“Faet Long Gudfala Faet Ya Blong Bilif”

TINGBAOT wan soldia, we long taem blong faet hem i kasem oda ya se: “Yu mas gobak long haos blong yu mo stap smol taem wetem waef mo famle blong yu.” ?Yu save wan soldia we bambae i no glad blong kasem oda ya?

Wan man Het, we nem blong hem Uria, i kasem oda ya. Hem i wan soldia long taem blong King Deved blong Isrel. King Deved hem wan i talem long Uria se hem i mas gohom. Nating se i olsem, Uria i no wantem gobak long haos blong hem. Taem oli askem long hem from wanem hem i no wantem gohom, Uria i talem se bokis blong kontrak, we i soemaot se Jeova i stap, mo ami blong Isrel, olgeta oli stap long ples blong mekem faet. Mo hem i askem se: “?Olsem wanem nao bambae mi mi gohom, . . . mo mi go slip wetem woman blong mi?” Long tingting blong Uria, hem i no save mekem fasin ya taem ol narafala oli stap faet.​—2 Samuel 11:​8-11.

Fasin blong Uria i mekem sam impoten kwestin i kamaot, from we yumi tu, yumi stap laef long wan taem blong faet. Wan faet i stap gohed, wan faet we i defren olgeta long ol faet we oli kamaot long wol. Tufala wol wo we i pas finis i nating nomo taem yu skelem tufala wetem faet ya. Mo yu, yu joen long faet ya. Denja i bigwan, mo enemi i strong. Long faet ya, oli no sutum man wetem ol masket, oli no yusum ol bom, be oli nidim ol gudfala plan blong faet.

Bifo we yu joen long faet ya, yu mas save sipos hem i stret, mo yu mas save se bambae yu faet from wanem. ?Faet ya bambae i karem sam gudfala frut? Stamba risen blong faet ya i kamaot klia long leta we aposol Pol i raetem long Timoti, i se: “Yu mas faet long gudfala faet ya blong bilif.” Yes, long faet ya, yu no faet blong wan bigfala haos blong king. Faet ya hem i wan faet blong “bilif”​—hemia olgeta Kristin trutok we Baebol i tokbaot. Yu mas agri se “bilif” ya i tru sipos yu wantem faet blong hem mo win.​—1 Timoti 6:​12, NW.

Wan man blong faet we i waes, i traehad blong savegud enemi blong hem. Long faet ya, enemi i gat plante ekspiriens long fasin blong mekem plan blong faet, mo hem i gat plante plante tul blong faet. Mo tu, hem i gat sam spesel paoa. Hem i rabis olgeta, hem i raf, mo hem i wantem spolem man nomo. Enemi ya, nem blong hem Setan. (1 Pita 5:8) Yumi no save yusum ol tul blong faet long saed blong bodi mo waes blong man, blong faet agensem enemi ya. (2 Korin 10:4) ?Yumi save mekem wanem blong faet agensem hem?

Faswan tul blong faet we yumi save yusum, hemia ‘tok blong God we i olsem naef blong faet we tabu spirit i givim.’ (Efesas 6:17) Aposol Pol i eksplenem olsem wanem tul ya i gat paoa, hem i se: “Tok blong God i wan samting we i laef, mo i stap wok, mo i sap we i sap i winim naef blong faet ya we i sap tu saed. Hem i save go insaed long ples we tingting blong man i joen long laef blong hem, olsem we naef blong faet i save go insaed olgeta long bun, i kasem wota blong hem. Tok blong God i save jajem olgeta tingting blong man, mo ol samting we man i wantem long tingting blong hem.” (Hibrus 4:​12) Wan tul blong faet we i sap we i sap gogo hem i save go dip insaed long tingting blong man, ating hem i wan tul we man i mas savegud, mo i mas yusum hem wetem waes fasin.

Ating yu save finis we, nating se wan ami i gat ol nambawan tul blong faet, be sipos ol soldia oli no save yusum olgeta, ol tul blong faet ya i blong nating nomo. Long sem fasin, yu tu yu nidim sam advaes blong yusumgud naef blong faet blong yu. Mo yu gat wan bigfala janis, from we sam man blong faet we oli gat plante ekspiriens oli save trenem yu. Jisas i kolem ol man ya ‘slef we i stret mo waes,’ we long stret taem blong hem bambae i mas givim kakae long saed blong spirit, no advaes, long olgeta we oli stap folem Jisas. (Matiu 24:​45, NW ) Yu luksave grup ya we i olsem slef taem yu luk ol traehad blong hem blong tijim mo givim woning long ol man long saed blong ol fasin blong enemi blong yumi. Slef ya, hemia ol tabu man we oli memba blong Kristin kongregesen blong ol Witnes blong Jeova.​—Revelesen 14:1.

Grup ya we i olsem slef i no jes mekem wok blong tijim man. Hem i soem semfala tingting olsem aposol Pol, we i raetem leta ya i go long kongregesen blong Tesalonaeka se: “Taem mifala i stap wetem yufala, mifala i stap mekem i isi long yufala, olsem wan mama we i stap lukaot long ol pikinini blong hem. Mifala i no tingbaot blong talemaot gud nius ya nomo long yufala. Mifala i rere tu blong lego laef blong mifala from we mifala i lavem yufala, mo mifala i wantem tumas blong givhan long yufala.” (1 Tesalonaeka 2:​7, 8) I stap long evri Kristin soldia wanwan blong jusum sipos oli wantem kasem trening ya, we ol brata oli givim wetem lav.

Olgeta Klos Blong Faet

Yu save kasem olgeta klos we i olsem klos blong faet blong protektem yu. Efesas 6:​13-18 i tokbaot ol defren haf blong ol klos ya blong faet. Wan soldia we i waes, bambae hem i no save wokbaot samples sipos wan haf blong ol klos blong faet blong hem long saed blong spirit i no stap, no sipos hem i mas fiksimap wan haf blong klos ya.

Wan Kristin i nidim olgeta klos blong faet blong protektem hem, be bigfala sil blong bilif, hem i wan haf we i rili impoten. Taswe Pol i raetem se: “Mo oltaem yufala i mas bilif strong long God. Fasin ya i olsem sil, we yufala i save yusum blong blokem ol ara ya blong Setan, we faea i laet long hem.”​—Efesas 6:16.

Bigfala sil ya we i save kavremap ful bodi, hem i pija blong gudfala fasin ya bilif. Yu mas gat strong bilif long Jeova se hem i stap lidim yu long stret fasin, mo yu mas sua fulwan se olgeta promes blong hem bambae oli kamtru. Yu mas harem olsem se ol promes ya oli kamtru finis. Yu mas bilif strong se rabis wol blong Setan bambae i lus olgeta, wol bambae i kam wan paradaes, mo ol man we oli stap tru long God bambae oli kam stretgud olgeta.​—Aesea 33:24; 35:​1, 2; Revelesen 19:​17-21.

Be long faet ya blong bilif we i stap gohed, yu nidim wan narafala samting​—yu nidim wan fren. Long taem blong faet, ol soldia oli lan blong frengud tugeta from we wanwan long olgeta i save leftemap tingting mo protektem narafala, mo samtaem, oli sevem laef blong narafala tu. I impoten blong gat ol gudfala fren, be sipos yu wantem stap laef tru long faet ya, yu nid blong kam fren wetem Jeova hem wan. Taswe, afta we Pol i tokbaot ol defren haf blong ol klos blong faet hem i talem se: “Wetem ol samting ya, yufala i mas prea, yufala i mas askem long God blong i givhan long yufala. Oltaem nomo yufala i mas prea long paoa blong Tabu Spirit.”​—Efesas 6:18.

Yumi glad blong stap wetem wan gudfala fren. Yumi wantem tumas blong spenem taem wetem hem. Sipos yu toktok oltaem wetem Jeova tru long prea, bambae yu tingbaot hem olsem wan trufala man, wan fren we yu save trastem. Disaepol Jemes i leftemap tingting blong yumi i se: “Stap klosap long God, nao hem bambae i kam stap klosap long yufala.”​—Jemes 4:8.

Ol Plan Blong Enemi

Taem yu faet wetem wol ya, samtaem i olsem we yu stap wokbaot long wan ples we i fulap long bom we oli stap haed long graon. Enemi i save kamaot long eni ples, mo hem i traem kasem yu long wan taem we yu no tingbaot. Nating se i olsem, yu mas save we Jeova i mekem plan finis blong protektem yu.​—1 Korin 10:13.

Maet enemi ya i save putum olgeta paoa blong hem agensem ol trutok blong Baebol, we i stamba blong bilif blong yu. Ol man blong apostasi oli yusum ol swit tok, mo oli save twistim stret tingting blong traem spolem yu. Be ol man blong apostasi ya oli no wantem we yu haremgud. Ol Proveb 11:9 i talem se: “Tok blong man we i no bilif long Hae God, hem i stap spolem ol man we oli stap raonabaot long hem, be waestok i stap sevem ol stret man.”

Sipos yu gat tingting ya se, yu mas lesin long ol man blong apostasi no yu mas ridim ol buk blong olgeta from we long rod ya nao bambae yu save agensem ol giaman tok blong olgeta, hemia yu stap trikim yu wan nomo. Tingting blong ol man blong apostasi i rabis mo i denja, mo hem i save spolem yu long saed blong spirit. Tingting ya i save spolem bilif blong yu tu olsem wan sik we i spolem ful bodi blong man kwiktaem nomo. (2 Timoti 2:​16, 17) I moagud yu folem eksampol blong God long saed blong ol man blong apostasi. Job i tokbaot Jeova i se: “I no gat wan man nogud [no “wan man blong apostasi,” NW ] i rere blong go stanap long fes blong hem.”​—Job 13:16.

Enemi i save yusum wan defren plan blong agensem yu, wan plan we i wokgud samtaem. Taem wan ami i stap long faet, sipos sam soldia oli lego faet ya blong mekem ol rabis fasin long saed blong seks, trabol i save kamaot.

Ol pleplei blong wol, olsem ol rabis film mo ol so long televisin mo nogud miusik, olgeta samting ya oli olsem ol bet we i wokgud blong trikim man. Sam man oli talem se oli save lukluk ol rabis pija no ridim ol rabis buk, we samting ya bambae i no afektem olgeta. Be wan man we bifo, hem i stap wajem oltaem ol film we oli soem ol rabis fasin long saed blong seks, hem i talem se: “Yu neva fogetem ol rabis pija we yu luk, moa we yu stap tingbaot ol pija ya, moa we yu wantem mekem samting we yu luk . . . Film ya i givim tingting long yu se yu rili mestem wan samting.” ?Yu ting se i gud blong traem pleplei wetem ol bet ya we i save spolemgud yu?

Wan narafala tul blong faet we enemi ya i stap yusum, hemia fasin blong wantem plante samting long saed blong bodi. I no isi blong luksave trap ya, from we yumi evriwan i gat ol nid long saed blong bodi. Yumi nidim wan haos, kakae, ol klos. Mo i no rong blong gat ol naesfala samting. Denja i kamaot from tingting we man i gat long saed blong ol samting blong bodi. Naoia, mane i moa impoten i winim ol samting blong spirit. Maet yumi save kam olsem man we i laekem mane tumas. I gud yumi rimemba se mane i gat mak blong hem. Hem i no save stap oltaem, be ol rij samting long saed blong spirit oli save stap blong olwe.​—Matiu 6:​19, 20.

Sipos strong tingting blong wan ami i godaon, bambae oli no gat plante janis blong winim faet. Baebol i talem se: “Sipos tingting blong yu i no strong long taem blong trabol, hemia i soemaot we yu yu no strong nating.” (Ol Proveb 24:10) Tingting we i foldaon hem i wan tul blong faet we Setan i yusumgud. Sipos yu stap putum ‘tingting blong yu long God’ olsem wan “hat blong faet,” bambae yu winim tingting we i foldaon. (1 Tesalonaeka 5:8) Traem holem bilif blong yu i stap strong olsem bilif blong Ebraham. Taem Jeova i askem Ebraham blong i givim pikinini boe blong hem, Aesak, olsem wan sakrefaes, Ebraham i kwik blong mekem samting we Jeova i askem. Hem i save we God bambae i mekem promes blong hem i kamtru, se tru long ol pikinini blong hem bambae olgeta nesen oli kasem blesing. Mo hem i save we God i naf blong mekem Aesak i laef bakegen blong holem promes blong hem.​—Hibrus 11:​17-19.

No Lego Faet Ya

Sam man we oli bin faet strong longtaem oli kam slak lelebet, mekem se naoia oli no lukaotgud olsem bifo. Eksampol blong Uria, we yumi tokbaot long fastok blong haf ya, hem i save halpem olgeta man we oli stap faet, blong oli holem wan stret tingting long saed blong faet ya. Plante long ol Kristin brata blong yumi oli safa from we oli no gat ol samting we oli nidim long saed blong bodi, oli stap long denja, no oli no gat wan haos mo kakae. I gud yumi folem eksampol blong Uria. Yumi no tingbaot ol gudfala samting we yumi save gat naoia mo yumi no traem gat wan laef we i isi. Yumi wantem stap long ami blong Jeova wetem ol soldia we oli stap tru long hem, mo gohed long faet ya go kasem taem we bambae yumi kasem ol nambawan blesing we Jeova i promes blong givim long yumi.​—Hibrus 10:​32-34.

Bambae i denja sipos yumi no stap lukaotgud, sipos yumi gat tingting ya se laswan haf blong faet i stap longwe yet. Eksampol blong King Deved i soem gud denja ya. From defren risen, hem i no stap wetem ami blong hem long faet. Taswe, Deved i mekem wan bigfala sin we i givim trabol mo safa long hem long ful laef blong hem.​—2 Samuel 12:​10-14.

?Yu ting se i stret blong joen long faet ya, fesem ol hadtaem blong hem, gohed strong nomata we ol man oli jikim yumi, mo lego ol rabis fasin blong wol ya? Olgeta we oli stap gohedgud long faet oli agri se ol samting blong wol oli pulum man, olsem ol laet we i flas, be taem yu luklukgud, oli nating nomo. (Filipae 3:8) Antap moa, plante taem oli mekem man i soa mo i harem nogud.

Wan Kristin man we i joen long faet long saed blong spirit i glad from we hem i gat ol trufala fren, tingting we i jajem hem i klin, mo hem i gat wan nambawan hop. Ol tabu Kristin oli gat hop blong laef blong olwe long heven wetem Jisas Kraes. (1 Korin 15:54) Bighaf blong ol soldia blong Kraes oli gat hop blong laef foreva long paradaes long wol. Yes, i stret blong traehad blong kasem ol blesing ya. Mo i gat wan samting long saed blong faet ya we i defren olgeta long ol faet blong wol, hemia se: Yumi sua we bambae yumi winim faet ya, sipos yumi stap tru long God. (Hibrus 11:1) Be wol ya we i stap aninit long paoa blong Setan, bambae hem i lus olgeta.​—2 Pita 3:10.

Yu we yu stap gohed long faet ya, i gud yu rimemba ol tok blong Jisas se: “Yufala i no fraet. Mi mi winim paoa blong olgeta samting blong wol ya finis.” (Jon 16:33) Jisas i winim wol from we hem i stap lukaotgud mo i stap tru nomata long ol traem we hem i kasem. Yumi save folem eksampol blong hem.

[Tok blong makem poen long pej 27]

Oli no sutum man wetem ol masket, oli no yusum ol bom, be oli nidim ol gudfala plan blong faet

[Tok blong makem poen long pej 30]

Bambae yumi winim faet ya sipos yumi stap tru long God

[Tok blong pija long pej 26]

Hop blong yumi we i olsem hat blong faet bambae i halpem yumi blong winim tingting we i foldaon

Yusum bigfala sil blong bilif blong blokem ol “ara blong Setan, we faea i laet long hem”

[Tok blong pija long pej 28]

“Stap klosap long God, nao hem bambae i kam stap klosap long yufala”

[Tok blong pija long pej 29]

Yumi mas bilif se ol promes blong God bambae oli kamtru