Ol Waef—Yufala i Mas Gat Bigfala Respek Long Hasban Blong Yufala
“Yufala ol woman we i mared. Yufala i mas ona long ol man blong yufala.”—EFESAS 5:22.
1. ?From wanem plante taem i had long ol waef blong gat respek long hasban blong olgeta?
LONG plante kantri, taem man mo woman i mared, woman i mekem promes ya se bambae hem i gat bigfala respek long man blong hem. Be, plante taem, fasin we hasban i mekem long waef blong hem, i mekem we i isi no i had long waef blong gat bigfala respek ya long hem. Long stat, mared i wan nambawan samting tumas. God i tekemaot wan rib blong faswan man ya Adam, mo i wokem wan woman long hem. Adam i talem se: “Hemia nao prapa fren blong mi. Bun blong hem i kamaot long bun blong mi, mo bodi blong hem i kamaot long bodi blong mi.”—Jenesis 2:19-23.
2. ?Long taem blong yumi wanem sam jenis we oli kamaot long fasin blong ol woman mo long saed blong mared?
2 Long Yunaeted Stet, long ol yia 1960, ol woman oli stanemap wan grup we i blong mekem ol woman oli no moa stap aninit long paoa blong ol man. Long taem ya, namba blong ol hasban we oli lego famle blong olgeta i hae moa i bitim namba blong ol waef, be klosap long en blong ol yia 1960, namba blong ol waef we oli stap lego famle blong olgeta i kam antap bigwan tu. Naoia ol woman oli tok swea, oli drong, oli smok, mo oli mekem fasin sem mak olsem ol man nomo. ?Olsem wanem? ?Samting ya i mekem se ol woman oli glad moa? Nogat. Long sam kantri, klosap haf blong olgeta man mo woman we oli mared, oli divos biaen. ?Traehad ya we samfala woman oli mekem blong halpem mared laef blong i kam moagud, i rili givhan long mared no i mekem i mowas?—2 Timoti 3:1-5.
3. ?Wanem stamba blong problem we i stap spolem mared?
3 ?Wanem nao stamba blong problem ya? Wan haf blong problem ya i stat long taem ya we wan stronghed enjel hemia “snek ya blong bifo we nem blong hem ‘Setan’ no ‘Man we i agensem man,’ ” i trikim Iv. (Revelesen 12:9; 1 Timoti 2:13, 14) Setan i traem spolem tijing blong God. Olsem nao, hem i traem mekem ol man oli ting se mared i wan samting we i blokem man blong i no fri mo i mekem i strong tumas long man. Long wol ya we Setan i rul long hem, ol toktok long televisin, niuspepa, mo ol buk, oli traem leftemap tingting ya se ol advaes we God i givim oli no stret mo oli blong laef bifo nomo. (2 Korin 4:3, 4) Be sipos yumi traem stretem tingting blong yumi nao yumi tektaem blong faenemaot wanem samting stret we God i talem long saed blong wok blong woman insaed long mared, bambae yumi luk se Tok blong God i waes mo i rili wokgud.
Advaes i Go Long Olgeta We Oli Tingbaot Mared
4, 5. (a) ?From wanem wan woman i mas tingtinggud taem hem i wantem mared? (b) ?Bifo we wan woman i agri blong mared wetem wan man, hem i mas mekem wanem?
4 Baebol i givim wan woning. Hem i talem se, long wol ya we Setan i rul long hem, olgeta ya we oli gat wan gudfala mared be bambae oli ‘gat trabol’ tu. Yes, nating se mared i wan samting we God i stanemap, Baebol i pulum olgeta we oli wantem mared, blong oli tingtinggud fastaem. Tabu spirit i pulum wan long ol man we oli raetem Baebol blong tokbaot woman we hasban blong hem i ded nao i fri blong mared bakegen, i se: “Long tingting blong mi, sipos hem i stap olsem nomo, bambae hem i glad moa.” Mo tu, Jisas i talem se ‘olgeta we oli save holem tok ya’ se bambae oli no mared, ‘oli mas holem.’ Be sipos man i jus blong mared, hem i mas mared nomo long wan “man blong Masta,” i minim wan man no woman we i givim laef long God finis mo i baptaes.—1 Korin 7:28, 36-40; Matiu 19:10-12.
5 Risen from wanem woman nao i mas tingtinggud long hu man we bambae hem i maredem, hemia from woning ya we Baebol i givim: “Woman we i mared finis, loa i fasem hem se i mas stap wetem man blong hem.” Sipos man ya i ded, no i slip wetem narafala woman mo tufala i divos from, long taem ya nomo “loa ya i no moa fasem hem.” (Rom 7:2, 3) Maet strongfala filing blong lav i pulum tufala blong frengud fastaem, be hemia i no wan gudfala fandesen blong mared. Taswe, wan woman we i no mared yet i mas tingtinggud long kwestin ya se, ‘?Mi mi rere, mo mi wantem, mekem promes blong stap aninit long loa blong man ya?’ I gud blong tingbaot kwestin ya bifo mared, i no afta.
6. ?Wanem desisen we plante woman tede oli save mekem, mo from wanem desisen ya i impoten tumas?
6 Long plante kantri tede, taem man i askem wan woman blong mared, woman ya i save jus sipos hem i wantem no i no wantem man ya. Blong mekem wan jus we i waes, hemia wan had samting moa i bitim ol narafala samting we woman ya bambae i save mekem long laef blong hem. I had long hem from we filing ya blong wantem gat wan fren mo blong wantem se narafala i laekem hem, we hem i save kasem insaed long mared, i strong we i strong. Wan man blong raetem buk i talem se: “Taem yumi wantem tumas blong mekem wan samting, maet blong mared no blong klaem i go antap long wan haefala hil, ale i isi blong ting se samting ya we yumi wantem hem i gud nomo, nao yumi lesin nomo long ol samting we oli talem long yumi se samting ya we yumi wantem i gud.” Man we i wantem klaem wan haefala hil be i no tingtinggud mo skelemgud ol samting, hem i save ded from. Long sem fasin, man we i no waesgud taem hem i jusum wan patna blong mared, hem i save kasem bigfala trabol.
7. ?Wanem waes advaes i stap go long olgeta we oli lukaot wan patna blong mared?
7 Wan woman i mas tingtinggud se laef blong hem bambae i olsem wanem sipos hem i agri blong stap aninit long loa blong man ya we i askem hem blong mared. Plante yia bifo, wan yangfala gel blong India i gat tingting daon taem hem i talem se: “Papa mama blong yumi oli olfala moa mo oli waes moa long yumi, mo i no isi blong narafala i trikim olgeta olsem yumi . . . Mi mi save mekem mastik isi nomo.” Papa mama mo ol narafala oli save givhan bigwan. Wan man we i givim waes advaes i talem plante taem finis long ol yangfala se i gud oli traem save papa mama blong hemia we oli wantem mared wetem. Nao long semtaem bambae oli save wajemgud se fasin blong yang man no yang woman ya i olsem wanem taem hem i stap wetem papa mama blong hem mo wetem ol narafala famle blong hem.
?Olsem Wanem Jisas i Stap Daon Long God?
8, 9. (a) ?Wanem tingting blong Jisas long fasin ya se hem i mas stap daon long God? (b) ?Wanem gudfala frut i save kamaot from fasin blong stap aninit long olgeta we oli hed blong yumi?
8 I no isi blong stap daon long wan we i hed blong yumi. Be ol woman oli save tingbaot samting ya olsem wan wok we i karem ona long olgeta. Hemia nao tingting we Jisas i gat. Hem i stap daon long God we i hed blong hem mo blong mekem olsem, hem i safa, mo i ded long pos. Be hem i glad tumas we hem i stap daon long God. (Luk 22:41-44; Hibrus 5:7, 8; 12:3) Ol woman oli save lukluk i go long Jisas olsem wan eksampol blong olgeta. Baebol i talem se: “God, hem i hed blong Kraes, . . . mo man, hem i hed blong woman blong hem.” (1 Korin 11:3) Makemgud se ol woman oli no stap aninit long man taem we oli mared nomo.
9 Baebol i soemaot se olgeta woman, nomata se oli mared no nogat, oli mas stap aninit long ol brata we oli bigman long saed blong spirit we oli gat wok blong lidim Kristin kongregesen. (1 Timoti 2:12, 13; Hibrus 13:17) Taem ol woman oli letem God i lidim olgeta, oli soem eksampol we ol enjel long ogenaesesen blong God oli save folem. (1 Korin 11:8-10) Mo tu, ol woman we oli mared longtaem finis, oli save soem gudfala eksampol mo oli save givim advaes tu blong tijim ol yangfala woman blong oli ‘ona long ol man blong olgeta.’—Taetas 2:3-5.
10. ?Olsem wanem Jisas i soem eksampol blong fasin blong stap daon long hemia we i Hed blong hem?
10 Jisas i luksave se i impoten tumas blong stap daon long hemia we i hed blong yumi. Wan taem, hem i talem long Pita blong i pem takis blong tufala i go long gavman, mo i wokem rod tu blong Pita i faenem mane ya. Biaen Pita i raetem se: “From we yufala i man blong Masta blong yumi, yufala i mas obei long olgeta lida we ol man oli putumap.” (1 Pita 2:13; Matiu 17:24-27) Baebol i tokbaot nambawan fasin blong Jisas blong stap daon long God, i se: “Hem nomo i lego ol samting blong laef ya, nao i kam olsem man blong wok nomo. Hem i bon long wol ya, i kam olsem man. Mo tu, hem i mekem tingting blong hem i stap daon blong i obei long God, gogo i ded.”—Filipae 2:5-8, NW.
11. ?From wanem Pita i talem long ol woman blong stap daon long hasban blong olgeta nating se hasban i no bilif?
11 Pita i leftemap tingting blong ol Kristin blong oli stap daon long ol gavman blong wol ya nating se rul blong olgeta i strong no i had olsem wanem. Nao hem i eksplenem se: “Hemia wan fasin we God i singaot yufala blong karem, from we Kraes, hem i harem nogud long bodi blong hem, blong sevem yufala, mo hem i soemaot fasin ya long yufala, blong bambae yufala i biaen long hem.” (1 Pita 2:21) Pita i tokbaot olsem wanem Jisas i safa mo i stanap strong from we i wantem stap daon long God. Ale, hem i leftemap tingting blong ol woman we hasban blong olgeta i no bilif i se: “Nao long sem fasin, yufala ol woman we i mared, yufala i mas obei long ol man blong yufala. Nao sipos ol man blong yufala oli no bilif long tok blong God, be bambae fasin nomo blong yufala i save pulum olgeta blong oli bilif. Taem ol man blong yufala oli luk we fasin blong yufala i klin gud, mo yufala i gat ona, hemia i naf blong pulum olgeta. Bambae i no nid blong yufala i talem wan samting long olgeta.”—1 Pita 3:1, 2.
12. ?Wanem blesing i kamaot from we Jisas i stap daon long God we i Hed blong hem?
12 Maet samfala oli ting se hemia slak fasin ya sipos wan woman i stap nomo wetem man blong hem we i stap daonem hem mo tok nogud long hem. Be hemia i no tingting blong Jisas. Pita i raetem se: “Taem ol man oli tok nogud long [Jisas], hem i no tok nogud bakegen long olgeta. Taem oli mekem hem i harem nogud tumas long bodi blong hem, hem i no talem se bambae i givimbak fasin ya long olgeta.” (1 Pita 2:23) Sam long olgeta we oli wajem Jisas i safa oli bilif long hem. Long olgeta ya i gat man blong stil ya we i hang long pos klosap long Jisas mo kapten blong ol soldia we i luk taem we oli nilim Jisas long pos. (Matiu 27:38-44, 54; Mak 15:39; Luk 23:39-43) Long sem fasin, Pita i talem se, sam hasban we oli no bilif, mo we maet oli mekem i had tumas long waef, bambae oli kam Kristin afta we oli luk gudfala fasin blong waef blong stap daon long olgeta. I gat plante pruf tede we oli soemaot se samting ya i tru.
?Olsem Wanem Waef i Save Pulum Man Blong Hem?
13, 14. ?Wanem blesing i kamaot from fasin blong stap daon long hasban we i hed, nating se hem i no bilif?
13 Ol waef we oli bilif oli bin pulum man blong olgeta from we oli soemaot fasin blong Kraes. I no longtaem i pas, long wan distrik asembli blong ol Witnes blong Jeova, wan hasban i tokbaot woman blong hem we i Witnes, i se: “Ol samting we mi mekem long hem i krangke stret. Be oltaem nomo hem i respektem mi. Neva hem i daonem mi. Hem i no traem fosem mi blong agri wetem ol bilif blong hem. Hem i rili keagud long mi mo i soem lav long mi. Taem hem i go long wan asembli, hem i wokhad blong rerem kakae blong mi fastaem, mo blong finisimgud olgeta wok blong hem long haos. Fasin blong hem i pulum mi blong wantem save wanem i stap long Baebol. !Ale, hemia nao, tede mi wan Witnes!” Yes, ‘fasin blong woman blong hem nomo i pulum man ya blong bilif.’
14 Olsem Pita i talem, i no toktok blong waef be fasin blong hem nao we i save karem gudfala frut. Yumi luk samting ya long stori blong wan sista we hem i lanem ol trutok blong Baebol mo tingting blong hem i strong blong go long olgeta Kristin miting. Hasban blong hem i singaot strong long hem i se: “!Agnes, sipos yu goaot long doa ya, mi no moa wantem luk yu yu kambak!” Ale, sista ya i no goaot long “doa ya,” be i goaot long wan narafala doa. Long taem blong nekis miting, hasban i wantem mekem sista i fraet nao i tok se: “Taem yu kambak, mbae mi no stap.” Mo i tru, taem sista i kambak, man blong hem i no stap—hem i lus tri dei, be afta i kambak. Taem hem i kamtru long haos, sista i toktok kaen long hem i se: “Yu kam, mbae mi kasem kakae blong yu.” Agnes i neva lego fasin blong hem blong fasgud long Jeova. Biaen, man blong hem i stadi Baebol, i givim laef blong hem long God, mo i mekem wok blong elda tu long kongregesen.
15. ?Wanem fasin we Kristin waef i mekem we i “flasem” hem?
15 Aposol Pita i tokbaot wan samting we yumi luk long fasin blong ol sista ya. Hem i talem se samting we i “flasem” olgeta i no from we oli spenem plante taem blong “fasem hea” no blong putum “ol flas klos.” Defren olgeta, Pita i talem se: “I moa gud yufala i mekem tingting blong yufala i stret long fes blong God, mo yufala i gat pis long laef blong yufala, mo yufala i kwaet woman, we fasin blong yufala i stret gud. Fasin olsem i gud tumas long fes blong God mo i no save lus.” Waef i soemaot kwaet fasin ya long ol toktok mo fasin blong hem we i mekem hem i naes long fes blong man blong hem. Waef olsem i no traem winim man blong hem mo i no traem pulum man blong hem blong mekem samting we i stret folem tingting blong hem nomo. Long rod ya nao, Kristin woman i soem bigfala respek long hasban blong hem.—1 Pita 3:3, 4.
Sam Eksampol Blong Tijim Yumi
16. ?Wanem gudfala eksampol we Sera i soemaot long ol Kristin waef?
16 Pita i raetem se: “Ol woman ya bifo we oli tabu, mo oli klin gud long fes blong God, we tingting blong olgeta i stap strong long hem, olgeta ya, oltaem oli kaen long ol man blong olgeta, mo oli obei long olgeta. Long fasin ya nao oli mekem olgeta oli naes long fes blong ol man blong olgeta.” (1 Pita 3:5) Ol woman ya oli luksave se taem oli folem ol advaes from we oli wantem mekem Jeova i glad, samting ya i mekem tu we oli gat wan famle laef we i hapi mo oli save kasem laef we i no save finis. Pita i tokbaot Sera, naesfala woman blong Ebraham, mo i talem olsem wanem hem i “obei long Ebraham, mo i singaot hem, se ‘Masta blong mi.’ ” Sera i sapotem man blong hem we i man blong God mo we God i givim wok long hem blong go long wan kantri farawe. Woman ya i lego gudfala laef mo i rere tu blong lusum laef blong hem blong folem man blong hem. (Jenesis 12:1, 10-13) Pita i talem se Sera i wan nambawan eksampol we ol woman oli save folem. Hem i se: “Sipos yufala i stap mekem ol gudfala fasin, mo yufala i no fraet long sam samting, bambae yufala i kam olsem we yufala i dota blong Sera.”—1 Pita 3:6.
17. ?From wanem maet Pita i tingbaot Abigail olsem eksampol blong ol Kristin waef?
17 Abigail i wan narafala woman we i fraetgud mo i trastem God. Ating Pita i stap tingbaot hem tu. Woman ya “i gat hed,” be man blong hem Nabal “i wan had man, mo i man blong kros kwiktaem tu.” Taem Nabal i no wantem givhan long Deved mo ol man blong hem, olgeta ya oli mekemrere blong go faet agensem Nabal mo olgeta man we oli laef long haos blong hem. Be Abigail i tekem aksin blong sevem ol man long haos blong hem. Hem i fulumap kakae i go long ol basket mo i putum long baksaed blong ol dongki nao i go mitim Deved wetem ol man blong hem we oli stap kam blong mekem faet long Nabal. Taem Abigail i luk Deved longwe, hem i jamdaon long dongki blong hem, i bodaon fored long Deved, mo i plis long hem blong i no hareap tumas blong stretem bisnes ya long rod ya. Fasin blong woman ya i jenisim tingting blong Deved wantaem. Hem i talem se: “!Mi mi presem [Jeova]! Hem i laef, i stap we i stap, mo hem i God blong yumi. Hem nao i sanem yu blong yu kam mitim mi tede. Mi talem tangkiu long hem from gudfala tingting ya blong yu, mo from samting ya we yu mekem naoia.”—1 Samuel 25:2-33.
18. ?Sipos wan waef i stat laekem narafala man, i gud hem i tingbaot eksampol blong hu mo from wanem?
18 Wan narafala gudfala eksampol blong ol waef hemia yangfala woman Sulem. Woman ya i save se hem i promes blong mared long wan yang man we i man blong lukaot sipsip, ale hem i stap tru long yang man ya. Lav we hem i gat long man ya i stap strong nating se wan King we i rij we i rij i laekem woman ya tu mo i traem pulum hem. Woman ya i talemaot filing we hem i gat long yang man ya blong lukaot sipsip i se: “Plis, yu no tingbaot ol narafala woman, yu holem mi nomo mi stap long tingting blong yu. Bambae yu no tekem narafala woman i kam stap wanples wetem yu, yu letem mi nomo mi kam stap wetem yu. Fasin ya we yumitufala i laeklaekem yumitufala, hem i gat paoa, man i no save blokem, olsem we ded i gat paoa . . . Hem i olsem wan bigfala faea we wota i no save kilim, we i no gat wan wota we i ron bigwan we i naf blong draonem.” (Sing Blong Solomon 8:6, 7) Taem wan woman i talem yes blong mared long wan man, i gud sipos hem i stap tru long man blong hem mo i respektem hem bigwan olsem ol tok blong woman Sulem i soemaot.
Sam Narafala Advaes We Oli Kamaot Long God
19, 20. (a) ?From wanem risen nao ol waef oli mas stap daon long man blong olgeta? (b) ?Wanem gudfala eksampol we i stap blong ol waef?
19 Stamba vas blong stadi ya hemia: “Yufala ol woman we i mared. Yufala i mas ona long ol man blong yufala.” (Efesas 5:22) ?From wanem i impoten we waef i ona long hasban blong hem? Nekis vas i talem se: “From we man i hed blong woman blong hem, olsem we Kraes i hed blong [“kongregesen,” NW ].” Taswe advaes ya i go long ol waef se: “Ol woman oli mas ona long ol man blong olgeta, long evri samting, olsem we [kongregesen] i stap ona long Kraes.”—Efesas 5:23, 24, 33.
20 Blong obei long oda ya, ol waef oli mas stadi nao biaen oli save folem eksampol blong kongregesen blong ol tabu brata blong Kraes. I gud blong ridim 2 Korin 11:23-28 mo lanem wanem sam samting we aposol Pol, wan memba blong kongregesen ya, i fesem from we hem i no wantem lego Jisas Kraes we i hed blong hem. Olsem Pol, ol waef wetem ol narafala memba blong kongregesen oli mas stap tru, mo oli mas stap daon, long Jisas. Ol waef oli soemaot se oli mekem olsem, taem oli stap daon long hasban blong olgeta.
21. ?Wanem i save pulum ol waef blong wantem stap daon long hasban blong olgeta?
21 Plante waef tede oli no laekem nating blong stap daon long wan man. Be woman we i waes bambae i tingbaot ol gudfala samting we oli save kamaot from fasin ya. Eksampol, sipos wan hasban i no man blong bilif nao waef i obei mo ona long man blong hem long evri samting we i no go agensem loa no stamba rul blong God, gudfala frut i save kamaot se hem i save “sevem man” blong hem. (1 Korin 7:13, 16) Mo tu, bambae hem i harem gud from we hem i save se Jeova God i glad long fasin blong hem mo i save se bambae Jeova i blesem hem bigwan from we hem i folem gudfala eksampol blong Pikinini blong hem.
?Yu Yu Tingbaot?
• ?From wanem samtaem i had long ol waef blong gat respek long hasban?
• ?From wanem woman i mas tinghevi long fasin ya we man i askem hem blong mared?
• ?Olsem wanem Jisas i givim gudfala eksampol long ol waef, mo wanem blesing i save kamaot sipos oli folem eksampol blong hem?
[Tok blong pija long pej 11]
?Ol waef oli save lanem wanem long eksampol blong Abigail mo ol narafala woman we Baebol i tokbaot?