Naoia We “Yufala i Save God Finis,” ?Yufala i Mas Mekem Wanem?

 1. ?From wanem wan paelot i yusum wan lis taem hem i jekem plen?

BIFO we wan paelot i flae long plen, hem i mas jekem gud plen ya. Hem i yusum wan lis, blong meksua se hem i jekem evri samting. Sipos hem i no jekem plen, maet bambae hem i no luk wan problem we i save mekem se plen ya i foldaon. Ol paelot tu we oli flae plante yia finis, oli mas jekem gud evri samting long lis ya.

 2. ?Wanem samting we yumi mas jekem?

² Sem mak long lis ya we paelot i yusum, i gat wan lis blong sam samting we yumi mas jekem, blong mekem se bilif blong yumi i stap strong nomata se i gat trabol. Maet yumi jes baptaes no yumi stap plante yia finis long trutok, be yumi mas jekem bilif blong yumi oltaem. Yumi no mas tingting se bilif blong yumi i strong finis. From we sipos wan trabol i kasem yumi, bambae i isi blong yumi no moa fren gud wetem Jehova. Baebol i givim woning long yumi se: “Man we i ting se i stap stanap strong, hem i mas lukaot gud, blong bambae i no foldaon.”—1 Kor. 10:12.

 3. ?Ol Kristin long Galesia oli mas mekem wanem?

³ Ol Kristin long Galesia oli mas gohed blong jekem bilif blong olgeta. Sakrefaes blong Jisas i mekem se ol Kristin oli save kam klosap long God, mo oli save kasem wan spesel samting we i no gat bifo. Yes, God i save jusum olgeta blong oli kam pikinini blong hem. (Gal. 4:9) Be sam long ol Kristin ya oli talem se ol Kristin oli save kam stret man sipos oli folem Loa blong Moses. God i no moa yusum Loa ya, mo ol man we oli no laen blong Isrel, oli neva folem Loa ya. Taswe, ol Kristin we oli man Isrel wetem olgeta we oli no man Isrel, oli mas kasem save se God i no moa askem long ol man blong oli folem Loa blong Moses. Long rod ya, oli soemaot se oli gohed gud long trutok.

4, 5. ?Pol i givim wanem advaes long ol Kristin long Galesia? ?From wanem leta blong hem i impoten long yumi?

⁴ Leta blong aposol Pol we i go long ol Kristin long Galesia, i pulum olgeta evriwan blong oli tingbaot se oli no mas lego ol trutok blong Baebol we oli lanem finis. Yumi no mas gobak long ol samting we yumi lego finis. Leta ya i givhan long yumi evriwan, blong yumi holemstrong long trutok.

⁵ Yumi evriwan i mas tingbaot taem ya we yumi mekem desisen se yumi wantem kam wan man blong Jehova. I gud yu tingbaot ol kwestin ya: ?Yu yu tingbaot ol step we oli givhan long yu blong yu naf blong baptaes? ?Yu tingbaot taem ya we yu save God? ?Wanem tingting blong yu taem yu harem se hem i save gud yu?

 6. ?Wanem kaen lis we bambae yumi tokbaot?

⁶ I gat naen step we yumi mekem taem yumi kam long trutok. (Yu lukluk bokis ya “Ol Step We Yumi Mekem Blong Save God, Oli Givhan Long Yumi Blong Yumi Gohed.”) Yumi save tingbaot ol step ya olsem wan lis blong ol samting we yumi mas jekem blong mekem bilif blong yumi i strong, mo blong yumi no gobak long ol samting blong wol we yumi lego finis. Olsem wan paelot we i jekem lis blong hem oltaem bifo we i flae long plen, yumi tu yumi mas jekem lis blong yumi oltaem.

 7. ?Wanem ‘ol tok ya we oli stret gud’ we yumi mas folem? ?From wanem yumi mas folem?

⁷ Evritaem wan paelot i mas jekem lis bifo we hem i flae long plen. Long sem fasin, yumi mas jekem yumi wan se yumi stap gohed long trutok no nogat. Pol i raet long Timoti se: “Yu yu mas holem strong ol tok ya we mi mi tijim yu finis long hem. Ol tok ya i stret gud, mo i blong soemaot rod blong yu, blong yu save folem ol fasin blong bilif mo blong lavem ol man. Ol fasin ya, yumi stap folem from we yumi joen long Jisas Kraes.” (2 Tim. 1:13) ‘Ol tok ya we i stret gud’ oli stap long Tok blong God. (1 Tim. 6:3) Plan blong haos we man i droem long pepa, i givhan long yumi blong tingbaot se haos ya bambae i olsem wanem taem oli wokem. Long sem fasin, ‘ol tok we i stret’ oli givhan long yumi blong luksave ol samting we Jehova i wantem se yumi wokem long laef blong yumi. Naoia bambae yumi tokbaot ol step we yumi mekem bifo we yumi baptaes, mo bambae yumi jekem sipos yumi stap folem gud ol tok ya we oli stret gud.

8, 9. ?From wanem yumi mas gohed blong mekem save blong yumi i kam bigwan moa mo bilif blong yumi i kam strong moa? Talem wan pijatok.

⁸ Fas step we yumi mekem, hemia blong kasem save blong God we i givhan long yumi blong gat bilif. Be afta we yumi baptaes, fasin fren blong yumi wetem God i mas kam bigwan moa mo i mas kam strong moa. Taswe yumi mas gohed blong mekem save ya i kam bigwan moa, mo yumi mas gohed blong mekem bilif blong yumi i strong moa.—2 Tes. 1:3.

⁹ Hemia i sem mak long wan tri taem i gru. Taem wan tri i gru gogo i kam longfala, hemia i wan samting blong sapraes, antap moa taem ol rus blong hem oli strong. Long Lebanon, i gat ol naesfala tri we oli kolem sida tri. Sam long olgeta oli longlongfala olsem wan bigfala haos we i gat 12 stori long hem. Mo stamba blong olgeta i save kam bigwan, we wan rop blong 12 meta i save goraon long hem. (Sing 5:15) Taem wan tri i gru, fastaem hem i gru kwik. Ale, taem ol rus blong hem oli go dip insaed long graon mo oli gru i go longwe long stamba blong hem, stamba blong tri ya i kam bigwan moa mo i kam longfala moa. Be afta, i no isi blong luk se tri ya i stap gohed blong gru. Hemia i sem mak long ol Kristin taem oli stap gohed gud. Taem yumi jes stat blong stadi long Baebol, yumi jenisim plante samting long laef blong yumi. Biaen yumi baptaes. Ol narafala long kongregesen oli save luk se yumi stap gohed long trutok. Maet yumi stat blong mekem wok blong paenia, no yumi mekem sam narafala wok long kongregesen. Be taem ol yia oli stap pas, i no isi blong ol narafala oli luk se yumi stap gohed gud long trutok. Yumi evriwan i mas mekem save mo bilif blong yumi i kam bigwan moa gogo kasem we yumi ‘no moa pikinini, yumi bigman finis, yumi kam olsem Kraes nomo, we hem i bigman tru.’ (Efes. 4:13) Taswe, taem yumi gohed gud long trutok, yumi olsem wan smol tri we i gru gogo i kam wan bigfala tri we i strong.

10. ?From wanem ol Kristin we oli bigman oli mas traehad blong gohed gud long trutok?

¹⁰ Yumi mas traehad blong gohed moa. Save we yumi gat long saed blong Baebol mo bilif blong yumi, oli olsem ol rus we oli mekem tri i stanap strong mo i no muv. Ol rus ya oli mas gohed blong kam strong moa. (Kol. 2:7) I gat plante brata mo sista we oli traehad blong gohed gud olsem. Wan brata we i elda bitim 30 yia, i talem se hem i stap traehad blong gohed gud yet. Hem i talem se hem i tinghae moa long Baebol i bitim bifo. Hem i gohed blong lanem ol niufala rod blong folem ol rul mo ol loa blong Baebol long laef blong hem. Mo hem i glad moa long wok blong prij.

11. ?Yumi mas mekem wanem blong yumi fren moa wetem Jehova?

¹¹ Sipos yumi wantem gohed gud long trutok, yumi mas kam klosap long Jehova. Hem i wantem se yumi harem we yumi sef gud mo se hem i lavem yumi, olsem wan pikinini we i harem se hem i sef taem hem i stap wetem papa mo mama blong hem we tufala i lavem hem, no taem yumi stap wetem wan besfren blong yumi. Be blong kam klosap long Jehova, yumi mas rere blong yusum taem blong yumi mo yumi mas traehad, ale bambae yumi harem se hem i lavem yumi mo se yumi sef. Taswe, yumi mas meksua se yumi spenem taem evri dei blong ridim Baebol. Mo yumi mas ridim ol niufala magasin, ol buk, mo ol buklet we Jehova i givim long yumi. Samting ya bambae i givhan long yumi blong save God moa, mo bambae yumi fren moa wetem hem.

12. ?Yumi mas mekem wanem sipos yumi wantem se fasin fren blong yumi wetem Jehova i stap strong?

¹² Prea mo ol gudfala fren i save givhan blong mekem fasin fren blong yumi wetem God i kam strong moa. (Ridim Malakae 3:16.) Taem ol fren blong God oli prea long hem, hem i lesin long “ol prea blong olgeta.” (1 Pita 3:12) Taswe yumi mas prea oltaem. (Rom 12:12) Yumi no save gohed blong stap fren blong God sipos hem i no givhan long yumi. Mo sipos yumi no moa prea long hem, bambae yumi no kasem paoa we yumi nidim. Maet bambae tingting blong yumi i foldaon from ol rabis fasin blong wol ya, no maet wan samting i traem yumi nao yumi mekem samting we i nogud. Be God i glad blong mekem evri samting blong givhan long yumi, sipos yumi askem long hem. ?Olsem wanem? ?Yu yu toktok long Jehova olsem we hem i wan fren blong yu we yu trastem hem? ?I gat sam samting we yu mas mekem blong ol prea blong yu i kamgud moa?—Jer. 16:19.

13. ?From wanem yumi mas go oltaem long ol miting?

¹³ Yumi mas joen wetem ol brata mo sista long kongregesen, olgeta ya oli fren blong Jehova. Hem i lavem olgeta from we oli “putum tingting blong olgeta i stap strong long hem” oltaem. (Neham 1:7) Wol ya i nogud tumas, taswe yumi mas spenem plante taem wetem ol brata mo sista. Yumi save givgivhan long yumi blong yumi stap strong. Mo olgeta oli save pulum yumi blong lavem ol narafala mo blong “mekem ol gudfala fasin.” (Hib. 10:24, 25) Sipos yumi no joen wetem ol brata mo sista long kongregesen, bambae yumi no save folem advaes ya we Pol i raetem long buk blong Hibrus. Taswe i gud yumi go oltaem long ol miting, mo yumi traehad blong givim ansa.

14. ?From wanem yumi mas rere oltaem blong tanem tingting blong yumi mo jenisim sam samting long laef blong yumi?

¹⁴ Bifo we yumi kam Kristin, yumi mas tanem tingting blong yumi mo yumi mas finis long olfala laef blong yumi. Be yumi mas rere oltaem blong tanem tingting blong yumi mo blong jenisim sam samting long laef blong yumi. Yumi no stret gud mo yumi gat sam slak fasin blong yumi, taswe i isi blong yumi mekem sin. Sin i olsem wan snek we i rere blong kakae yumi long enitaem. (Rom 3:9, 10; 6:12-14) Yumi no mas giaman long yumi wan se yumi no gat sam slak fasin blong yumi. Jehova i gat longfala tingting long yumi taem yumi stap traehad blong sakemaot ol slak fasin ya. (Fil. 2:12; 2 Pita 3:9) I moa gud yumi yusum taem mo paoa blong yumi blong mekem wok blong Jehova, i bitim we yumi mekem samting we yumi nomo i wantem. Wan sista we i gruap long trutok, i ting se ol man oli mas fraet long Jehova, ale hem i ting se hem i no naf blong mekem Jehova i glad long hem. Hem i lavem Jehova, be hem i no save gud hem. Taswe hem i no harem se hem i stap klosap long Jehova, mo hem i mekem plante mastik long laef blong hem. Ale hem i prea long God blong i halpem hem, mo hem i stat blong jenisim sam samting long laef blong hem. Hem i talem se: “Mi luk se Jehova i lidim gud mi olsem we mi mi wan pikinini blong hem, mo taem ol samting i blokem mi, hem i givhan long mi blong mi winim olgeta wanwan. Hem i kaen gud long mi, hem i soemaot samting we mi mas mekem.”

15. ?Wanem samting we Jisas mo Jehova tufala i luk mo we i mekem tufala i glad?

¹⁵ Enjel blong God i talem long Pita mo ol narafala aposol se oli mas gohed blong “talemaot ol tok” blong gud nius. (Wok 5:19-21) Wan samting we i save mekem bilif blong yumi i strong, hemia blong jekem sipos yumi stap mekem wok blong prij evri wik. Jisas mo Jehova tufala i luk se bilif blong yumi i strong no nogat, mo tufala i glad long wok we yumi mekem taem yumi prij. (Rev. 2:19) Wok blong prij i mas wan impoten samting long laef blong yumi.

16. ?From wanem yumi no mas fogetem se yumi givim laef blong yumi long Jehova?

¹⁶ Yumi no mas fogetem se yumi givim laef blong yumi long Jehova. Yumi gat wan samting we i impoten tumas, hemia fasin fren blong yumi wetem Jehova. Hem i save gud olgeta man we oli blong hem. (Ridim Aesea 44:5.) I gud yumi jekem sipos fasin fren blong yumi wetem Jehova i strong no nogat, mo yumi askem long hem blong i givhan long yumi. Mo tu, i gud yumi tingbaot dei we yumi baptaes long hem. Dei ya i impoten. Baptaes blong yumi i soemaot long ol narafala se yumi givim laef blong yumi long Jehova. Hemia i wan desisen we yumi mekem we i impoten i bitim ol narafala desisen.

17. ?From wanem yumi mas stanap strong?

¹⁷ Pol i talem long ol Kristin long Galesia se oli no mas kam slak. (Gal. 6:9) Yumi tu yumi mas stanap strong, from we bambae yumi kasem ol trabol. Be Jehova bambae i givhan long yumi. I gud yumi prea oltaem from tabu spirit blong God, mo hem bambae i givhan long yumi blong yumi glad mo yumi gat pis, nomata se trabol i stap yet. (Mat. 7:7-11) Yu traem tingbaot: Jehova i lukaot gud long ol smosmol pijin. Be hem i lavem yu moa i bitim ol smosmol pijin ya. Hem i wantem lukaot gud long yu from we yu lavem hem mo yu givim laef blong yu long hem. (Mat. 10:29-31) Nating se yu kasem sam bigfala trabol, be yu no mas kam slak. Yu no mas lego trutok mo gobak long ol samting we yu lego finis. Yumi gat plante blesing from we naoia, Jehova i save gud yumi.

18. ?Olgeta we oli save God oli mas mekem wanem?

¹⁸ Nomata se yu jes baptaes no yu baptaes plante yia finis, ?be naoia yu mas mekem wanem? Yu mas save gud Jehova, mo yu mas gohed gud long trutok. Yu no mas ting se yu save God finis ale yu no moa mekem fasin fren blong yu wetem hem i kam gud moa. I gud we wanwan taem, yu luklukbak long ol save we yumi tokbaot long stadi ya, blong mekem se yu kam klosap long Jehova, we i Papa, Fren, mo God ya we i lavem yumi tumas.—Ridim 2 Korin 13:5, 6.