?Man i Rili Save Jenisim Laef Long Wol?

“Ol puaman oli talem long mifala se, antap long ol narafala samting, olgeta oli wantem pis mo fasin sef​—mo tu oli wantem ol jenis we i save mekem laef blong olgeta i kam moagud. Oli wantem se kantri blong olgeta mo ol narafala kantri oli stanemap sam plan we oli stret blong mekem se ol kantri mo kampani we oli rij oli no save spolem ol traehad blong olgeta.”

HEMIA wanem we daerekta blong wan grup blong halpem ol man long taem blong trabol i talem long saed blong hop mo fiuja blong ol puaman. Yes, ol tok ya blong hem oli soemaot samting we sam man oli wantem tumas. Ol man ya hemia olgeta we narafala i mekem i no stret long olgeta no i mekem trabol long olgeta. Olgeta evriwan oli wantem trufala pis mo fasin sef long wol. ?I save gat trufala pis mo fasin sef long wol? ?I gat wan man we i naf mo i gat paoa blong jenisim stamba samting we i mekem se i no gat stret fasin long wol?

Mekem Sam Jenis

Plante man oli traem blong jenisim laef long wol ya. Eksampol, Florence Nightingale, wan woman Inglan we i laef long ol yia 1900, i spenem laef blong hem blong lukaot mo keagud long ol sikman. Ol hospital long taem blong hem bifo, oli no gat ol meresin olsem we yumi gat tede. Wan buk i talem se, “ol nes oli no kasem naf trening, oli no klin mo man i savegud olgeta from fasin blong olgeta blong drong mo blong slip olbaot.” ?Olsem wanem? ?Ol traehad we Florence i bin mekem oli jenisim fasin blong wok blong ol nes? Yes. Long sem fasin, plante man we oli kea mo oli tingbaot nid blong narafala, oli kasem nambawan frut taem oli halpem ol man long plante defren haf blong laef. Maet long saed blong edukesen, wok blong dokta, bildim haos, givim kakae mo narafala samting tu. Frut we i kamaot from ol traehad ya hemia se laef blong plante milian man we narafala i ting nating long olgeta i kam moagud.

Nating se i olsem, yumi no save giaman long yumi wan se laef i gud from we i gat plante handred milian man oli safa yet from ol wo, raf fasin, sik, kakae i sot mo plante narafala nogud trabol bakegen. Wan grup long Aealan we oli kolem Concern, i talem se: “Fasin pua i kilim i ded 30,000 man evri dei.” Mo tu, fasin slef we plante man oli wok strong blong stopem longtaem finis i kam, i gohed yet tede. Buk ya Disposable People​—New Slavery in the Global Economy i talem se: “I gat moa man we oli wok slef tede i bitim olgeta man Afrika we oli bin stilim olgeta mo salem olgeta olsem slef long Yurop bifo.”

?Wanem i stap blokem traehad blong ol man blong jenisim laef long wol ya? ?Olsem wanem? ?Ol kantri nomo we oli rij mo oli gat paoa, oli stap spolem traehad blong man, no i gat sam narafala samting tu?

Ol Samting We Oli Blokem Traehad Blong Man

Folem Baebol, Devel Setan nao i stap blokem ol traehad blong man blong traem mekem se i gat stret fasin long wol ya. Aposol Jon i talem long yumi se, “olgeta man blong wol ya oli stap long paoa blong Setan.” (1 Jon 5:19) Naoia, Setan i stap “giaman long olgeta man long wol, i lidim olgeta oli go krangke.” (Revelesen 12:9) Rabis fasin ya blong Setan bambae i spolem ol man gogo kasem taem we Jeova i finisim rabis man ya. ?From wanem wol ya i stap long paoa blong Setan?

Jeova i givim long faswan papa mo mama blong yumi, Adam mo Iv, wan paradaes wol we i stretgud olgeta. Wol ya bambae i olsem hom blong olgeta man. Yes, hemia wan wol we i “gud tumas” (Jenesis 1:31) ?Hu i jenisim ol samting ya? Setan. Setan i agensem raet we God i gat blong putumap ol loa we ol man mo woman oli mas folem. Setan i talem se fasin blong God blong rulum man, i no stret. Hem i pusum Adam mo Iv blong tufala i no moa stap aninit long rul blong Jeova mo long rod ya tufala nomo i save jusum, wanem i gud mo wanem i nogud. (Jenesis 3:​1-6) From samting ya, olgeta man oli gat sin mo oli no stretgud olgeta, taswe ol traehad blong olgeta blong mekem we i gat stret fasin long wol, oli no karem gudfala frut.​—Rom 5:12.

?From Wanem God i Letem Fasin Blong Sin i Stap?

Maet samfala oli askem se, ‘?Be from wanem God i letem sin i gohed? ?From wanem Hem i no yusum bigfala paoa blong hem blong finisim ol man ya we oli rebel agens long hem mo wokem gudfala samting bakegen?’ I luk olsem se hemia i wan gudfala tingting. Be, i gud blong askem sam kwestin long saed blong fasin ya blong yusum paoa. ?Taem man i gat paoa be i no yusum paoa ya long fasin we i stret, yu no ting se hemia wan stamba samting we i spolem ol puaman mo i mekem ol man oli safa? ?Man we i gat gud tingting bambae i tingting olsem wanem sipos i luk we wan rula i yusum paoa blong hem blong finisim eniman we i no agri wetem ol desisen blong hem?

God i jus blong letem Setan mo ol man blong hem oli folem tingting blong olgeta nomo, oli no folem ol loa mo ol rul blong hem blong smoltaem nomo. Hem i mekem olsem from we hem i wantem mekem ol man oli sua se Hem i wan God we i no rulum ol man long fasin we i strong tumas. Ol taem we oli stap pas bambae oli pruvum se i gat wan fasin blong rul nomo we i stret mo hemia rul blong God. Bambae hem i soem se ol samting we God i blokem ol man blong mekem, oli blong mekem i gud long yumi. Defren olgeta, frut we i kamaot from fasin blong rebel agensem rul blong God i soem finis se ol loa we God i putum long man oli stret gud nomo. Mo ol rabis frut ya oli pruvum se God i gat gudfala risen blong yusum bigfala paoa blong hem blong finisim ol rabis man long taem we hem i jus blong mekem olsem. Samting ya bambae i hapen i no longtaem.​—Jenesis 18:​23-32; Dutronome 32:4; Ol Sam 37:​9, 10, 38.

Be bifo taem ya we God i mas tekem aksin, yumi stap yet long wol ya we i no gat stret fasin long hem, ‘yumi stap krae, from we yumi stap harem nogud.’ (Rom 8:22) Nomata wanem samting we yumi mekem blong traem jenisim laef long wol, be yumi no save aotem Setan mo yumi no save tekemaot stamba samting we i mekem olgeta man oli safa tede. Yes, yumi no gat naf paoa blong tekemaot sin we Adam i pasem i go long ol man.​—Ol Sam 49:​7-9.

Jisas Kraes Bambae i Mekem Wan Jenis We i Stap Olwe

?Hemia i minim se wol bambae i neva save kam gud? Si bambae i kam gud. God i givim raet long wan man we i gat moa paoa long yumi blong i mekem wan jenis we i stap olwe. ?Hu ya man ya? Hemia Jisas Kraes. Baebol i tokbaot Jisas olsem Haeman blong God we bambae i sevem ol man.​—Ol Wok 5:31.

Naoia Jisas i stap wet long “taem” we God i jusum finis blong tekem aksin. (Revelesen 11:18) ?Wanem samting we bambae hem i mekem? Hem bambae i mekem “olgeta samting oli kam niuwan bakegen, olsem we God i talemaot finis long ol tok blong ol tabu profet blong hem bifo.” (Ol Wok 3:21) Eksampol, Jisas bambae i “sevem ol puaman we oli stap singaot i go long hem, mo bambae i stap givhan long olgeta we oli sot long ol samting, mo i no gat man blong lukaot long olgeta. . . . Olgeta we oli stap harem nogud aninit long han blong narafala man, hem bambae i tekemaot olgeta, i sevem olgeta.” (Ol Sam 72:​12-16) Tru long Jisas Kraes, God i promes blong mekem “ol faet i finis long olgeta ples long wol.” (Ol Sam 46:9) Hem i promes se: “Bambae i no moa gat man [long wol ya we i klingud] we i save talem se hem i sik.” Ol blaen man, olgeta we sora blong olgeta i fas, olgeta we leg blong olgeta i nogud, olgeta we oli gat sam kaen sik, bambae oli kamgud bakegen. (Aesea 33:24; 35:​5, 6; Revelesen 21:​3, 4) Olgeta tu we oli ded longtaem bifo bambae oli laef bakegen. Hem i promes blong givim laef bakegen long olgeta man we oli bin safa from rabis fasin blong wol ya.​—Jon 5:​28, 29.

Jisas Kraes bambae i no mekem wan jenis we i blong smoltaem nomo. Hem bambae i finisim fulwan ol samting we oli stap mekem se i no gat stret fasin long wol ya. Hem bambae i finisim sin mo fasin we i no stret mo bambae hem i spolem Devel Setan mo ol man we oli biaen long hem. (Revelesen 19:​19, 20; 20:​1-3, 10) Ol wari mo fasin safa we God i bin letem i stap, bambae oli no save kam antap bakegen namba ‘tu taem.’ (Neham 1:9) Hemia nao samting we Jisas i tingbaot taem hem i tijim yumi blong prea from Kingdom blong God blong i kam mo blong i mekem ol samting we God i wantem oli ‘kamaot long wol olsem we oli kamaot finis long heven.’​—Matiu 6:​10, NW.

Maet yu talem se: ‘Be Jisas hem wan i talem se “ol puaman bambae oli stap oltaem wetem yumi.” ?Olsem wanem? ?Tok ya i minim se bambae i stil gat fasin pua mo fasin we i no stret?’ (Matiu 26:11) I tru, Jisas i talem se bambae i gat ol puaman. Be, ol tok blong Jisas long ol vas raonabaot wetem ol promes blong Tok blong God, oli soem se tok ya i minim se oltaem we bambae wol ya wetem ol rabis fasin blong hem i stap be puaman tu bambae i stap. Jisas i save se i no gat wan man we i naf blong karemaot fasin pua mo rabis fasin long wol. Hem i save tu se hem nao bambae i jenisim olgeta samting ya. I no longtaem bambae hem i jenisim olgeta samting long wol ya oli kam niuwan bakegen​—“niufala skae mo niufala wol” we bambae i no moa gat samting we i givim soa long man, bambae i no moa gat sik, fasin pua mo ded.​—2 Pita 3:13; Revelesen 21:1.

“Oltaem Yufala i Mas Mekem Ol Gudfala Fasin”

?Hemia i min se i blong nating nomo we man i mekem sam samting blong givhan long narafala? No gat i no minim olsem. Baebol i leftemap tingting blong yumi blong halpem ol narafala taem oli fesem ol traem mo trabol long laef blong olgeta. King Solomon bifo i raetem se: “Sipos yu gat janis blong givhan long narafala man, i gud yu gohed, yu mekem i gud long hem, stret olsem we hem i wantem.” (Ol Proveb 3:27) Aposol Pol i talem se: “Oltaem yufala i mas mekem ol gudfala fasin, mo yufala i mas givgivhan long yufala.”​—Hibrus 13:16.

Jisas Kraes i leftemap tingting blong yumi blong mekem samting we yumi naf blong mekem blong halpem narafala. Hem i tokbaot eksampol blong wan man Sameria we i faenem wan man we ol narafala oli kilim hem i hafded long rod. Jisas i talem se, man Sameria ya i “gat sore” nao hem i yusum ol samting we hem i gat blong wasem ol soa blong man ya mo blong halpem hem long ol trabol blong hem. (Luk 10:​29-37) Fasin blong man Sameria ya i no jenisim wol ya be hem i mekem wan jenis long laef blong narafala man. Yumi save mekem sem mak.

Be, Jisas Kraes i save mekem plante samting moa i bitim we hem i halpem ol wanwan man. Hem i save jenisim ol samting long wol ya mo bambae hem i mekem olsem i no longtaem. Taem bambae Jisas i mekem ol jenis ya, olgeta man bambae oli haremgud mo oli glad long laef blong olgeta from i gat trufala pis mo fasin sef.​—Ol Sam 4:8; 37:​10, 11.

Taem yumi stap wet long ol jenis ya blong oli kamtru, yumi no mas fraet blong mekem eni samting we yumi naf blong mekem long saed blong spirit mo bodi, blong “mekem i gud” long olgeta man we oli stap harem nogud long wol ya we i no gat stret fasin long hem.​—Galesia 6:10.

[Tok blong pija long pej 5]

Florence Nightingale i mekem wan jenis long fasin blong wok blong ol nes

[Credit Line]

Courtesy National Library of Medicine

[Tok blong pija long pej 7]

Ol man we oli biaenem Jisas oli mas mekem i gud long ol narafala man

[Foto Credit Line blong pija long pej 4]

The Star, Johannesburg, S.A.