Wan Kwestin

?From wanem Pol i raetem long saed blong Kristin waef se: “Taem hem i bonem pikinini, God bambae i lukaot gud long hem, i sevem hem”?​—1 Timoti 2:15.

?Ol vas raonabaot oli soemaot wanem mining blong ol tok ya blong Pol? Tabu spirit i pulum Pol blong givim advaes long saed blong fasin blong ol Kristin woman long kongregesen. Hem i raetem se: “Mi wantem se ol woman oli putum klos blong olgeta we i stret nomo, i no blong pulum ae blong man, mo i no blong flas. Bambae oli no mas mekem hea blong olgeta i flas tumas, mo oli no mas putum ol flas samting we oli wokem long gol mo perel, mo ol dres ya we praes blong olgeta i antap tumas, blong mekem ol man oli glad long olgeta. Olgeta oli mas mekem ol gudgudfala wok, from we hemia i prapa fasin blong ol woman we oli stap talem se oli lavem God.” (1 Timoti 2:​9, 10) Pol i stap talem long ol Kristin sista blong hem se oli mas putum klos we i stret nomo, oli no mas bitim mak taem oli flasem bodi blong olgeta, mo oli mas mekem ol gudgudfala wok.

Biaen, Pol i tokbaot plan ya we i stap long kongregesen se ol man nomo oli save tij. Hem i se: “Mi mi no save letem ol woman oli tij, mo oli kam bos long ol man. Oli mas stap kwaet nomo.” (1 Timoti 2:12; 1 Korin 11:3) Blong soem stamba blong plan ya, hem i tokbaot Adam mo Iv. Hem i talem se Setan i no trikim Adam, be Iv nao we ‘Setan i trikim hem nao hem i brekem loa blong God.’ ?Kristin woman i mas mekem wanem blong i no foldaon long sem trik ya we Iv i foldaon long hem? Pol i ansa se: “Sipos woman i holemstrong fasin blong bilif, mo fasin blong lavem man, mo hem i kam wan kwaet woman we i tabu, i blong God, taem hem i bonem pikinini, God bambae i lukaot gud long hem, i sevem hem.” (1 Timoti 2:​14, 15) ?Ol tok ya blong Pol oli minim wanem?

Sam man blong tanem Baebol, oli tanem ol tok ya blong minim se woman i mas bonem pikinini sipos i wantem se God i sevem hem. Traem ridim vas ya long Baebol ya Today’s English Version: “Sipos woman i wantem se God i sevem hem, hem i mas bonem pikinini.” Be hemia i no stret mining blong ol tok blong Pol. Plante vas blong Baebol oli soemaot se sipos yumi wantem we God i sevem yumi, yumi mas savegud Jeova, bilif long Jisas, folem bilif ya, mo mekem ol gudfala wok we oli soemaot bilif. (Jon 17:3; Ol Wok 16:​30, 31; Rom 10:10; Jemes 2:26) Mo tu, Pol i no minim se sipos wan woman i Kristin woman, samting ya bambae i mekem se God i lukaot gud long hem taem i bonem pikinini. Nogat. Plante woman oli no kasem trabol taem oli bonem pikinini, nating sipos oli gat bilif no nogat. Be sore tumas, sam woman oli ded taem oli bonem pikinini, nating sipos oli gat bilif no nogat.​—Jenesis 35:​16-18.

Long semfala leta ya, Pol i givim sam moa advaes long saed blong ol woman. Ol tok ya i save givhan long yumi blong kasem stret mining blong vas ya. Hem i givim woning long ol yangfala wido woman we oli stap “go olbaot long ol haos blong storian blong nating nomo. Mo biaen, bambae oli save kam mowas, nao oli save kam woman blong mekem toktok, we oli stap go insaed long bisnes blong ol narafala man, nao oli stap talem ol samting we oli no gat raet blong talem.” ?Pol i givim wanem advaes long olgeta ya? Hem i gohed olsem: “Mi mi ting se i moa gud sipos ol yangfala wido oli mared bakegen, oli gat pikinini, nao oli stap lukaot long ol haos blong olgeta. Long fasin ya, bambae oli no save givim janis long ol badfren blong yumi blong oli tok nogud long yumi.”​—1 Timoti 5:​13, 14.

Pol i wantem makem strong, ol gudfala wok we ol woman oli stap mekem insaed long famle. Sipos woman i ‘gat pikinini, i stap lukaot long haos blong hem,’ mo long semtaem hem i “holemstrong fasin blong bilif, mo fasin blong lavem man, mo hem i wan kwaet woman we i tabu, i blong God,” ale, ol nogud fasin oli no save pulum hem. Bambae hem i stap strong long saed blong spirit, yes, God bambae i “lukaot gud” long hem. (1 Timoti 2:15) Fasin ya bambae i givhan long plante yangfala woman blong ronwe long ol trap blong Setan.

Ol tok ya we Pol i raetem i go long Timoti oli gud long yumi evriwan, ol man mo ol woman tu. Oli mekem yumi tingbaot, se i gud we yumi yusum taem blong yumi blong mekem ol gudgudfala wok. Tok blong God i givim advaes long ol Kristin se: “Yufala i mas lukaot gud long ol fasin blong yufala. Bambae yufala i no mekem fasin blong man we i no gat hed. Yufala i mas mekem fasin blong man we i waes.”​—Efesas 5:​15.