Yumi Mas Lefleftemap Tingting Blong Yumi

1, 2. ?Wanem i givhan long ol 230 Witnes ya blong oli no ded?

TAEM gavman blong Nasi i foldaon long en blong Wol Wo Tu, hem i givim oda blong oli kilim i ded plante taosen man we oli stap long ol rabis kalabus. Olgeta presina we oli stap long rabis kalabus ya Sachsenhausen, oli mas wokbaot i go kasem wof, blong oli go long sip, mo go draon long solwota. Ol man oli kolem wokbaot ya se wokbaot blong ded.

² Toti tri taosen presina we oli kamaot long rabis kalabus ya, oli mas wokbaot 250 kilometa i go long wan wof we nem blong hem Lübeck. Long olgeta ya, i gat 230 Witnes blong Jehova we oli kamaot long sikis defren kantri. Ol soldia oli putum ol Witnes ya oli wokbaot wanples. Taem oli stap wokbaot, olgeta evriwan oli slak we oli slak from we oli hanggri mo oli sik. ?Ol brata ya oli mekem wanem blong oli no ded? Wan long olgeta i talem se: “Mifala i no stop blong lefleftemap tingting blong mifala taem mifala i stap wokbaot.” Tru ya, from we God i givim “paoa ya we i bigwan tumas” long olgeta, mo from we oli lavlavem olgeta, samting ya i givhan long olgeta blong oli no ded long trabol taem ya.—2 Kor. 4:7.

 3. ?From wanem yumi mas lefleftemap tingting blong yumi?

³ Tede, yumi no stap long wan wokbaot olsem. Nating se i olsem, yumi stap kasem plante trabol. Afta we Kingdom blong God i stanap long 1914, oli sakemaot Setan long heven i kamdaon long wol, mo hem i “kros tumas, from we hem i save se i gat smol taem nomo blong hem i stap yet.” (Rev. 12:7-9, 12) Taem Amagedon i stap kam klosap, Setan i stap yusum ol hadtaem mo ol samting blong traem yumi, blong mekem se yumi no moa strong long bilif. Mo tu hem i stap yusum ol wari blong laef evri dei. (Job 14:1; Pri. 2:23) Samtaem, ol trabol we yumi stap kasem oli mekem i had long yumi mo oli mekem tingting blong yumi i foldaon. Nating se bilif blong yumi i strong, be yumi no save winim tingting we i foldaon. Yu traem tingbaot wan brata we blong plante yia, hem i givhan long plante brata mo sista blong oli gat strong bilif. Taem hem mo waef blong hem tufala i kam olfala, tufala i sik. Mo tingting blong brata ya i foldaon bigwan. Olsem brata ya, yumi evriwan i nidim “paoa ya we i bigwan tumas” we Jehova i givim blong givhan long yumi. Mo tu yumi nidim blong lefleftemap tingting blong yumi.

 4. Sipos yumi mas leftemap tingting blong narafala, ?yumi mas tingbaot wanem advaes blong Pol?

⁴ Sipos yumi mas leftemap tingting blong ol narafala, yumi mas tingbaot advaes we Pol i talem long ol Kristin se: “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin. I nogud yumi lego ol miting blong jos, olsem we sam long yumi oli mekem finis. Oltaem yumi mas toktok gud long yumi blong leftemap tingting blong yumi, from we yumi save se Dei ya we Masta blong yumi bambae i jajem olgeta man long hem, hem i kam klosap finis.” (Hib. 10:24, 25) ?Yumi save folem ol tok blong vas ya olsem wanem?

 5. ?I minim wanem blong “yumi stap tingbaot yumi,”? ?Mo yumi mas mekem samting ya olsem wanem?

⁵ Tok ya “tingbaot yumi” i min se yumi “tingbaot nid blong ol narafala mo yumi tingbaot olgeta.” ?Yu ting se yumi save tingbaot nid blong ol brata sista blong yumi sipos yumi no storian plante wetem olgeta afta long ol miting? ?Yu ting se yumi save mekem olsem sipos yumi tingbaot samting we narafala i talem se i no impoten? Nogat. I tru se yumi mas ‘lukaot long ol bisnes blong yumi nomo,’ mo yumi no ‘go insaed long bisnes blong narafala man.’ (1 Tes. 4:11; 1 Tim. 5:13) Be sipos yumi wantem leftemap tingting blong ol brata mo sista blong yumi, yumi mas save gud laef blong olgeta. Yumi mas save samting we oli naf blong mekem mo samting we oli no naf blong mekem, mo ol fasin blong olgeta. Mo yumi mas luksave sipos oli gat strong bilif no nogat. Oli mas luk yumi se yumi fren blong olgeta we yumi lavem olgeta. Blong mekem olsem, yumi mas spenem taem wetem olgeta, i no long taem nomo we oli fesem trabol, be long ol narafala taem tu.—Rom 12:13.

 6. ?Wanem i save givhan long ol elda blong oli “tingbaot” ol brata mo sista?

⁶ God i givim wok long ol elda blong oli ‘lukaot gud long ol man we hem i givim’ long olgeta. Oli mas glad mo oli mas wantem blong mekem wok ya. (1 Pita 5:1-3) Be sipos ol elda oli no savegud ol brata mo sista, ?olsem wanem oli save mekem gud wok blong olgeta? (Ridim Ol Proveb 27:23.) Sipos ol elda oli rere blong lesin long ol brata sista, mo oli glad blong joen wetem olgeta, bambae ol brata sista oli glad blong askem advaes long olgeta. Mo bambae oli glad moa blong talemaot ol filing mo ol wari blong olgeta long ol elda. Ale samting ya bambae i givhan long ol elda blong oli “tingbaot” ol brata sista ya mo givhan long olgeta.

 7. Taem man we tingting blong hem i foldaon i talem wan tok we yumi “sek” long hem, ?yumi mas mekem wanem?

⁷ Taem Pol i stap toktok long ol Kristin long Tesalonaeka, hem i talem se: “Yufala i mas givhan long olgeta we oli no strong.” (Ridim 1 Tesalonaeka 5:14.) Olgeta we tingting blong olgeta i foldaon oli olsem olgeta ya we vas ya i talem se “oli stap fraet,” oli no strong. Ol Proveb 24:10 i talem se: “Sipos tingting blong yu i no strong long taem blong trabol, hemia i soemaot we yu yu no strong nating.” Taem man we tingting blong hem i foldaon bigwan i toktok, man i save “sek long ol tok” blong hem. (Job 6:2, 3) Taem yumi harem ol tok blong man olsem, yumi mas “tingbaot” se samting we hem i talem, i no rili samting we i stap long hat blong hem. Mama blong Rachelle i harem nogud tumas mo tingting blong hem i foldaon bigwan. Rachelle i talem se: “Plante taem, Mama i talem sam samting we i stikim mi. Long taem olsem, mi traem blong tingbaot ol gudfala fasin blong mama. Hem i lavem ol man, hem i kaen, mo hem i stap givim samting long gladhat blong hem. Mi lanem se ol man we tingting blong olgeta i foldaon, oli talem plante samting we oli no minim blong talem. Long taem olsem, wan samting nomo we yumi save mekem, hemia blong no givimbak fasin nogud blong olgeta.” Ol Proveb 19:11 i talem se: “Sipos yu gat hed, bambae yu no save kros kwik. Sipos wan man i mekem i rong long yu, nao yu no tingbaot, hemia i wan gudfala fasin.”

 8. ?Yumi mas ‘mekem hu i save’ se yumi lavem hem, mo from wanem?

⁸ Yu traem tingbaot wan man we i mekem wan sin, nao i kasem trabol. Biaen, hem i tanem tingting blong hem. Nating se i olsem, hem i stap harem nogud yet mo i sem from mastik we hem i mekem. ?Wanem samting we yumi save mekem we i soemaot se yumi “tingbaot” man ya? Pol i raetem leta long ol Kristin long Korin long saed blong wan Kristin we i tanem tingting blong hem from mastik blong hem. Pol i talem se: “Yufala i leftemap tingting blong hem bakegen. Sipos no, bambae hem i harem nogud tumas, nao bambae tingting blong hem i foldaon olgeta. Mi mi talem long yufala, se plis yufala i go mekem hem i save we yufala i lavem hem.” (2 Kor. 2:7, 8) Wan diksonari i eksplenem minim blong tok ya “mekem hem i save” se i minim “soemaot, agri, mo pruvum.” Yumi no mas ting se man bambae i kasem save hem wan se yumi lavem hem mo yumi tingbaot hem. Hem i mas luk se yumi mekem sam samting blong soemaot se yumi lavem hem.

 9. ?I minim wanem blong givgivhan long yumi “blong lavem ol man mo mekem ol gudfala fasin”?

⁹ Pol i talem se: “I gud yumi stap tingbaot yumi, blong yumi givgivhan long yumi blong mekem yumi strong blong lavem ol man, mo blong mekem ol gudfala fasin.” Yumi mas pulum ol brata mo sista blong oli lavlavem olgeta mo blong oli mekem ol gudfala fasin. Yu traem tingbaot. Taem faea i stat blong godaon, yumi mas putum sam moa faeawud mo blu long faea blong i laet. (2 Tim. 1:6, NW) Long sem fasin, yumi tu yumi save pulum ol brata mo sista blong yumi blong oli soemaot se oli lavem Jehova, mo ol man raonabaot long olgeta. Yumi mas talem ol gudfala tok long olgeta blong pulum olgeta blong mekem ol gudfala fasin.

10, 11. (1) ?Hu i nidim we yumi talem ol gudfala toktok blong leftemap tingting blong olgeta? (2) Yu talem wan stori we i soemaot olsem wanem gudfala toktok i save givhan long man we tingting blong hem i foldaon.

¹⁰ Yumi evriwan i wantem se narafala i talem ol gudfala tok long yumi, nating se yumi harem nogud no nogat. Wan elda i talem se: “Papa blong mi i neva talem long mi se mi mekem wan gud samting. Ale, taem mi gruap, mi ting nating long mi wan. . . . Naoia mi gat 50 yia, mo mi glad taem ol fren blong mi oli talem se mi mekem wan gudfala wok olsem wan elda. . . . Samting we i hapen long laef blong mi, i tijim se i impoten blong talem ol gudfala tok blong leftemap tingting blong ol narafala, mo mi mi traehad blong mekem olsem.” Ol gudfala toktok blong leftemap tingting i save givhan bigwan long evriwan, ol paenia, ol elda, mo ol narafala tu we tingting blong olgeta i foldaon.—Rom 12:10.

¹¹ Taem olgeta we oli bigman long Kristin fasin oli stap ‘givhan long man we i foldaon,’ oli mas talem ol gudfala toktok long hem mo oli mas givim advaes wetem lav. Samting ya bambae i givhan long hemia we i mekem mastik, blong i tanem tingting blong hem, mo i gohed blong mekem ol gudfala wok. (Gal. 6:1) Hemia samting we i hapen long sista ya Miriam. Hem i talem se: “Taem ol gudfala fren blong mi oli lego kongregesen, mi mi harem nogud bitim mak. Long sem taem ya, papa blong mi i sik bigwan, blad i ron insaed long bren blong hem. Tingting blong mi i foldaon bigwan. Ale, blong traem winim samting ya, mi stat blong joen wetem ol fren blong wol.” Samting ya i mekem hem i harem olsem se Jehova i no lavem hem, mo hem i tingting blong lego trutok. Taem wan elda i storian wetem hem, mo i tokbaot ol gudfala wok we hem i bin mekem long ol yia we oli pas, samting ya i tajem hat blong hem. Hem i letem ol elda oli givhan long hem blong i luksave se Jehova i lavem hem. From samting ya, hem i lavem Jehova bakegen. Hem i sakemaot boefren blong hem we i no wan man blong Jehova, mo hem i gohed blong mekem wok blong Jehova.

12. ?Wanem bambae i hapen long man we yumi jikim hem?

¹² Sipos yumi mekem wan brata no sista i sem taem yumi skelem wok blong hem wetem wok blong ol narafala, no yumi daonem hem from we hem i no folem ol strong rul we yumi putum, no yumi mekem hem i harem nogud from we hem i no mekem plante wok, samting ya bambae pusum hem blong i wok strong, be blong smoltaem nomo. Be sipos yumi talem ol gudfala toktok long wan brata mo sista, mo yumi pulum hem blong i lavem Jehova, samting ya i givim gudfala tingting long hem, mo bambae hem i gohed strong longtaem long wok blong Jehova.—Ridim Filipae 2:1-4.

13. ?I minim wanem se yumi leftemap tingting blong narafala? (Yu lukluk pija long stat blong stadi ya.)

¹³ Yumi mas ‘leftemap tingting blong yumi, from we yumi save se dei ya i kam klosap finis.’ Hemia i min se yumi pulum olgeta blong oli gohed blong mekem wok blong God. Yumi givgivhan long yumi blong yumi kam strong moa blong lavem ol man mo blong mekem ol gudfala fasin. Hemia i olsem we yumi blo long faea we klosap i ded. Mo taem yumi leftemap tingting blong narafala, i olsem we yumi putum faeawud long faea blong i gohed blong laet, no blong i laet moa. Hemia i minim tu se yumi givhan long narafala blong mekem hem i kam strong long bilif mo yumi leftemap tingting blong olgeta we oli harem nogud. Taem yumi gat janis olsem blong leftemap tingting blong wan narafala, yumi mas toktok long hem wetem respek mo yumi mas toktok long fasin we i soemaot se yumi lavem hem. (Prov. 12:18) Mo tu, yumi mas “rere oltaem blong lesin” mo yumi “no mas hareap blong toktok.” (Jem. 1:19) Sipos yumi lesin gud long ol Kristin brata mo sista blong yumi, bambae yumi save kasem save long trabol blong olgeta, nao yumi save talem wan toktok we i givhan long olgeta blong oli stanap strong nomata se oli kasem trabol.

14. ?Wan elda i givhan olsem wanem long wan brata we tingting blong hem i foldaon?

¹⁴ Wan elda we i gat sore, i stap givhan long wan brata we i slak blong sam yia finis. Elda ya i lesin gud taem brata ya i toktok long hem, ale elda ya i luksave se brata ya i lavem Jehova yet. Brata ya i stap stadi long evri Wajtaoa we i kamaot mo hem i stap traehad blong go oltaem long ol miting. Be fasin blong samfala long kongregesen i mekem hem i harem nogud mo i kam kros. Elda ya i no jajem brata ya, be hem i lesin gud long hem, mo hem i talem long brata ya se hem i stap tingbaot hem mo famle blong hem. Sloslo, brata ya i stat blong luksave se hem i stap letem ol nogud samting we oli hapen longtaem finis, oli blokem hem blong mekem wok blong Jehova. Elda ya i singaot brata ya blong prij wetem hem. Ale samting we i kamaot se, brata ya i gohed gud bakegen long wok blong Jehova mo samtaem biaen, hem i kam wan elda bakegen.

15. ?Fasin blong Jehova i tijim yumi long wanem?

¹⁵ Taem yumi givhan long wan man we tingting blong hem i foldaon, bambae i tektaem blong man ya i harem gud bakegen. Yumi mas gohed blong stap givhan long hem. Pol i talem se: ‘Yufala i mas givhan long olgeta we oli no strong. Mo yufala i mas mekem tingting blong yufala i longfala long olgeta man.’ (1 Tes. 5:14) Yumi no mas hareap blong lego olgeta we oli no strong, be yumi mas gohed blong “givhan” long olgeta. Bifo, Jehova i mekem tingting blong hem i longfala, taem hem i stap givhan long ol man blong hem we oli harem nogud. Wan taem, God i toktok gud long Elaeja mo i tingbaot filing blong hem. Jehova i givim samting we profet ya i nidim taem hem i stap mekem wok blong hem. (1 King 19:1-18) Jehova i kaen long Deved mo i fogivim hem from we Deved i tanem tingting blong hem. (Sam 51:7, 17) Taem man we i raetem Ol Sam 73, klosap hem i lego Jehova, Jehova i givhan long hem tu. (Sam 73:13, 16, 17) Jehova i kaen long yumi taem yumi harem nogud mo tingting blong yumi i foldaon. (Eks. 34:6) Baebol i talem se sore blong hem i “niuwan oltaem nomo,” mo i ‘stap sem mak nomo olwe, i no save jenis.’ (Krae. 3:22, 23) Jehova i wantem se yumi folem fasin blong hem mo yumi kaen long olgeta we oli harem nogud mo tingting blong olgeta i foldaon.

16, 17. ?Yumi mas gat strong tingting blong mekem wanem, mo from wanem?

¹⁶ Plante long ol 33,000 presina we oli kamaot long rabis kalabus ya, oli ded. Be evri 230 Witnes blong Jehova, oli no ded. Tru ya, fasin blong olgeta blong lefleftemap tingting blong olgeta mo blong givgivhan long olgeta, mo i halpem olgeta bigwan. Ale, wokbaot ya we oli talem se hem i wokbaot blong ded, i kam wokbaot blong laef.

¹⁷ Tede, yumi stap long ‘rod blong go kasem laef.’ (Mat. 7:14) I no longtaem, ol man blong Jehova bambae oli wokbaot i go insaed long niufala wol we stret fasin nomo bambae i stap long hem. (2 Pita 3:13) Yumi mas gat strong tingting blong givgivhan long yumi, blong yumi folem rod we i go kasem laef we i no save finis.