Gohed Gud Mo Traehad Blong Kam Gud Moa

TAEM yu jes stat blong mekem ol tingting blong God long Baebol oli wok long laef blong yu, sloslo ol fasin we yu folem longtaem finis i kam, wetem ol tingting mo toktok blong yu, oli jenis. Bighaf blong ol jenis ya yu yu mekem finis, bifo we yu joen long Tiokratik Skul. Naoia, maet yu givim laef blong yu long Jehova finis. ?Hemia i min se yu no nid blong gohed moa? Si, yu mas gohed moa yet. Baptaes hem i stat blong rod nomo.

Nating se disaepol Timoti i wan Kristin elda finis, be Pol i talem long hem se hem i mas ‘putum tingting blong hem i stap strong’ long ol advaes we hem i kasem mo ol spesel wok we i stap long han blong hem. Yes, Timoti i mas “mekem ol wok ya” long fasin we ‘olgeta man oli save luk we hem i stap gohed gud long laef blong hem mo long wok blong hem.’ (1 Tim. 4:12-15) Nating sipos yumi jes stat blong wokbaot long rod blong trutok, no yumi folem Kristin fasin blong laef plante yia finis, yumi mas wantem blong gohed moa.

Long Efesas 3:14-19, aposol Pol i talem se, hem i prea from ol Kristin brata blong hem. Hem i wantem we oli kasem save se trutok “i bigwan olsem wanem, mo i longfala olsem wanem, mo i hae olsem wanem, mo i dip olsem wanem.” Blong oli save mekem samting ya, Jisas i givim sam man olsem ol presen, we bambae oli tijim, oli stretem, mo oli bildimap kongregesen. Yumi save “gru blong kam bigman” long ol Kristin fasin, sipos yumi tingting dip long Tok blong God, mo yumi lesin long advaes blong olgeta we oli tijim ol narafala longtaem finis i kam.—Efes. 4:11-16.

Blong gru i kam bigman, yu mas ‘kam olsem niufala man long paoa we i stap wok long tingting blong yu.’ Hemia i min se tingting blong yu i mas laenap wetem tingting blong God mo Kraes. Mo tu, yu mas gohed oltaem blong kasem save long tingting blong tufala, nao bambae yu yu naf blong “putum niufala fasin blong laef” olsem klos blong yu. (Efes. 4:23, 24, NW) ?Taem yu stadi long ol Gospel, yu yu tingbaot ol stori blong laef blong Kraes, olsem eksampol we yu save folem? ?Yu yu traem blong luksave sam spesel fasin blong Jisas, mo yu traehad blong folem olgeta long laef blong yu?—1 Pita 2:21.

Ol samting we yu yu stap tokbaot oli soemaot sipos yu stap gohed gud. Olgeta we oli putum niufala fasin blong laef olsem klos blong olgeta, oli no talem ol tok we i giaman mo oli no tok nogud long narafala, oli no tok swea, mo oli no tokbaot nogud saed blong evri samting. Defren olgeta, oli tokbaot samting we i save mekem ol man “oli kam strong moa . . . [mo ol tok we i] save givhan moa long ol man we oli harem.” (Efes. 4:25, 26, 29, 31; 5:3, 4; Jud 16) Ol ansa blong olgeta long ol miting blong kongregesen, mo ol storian blong olgeta wetem ol man wanwan mo long ol miting, oli soemaot se trutok i stap jenisim fasin blong olgeta.

Sipos yu yu no moa letem ‘ol giaman tijing oli tantanem yu yu go olbaot olsem wan kenu we solwota i stap sakem i go olbaot,’ hemia tu i soemaot se yu yu stap gohed gud. (Efes. 4:14) ?Yu yu mekem wanem taem yu harem sam niufala tingting blong ol man blong wol, sam plan we ol man blong wol oli wantem mekem i kamtru, mo sam niufala samting we man i save mekem blong spel mo pleplei? ?Yu yu harem se yu wantem spenem taem long ol samting ya, nao yu no moa gat plante taem blong spenem long ol samting we God i askem long yu blong mekem? Sipos yu mekem olsem, yu yu stap blokem yu wan blong yu no gohed gud. !I waes moa blong tekemaot taem we yu spenem long ol samting we oli no impoten, nao yu yusum taem ya blong fren gud wetem God!—Efes. 5:15, 16.

Wan narafala samting we i save givhan long yu blong yu luksave sipos yu stap gohed gud, hemia fasin we yu stap mekem long ol narafala. ?Yu yu lanem finis blong ‘kaen gud mo blong fogivim’ ol Kristin brata mo sista blong yu?—Efes. 4:32.

Long kongregesen mo long haos blong yu, yu mas soemaot se yu yu stap gohed gud blong mekem ol samting we Jehova i wantem. Samting ya i mas klia taem yu stap long skul tu, mo long ol pablik ples, mo long ples blong wok. (Efes. 5:21 kasem Efes. 6:9) Sipos yu luk se ol fasin we God i glad long olgeta oli stat kamaot moa long laef blong yu nomata weples yu stap long hem, hemia i min se yu stap gohed gud.

Yumi evriwan i gat gudhan mo waes we Jehova i givim long yumi blong mekem sam spesel samting. Mo hem i wantem we yumi yusum ol presen ya, blong yumi givhan long ol narafala. Long rod ya, Jehova i save yusum yumi blong soemaot gladhat blong hem long ol man. Aposol Pita i tokbaot samting ya taem hem i raetem se: ‘Long gladhat blong God, hem i givim ol defdefren kaen presen long yufala blong mekem ol wok blong hem. Yufala i mas yusum ol presen ya blong hem blong givgivhan long yufala.’ (1 Pita 4:10) ?Yu yu stap mekem wok ya we God i givim long yu?

Pita i gohed i talem se: “Sipos yufala i stap prij, yufala i mas talemaot ol tok we God i givim.” (1 Pita 4:11) Vas ya i soemaot gud se yumi wanwan i mas lukaot gud blong mekem toktok blong yumi i laenap wetem Tok blong God. Olsem nao, ol tok we yumi talem oli save leftemap nem blong God. I impoten tu blong lukaot long fasin blong yumi blong toktok, blong meksua se i leftemap nem blong Jehova. Trening we yu kasem long Tiokratik Skul i save givhan long yu blong yusum presen blong yu long rod ya. Olsem nao, yu leftemap nem blong God from fasin we yu mekem blong givhan long ol narafala. Ale, ?bambae yu luksave olsem wanem se yu stap gohed gud long Tiokratik Skul?

I nogud yu stap kaontem nomo hamas poen we yu finisim long Tiokratik Skul. Mo i nogud yu tingbaot nomo ol defren kaen tok we yu givim finis. I moa gud yu tingbaot wanem haf blong wok blong God we yu kam gud long hem finis from trening we yu kasem long Tiokratik Skul. Tiokratik Skul i rerem yumi blong yumi save karem moa frut long wok blong prij. Taswe i gud yu tingbaot se: ‘?Mi mi stap rerem gud toktok we mi talem long wok blong prij? ?Mi mi lanem finis blong soemaot long ol man se mi stap tingbaot laef mo trabol blong olgeta wanwan? ?Blong wokem rod blong mekem visit long ol man, mi mi stap askem wan kwestin we mifala i save tokbaot nekis taem? ?Sipos mi mekem Baebol stadi long wan man, mi mi traehad blong kam gud moa long fasin blong tij, mo blong mekem trutok i kasem hat blong man ya?’

Yu no mas ting se taem yu kasem sam spesel wok, yu stap gohed gud. I no wok ya we i soemaot se yu stap gohed gud. Samting we i soemaot se yu stap gohed gud, hemia fasin blong yu blong mekem wok ya. Sipos oli givim wan tok long yu we i mas tijim ol man, yu save tingbaot se: ‘?Mi mi traehad blong yusum ol gudfala rod blong tij? ?Mi mi yusum ol save ya long fasin we bambae i givhan long ol man ya long laef blong olgeta?’

Advaes ya blong yusum gud presen we God i givim long yu, i soemaot se yu wan yu mas mekem sam samting. ?Yu yu stap mekem plan blong prij wetem ol narafala? ?Yu yu lukaot sam rod blong givhan long ol niuwan long kongregesen, wetem ol yangfala, ol olfala, mo olgeta we oli sik tu? ?Yu yu rere oltaem blong givhan blong klinim Haos Kingdom, mo blong givhan long ol defren wok long taem blong asembli? ?Long sam manis, yu yu joen long wok blong haftaem paenia? ?Yu yu naf blong mekem wok blong fultaem paenia, no blong muv i go long wan kongregesen we i nidim moa man blong prij? Sipos yu yu wan brata, ?yu stap traem blong wokem ol fasin we Baebol i talem se yu mas gat blong yu save kam wan man blong givhan no wan elda? Taem yu yu rere blong givhan long narafala mo yu glad blong mekem wok, hemia i soemaot se yu stap gohed gud.—Sam 110:3.

Yu no mas harem se yu no naf from we yu jes stat blong folem Kristin fasin blong laef. Tok blong God i “givim waes long olgeta we oli no waes.” (Sam 19:7; 119:130; Prov. 1:1-4) Taem yumi folem ol advaes blong Baebol, samting ya i givhan moa long yumi, i winim olgeta samting we yumi save lanem long plante yia. Hemia from we yumi yusum waes blong Jehova we i stret gud olgeta. Taem yumi stap gohed longtaem long wok blong Jehova, yumi kasem plante save, mo yumi save gat gudhan tu long wok blong hem. ?Yumi mekem olsem wanem blong yusum gud ol samting ya?

Sipos wan man i fesem plante defren samting finis long laef blong hem, maet hem i ting se: ‘Samting ya i hapen long mi finis. Mi mi save wanem blong mekem.’ ?Olsem wanem? ?I waes blong tingting olsem? Ol Proveb 3:7 i givim woning se: “I nogud yu ting se yu yu wan waes man.” I tru se sipos yumi fesem plante samting long ol yia we oli pas, yumi luksave plante moa samting we yumi mas skelem taem yumi stretem wan trabol long laef blong yumi. Be ol samting we yumi fesem long laef oli mas mekem yumi luksave se yumi mas gat blesing blong Jehova blong yumi save win long laef. Taswe, yumi soemaot se yumi stap gohed gud taem yumi lukluk i go long Jehova blong lidim yumi long laef, be i no taem yumi fesem wan trabol wetem tingting ya se yumi naf finis. Yumi soemaot we yumi gohed gud taem tingting blong yumi i strong se i no gat wan samting i save hapen sipos Jehova i no letem. Mo tu, yumi gohed gud taem yumi trastem Papa blong yumi long heven mo yumi fren gud oltaem wetem hem.

Nating we tabu spirit i makemaot aposol Pol, mo hem i bigman finis long ol Kristin fasin, be hem i luksave se hem i mas gohed yet blong “traehad oltaem blong kasem” praes ya, hemia laef we i no save finis. (Fil. 3:13-16) ?Yu yu gat tingting olsemia?

?Yu yu kam gud finis long wanem samting? Blong luksave samting ya, yu mas jekemap sipos yu stap putum ol niufala fasin olsem klos blong yu. Yu jekem sipos yu stap obei fulwan long Jehova olsem King blong yu. Yu jekem sipos yu stap yusum ol presen we Jehova i givim long yu blong yu ona long hem. Taem Tiokratik Skul i givhan long yu, sloslo fasin blong yu blong toktok mo tij bambae i stret long ol fasin we Tok blong God i talem. Yu mas putum tingting blong yu oltaem long ol fasin ya we oli stap soemaot se yu gohed gud. Yes, yu mas glad tumas long ol fasin ya, nao ol man bambae oli luksave se yu yu stap gohed gud.