Ol Yangfala Oli Askem . . .

?Olsem Wanem Prea i Save Givhan Long Mi?

“Prea nao i givhan long mi blong stretem laef blong mi.”—Brad.a

PLANTE yangfala oli stap prea, bitim wanem we yumi tingting. Wan stadi we oli mekem long ol yangfala long Amerika we oli gat 13 kasem 17 yia, i soem se bitim stret haf (56 pesen) blong olgeta oli prea bifo we oli kakae. Stadi blong ol yangfala we oli bigwan moa i soemaot se 62 pesen blong olgeta oli prea evri dei.

Nating se i olsem, prea i olsem wan kastom nomo long plante yangfala. Smol nomo oli gat “stret save blong God” we Baebol i tokbaot. (Kolosi 1:9, 10, NW ) From samting ya, God i no gat bigfala paoa long laef blong olgeta. Samfala oli askem long ol yangfala sipos oli bin prea long God samtaem blong i givhan long olgeta blong mekem wan impoten disisen. Wan gel i ansa se: “Oltaem mi askem long God blong lidim mi blong jusum stret rod long laef.” Be hem i gohed se: “Mi no save tingbaot naoia wan disisen we mi bin mekem.” !I klia from wanem plante yangfala oli no bilif se prea i gat paoa mo se i save givhan long olgeta!

Be, plante taosen yangfala oli olsem Brad we yumi tokbaot fastaem finis. Oli luksave olsem wanem prea i bin givhan long prapa laef blong olgeta. !Yu tu yu save mekem olsem! Wan stori we i kamaot long Wekap! finis i tokbaot from wanem yumi save sua se God bambae i lesin long ol prea blong yumi.b Naoia, kwestin i stap se, ?Olsem wanem prea i save givhan long yu? Fastaem, bambae yumi tokbaot olsem wanem God i stap ansa long ol prea blong yumi.

God i Ansa Olsem Wanem

Long saed blong sam man blong bilif we Baebol i tokbaot, God i ansa stret long prea blong olgeta, mo sam samtaem hem i mekem merikel blong ansa. Olsem nao, taem King Hesekia i kasem save se bambae hem i ded from sik blong hem, hem i prea wetem fulhat blong hem, blong askem God blong sevem hem. God i ansa se: “Mi mi harem prea blong yu, mo mi luk we yu harem nogud tumas, yu stap krae. Bambae mi mekem yu yu kam oraet bakegen.” (2 King 20:1-6) Sam narafala man mo woman we oli onagud long God tu, oli bin luk we God i mekem wan samting blong halpem olgeta.—1 Samuel 1:1-20; Daniel 10:2-12; Ol Wok 4:24-31; 10:1-7.

Be i no plante taem we God i ansa stret long prea blong ol man. Samting ya i sem mak long taem blong Baebol tu. God i no stap mekem merikel blong ansa long bighaf blong ol man blong hem. Be, hem i ansa taem hem i ‘mekem olgeta oli waes, oli luksave olgeta samting we Hem i wantem, blong bambae oli savegud olgeta.’ (Kolosi 1:9, 10) Yes, God i givhan long ol man blong hem taem hem i mekem olgeta oli strong long saed blong bilif mo strong blong mekem ol gudfala fasin. Hem i givim waes mo save, nao oli naf blong mekem ol gudfala disisen. Taem ol Kristin oli kasem traem, maet God i no tekemaot traem ya. !Be, hem i givim ‘paoa ya we i bigwan tumas i blong Hem, i no blong olgeta,’ nao oli naf blong stanap strong!—2 Korin 4:7; 2 Timoti 4:17.

Tede tu, ating God bambae i no mekem wan bigfala samting blong ansa long prea blong yu. Olsem long taem bifo, Hem bambae i givim tabu spirit blong mekem yu yu strong, nao bambae yu yu naf blong winim ol trabol we oli kasem yu. (Galesia 5:22, 23) Blong soemaot poen ya, bambae yumi tokbaot fo rod we prea i save givhan long yu.

Givhan Blong Mekem Disisen

Karen i stap fren wetem wan boe we i luk olsem se hem i stap traehad long Kristin laef blong hem. Karen i talem se: “Oltaem hem i stap talem long mi se hem i wantem kam wan elda long kongregesen.” Hemia i gud. Be “wetem samting ya, hem i tokbaot wan bisnes blong winim mane we hem i jes statem, mo olting we bambae hem i pem blong mi. Mi stat blong tingting se hem i stap giaman.” Karen i prea long saed blong samting ya. “Mi askem long Jeova blong openem ae blong mi mo soem long mi wanem samting mi mi nidim blong save long saed blong boe ya.”

Sam samtaem, fasin blong prea nomo i save givhan long yumi. Hem i save halpem yumi blong tingting gud long wan samting mo kasem tingting blong Jeova long saed ya. Be Karen i nidim advaes tu. ?God i mekem wan merikel blong ansa long prea blong hem? Tingbaot stori blong King Deved long Baebol. Deved i gat wan fren we hem i trastem gud, nem blong hem Ahitofel. Be Deved i faenemaot se Ahitofel i stap givim advaes long Absalom, pikinini blong Deved we i man blong giaman stret. Ale, Deved i prea se: “!Hae God, plis yu tanem ol gudfala toktok blong Ahitofel ya i kam rabis!” (2 Samuel 15:31) Mo Deved i wok folem prea ya blong hem. Hem i givim wan wok long fren blong hem Husae, i se: “Yu yu mas traehad blong kafsaedem ol toktok we man ya Ahitofel i stap givim long hem.” (2 Samuel 15:34) Long sem fasin, Karen i wok folem prea blong hem. Hem i go luk wan Kristin elda we i save boefren blong hem. Elda ya i talem sem samting we i stap finis long tingting blong Karen. Boefren blong hem i no stap gohed gud long Kristin laef blong hem.

Karen i talem se: “Samting ya i mekem mi mi luksave bigwan se prea i gat paoa.” Sore tumas, boe ya we Karen i bin fren wetem hem, hem i stop blong mekem wosip long Jeova, mo hem i ronem mane. Karen i talem se: “Sipos mi mi mared wetem hem, ating naoia mi stap kam long ol Kristin miting mi wan nomo.” Prea i givhan long Karen blong jusum stret rod.

Givhan Blong Blokem Filing

Ol Proveb 29:11 i talem se: “Man we i no gat hed, hem i save soemaot long fes blong ol man we hem i kros, be man we i gat hed, tingting blong hem i longfala, mo hem i save holem kros blong hem.” Trabol se, plante man tede oli gat ol bigfala wari, mo oli save kam kros gogo oli faerap mo mekem wan bigfala trabol i kamaot. Yangfala Brian i tingtingbak long laef blong hem, i se: “Mi bin gat wan trabol wetem wan man long ples blong wok. Ale, wan dei hem i karemaot wan naef, i poenem long mi.” ?Sipos samting ya i kamaot long yu, bambae yu mekem wanem? Brian i prea. Hem i talem se: “Jeova i givhan long mi blong gat kwaet tingting, nao mi toktok gud long man ya. Ale, hem i lego naef ya i foldaon long graon, mo hem i ronwe.” From we Brian i naf blong blokem ol filing blong hem mo no faerap long kros, ating samting ya i sevem laef blong hem.

Maet wan man i no poenem naef long yu. Be bambae i gat plante samting i kamaot long laef blong yu we i mekem se yu mas blokem filing blong yu. Prea i save givhan long yu blong gat kwaet tingting.

Givhan Blong Winim Wari

Barbara i tingbaot “hadtaem” we hem i kasem sam yia i pas. Hem i talem se: “Wok blong mi, famle blong mi, ol fren blong mi, evri samting i go nogud. Mi no moa save wanem blong mekem.” Barbara i prea blong askem God blong givhan long hem. Be hem i gat wan problem. Hem i se: “Mi no bin save wanem samting mi mas askem long Jeova. Ale, mi girap mi askem hem blong putum pis long tingting blong mi. Evri naet mi askem long hem blong givhan long mi blong no moa wari.”

?Prea i givhan long hem olsem wanem? Hem i talem se: “Sam dei biaen, mi luksave se mi no moa tingbaot mo wari tumas long ol trabol blong mi, nating se trabol ya i stap yet.” Yes, Baebol i promes se: “Yufala i mas askem long hem [God], . . . Nao pis we hem i givim, we i bigfala moa, i bitim save blong yumi, bambae hem i putum long tingting blong yufala, blong lukaot gud long yufala ya we i joen long Jisas Kraes.”—Filipae 4:6, 7.

Givhan Blong Kam Klosap Long God

Tingbaot wan yangfala we nem blong hem Paul. Hem i se: “Mi mi go stap wetem sam famle blong mi. Wan naet, tingting blong mi i foldaon olgeta. Mi jes finis long hae skul, mo mi harem nogud from mi no moa save joen wetem ol fren blong mi. Long naet ya, mi tingting bak long ol gudfala taem we mifala i bin pasem tugeta, nao wota i ron long ae blong mi.” ?Pol i mekem wanem? Hemia fastaem long laef blong hem we i prea wetem fulhat blong hem. Hem i se: “Mi talemaot evri samting we i stap long hat blong mi mo mi askem Jeova blong givim paoa long mi mo putum pis long tingting blong mi.”

?Wanem i kamaot? Paul i tingtingbak, i se: “Taem mi wekap long nekis moning, mi harem se tingting blong mi i spel bitim ol narafala taem long laef blong mi. Bifo, tingting blong mi i trabol bitim mak. Be naoia, mi kasem ‘pis we God i givim, we i bigfala moa, i bitim save blong yumi.’ ” Afta we tingting blong Paul i kam kwaet, ol filing oli no moa bos long hem nao hem i save skelem gud ol samting. Hem i luksave se ‘ol gudfala taem’ wetem ol fren blong hem bifo, oli no rili gud tumas. (Prija 7:10) Ol “fren” we hem i stap sore long olgeta, oli bin pulum hem long rod we i no stret.

Samting we i impoten moa, Paul i harem save se Jeova i stap lukaot gud long hem. Hem i luksave trutok ya long Jemes 4:8 se: “Yufala i mas stap klosap long God, nao hem bambae i kam stap klosap long yufala.” Taem Paul i luksave samting ya, laef blong hem i jenis bigwan. Hem i wantem tumas blong putum Jeova long fas ples long laef blong hem, mo givim ful laef blong hem i go long Jeova.

!Toktok Long God!

Ol stori ya oli soemaot gud se prea i save givhan long yu. I tru, samting ya bambae i kamaot nomo taem yu yu rili wantem save God mo kam wan fren blong hem. Sore tumas, plante yangfala oli no ting se samting ya i impoten. Carissa i gruap long wan Kristin famle. Be hem i talem se: “Mi ting se long ol laswan yia nomo mi kasem save fulwan olsem wanem nambawan fasin ya blong fren wetem Jeova i impoten tumas.” Brad, we yumi tokbaot fastaem finis, i gruap long Kristin bilif, be hem i lego trufala wosip blong sam yia. Hem i talem se: “Taem mi luksave bigfala samting we mi lusum, long taem ya nao mi jes tanraon mo kambak long Jeova. Naoia mi save se taem yumi no fren wetem Jeova, laef blong yumi i no gat lav long hem mo i blong nating nomo.”

Be yu no mas wet se wan trabol i kasem yu, blong yu kam klosap long God. !Naoia nomo, yu mas stat blong toktok wetem hem, mo yu mas mekem samting ya oltaem! (Luk 11:9-13) ‘Talemaot ol trabol blong yu long hem.’ (Ol Sam 62:8) !I no longtaem, bambae yu luksave se prea i rili save givhan long yu!

[Futnot]

[Bokis/Foto blong pija long pej 17]

Prea i Save Givhan Long Yu

● Blong mekem ol gudfala disisen

● Blong gat kwaet tingting taem trabol i kasem yu

● Blong no wari tumas

● Blong kam klosap moa long God