Traehad Blong Folem Plan Blong God Tede

“[Kraes] i ded blong sevem olgeta man, blong bambae ol man . . . oli no moa laef blong mekem ol wok blong olgeta nomo. . . . Oli laef blong mekem ol wok blong hem.”—2 KORIN 5:15.

 1. Tokbaot samting we i hapen long wan misinari long kantri we hem i stap prij long hem.

WAN misinari we nem blong hem Aaron,a i tokbaot se: “Taem faet i kamaot long wan kantri blong Afrika, mifala i no moa kasem nius blong wan smol kongregesen we i stap hem wan, longwe long taon. Mi mo sam fren blong mi, mifala i mas lukaot long ol nid blong ol brata mo sista long kongregesen ya, taswe taem faet ya i finis, trak blong mifala nao i faswan blong kasem vilej ya. Mifala i karem kakae, klos, mo ol buk we oli tokbaot Baebol, mo mifala i karem vidio kaset ya, Jehovah’s Witnesses—The Organization Behind the Name.b Blong soem vidio kaset ya, mifala i yusum wan bigfala haos natanggura we oli stap lukluk vidio mo televisin insaed long hem. I gat plante man we oli intres oli kam hivap long haos ya gogo mifala i mas soem vidio kaset ya tu taem. Plante man oli stat blong stadi Baebol afta we oli wajem vidio kaset ya. I klia se ol traehad blong mifala oli no blong nating nomo.”

 2. (a) ?From wanem ol Kristin oli yusum laef blong olgeta blong mekem wok blong God? (b) ?Wanem ol kwestin we bambae yumi tokbaot naoia?

² ?From wanem Aaron mo ol fren blong hem, oli mekem bigfala wok ya? From we oli gat tangkiu long ransom sakrefaes blong Jisas Kraes, nao oli givim laef blong olgeta i go long God, mo oli wantem yusum laef blong olgeta long fasin we i laenap wetem plan blong God. Olgeta Kristin we oli givim laef blong olgeta i go long God, oli mekem olsem Aaron mo ol fren blong hem. Oli jusum blong “no moa laef blong mekem ol wok blong olgeta nomo,” be oli traem bes blong olgeta “from gud nius.” (2 Korin 5:15; 1 Korin 9:23) Oli save se taem rabis wol ya i finis, olgeta mane mo haenem long wol ya bambae oli no givhan long olgeta nating. From we oli laef mo oli gat gudfala helt, oli wantem yusum tufala samting ya long fasin we i laenap wetem plan blong God. (Prija 12:1) ?Olsem wanem yumi save mekem sem mak? ?Weples yumi save kasem paoa blong mekem olsem mo blong yumi no fraet? ?Mo wanem ol defren rod we yumi save folem blong mekem wok blong God?

Gohed Blong Kasem Ol Mak We Oli Save Givhan Long Yu

 3. ?Wanem ol mak we yumi mas kasem sipos yumi wantem mekem samting we God i wantem?

³ Long tingting blong ol trufala Kristin, wok ya blong mekem samting we God i wantem, i wan wok we oli mas gohed long hem long ful laef blong olgeta. Plante taem wok ya i stat taem oli kasem ol mak olsem joen long Tiokratik Skul, ridim Baebol evri dei, joen long wok blong prij, mo gohed gud kasem baptaes. Taem yumi stap gohed olsem, yumi tingbaot ol tok ya blong aposol Pol we i talem se: “Yu mas mekem ol wok ya, mo yu mas putum tingting blong yu i stap strong blong mekem olgeta samting ya, blong bambae olgeta man oli save luk we yu stap gohed gud long laef blong yu mo long wok blong yu.” (1 Timoti 4:15) Taem yumi gohed gud olsem, hemia i no blong leftemap yumi wan bakegen, be i soemaot se yumi gat strong tingting blong mekem samting we God i wantem mo yumi no tingbaot yumi nomo. Taem yumi folem rod ya, yumi soem se yumi letem God i lidim yumi long evri haf blong laef blong yumi, mo God i nafgud blong mekem olsem, i bitim yumi.—Ol Sam 32:8.

 4. ?Olsem wanem yumi save winim fraet blong yumi?

⁴ Sipos yumi fraet blong mekem wan desisen no yumi wari tumas long saed blong yumi wan, hemia i save blokem yumi blong gohed gud long wok blong God. (Prija 11:4) Taswe, bifo we yumi save faenem trufala glad long wok blong God mo givhan long ol narafala, fastaem yumi mas winim ol fraet mo wari blong yumi. Tingbaot Erik. Hem i gat tingting blong joen long wan kongregesen we oli toktok narafala lanwis. Be Erik i wari mo i stap tingting se: ‘?Olsem wanem? ?Olgeta long kongregesen ya bambae oli joengud wetem mi? ?Bambae mi mi laekem ol brata mo sista longwe? ?Bambae olgeta oli laekem mi?’ Erik i talem se: “Biaen, mi kasem save se mi mas tingbaot ol brata sista moa, i bitim we mi tingbaot mi wan. Mi mekemap tingting blong mi blong no moa wari, mo blong putum tingting blong mi i stap strong long ol samting we bambae mi mekem blong givhan long ol narafala. Mi prea blong Jeova i givhan long mi, afta, mi gohed wetem plan blong mi. Naoia mi kasem bigfala glad long wok we mi mekem long ples ya.” (Rom 4:20) Yes, moa we yumi mekem wok blong God mo givhan long ol narafala i bitim we yumi tingbaot yumi wan, moa we bambae yumi kasem glad mo yumi haremgud.

 5. ?From wanem yumi nidim blong mekem wan gudfala plan sipos yumi wantem laef folem plan blong God? Talem wan stori.

⁵ Blong mekem laef blong yumi i laenap gud wetem plan blong God, yumi nidim blong mekem wan gudfala plan long ol wok we yumi wantem mekem. Yumi waes sipos yumi no gat tumas kaon we oli save mekem se yumi kam slef blong wol ya, nao yumi no moa gat taem blong mekem wok blong God. Baebol i talem se: “Sipos yu kaon long wan man, bambae yu kam slef blong hem.” (Ol Proveb 22:7) Sipos yumi trastem Jeova mo putum ol samting long saed blong spirit long fasples long laef blong yumi, hemia bambae i givhan long yumi blong putum tingting blong yumi long ol samting we oli moa impoten. Tingbaot man ya Guoming mo tufala sista blong hem. Trifala i stap wetem mama blong trifala long wan ples we i sas blong rentem wan haos mo i no isi blong faenem wan wok we i save stap longtaem. I no oltaem we trifala evriwan i gat wok, be trifala i gat evri samting we oli nidim from we trifala i lukaot gud blong no westem mane, mo trifala evriwan oli joen blong pem samting we oli nidim long haos. Guoming i talem se: “Samtaem i no mitrifala evriwan we i karem pei. Be nating, mitrifala i naf blong gohed long wok blong paenia mo blong lukaot gud long mama blong mitrifala. Mitrifala i glad se mama i no wantem we mitrifala i lego ol wok long saed blong spirit, blong mitrifala i wok blong pem ol sas samting we mifala i no rili nidim.”—2 Korin 12:14; Hibrus 13:5.

 6. ?Wanem eksampol i soem se yumi naf blong mekem laef blong yumi i laenap wetem plan blong God?

⁶ Sipos yu stap spenem plante taem long wok blong kasem mane no long sam narafala wok bakegen, yu mas mekem sam bigfala jenis blong bambae yu save putum plan blong God long fasples long laef blong yu. I nidim taem blong mekem ol jenis olsem, mo sipos yu mekem sam mastik taem yu stat blong mekem ol jenis ya, hemia i no min se yu yu no naf blong jenis. Tingbaot man ya Koichi, we problem blong hem hemia se hem i spenem fulap taem long ol pleplei. Taem Koichi i yangfala, hem i bin stadi Baebol, be blong plante yia nao hem i westem tumas taem long ol vidio gem. Wan dei Koichi i stap tingting se: ‘?Mi mi stap mekem wanem ya? !Mi mi gat bitim 30 yia finis, be mi no mekem wan gudfala samting nating long laef blong mi!’ Biaen, Koichi i gohed bakegen blong stadi Baebol mo hem i letem kongregesen i givhan long hem. Nating se Koichi i tekem longtaem blong jenisim ol samting long laef blong hem, be hem i no lego. Hem i gohed blong prea, mo ol narafala oli leftemap tingting blong hem wetem lav, nao Koichi i naf blong winim fasin ya we i stap holemtaet hem. (Luk 11:9) Tede Koichi i glad blong wok olsem wan man blong givhan long kongregesen.

Lanem Fasin Blong Skelemgud Ol Samting

 7. ?From wanem yumi mas gat fasin blong skelemgud ol samting taem yumi mekem wok blong God?

⁷ I nidim bigfala traehad blong yumi laef folem plan blong God. Yumi neva mas kam les we yumi no wantem wok wetem ful laef blong yumi. (Hibrus 6:11, 12) Be Jeova i no wantem tu, we yumi kam taed bitim mak long bodi, tingting mo filing blong yumi. Yumi no naf blong mekem wok blong God long prapa paoa blong yumi. Taem yumi gat tingting daon blong luksave samting ya, yumi stap leftemap nem blong God mo yumi soem tu se yumi gat fasin blong skelemgud ol samting. (1 Pita 4:11) Jeova i promes blong givim paoa we yumi nidim blong mekem wok blong hem. Be yumi no mas fosem bodi, tingting, mo filing blong yumi, gogo yumi bitim mak blong mekem samting we God i wantem yumi blong mekem. (2 Korin 4:7) Sipos yumi wantem gohed blong mekem wok blong God we bodi blong yumi i no kam taed mo slak, yumi mas skelemgud olsem wanem yumi yusum paoa blong yumi.

 8. ?Wanem i hapen taem wan yangfala Kristin i traem blong givim bes blong hem long wol mo long Jeova tu? ?Wanem jenis we hem i mekem?

⁸ Tingbaot woman ya Ji Hye we i laef long Is Esia. Blong tu yia, hem i paenia mo long semtaem hem i gat wan wok we i tekem bighaf blong taem mo paoa blong hem. Ji Hye i talem se: “Mi mi traem blong givim bes blong mi long Jeova mo long wol tu. Evri naet mi gat faef aoa nomo blong slip. Biaen, mi no moa gat paoa blong tingting long ol samting long saed blong trutok, mo mi no moa glad long wok we mi mekem blong Jeova.” Ji Hye i wantem mekem wok blong Jeova long ‘olgeta hat blong hem, olgeta laef blong hem, olgeta tingting blong hem, mo olgeta paoa blong hem.’ Taswe hem i lukaot wan narafala wok we i no kakae tumas taem mo paoa blong hem. (Mak 12:30) Hem i talem se: “Nating se famle blong mi i pusum mi blong kasem moa mane, be mi traehad blong putum plan blong God long fasples long laef blong mi. Mi mi winim naf mane blong kasem ol samting we mi nidim, olsem ol klos we i stret blong werem. !Mo mi haremgud from we mi gat moa taem blong slip! Naoia mi glad long wok blong prij, mo fasin fren blong mi wetem Jeova i kam gud moa. Hemia i from we mi no moa spenem plante taem long ol samting we oli save pulum tingting blong mi i go long wol.”—Prija 4:6; Matiu 6:24, 28-30.

 9. ?Olsem wanem traehad we yumi mekem long wok blong prij i save gat paoa long ol narafala?

⁹ I no evri man we i save mekem wok blong God olsem wan man blong prij fultaem. Sipos yu yu olfala, yu stap siksik, no wan narafala samting i blokem yu, yu mas save se Jeova i laekem yu mo i tinghae long yu from we yu stap tru long hem, mo i tinghae long wanem wok we yu yu naf blong mekem wetem ful hat blong yu. (Luk 21:2, 3) Yumi evriwan, yumi no mas fogetem se ol traehad blong yumi oli save gat paoa long ol narafala, nating sipos oli smol nomo. Olsem nao, tingbaot sipos yumi stap prij be yumi no faenem wan man we i intres. Nating se i olsem, afta we yumi aot, maet ol man blong haos oli tokbaot long ol narafala se yumi bin go long haos blong olgeta. !Maet oli tokbaot yumi blong plante aoa no plante dei! !Mo samfala oli mekem olsem, nating we oli no bin openem doa long yumi! Yumi mas save se i no evri man we bambae oli intres long gud nius, be samfala bambae oli intres. (Matiu 13:19-23) Maet sam narafala bambae oli intres taem laef long rabis wol ya i kam moa nogud, no taem ol samting long laef blong olgeta i jenis. Nomata se i olsem wanem, be taem yumi traem bes blong yumi long wok blong prij, yumi stap mekem wok blong God. Yumi “stap joen wetem God blong mekem wok blong hem.”—1 Korin 3:9.

10. ?Wanem janis we evriwan long kongregesen oli gat?

¹⁰ Mo tu, yumi evriwan yumi save givhan long ol memba blong famle blong yumi mo long ol Kristin brata sista. (Galesia 6:10) Traehad blong yumi i save gat bigfala paoa long ol narafala mo i save givhan long olgeta blong longtaem. (Prija 11:1, 6) Taem ol elda mo ol man blong givhan oli mekem gud wok blong olgeta, kongregesen i save kam strong mo gohed gud, mo hemia i openem rod blong ol Kristin oli mekem moa wok. Yumi sua se sipos yumi “gat plante wok blong mekem long wok blong Masta,” wok blong yumi “i no blong nating nomo.”—1 Korin 15:58, NW.

Traehad Blong Mekem Plan Blong God i Kam Bigfala Samting Long Laef Blong Yu

11. ?Yumi gat wanem janis blong wok long ol narafala kongregesen?

¹¹ Yumi ol Kristin, yumi laekem laef mo yumi wantem leftemap nem blong God long evri samting we yumi mekem. (1 Korin 10:31) Yumi mas traehad fulwan long wok blong talemaot gud nius, mo tijim ol narafala blong oli folem oda blong Jisas. Bambae yumi faenem se samting ya i openem rod blong yumi mekem plante naranarafala wok blong God, mo ol wok ya oli save givim glad long yumi tu. (Matiu 24:14; 28:19, 20) Yumi joen wetem kongregesen long ples blong yumi blong mekem wok blong God. Be yumi save gat plante janis tu blong wok long ol ples we i nidim moa man blong prij, maet long wan narafala teritori, kantri, no wan kongregesen we i toktok narafala lanwis. Ol elda mo ol man blong givhan we oli nafgud, mo we oli no mared yet, oli save joen long Ministeriol Trening Skul, mo biaen oli save go wok long ol kongregesen we oli nidim moa elda no man blong givhan, maet long kantri blong olgeta nomo, no long narafala kantri. Olgeta we oli mared mo oli joen long wok blong prij fultaem oli save kasem trening long Gilead Skul, blong oli kam misinari mo oli go wok long ol narafala kantri. Mo i nidim plante man yet blong mekem ol defren wok long ol haos Betel mo blong bildim mo fiksimap ol haos wosip mo ol branj ofis.

12, 13. (a) ?Olsem wanem yu save jusum rod we bambae yu folem blong mekem wok blong God? (b) Tokbaot olsem wanem gudhan we man i kasem long wan wok i save givhan long hem long wan narafala wok bakegen.

¹² ?Weswan long ol rod ya blong mekem wok blong God we bambae yu yu traehad blong folem? Yu yu wan man blong wok blong Jeova we yu givim laef blong yu i go finis long hem, taswe oltaem yu mas lukluk i go long hem mo ogenaesesen blong hem blong oli lidim yu. ‘Spirit blong hem i gud tumas’ mo bambae i givhan long yu blong tekem stret desisen. (Nehemaea 9:20) Plante taem, wan wok i openem rod i go long wan narafala wok bakegen. Taem yu stap mekem wan wok, nao yu gat save mo gudhan long hem, hemia i save givhan long yu blong mekem wan narafala wok biaen.

¹³ Tingbaot Dennis mo waef blong hem, Jenny. Plante taem tufala i joen long wok blong bildim ol Haos Kingdom. Afta we hariken Katrina i kilim saot blong Yunaeted Stet, tufala i joen blong givhan long olgeta we oli nidim help. Dennis i talem se: “Mitufala i yusum gudhan we mitufala i kasem long wok blong bildim ol Haos Kingdom blong givhan long ol brata sista, mo mitufala i glad tumas from. Taem olgeta we mifala i givhan long olgeta oli soem tangkiu, hemia i rili tajem hat blong mitufala. Bighaf blong ol grup we ol man oli stanemap blong givhan long taem blong ol disasta, oli no mekemgud wok ya blong bildim bakegen ol haos we hariken i spolem. Be ol Witnes blong Jeova oli riperem mo bildim bakegen bitim 5,300 haos wetem plante Haos Kingdom. Ol man oli luk samting ya mo naoia oli intres bigwan long gud nius blong Kingdom.”

14. ?Wanem samting we yu mas mekem sipos yu wantem joen long wok blong fultaem paenia?

¹⁴ ?Olsem wanem? ?Yu yu save traehad blong kam wan fultaem paenia mo folem plan blong God long rod ya? Sipos yu mekem olsem, i sua se bambae yu kasem plante blesing. Sipos ol samting long laef blong yu naoia oli mekem se yu no save joen long wok ya, ating yu save jenisim sam samting. I gud yu mekem olsem Nehemaea. Taem Nehemaea i wantem tumas blong mekem wan impoten wok, hem i prea long Jeova mo i talem se: “Plis yu . . . mekem mi mi win tede.” (Nehemaea 1:11) Biaen, yu mas trastem Jeova we i “stap ansa long ol prea,” nao yu wok folem prea blong yu. (Ol Sam 65:2) Sipos yu wantem se Jeova i blesem ol traehad blong yu blong mekem moa long wok blong hem, fastaem yu mas mekem ol traehad ya. Taem yu tekem desisen finis se bambae yu joen long wok blong fultaem paenia, yu mas wok folem desisen blong yu. Taem ol yia oli pas, bambae yu kam gud moa long wok ya, mo glad blong yu bambae i kam bigwan moa.

Wan Laef We i Rili Gat Mining

15. (a) ?Sipos yumi toktok long ol man we oli mekem wok blong God blong plante yia finis mo yumi ridim stori blong sam long olgeta, olsem wanem oli save givhan long yumi? (b) Tokbaot wan stori olsem, we yu luk se i leftemap tingting blong yu.

¹⁵ ?Wanem frut we bambae yu yu kasem sipos yu folem plan blong God long laef blong yu? Traem storian wetem olgeta we oli mekem wok blong God blong plante yia finis, antap moa olgeta we oli stap longtaem long wok ya blong fultaem paenia. !Laef blong olgeta ya i gat mining mo oli kasem plante rij blesing! (Ol Proveb 10:22) Bambae oli talem long yu se Jeova i neva lego olgeta, be hem i givhan oltaem long olgeta, nomata long gudtaem no long hadtaem, blong oli kasem ol samting we oli rili nidim, wetem plante narafala samting tu. (Filipae 4:11-13) Stat long 1955 kasem 1961, i gat wan haf we i kamaot oltaem long Wajtaoa (Franis/Inglis), we stamba tok blong hem se “Traehad Blong Mi Blong Mekem Se Laef Blong Mi i Gat Mining” (“Pursuing My Purpose in Life”). Long haf ya i gat stori blong ol man we oli bin mekem wok blong Jeova blong plante yia finis. Afta long taem ya, i gat plante narafala stori olsem we oli kamaot oltaem long magasin ya. Wanwan long ol stori ya i soemaot strong tingting we ol man ya oli gat blong wok, mo glad we oli kasem from. Hemia i mekem yumi tingbaot ol Kristin we Baebol i tokbaot long buk blong Ol Wok. Sipos yumi ridim ol gudfala stori olsem, bambae oli pulum yumi blong talem se: ‘!Hemia nao laef we mi tu mi wantem!’

16. ?Wanem i mekem se laef blong ol Kristin i gat mining mo oli glad?

¹⁶ Aaron, we yumi bin tokbaot long stat blong stadi ya, i talem se: “Long Afrika, plante taem mi mi mitim ol yangfala we oli wokbaot olbaot long kantri ya blong traem faenem mining blong laef. Bighaf blong olgeta i neva faenem mining ya. Be mi mo ol fren blong mi, mifala i stap traehad blong folem plan blong God long laef blong mifala, ale mifala i talemaot gud nius blong Kingdom. Mo mifala i glad tumas from ol hadwok we mifala i mekem, mo from we laef blong mifala i gat mining. Mifala i luk wetem prapa ae blong mifala olsem wanem yumi kasem moa glad taem yumi givim presen i go, i bitim we yumi kasem presen.”—Ol Wok 20:35.

17. ?From wanem yumi mas mekem laef blong yumi i laenap wetem plan blong God tede?

¹⁷ ?Olsem wanem long yu? ?Yu yu stap mekem wanem long laef blong yu? Sipos yu no putum sam mak we oli save givhan long yu blong laef folem plan blong God, bambae kwiktaem nomo ol narafala samting oli save kakae taem mo paoa blong yu. ?From wanem yu wantem westem gudfala laef blong yu blong ronem ol giaman samting we rabis wol ya blong Setan i leftemap? Klosap nao, taem blong “bigfala trabol” bambae i kamtru, nao ol sas samting blong wol ya wetem ol haenem blong hem bambae oli kam olsem nating nomo. Samting we bambae i impoten long taem ya, hemia fasin fren blong yumi wetem Jeova. !Long taem ya, bambae yumi glad tumas from we yumi bin mekem wok blong God mo yumi bin givhan long ol narafala, mo from we yumi mekem laef blong yumi i laenap fulwan wetem plan blong God!—Matiu 24:21; Revelesen 7:14, 15.

[Ol Futnot]

?Yu Yu Save Eksplenem?

• ?Wanem tingting blong Jeova long saed blong wok we yumi mekem blong hem?

• ?Olsem wanem fasin blong tingting gud mo blong skelemgud ol samting i save givhan long yumi blong mekem wok blong God mo givhan long ol narafala?

• ?Wanem ol janis we yumi gat blong mekem moa long wok blong God?

• ?Olsem wanem yumi save mekem se laef blong yumi tede i gat trufala mining?