“Kaen Fasin” Blong God We Hem i Soemaot “Long Plante Defren Rod”

Aposol Pita i luk se ol Kristin oli “harem nogud from plante samting we oli stap kam blong traem [olgeta].” (1 Pita 1:6) Ale, long leta blong hem, hem i tokbaot “kaen fasin” blong God we “long gladhat blong hem, hem i soemaot long plante defren rod.” (1 Pita 4:10, NW ) Tok ya “plante defren rod” i gat semfala mining long Grik tok ya poikilos. Wan man we i stadi dip long ol tok blong Baebol i talem se: “Tok ya i karem wan mining we i impoten tumas . . . Taem yumi tokbaot kaengud fasin we God i soem long gladhat blong hem, se hem i poikilos, i min se nomata wanem samting we i hapen long laef, be God i kasem save long hem mo i save stretem tu.” Man ya i gohed i se: “Nating se samting we i kasem yumi long laef, maet wan trabol, aksiden no nid we yumi gat, i bigwan olsem wanem, oltaem God i faenem rod blong soem kaengud fasin long yumi long gladhat blong hem. I no gat wan samting long laef we i had long kaen fasin blong God blong i dil wetem. Klia mining blong tok ya poikilos i pulum yumi blong tingbaot se God i save soem kaen fasin blong hem long plante defren rod, i olsem se fasin ya blong hem i gat plante defdefren kala long hem. From samting ya, God i save mekem yumi naf blong stanap strong long eni traem long laef.”

Kaen Fasin We God i Soemaot i Givhan Long Yumi Blong Stanap Strong

Pita i talem se, wan rod we God i soemaot kaen fasin blong hem, hemia tru long ol defdefren brata mo sista long Kristin kongregesen. (1 Pita 4:11) Wanwan long ol man blong God oli gat sam paoa, no presen long saed blong spirit, we God i givim long olgeta, mekem se oli naf blong leftemap tingting blong olgeta we oli kasem traem. (Rom 12:6-8) Eksampol, sam memba blong kongregesen oli gat gudhan blong tijim Baebol. Oli gat fasin luksave nao toktok blong olgeta i pulum ol narafala blong stanap strong. (Nehemaea 8:1-4, 8, 12) Sam narafala oli go visitim ol brata mo sista we oli nidim help long saed blong spirit. Taem oli mekem olsem, oli leftemap tingting blong ol brata sista, mo oli “mekem hat blong olgeta i harem gud.” (Kolosi 2:2) Taem ol elda oli kam luk yumi blong mekem bilif blong yumi i strong, i olsem se oli givim paoa blong God long yumi. (Jon 21:16) Bakegen, i gat sam long kongregesen we oli gat lav, oli gat sore, mo oli soem fasin kea long ol brata mo sista we oli harem nogud from sam traem we oli kasem. (Ol Wok 4:36; Rom 12:10; Kolosi 3:10) Ol brata mo sista we oli kasem save long filing blong olgeta we oli kasem traem mo we oli rere blong halpem olgeta ya, oli soem kaen fasin blong God we hem i stap soemaot long gladhat blong hem.​—Ol Proveb 12:25; 17:17

Yes, nomata wanem kaen traem i kasem yumi, no ol traem ya i kam olsem wanem, be kaen fasin we God i soemaot wetem gladhat i save givhan long yumi blong stanap strong. (Jemes 1:17) Help we Jeova i givim long ol man blong hem​—nomata wanem kaen traem no trabol we oli kasem—​i kam long stret taem mo i stret long nid blong olgeta wanwan. Help olsem i pruvum se “waes ya blong [God] i gat plante naranarafala rod blong hem.” (Efesas 3:10) ?Yu yu agri se samting ya i tru?