Wan Kwestin

Long leta blong aposol Pol we hem i raetem i go long ol man Hibru, hem i tokbaot “fasin blong putum han long hed blong man.” ?Hem i stap tokbaot fasin blong putumap ol elda, no i stap tokbaot wan narafala samting bakegen?—Hib. 6:2.

Yumi no sua fulwan, be i luk olsem we Pol i stap tokbaot fasin ya blong putum han long hed blong man olsem wan rod blong pasem long narafala wan presen no wan spesel paoa we tabu spirit i givim.

I tru se Baebol i tokbaot fasin blong putum han long hed blong man taem hem i kasem wan spesel wok we i kam long God. Moses i putum han blong hem long Josua blong putumap hem blong i tekem ples blong hem. (Dut. 34:9, NW) Long Kristin kongregesen, oli putum han blong olgeta long hed blong samfala we oli nafgud, blong putumap olgeta blong mekem wan spesel wok. (Wok 6:6; 1 Tim. 4:14) Pol i givim advaes agensem fasin blong hareap blong putum han long hed blong man.—1 Tim. 5:22.

Be, Pol i givim advaes i go long ol Hibru Kristin se i gud oli gohed blong “kam bigman long Kraes” mo i nogud oli gobak bakegen long ol “stamba tijing” we oli lanem fastaem. Biaen hem i talemaot sam tijing olsem, i se: “Yumi no save tokbaot fasin ya oltaem we yumi tanem tingting blong yumi from ol fasin blong yumi we i blong ded nomo, blong yumi bilif long God. Yumi no save stap oltaem long ol tok blong fasin blong baptaes, mo fasin blong putum han long hed blong man.” (Hib. 6:1, 2) ?Fasin blong putumap ol elda, hem i wan stamba samting we ol Kristin oli no mas gobak long hem taem oli gohed blong kam bigman? Nogat. Blong kam wan elda long kongregesen, hemia wan mak we ol brata we oli bigman long Kraes oli traehad blong kasem mo biaen oli tinghae long wok ya.—1 Tim. 3:1.

Be i gat wan narafala risen from wanem oli putum han long hed blong man. Long faswan handred yia, Jeova i sakemaot ol man Isrel olsem ol man blong hem, ale hem i givim blesing ya long Isrel long saed blong spirit, hemia kongregesen blong ol Kristin we tabu spirit i makemaot olgeta. (Mat. 21:43; Wok 15:14; Gal. 6:16, NW) Wan pruf blong jenis ya, hemia se tabu spirit i givim ol presen no ol defren kaen paoa long olgeta ya, wan long ol paoa ya hemia blong toktok long narafala lanwis. (1 Kor. 12:4-11) Taem Konilias mo famle blong hem oli bilif long Jisas, oli kasem tabu spirit we i mekem se “oli stap toktok long ol naranarafala lanwis.”—Wok 10:44-46.

Samtaem fasin blong putum han long hed blong man i save pasem long hem wan presen no spesel paoa we tabu spirit i givim. Taem Filip i stap prij long Sameria, plante man oli tekem baptaes. Hed kampani i sanem aposol Pita mo Jon long ples ya. ?From wanem? Baebol i talem se: “Nao Pita mo Jon, tufala i putum han blong tufala long hed blong olgeta” [we oli jes baptaesem] nao olgeta i kasem tabu spirit.” Samting ya i mas minim se oli kasem ol presen blong tabu spirit no ol defdefren paoa we man i save luk. Yumi save samting ya from we taem man ya Saemon, we bifo i stap mekem wok blong kleva, i luk wok blong tabu spirit, griri fasin i pusum hem blong traem pem Pita mo Jon blong tufala i givim paoa long hem blong i save putum han blong hem long hed blong ol man blong givim tabu spirit long olgeta. Olsemia olgeta tu bambae oli save mekem ol merikel. (Wok 8:5-20) Biaen 12 man long Efesas oli tekem baptaes. Yumi ridim se: “Taem Pol i putum han blong hem long hed blong olgeta, tabu spirit i kam long olgeta. Nao oli stap toktok long ol narafala lanwis, mo oli stap talemaot ol tok we God i givim long olgeta.”—Wok 19:1-7; skelem wetem 2 Timoti 1:6.

Taswe long Hibrus 6:2, i luk olsem se Pol i putum han blong hem long hed blong man blong pasem ol presen we tabu spirit i givim long ol niufala disaepol.