum ae blong yu

[Tok blong pija long pej 23]

?“Naef blong faet” blong yu i sapgud no i rosta?