Kraes i Stap Lidim Kongregesen Blong Hem

“Yufala i mas save se mi bambae mi stap wetem yufala oltaem, gogo wol ya i finis.”​—MATIU 28:20.

1, 2. (a) ?Taem Jisas i laef bakegen nao i talem long ol man blong hem blong pulum ol man oli kam disaepol, hem i mekem wanem promes long olgeta? (b) ?Jisas i mekem olsem wanem blong lidim faswan Kristin kongregesen?

AFTA we Lida blong yumi, Jisas Kraes, i laef bakegen long ded mo bifo we hem i go antap long heven, hem i kamtru long ol disaepol blong hem. Nao hem i talem long olgeta se: ‘God i givim olgeta paoa long mi, long olgeta samting long heven mo long wol. Nao from samting ya, yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu spirit. Mo yufala i mas tijim olgeta blong oli folem olgeta tok ya we mi mi givim finis long yufala. Mo yufala i mas save se mi bambae mi stap wetem yufala oltaem, gogo wol ya i finis.’​—Matiu 23:10; 28:​18-20.

² Yes, Jisas i givim wok ya blong mekem disaepol i go long ol man blong hem, be tu hem i promes blong stap wetem olgeta. Stori blong ol faswan Kristin long buk blong Ol Wok long Baebol, i soemaot klia se Kraes i yusum paoa we God i givim long hem blong lidim niufala kongregesen long taem ya. Hem i holem promes blong hem blong sanem tabu spirit i kam olsem “Spirit blong Givhan,” blong givim paoa long ol man blong hem mo blong lidim wok blong olgeta. (Jon 16:7; Ol Wok 2:​4, 33; 13:​2-4; 16:​6-10) Afta we Jisas i laef bakegen, hem i yusum ol enjel we oli stap wok blong hem, blong oli givhan long ol disaepol blong hem. (Ol Wok 5:​19; 8:​26; 10:​3-8, 22; 12:​7-11; 27:​23, 24; 1 Pita 3:​22) Mo tu, blong lukaot long kongregesen, Lida blong yumi i putumap samfala we oli bigman long ol Kristin fasin, blong oli wok olsem hed kampani.​—Ol Wok 1:​20, 24-​26; 6:​1-6; 8:​5, 14-17.

 3. ?Bambae yumi ansa long wanem kwestin long stadi ya?

³ ?Be, olsem wanem long taem blong yumi, we klosap “wol ya i finis”? ?Tede, Jisas Kraes i stap lidim Kristin kongregesen olsem wanem? ?Mo olsem wanem yumi soemaot se yumi glad blong letem hem i lidim yumi?

Masta i Gat Wan Slef We i Stret

 4. (a) ?Hu ya ‘slef we i stret mo waes’? (b) ?Masta i putum wanem long han blong slef ya?

⁴ Taem Jisas i talemaot profet tok long saed blong saen we i soemaot se hem i kambak bakegen, hem i se: “?Hu ya i rili slef ya we i stret mo waes, we masta blong hem i putumap hem blong lukaot long ol man blong hem, mo blong givim kakae long olgeta long stret taem blong hem? Sipos masta blong hem i kamtru i faenem se hem i stap mekem wok ya, slef ya i save harem gud. Tru ya, Masta bambae i putumap hem blong lukaot long olgeta samting blong hem.” (Matiu 24:​45-47, NW ) “Masta” ya, hemia Lida blong yumi, Jisas Kraes. Hem i putumap “slef ya we i stret mo waes” hemia grup blong ol tabu Kristin long wol ya, blong i lukaot long ol samting blong hem long wol.

5, 6. (a) ?Long vison we aposol Jon i kasem, wanem mining blong ‘ol seven ples blong putum laet we oli wokem long gol’ mo “ol seven sta”? (b) “Ol seven sta ya” oli stap long raethan blong Jisas. ?Hemia i minim wanem?

⁵ Buk blong Revelesen long Baebol i soemaot se Jisas Kraes nao i lidim slef ya we i stret mo waes. Aposol Jon i luk wan vison blong ‘dei blong Masta.’ I gat “seven ples blong putum laet, we oli wokem olgeta long gol. Long medel blong ol samting ya, mi luk wan man we i olsem Pikinini blong Man.” Mo “hem i holem seven sta long raethan blong hem.” Jisas i talemaot mining blong vison ya long Jon i se: “?Yu luk ol seven sta ya we i stap long raethan blong mi, mo ol seven ples ya blong putum laet we oli wokem olgeta long gol? I gat tokhaed blong olgeta. Ol seven sta ya, hemia ol enjel blong ol seven [“kongregesen,” NW ] ya. Mo ol seven ples ya blong putum laet, hemia ol seven [kongregesen] ya nomo.”​—Revelesen 1:​1, 10-20.

⁶ “Seven ples ya blong putum laet we oli wokem olgeta long gol” oli minim olgeta kongregesen blong ol trufala Kristin we oli stap long ‘dei blong Masta’ we i stat long 1914. ?Be olsem wanem long “ol seven sta ya”? Fastaem, olgeta oli minim ol man blong lukaot long ol kongregesen long faswan handred yia, hemia olgeta we tabu spirit i makemaot olgeta.a I olsem we ol man ya oli stap long raethan blong Jisas, from se hem i lidim olgeta mo i soem wanem we oli mas mekem. Yes, Jisas Kraes i lidim grup ya we i olsem slef. Be, long ‘dei blong Masta,’ i no moa gat plante tabu man ya oli stap. ?Olsem wanem Kraes i stap lidim bitim 93,000 kongregesen blong ol Witnes blong Jeova raon long wol?

 7. (a) ?Olsem wanem Jisas i stap yusum Hed Kampani blong lidim ol kongregesen long wol? (b) ?From wanem yumi save talem se tabu spirit i putumap ol Kristin elda?

⁷ Olsem long faswan handred yia, tede tu, wan smol grup blong ol tabu man we oli lukaot long ol kongregesen oli wok olsem wan Hed Kampani. Olgeta ya oli wok long nem blong slef we i stret mo waes. Lida blong yumi i stap yusum Hed Kampani ya blong putumap ol man we oli naf, nating se tabu spirit i makemaot ol man ya no nogat. Olgeta ya oli mekem wok olsem elda long ol kongregesen. Tabu spirit, we Jeova i givim raet long Jisas blong yusum, i mekem wan bigfala wok blong putumap ol elda ya. (Ol Wok 2:​32, 33) Baebol, we tabu spirit i pusum ol man blong raetem, i makemaot ol fasin we ol man ya oli mas gat. (1 Timoti 3:​1-7; Taetas 1:​5-9; 2 Pita 1:​20, 21) Ol brata we oli kam wanples blong luk sipos wan man i stret blong mekem wok blong elda, oli prea mo oli letem tabu spirit i lidim olgeta. Mo tu, man ya we bambae oli putumap, i mas stap soemaot ol frut blong tabu spirit long laef blong hem. (Galesia 5:​22, 23) Taswe, advaes blong Pol i stret long olgeta elda evriwan, nating se tabu spirit i makemaot olgeta no nogat. Hem i se: “Yufala i mas lukaot gud long yufala, mo long ol man ya we Tabu Spirit i putum olgeta oli stap finis long han blong yufala. Yufala i mas lukaot long ol man blong [“kongregesen,” NW ] blong God, olsem we man blong lukaot long sipsip i stap lukaot long ol sipsip blong hem.” (Ol Wok 20:28) Ol man ya oli kasem advaes long Hed Kampani, mo oli glad blong lukaot long kongregesen olsem wan man blong lukaot long sipsip i lukaot long ol sipsip blong hem. Long fasin ya, Kraes i stap wetem yumi naoia, hem i stap mekem wok ya blong lidim kongregesen.

 8. ?Olsem wanem Kraes i stap yusum ol enjel blong lidim ol man blong hem?

⁸ Mo tu, Jisas i stap yusum ol enjel blong lidim ol man blong hem tede. Pijatok blong hem long saed blong ol gudfala sid mo rabis gras i soemaot se taem blong karem kakae long garen, “hemia en blong wol ya.” ?Masta bambae i sanem hu blong karem kakae? Kraes i talem se: “Ol man blong wok ya we oli go blong tekemaot kakae long garen, hemia ol enjel.” Hem i gohed i se: “Mi, mi Pikinini blong Man, bambae mi sanem ol enjel blong mi oli go tekemaot ol samting blong mekem man i foldaon long sin, wetem ol man blong mekem sin. Olgeta ya, bambae oli no moa stap wetem ol man we mi mi King blong olgeta.” (Matiu 13:​37-41) Mo tu, tingbaot se wan enjel nao i lidim Filip blong faenem man Itiopia ya. Long sem fasin, tede, plante samting i soem se ol enjel oli stap lidim wok blong ol trufala Kristin, blong mekem se oli faenem ol man we hat blong olgeta i stret.​—Ol Wok 8:​26, 27; Revelesen 14:6.

 9. (a) ?Kraes i yusum wanem blong lidim Kristin kongregesen tede? (b) ?Blong kasem blesing from fasin blong Kraes blong lidim yumi, yumi mas tingbaot wanem kwestin?

⁹ !Yumi harem gud tumas blong save se Jisas Kraes i yusum Hed Kampani, tabu spirit, mo ol enjel blong lidim ol disaepol blong hem tede! Sipos ol man oli ronem mo kilim ol man blong Jeova, maet i gat wan smol taem we Hed Kampani i no save sanem toktok i go long olgeta. Be nating, Kraes bambae i gohed nomo blong yusum tabu spirit blong lidim olgeta, mo bambae i yusum ol enjel blong sapotem olgeta. Be, blong kasem ol blesing from, yumi mas letem Kraes i lidim yumi. ?Olsem wanem blong soemaot se yumi glad blong letem Kraes i lidim yumi?

“Ona . . . Obei”

10. ?Olsem wanem yumi save soemaot se yumi tinghae long ol elda long kongregesen?

¹⁰ Lida blong yumi i givim ‘ol man we oli olsem presen’ i go long ol kongregesen. Sam long olgeta, hem i givim blong “oli evanjelis,” samfala ‘oli man blong lukaot long sipsip mo tija insaed long kongregesen.’ (Efesas 4:​18, 11, 12) Tingting blong yumi long saed blong olgeta mo fasin we yumi mekem long olgeta, i soemaot klia sipos yumi stap letem Kraes i lidim yumi no nogat. I stret nomo we ‘oltaem yumi mas talem tangkiu’ from ol man ya we Kraes i givim, we oli bigman finis long ol Kristin fasin. (Kolosi 3:​15) Mo i stret we yumi respektem olgeta tu. Aposol Pol i raetem se: “Ol elda we oli stap wok strong long wok blong lidim ol man, [“i stret we oli kasem dabol ona,” NW ].” (1 Timoti 5:​17) ?Olsem wanem yumi save soemaot se yumi tinghae mo yumi gat tangkiu long ol elda we oli lukaot long kongregesen? Pol i ansa se: “Yufala i mas ona long ol lida blong yufala, mo yufala i mas obei long ol tok blong olgeta.” (Hibrus 13:17) Yes, yumi mas ona mo obei long olgeta, yumi mas letem olgeta oli lidim yumi.

11. ?From wanem yumi talem se yumi mas gat respek long ol elda blong holem promes we yumi mekem taem yumi baptaes?

¹¹ Lida blong yumi i stretgud olgeta. Be, ol man we hem i givim olgeta olsem presen oli no stretgud olgeta. Taswe, maet oli save mestem samtaem. Nating se i olsem, i impoten tumas we yumi gohed oltaem blong sapotem plan blong Kraes. Yes, blong folem promes we yumi mekem taem yumi givim laef blong yumi i go long Jeova mo tekem baptaes, yumi mas luksave se tabu spirit i putumap samfala long kongregesen blong lukaot long yumi, mo yumi mas glad blong obei long olgeta. Taem yumi baptaes long ‘nem blong tabu spirit,’ i olsem we yumi talemaot se yumi save wanem nao tabu spirit, mo se yumi luksave wok we spirit ya i mekem insaed long stamba tingting blong Jeova. (Matiu 28:19) Baptaes olsem i soemaot se yumi glad blong wok wetem spirit ya, mo se yumi no save mekem wan samting blong blokem spirit ya mo wok we hem i mekem long medel blong ol man blong Kraes. Tabu spirit i mekem wan bigfala wok blong skelem olgeta we maet oli naf blong kam elda, mo blong putumap olgeta. Taswe, sipos yumi no obei mo wok gud wetem ol elda long kongregesen, i olsem we yumi no stap holem promes we yumi bin mekem taem yumi givim laef blong yumi i go long Jeova.

12. ?Hu ya ol trifala man we Jud i tokbaot we oli no gat respek long ol man we oli lidim olgeta, mo ol stori ya oli lanem yumi long wanem samting?

¹² Baebol i fulap long ol stori we oli lanem yumi se i impoten tumas blong ona mo obei long olgeta we oli lidim yumi. Disaepol Jud i talemaot tri man we oli olsem woning long yumi. Trifala ya oli tok nogud long saed blong ol man we God i putumap olgeta blong lukaot long kongregesen. Jud i se: “!Sore tumas long ol tija ya! Oli folem rod blong man ya Ken bifo. Mo from we oli wantem mane tumas, oli foldaon long sem mastik we profet Balam bifo i mekem. Olgeta nomo oli stap spolem olgeta from we oli girap oli agens long God, olsem we Kora i mekem bifo.” (Jud 11) Ken i no wantem harem advaes we Jeova i givim wetem lav, ale hem i jusum nomo blong folem wan rod we i lidim hem blong agensem brata blong hem mo blong kilim hem i ded. (Jenesis 4:​4-8) Balam tu i kasem plante woning long God, be hem i no lesin, hem i traem blong singaot trabol i kam long ol man blong God blong kasem mane from. (Namba 22:​5-28, 32-34; Dutronome 23:5) Kora i holem wan gudfala wok long Isrel, be hem i no glad long samting ya. Ale, hem i girap i rebel agens long Moses, wan man blong God we tingting blong hem i stap daon moa i winim ol narafala man long wol. (Namba 12:3; 16:​1-3, 32, 33) Bigfala trabol i kasem Ken, Balam mo Kora. Ol stori ya oli tijim gud yumi se yumi mas lesin long advaes blong olgeta we Jeova i stap yusum blong lidim yumi, mo yumi mas respektem olgeta.

13. ?Wanem ol blesing we profet Aesea i talemaot blong olgeta we oli obei mo ona long ol elda?

¹³ Yumi evriwan i wantem kasem blesing from nambawan plan we Lida blong yumi i putumap insaed long Kristin kongregesen. Profet Aesea i talemaot ol blesing we bambae hem i karem i kam, se: “I gat taem i stap kam, we wan king bambae i stap rul long fasin we i stret olgeta, mo we ol haeman blong hem bambae oli stap mekem i stret nomo. Olgeta ya evriwan bambae oli stap mekem i gud long ol man. Bambae oli olsem strong sefples we man i save go haed long hem blong ronwe long hariken, no gudfala ples we i drae, we man i save go haed long hem blong ronwe long big ren. Bambae oli olsem reva we i ron, i pastru long ples we i drae olgeta, no sed blong bigfala ston, we i stanap hem wan long ples we i no gat tri long hem.” (Aesea 32:​1, 2) Wanwan long ol elda oli mas stap olsem wan “gudfala ples” blong haed we i sefgud. Sipos i had long yumi blong obei long olgeta we oli lidim yumi, yumi mas prea long saed ya, mo traehad blong obei mo ona long olgeta we God i putumap insaed long kongregesen.

?Olsem Wanem Ol Elda Oli Letem Kraes i Lidim Olgeta?

14, 15. ?Olsem wanem olgeta we oli lidim kongregesen oli soemaot se Kraes i Lida blong olgeta?

¹⁴ Olgeta Kristin evriwan oli mas letem Kraes i lidim olgeta, antap moa ol elda. Ol elda no ol man blong lukaot long kongregesen, oli gat paoa insaed long kongregesen. Be oli no traem blong bos long laef blong ol wanwan man long kongregesen, yes oli no stap ‘makem wanem tok i stret blong ol man oli bilif long hem mo wanem i no stret.’ (2 Korin 1:​24) Ol elda oli folem tok blong Jisas se: “Yufala i save finis we ol haeman blong ol hiten man oli stap mekem i strong tumas long ol man blong olgeta, mo ol bos blong olgeta oli stap mekem olgeta oli stap aninit long paoa blong olgeta. Be i no stret blong yufala i mekem olsem.” (Matiu 20:​25-27) Ol elda we oli mekem gud wok blong olgeta, oli rili kam man blong wok blong ol narafala.

¹⁵ Baebol i talem long ol Kristin se: “Bambae yufala i no fogetem ol man ya we . . . oli stap lidim yufala, . . . Oltaem yufala i mas tingbaot fasin blong olgeta, we laef blong olgeta i olsem wanem, . . . Nao yufala i mas biaen long olgeta, long fasin blong bilif blong olgeta.” (Hibrus 13:7) Yumi no biaen long ol elda jes from we oli lidim yumi, nogat. Jisas i talem se: “Yufala i gat wan [“Lida,” NW ] nomo blong yufala, we hemia mi ya, [“Kraes,” NW ].” (Matiu 23:10) Yumi biaen long ol elda long fasin blong bilif blong olgeta, from we olgeta ya oli folem trufala Lida blong yumi, Kraes. (1 Korin 11:1) Tingbaot olsem wanem ol elda oli traehad blong folem Kraes long fasin we oli mekem long ol narafala long kongregesen.

16. ?Nating se Jisas i gat bigfala paoa, hem i mekem wanem fasin long ol man blong hem?

¹⁶ Long evri fasin, Jisas i gud moa long ol narafala man we oli gat sin. Mo tu, Papa blong hem i givim paoa long hem we i antap moa long ol narafala. Nating se i olsem, Jisas i soemaot tingting daon long ol fasin we hem i mekem long ol disaepol blong hem. Hem i no talemaot ol bigfala save blong soem hem nomo long fored blong ol narafala man. Hem i sore long ol man blong hem, hem i tingbaot filing blong olgeta, mo hem i tingbaot ol samting we oli nidim. (Matiu 15:32; 26:​40, 41; Mak 6:​31) Hem i neva askem ol disaepol blong hem blong mekem samting we oli no naf blong mekem, mo i neva givim tumas wok long olgeta we i hevi tumas. (Jon 16:12) Jisas i ‘wan kwaet man, mo tingting blong hem i stap daon.’ Taswe, yumi no sapraes we plante man oli harem gud blong joen wetem hem.​—Matiu 11:​28-​30.

17. ?Olsem wanem ol elda oli save soemaot tingting daon olsem Kraes, long fasin we oli mekem long ol narafala long kongregesen?

¹⁷ ?Sipos Lida blong yumi Kraes i gat tingting daon, olsem wanem long olgeta we oli lidim kongregesen? !Tingting blong olgeta i mas stap daon moa! Oli mas lukaot blong no yusum paoa we God i givim long olgeta long fasin we i no stret. Oli no mas yusum ‘ol flas tok mo ol waestok blong man,’ blong traem pulum ol narafala blong tinghae long olgeta. (1 Korin 2:​1, 2) Oli mekem i defren, oli traehad blong talemaot ol trutok blong Baebol long fasin we i isi blong kasem save long hem, mo i kamaot long hat blong olgeta. Mo tu, ol elda oli traem blong no bitim mak long samting we oli ting se narafala i mas mekem, mo oli tingbaot ol samting we ol narafala oli nidim. (Filipae 4:5) Oli save se i gat sam samting we wanwan long yumi i no naf blong mekem. Fasin we oli mekem long ol Kristin brata blong olgeta i soemaot se oli luksave ol samting ya wetem lav. (1 Pita 4:8) ?Ol elda we oli kwaet man mo oli gat tingting daon, oli mekem yu yu harem gud? Yes, oli rili mekem yumi haremgud.

18. ?Ol elda oli save lanem wanem from fasin we Jisas i mekem long ol pikinini?

¹⁸ Jisas i neva bisi tumas blong toktok wetem ol man mo oli no fraet blong kam toktok long hem. Hemia i tru long saed blong olgeta tu we oli no gat haenem nating. Tingbaot wanem we Jisas i talem long ol disaepol blong hem taem oli tok long ol man from we oli “tekem ol pikinini blong olgeta oli kam long Jisas.” Hem i talem se: “!Yufala i no blokem ol pikinini ya! Yufala i letem olgeta oli kam long mi.” Nao “hem i putum han blong hem i goraon long ol pikinini ya, mo i putum han blong hem long olgeta, i blesem olgeta.” (Mak 10:​13-16) Jisas i kaen mo i gat lav, taswe ol narafala oli wantem kam long hem. Oli no fraet long hem. Ol pikinini tu oli harem gud blong stap klosap long hem. Ol elda oli gat semfala fasin. From we oli kaen mo oli soemaot lav, ol narafala wetem ol pikinini tu oli no fraet blong toktok wetem olgeta, mo oli harem gud blong stap klosap long olgeta.

19. ?I minim wanem blong “kasem tingting blong Kraes,” mo blong mekem olsem yumi mas traehad blong mekem wanem?

¹⁹ Sipos ol elda oli save gud Jisas Kraes, oli save folem gud fasin blong hem. Pol i askem se: “?Hu man i save tingting blong Hae God we i Masta blong yumi? ?Hu man i save tijim hem?” Biaen hem i talem se: “Be yumi ya, yumi kasem tingting blong Kraes finis.” (1 Korin 2:​16) Blong kasem tingting blong Kraes, yumi mas save tingting blong hem mo olgeta fasin blong hem. Olsem nao, bambae yumi save evri taem wanem we yumi mas mekem. !Traem tingbaot sipos yumi save gud Lida blong yumi olsem! Yes, i nidim we yumi ridim gud ol stori blong Gospel mo fulumap tingting blong yumi oltaem wetem save long saed blong laef blong Jisas mo eksampol we hem i soemaot. Taem ol elda oli traehad olsem blong folem Lida blong olgeta, hemia Jisas, olgeta long kongregesen oli wantem moa blong biaen long olgeta long fasin blong bilif. Mo ol elda oli harem gud blong luk ol narafala we oli glad blong folem Lida blong yumi.

Gohed Blong Letem Kraes i Lidim Yu

20, 21. ?Taem yumi stap wet long niufala wol we God i promes blong givim, yumi mas gat strong tingting blong mekem wanem?

²⁰ I impoten tumas we yumi evriwan i gohed blong letem Kraes i lidim yumi. Naoia we yumi kam klosap tumas long en blong rabis wol ya, yumi olsem ol man Isrel we oli stap long Flatples blong Moab long 1473 B.K.T. Olgeta ya oli stap rere blong go insaed long Promes Lan. Profet Moses i talemaot tok blong God, i se: “[Josua], yu nao bambae yu lidim ol man ya, blong yufala i go tekem kantri ya we Hae God i promes bifo long ol bubu blong yumi, se bambae i givim long yumi.” (Dutronome 31:​7, 8) Josua i lida we God i putumap. Sipos ol man Isrel oli wantem go insaed long Promes Lan, oli mas obei long lida blong olgeta, Josua.

²¹ Baebol i talem long yumi se: ‘Yufala i gat wan Lida nomo blong yufala, we hemia mi ya, Kraes.’ Yes, Kraes nomo bambae i lidim yumi i go long niufala wol we i fulap long stret fasin. (2 Pita 3:​13) Taswe, yumi mas gat strong tingting blong letem Kraes i lidim yumi long olgeta haf long laef blong yumi.

[Futnot]

?Yu Yu Rimemba?

• ?Olsem wanem Kraes i lidim kongregesen long taem bifo?

• ?Olsem wanem Kraes i stap lidim kongregesen blong hem tede?

• ?From wanem yumi mas obei long olgeta we oli stap lidim yumi long kongregesen?

• ?Olsem wanem ol elda oli save soemaot se Kraes i Lida blong olgeta?

[Tok blong pija long pej 15]

Kraes i stap lidim kongregesen blong hem mo i holem ol elda long raethan blong hem

[Tok blong pija long pej 16]

“Yufala i mas ona long ol lida blong yufala, mo yufala i mas obei long ol tok blong olgeta”

[Tok blong pija long pej 18]

Jisas i gat sore mo ol man oli no fraet blong kam toktok wetem hem. Ol Kristin elda oli traehad blong mekem olsem hem