Wan Kwestin

?Wanem pruf i stap blong soem se ol tok olsem “hem nomo i no save ded samtaem,” mo “i no gat man we i luk hem samtaem,” i no stap tokbaot Jeova God be i stap tokbaot Jisas?

Aposol Pol i raetem se: “Bambae hem i soemaot we hem i kamtru, be long prapa taem blong hem nomo. Hem i Bigfala Rula ya we i harem gud mo hem nomo i save rul. Hem i King blong olgeta king we oli stap rul. Mo hem i Masta blong olgeta masta we oli gat paoa. Hem nomo i no save ded samtaem, mo i stap long wan ples blong laet we ol man oli no save kasem. I no gat man we i luk hem samtaem, mo i no gat man we bambae i save luk hem samtaem.”​—1 Timoti 6:​15, 16, NW.

Plante man blong eksplenem mining blong Baebol oli ting se: ‘Ol tok olsem “hem nomo i no save ded samtaem,” mo “Bigfala Rula we hem nomo i save rul,” mo “i no gat man we i luk hem samtaem,” i mas minim God ya we i gat Olgeta Paoa. Tok ya i no stret long wan narafala man.’ I tru, yumi save yusum ol tok olsem blong tokbaot Jeova. Be long saed blong 1 Timoti 6:​15, 16, ol vas bifo mo afta long hem oli soemaot se Pol i stap tokbaot Jisas.

Long en blong vas 14, Pol i tokbaot we “bambae Jisas Kraes, Masta blong yumi, i kamtru bakegen.” (1 Timoti 6:14) Taswe, long vas 15, taem Pol i talem se ‘Bigfala Rula ya we i harem gud mo we hem nomo i save rul, bambae i soemaot long prapa taem blong hem we hem i kamtru,’ hem i stap tokbaot taem we Jisas bambae i kamtru bakegen, hem i no stap tokbaot Jeova God. ?Ale, hu ya ‘Bigfala Rula ya we hem nomo i save rul’? I luk olsem we Pol i stap tokbaot Jisas olsem Bigfala Rul ya. ?From wanem? From we, ol vas bifo mo afta, oli mekem i klia se Pol i stap skelem Jisas wetem ol rula blong wol. Olsem Pol i raetem, Jisas nao i rili ‘King blong olgeta king [blong wol ya] we oli stap rul mo Masta blong olgeta masta [blong wol ya] we oli gat paoa.’a Yes, taem yumi skelem Jisas wetem ol rula blong wol ya, Jisas i rili ‘Bigfala Rula we hem nomo i save rul.’ Jeova “i putumap [Jisas] i king, i leftemap nem blong hem i hae we i hae, mo i givim bigfala paoa long hem, blong bambae olgeta man blong olgeta kantri mo olgeta kala mo olgeta lanwis oli wok blong hem.” (Daniel 7:14) !I no gat wan rula blong wol we i save talem se God i mekem olsem long hem!

?Olsem wanem long tok ya, “hem nomo i no save ded samtaem”? Bakegen, Pol i stap skelem Jisas wetem ol king blong wol ya. I no gat wan rula blong wol ya we i save talem se God i givim presen ya long hem se bambae hem i no save ded samtaem. Be Jisas i kasem presen ya. Pol i raetem se: “Kraes ya, yumi save we God i mekem hem i laef bakegen, nao bambae hem i no save ded bakegen samtaem. Ded i no moa gat paoa long hem.” (Rom 6:9) Taswe, Jisas nao i faswan we Baebol i talem se i kasem presen ya blong no moa ded bakegen samtaem. Tru ya, long taem we Pol i raetem tok ya, Jisas nomo i bin kasem gudfala laef ya, we hem i no moa save ded samtaem.

I gat wan narafala samting tu we yumi mas tingbaot: Long taem we Pol i raetem tok ya, Jisas i kasem gudfala laef ya finis we hem i no moa save ded samtaem. Nao sipos Pol i talem se Jeova God nomo bambae i no save ded samtaem, Pol i rong ya. Be, from we Pol i stap skelem Jisas wetem ol rula blong wol, i no rong blong hem i talem se Jisas nomo bambae i no save ded samtaem.

Long saed blong tok ya, “i no gat man we i luk hem samtaem,” hemia i tru tumas afta we Jisas i laef bakegen mo i go antap long heven. Biaen, ol disaepol blong hem we tabu spirit i makemaot olgeta oli luk hem, taem oli ded mo oli laef bakegen wetem wan spirit bodi long heven. (Jon 17:24) Be i no gat man blong wol ya we i save luk Jisas wetem bigfala paoa blong hem long heven, nogat. From samting ya, i tru nomo se “i no gat man” we i luk Jisas afta we hem i laef bakegen mo i go antap long heven.

Long faswan taem we yumi ridim 1 Timoti 6:​15, 16, maet i luk olsem se vas ya i stap tokbaot God. Be ol tok blong Pol bifo mo afta long vas ya, mo sam narafala vas blong Baebol we oli givim moa save, oli soemaot se Pol i stap tokbaot Jisas nomo.

[Futnot]