!Yu Mas ‘Strong Blong Mekem Ol Gudfala Wok’!

“Jisas Kraes, hem i givim laef blong hem blong sevem yumi. Hem i tekemaot yumi long ol fasin blong yumi we i no stret, i mekem yumi fri. Mo hem i mekem yumi evriwan i kam wan famle, we laef blong yumi i klin, yumi man blong hem nomo, mo yumi strong blong mekem ol gudfala samting [“wok,” NW].”—TAET. 2:14.

 1. ?Wanem i hapen long yad blong tempol taem Jisas i kam long Nisan 10, 33 K.T.?

LONG Nisan 10, 33 K.T., jes sam dei bifo long lafet blong Pasova. Plante man we oli kam long Jerusalem blong mekem wosip, oli stap long yad blong tempol, oli glad tumas blong wet long lafet blong Pasova. ?Wanem i hapen taem Jisas i kam long tempol? Trifala man blong raetem Gospel, Matiu, Mak, mo Luk, oli talem se Jisas i ronemaot ol man we oli stap mekem maket long yad blong haos ya. Hem i kafsaedem ol tebol blong ol man we oli stap jenisim mane, mo ol jea blong olgeta we oli stap salem nawimba. (Mat. 21:12; Mak 11:15; Luk 19:45) Tri yia bifo finis, Jisas i bin ronemaot ol man blong mekem maket long yad blong tempol. I gud blong makem se strong tingting we Jisas i gat blong wantem mekem ol samting we God i wantem, i no kam slak nating.—Jon 2:13-17.

2, 3. ?Olsem wanem yumi save se strong tingting we Jisas i gat i no jes blong klinim tempol nomo?

² Ol tok blong Matiu oli soemaot se strong tingting blong Jisas long taem ya, i no jes blong klinim tempol nomo. Be hem i mekem ol blaenman mo ol man we leg blong olgeta i nogud, we oli kam long hem long tempol, oli gud bakegen. (Mat. 21:14) Gospel blong Luk i tokbaot sam narafala wok we Jisas i mekem. “Evri dei, Jisas i stap tijim ol man long yad ya blong haos blong God.” (Luk 19:47; 20:1) Minista wok blong Jisas i soemaot klia we Jisas i gat strong tingting.

³ Biaen, aposol Pol i raet long Taetas mo i eksplenem se Jisas “i givim laef blong hem blong sevem yumi. Hem i tekemaot yumi long ol fasin blong yumi we i no stret, i mekem yumi fri. Mo hem i mekem yumi evriwan i kam wan famle, we laef blong yumi i klin, yumi man blong hem nomo, mo yumi strong blong mekem ol gudfala samting [“wok,” NW].” (Taet. 2:14) ?Long wanem rod, yumi tede yumi save ‘strong blong mekem ol gudfala wok’? ?Mo olsem wanem ol eksampol blong ol king blong Juda oli leftemap tingting blong yumi?

Strong Tingting Blong Prij Mo Tij

4, 5. ?Long wanem rod ol fofala king ya blong Juda oli soemaot se oli strong blong mekem ol gudfala wok?

⁴ Asa, Jeosafat, Hesekia mo Josaea, olgeta evriwan oli mekem sam spesel traehad blong finisim fasin blong wosip long ol aedol long Juda. Asa “i tekemaot ol olta blong ol hiten man, wetem ol ples blong mekem wosip long ol narafala god, mo i brebrekemdaon ol longlongfala ston ya we ol man oli stanemap blong mekem wosip long olgeta, mo i katemdaon ol pija blong woman god ya Asera.” (2 Kron. 14:3) Strong tingting we Jeosafat i gat long wosip blong Jeova i pulum hem blong “brekemdaon olgeta ples blong mekem wosip long ol narafala god, mo i stap katemdaon ol aedol blong woman god ya Asera.”—2 Kron. 17:6; 19:3.a

⁵ Biaen long impoten lafet blong seven dei Pasova we Hesekia i mekem bakegen long Jerusalem, “ol laen blong Isrel we oli kam long lafet ya oli go long evri taon long Juda, oli brebrekem ol longlongfala ston we ol man oli stanemap blong mekem wosip long olgeta, mo oli katemdaon ol pija blong woman god ya Asera, mo oli spolem ol olta mo ol ples blong mekem wosip long ol god ya. Mo biaen, oli mekem sem samting ya long ol narafala ples long Juda, mo long ol ples long distrik ya Benjamin, mo long distrik ya Efrem, mo long distrik ya Manase.” (2 Kron. 31:1) Yangfala Josaea i kam king taem hem i gat eit yia blong hem nomo. Baebol i talem se: “Long taem ya we King Josaea i yangfala yet, long namba eit yia blong hem we hem i rul, hem i stat blong mekem wosip long Hae God olsem we olfala bubu ya blong hem bifo, King Deved i stap mekem. Mo long namba twelef yia blong hem, hem i stat blong mekem ol ples long Jerusalem mo olbaot long Juda oli klin bakegen long fes blong Hae God. Hem i tekemaot ol ples blong mekem wosip long ol narafala god, wetem ol aedol blong woman god ya Asera, mo ol narafala aedol we oli stap long ol ples ya.” (2 Kron. 34:3) Yes, ol fofala king ya oli strong blong mekem ol gudfala wok.

 6. ?From wanem wok blong prij we yumi mekem i sem mak long gudfala wok we ol fofala king blong Juda oli mekem?

⁶ Tede, yumi joen long wan spesel wok tu blong halpem ol man blong oli fri long ol giaman tijing mo fasin blong wosip long aedol tu. Wok we yumi mekem long ol haos wanwan i givim janis long yumi blong faenem enikaen man. (1 Tim. 2:4) Wan yangfala gel long Esia i tingbaot olsem wanem mama blong hem i stap mekem wosip long fored blong ol pija long haos blong olgeta. Gel ya i stap tingting se i no olgeta pija evriwan we oli pijarem trufala God, ale, plante taem hem i prea blong God i halpem hem blong save se hu ya trufala God. Wan dei hem i harem man i noknok long doa blong hem. Taem hem i openem doa, hem i luk tu woman we tufala i Witnes blong Jeova, mo tufala i glad blong halpem hem blong lanem long saed blong spesel nem blong God, hemia Jeova. !Mo hem i glad tumas blong lanem trutok long saed blong ol aedol! Naoia hem i soemaot strong tingting blong joen long wok blong prij mo tijim ol man long saed blong God mo stamba tingting blong Hem.—Sam 83:18, NW; 115:4-8; 1 Jon 5:21.

 7. ?Yumi save mekem wanem blong folem eksampol blong ol tija ya we Jeosafat i sanem olgeta oli go long ol taon blong Juda?

⁷ ?Taem yumi joen long wok blong prij long ol haos wanwan, yumi finisim fulwan ol teritori blong yumi? Long namba tri yia blong rul blong Jeosafat, Jeosafat i sanem faef haeman blong hem, naen Livaet, mo tu pris, oli go long ol taon blong Juda blong tijim ol man long ol loa blong Jeova. Spesel wok we olgeta ya oli mekem i karem gudfala frut, nao ol man blong ol neson raonabaot tu oli stat blong fraetgud long Jeova. (Ridim 2 Kronikel 17:9, 10.) Taem yumi visitim ol man long ol defdefren taem long haos blong olgeta, maet yumi save toktok wetem plante memba blong wan famle.

 8. ?Olsem wanem yumi save mekem moa long wok blong prij?

⁸ Plante man blong God tede oli glad blong lego haos blong olgeta blong go prij long ol ples we i nidim moa Witnes we oli wok strong. ?Yu yu save mekem olsem tu? Sam long yumi we oli no save mekem olsem, oli traem prij long ol man long ples blong yumi we oli toktok narafala lanwis. !Ron, we i gat 81 yia blong hem, i lanem blong talem halo long 32 lanwis! Hem i mekem olsem from we i gat plante man long teritori blong hem we oli toktok plante defdefren lanwis. I no longtaem i pas, hem i mitim wan man Afrika mo woman blong hem long rod, mo i talem halo long tufala long lanwis blong tufala, hemia Yoruba. Tufala i askem long Ron sipos hem i go finis long Afrika. Be Ron i talem se, no. Ale tufala i askem long hem se olsem wanem nao hem i save lanwis blong tufala. Long rod ya nao, Ron i prij long tufala. Tufala i tekem sam magasin mo tufala i glad blong givim adres blong tufala long Ron. Biaen, Ron i givim adres blong tufala long kongregesen blong lanwis ya blong mekem se tufala i save stadi Baebol.

 9. ?From wanem i impoten we long wok blong prij, yumi ridim ol vas stret long Baebol? Givim wan eksampol.

⁹ Ol tija ya we Jeosafat i sanem olgeta oli go long ol taon, oli tekem ‘buk blong loa blong Jeova’ wetem olgeta. Raon long wol, yumi traehad blong tijim ol man long Baebol from we Baebol i Tok blong God. Yumi mekem wan spesel traehad blong ridim Baebol stret long ol man blong oli luk samting we Baebol i rili talem. Wan woman i eksplenem long Witnes ya Linda se, hasban blong hem i kasem strok, mo i wantem we woman ya i stap klosap long hem oltaem. Woman ya i harem nogud tumas, hem i se: “Mi no save se mi bin mekem wanem blong God i letem samting olsem i hapen long mi.” Linda i ansa long hem se: “?Mi save soem wan samting long yu?” Ale, Linda ya i ridim Jemes 1:13 mo i talem se: “Olgeta fasin safa we yumi mo olgeta we yumi lavem olgeta tumas, yumi stap kasem, oli no wan panis we i kam long God.” Taem woman ya i harem samting ya, hem i putum han blong hem i goraon long Linda from we hem i glad tumas blong harem samting ya. Linda i talem se: “From we mi yusum Baebol, mi naf blong leftemap tingting blong woman ya. Samtaem ol vas we yumi ridim long Baebol long ol man long haos, oli ol vas we man i neva save bifo.” Storian ya i mekem se Linda i statem Baebol stadi wetem woman ya.

Ol Yangfala We Oli Strong Blong Mekem Gudfala Wok

10. ?Olsem wanem Josaea i wan gudfala eksampol blong ol Kristin yangfala tede?

¹⁰ Tingbaot bakegen eksampol blong Josaea. Yumi luk we Josaea i sapotem trufala wosip taem hem i wan yangfala nomo, mo taem hem i gat klosap 20 yia blong hem, hem i statem bigfala wok ya blong finisim fasin ya blong wosip long ol aedol. (Ridim 2 Kronikel 34:1-3.) Plante yangfala tede oli wok strong olsem Josaea long wok blong Kingdom.

11-13. ?Wanem ol lesen we yumi save lanem long ol yangfala tede we oli mekem wok blong Jeova wetem strong tingting?

¹¹ Hannah i laef long Inglan. Taem hem i gat 13 yia mo i stap lanem Franis long skul, hem i harem se i gat wan grup blong ol brata sista we i toktok Franis i stap long taon klosap long ples blong hem. Papa blong hem i glad blong folem hem i go long ol miting long taon ya. Naoia Hannah i gat 18 yia. Hem i wan fultaem paenia mo hem i strong blong prij long ol man we oli toktok Franis. ?Yu tu yu save lanem wan narafala lanwis mo halpem ol narafala man blong oli save Jeova?

¹² Rachel i laekem tumas blong wajem video ya we taetel blong hem se, Pursue Goals That Honor God. Hem i tokbaot taem ya we hem i stat mekem wok blong Jeova long 1995, mo wanem tingting blong hem long taem ya, i se: “Mi bin ting se mi stap gohed gud long trutok.” Nao hem i talem se: “Afta we mi wajem video ya, naoia mi luksave se long ol yia ya, mi no givim bes blong mi long wok blong Jeova. Mi mas wok strong blong holem trutok mo blong tingting strong mo traehad blong joen long wok blong prij mo mekem stadi blong mi wan.” Naoia Rachel i luk se hem i mekem wok blong Jeova wetem strong tingting. ?Wanem gudfala frut i kamaot from? Hem i talem se: “Fasin fren blong mi wetem Jeova i kam strong moa. Ol prea blong mi oli gat moa mining, stadi blong mi wan i kam dip moa mo i givim glad long mi, mo ol stori blong Baebol oli tru long tingting blong mi. Frut we i kamaot se, mi glad tumas blong joen long wok blong prij, mo mi kasem trufala glad taem mi luk olsem wanem ol rod blong Jeova oli mekem i gud long ol narafala.”

¹³ Luke i wan yangfala mo DVD ya Young People Ask—What Will I Do With My Life? i jenisim tingting blong hem. Afta we Luke i wajem DVD ya, hem i raetem se: “Mi stap tingting bakegen long mi wan se mi stap mekem wanem wetem laef blong mi.” Hem i talem se: “Fastaem, mi wantem kasem hae edukesen we i save givhan long mi blong kasem bigfala mane mo biaen mi save tingbaot ol mak blong mi long saed blong spirit. Be rod we mi folem i no pulum mi blong kam moa klosap long Jeova. Defren olgeta, i mekem mi mi slak.” Ol yangfala brata mo sista. I gud yufala i folem eksampol blong Hannah blong yusum samting we yufala i lanem long skul blong mekem moa long wok blong prij. I gud yufala i folem eksampol blong Rachel blong gat strong tingting blong kasem ol mak we oli givim ona long God. I gud yufala i folem eksampol blong Luke blong blokem ol denja we oli ol traem blong plante yangfala.

Strong Tingting Blong Obei Long Ol Woning

14. ?Wanem kaen wosip we Jeova i agri long hem, mo from wanem i no isi oltaem blong mekem olsem tede?

¹⁴ Ol man blong Jeova oli mas klin sipos oli wantem se Jeova i agri long wosip blong olgeta. Aesea i givim woning ya se: “Yufala ya we yufala i stap karem ol samting blong yusum long haos blong Hae God, yufala i mas aot gud nomo long kantri ya Babilonia. Yufala i no mas tajem ol samting we i doti long fes blong hem, yufala i mas mekem we yufala i klin long fes blong hem, nao yufala i mas aot.” (Aes. 52:11) Plante yia bifo we Aesea i raetem ol tok ya, gudfala King ya Asa i mekem wan bigfala wok blong karemaot rabis fasin long Juda. (Ridim 1 King 15:11-13.) Mo sam handred yia biaen, aposol Pol i talem long Taetas se Jisas i givim laef blong hem blong mekem ol man we oli biaen long hem oli klin, oli ‘blong hem nomo, mo oli strong blong mekem ol gudfala samting [“wok,” NW].’ (Taet. 2:14) Tede, wol i fulap moa long ol nogud fasin i bitim bifo, mo from samting ya, i no isi oltaem long ol yangfala blong oli stap klin. Olsem nao, olgeta man blong God, yangfala mo olfala, oli mas faet strong blong blokem ol nogud pija long saed blong seks we oli kamaot long ol bigfala saen long rod, long televisin, long ol muvi mo speseli long Intenet.

15. ?Wanem i save givhan long yumi blong wokem fasin ya blong no laekem nating ol rabis fasin?

¹⁵ Strong tingting blong obei long ol woning blong God i save halpem yumi blong wokem fasin ya blong no laekem nating ol rabis fasin. (Sam 97:10; Rom. 12:9) Wan Kristin man i talem se, yumi mas agensem ol nogud pija long saed blong seks blong bambae yumi “fri long paoa blong hem we i save pulum yumi.” Blong pulumaot tufala pis magnet we tufala i fas wanples, man i mas gat paoa we i strong moa long paoa we i joenem tufala magnet ya. Long sem fasin, i nidim bigfala traehad blong blokem ol nogud pija long saed blong seks blong oli no pulum yumi. Sipos yumi kasem save se ol nogud pija long saed blong seks oli save spolem yumi bigwan, samting ya bambae i halpem yumi blong wokem fasin ya blong no laekem nating olgeta. Wan brata i traehad bigwan blong stopem fasin ya blong go long ol websaet long Intenet we oli soemaot ol nogud pija long saed blong seks. Hem i muvum kompiuta blong hem i kam long wan ples we evriwan long famle oli save luk. Be i no hemia nomo. Brata ya i gat strong tingting blong stap klin mo hem i strong blong mekem ol gudfala wok. Hem i mekem wan narafala samting tu. From we hem i mas yusum Intenet long ol wok blong hem, hem i plan se hem i save openem Intenet nomo sipos waef blong hem i stap wetem hem.

Gudfala Kristin Fasin i Gat Paoa Long Ol Man

16, 17. ?Gudfala Kristin fasin blong yumi i gat paoa olsem wanem long ol man we oli stap wajem yumi? Givim wan eksampol.

¹⁶ !I gud tumas blong luk gudfala fasin we ol yangfala man mo woman oli gat long wok blong Jeova, mo olsem wanem samting ya i mekem ol man oli sapraes long olgeta! (Ridim 1 Pita 2:12.) Wan man we i go fiksimap mesin blong printim ol buk long Betel blong London i jenisim tingting we hem i bin gat long saed blong ol Witnes blong Jeova. Waef blong hem, we i stap stadi Baebol wetem wan woman we i Witnes, i luk se fasin blong man blong hem i jenis. Fastaem, hasban blong hem i no wantem we ol Witnes oli kam long haos blong tufala. Be afta we hem i finisim fiksimap mesin ya long Betel, hem i kambak long haos mo i glad tumas long kaen fasin we ol brata mo sista long Betel oli soemaot long hem blong talem ol gudfala toktok long hem. Hem i talem se i no gat wan long olgeta we i tok swea. Evriwan oli gat longfala tingting mo oli stap long pis. Wan samting we i mekem hem i sapraes hemia se ol yangfala brata mo sista oli gat strong tingting blong wok mo oli no kasem pei from. Oli givim taem mo paoa blong olgeta blong givhan long wok blong talemaot gud nius.

¹⁷ Long sem fasin, ol brata mo sista we oli wok blong winim mane blong givhan long famle blong olgeta, oli mekemgud wok blong olgeta. (Kol. 3:23, 24) Ol bos blong ol kampani oli glad blong tekem olgeta blong wok from we oli wokhad mo ol bos ya oli no wantem lusum olgeta.

18. ?Olsem wanem yumi save ‘strong blong mekem ol gudfala wok’?

¹⁸ Sam rod blong soemaot se yumi gat strong tingting long saed blong haos blong Jeova, hemia tras blong yumi long Jeova, obei long ol advaes we hem i givim blong lidim yumi, mo lukaotgud long ol ples blong miting blong yumi. Antap long ol samting ya, yumi wantem joen fulwan long wok blong talemaot Kingdom mo mekem disaepol. Nomata se yumi yangfala no olfala, taem yumi mekem bes blong yumi blong folemgud ol rul blong trufala wosip, yumi save kasem plante blesing. Mo bambae ol man oli save gud yumi se yumi ol man we yumi “strong blong mekem ol gudfala samting [“wok,” NW].”—Taet. 2:14.

[Futnot]

?Olsem wanem ol eksampol long Baebol mo long taem blong yumi, oli tijim

• yumi blong soemaot strong tingting taem yumi prij mo tijim man?

• ol yangfala Kristin blong oli ‘strong blong mekem ol gudfala wok’?

• yumi blong kamaot long ol rabis fasin we oli save spolem yumi?

[Tok blong pija long pej 17]

?Yu yu stap yusum Baebol oltaem long wok blong prij?

[Tok blong pija long pej 18]

Taem yu lanem narafala lanwis long skul, samting ya i halpem yu blong mekem moa long wok blong prij