?Dei Blong Jeova Bambae i Mekem Wanem i Kamaot Klia?

“Dei blong Masta blong yumi bambae i kam olsem we man blong stil i kam, we i kam long taem we man i no save. . . . Wol tu, wetem evri samting blong hem bambae i lus.—2 PITA 3:10.

1, 2. (a) ?Olsem wanem ol rabis fasin blong wol ya bambae oli lus? (b) ?Wanem ol kwestin we bambae yumi tokbaot?

OLGETA rabis fasin blong wol ya oli kamaot long faswan giaman tok ya se ol man oli no nidim Jeova. Olgeta nomo oli save rulum wol. (Sam 2:2, 3) ?Be olsem wanem? ?Wan samting we i kamaot long ol giaman tok, i save stap olwe? !Nogat! I mas lus. Be wol blong Setan bambae i no lus hem wan. Bifo we samting ya i hapen, God bambae i spolem hem. Bambae God i mekem olsem long stret taem we hem i putum mo long fasin we hem i wantem. God bambae i jajem rabis wol ya long fasin we i stret gud, mo folem fasin blong hem blong lavem man.—Sam 92:7; Prov. 2:21, 22.

² Aposol Pita i talem se: “Dei blong Masta blong yumi bambae i kam olsem we man blong stil i kam, we i kam long taem we man i no save. Mo long Dei ya, bambae i gat bigfala noes, nao skae bambae i lus. Bigfala faea we i hot we i hot bambae i bonem ol sta [“ol stamba samting,” NW] gogo oli ronaot, mo wol tu, wetem evri samting blong hem bambae i lus.” (2 Pita 3:10) ?Wanem mining blong “skae” mo “wol” we vas ya i tokbaot? ?Wanem mining blong “ol stamba samting” we faea bambae i bonem gogo oli ronaot? ?Mo wanem mining blong tok blong Pita se ‘wol wetem evri samting blong hem bambae i lus’? Sipos yumi kasem save long ansa blong ol kwestin ya, bambae yumi rere moa blong fesem ol samting we bambae oli kamtru i no longtaem, we bambae oli mekem ol man oli fraet tumas.

Bambae Skae Mo Wol Oli Lus

 3. ?“Skae” we 2 Pita 3:10 i tokbaot, i pija blong wanem samting? ?Mo bambae hem i lus olsem wanem?

³ Plante taem long Baebol, “skae” no heven i pija blong ol man we oli rul antap long ol narafala. (Aes. 14:13, 14; Rev. 21:1, 2) “Skae [we] bambae i lus” i pija blong rul blong man antap long ol man we oli no wantem obei long God. Taem skae i lus, bambae i gat “bigfala noes.” Maet tok ya i soemaot se skae ya we i minim rul blong man, bambae i lus kwiktaem nomo.

 4. ?“Wol” i pija blong wanem samting? ?Mo olsem wanem bambae wol i lus?

⁴ “Wol” no graon i pija blong olgeta man we oli stap longwe long God. Wol long taem blong Noa i olsem, mo folem tok blong God, wol ya i lus long Bigfala Wota we i ron. “Be skae mo graon we i stap naoia, tok blong God i blokem tufala, tufala i stap wet blong bambae faea i kasem tufala. Tok ya bambae i stap holem tufala, gogo i kasem bigfala Dei ya we God bambae i jajem ol man we oli no obei long hem, nao bambae oli lus.” (2 Pita 3:7) Long taem blong Noa, Bigfala Wota we i ron i spolem olgeta man nogud wantaem nomo. Be long “bigfala trabol” we i stap kam, bambae God i no spolem ol rabis man wantaem nomo. Bambae hem i spolem samfala fastaem mo ol narafala biaen. (Rev. 7:14) Long fashaf blong bigfala trabol, God bambae i kros tumas long ‘Bigfala Babilon,’ hemia ol skul we oli olsem woman blong rod. Bambae hem i pulum ol politik paoa blong wol ya blong spolem ‘Bigfala Babilon’ ya. (Rev. 17:5, 16; 18:8) Ale long lashaf blong bigfala trabol, hemia bigfala faet blong Amagedon, Jeova bambae i spolem olgeta narafala haf blong wol blong Setan.—Rev. 16:14, 16; 19:19-21.

‘Ol Stamba Samting We Faea Bambae i Bonem Gogo Oli Ronaot’

 5. ?Wanem mining blong “ol stamba samting” ya?

⁵ ?Wanem mining blong “ol stamba samting,” we faea bambae i bonem gogo oli ronaot? Hemia ol stamba samting blong skae mo wol we oli mekem se ol man blong wol ya oli gat ol fasin, tingting, mo aksen we God i no glad long olgeta, mo oli traem kasem ol mak we oli no stret. Wan long ol stamba samting ya we i pulum ol man blong mekem ol nogud fasin, hemia “spirit we i kamaot long wol.” Spirit ya i stap ‘wok long ol man we oli no obei long God.’ (1 Kor. 2:12; ridim Efesas 2:2.a) Hem i olsem “win” we i stap olbaot long wol blong Setan. Spirit ya i pulum ol man blong tingting, mekem plan, toktok, mo gat fasin olsem Setan. Hem nao stronghed ya we i flas mo i ‘jif blong paoa blong win’ ya.

 6. ?Spirit blong wol i mekem wanem long ol man?

⁶ Samfala oli save se spirit blong wol i gat paoa long olgeta mo samfala oli no save. Nating se i olsem wanem, spirit ya i mekem se oli letem Setan i jenisim tingting mo hat blong olgeta, gogo oli gat ol tingting mo fasin blong hem. From samting ya, oli mekem samting we olgeta nomo oli wantem, mo oli no tingbaot samting we God i wantem. Oli flas mo oli tingbaot olgeta nomo. Ol fasin ya oli lidim ol aksen we oli mekem. Taswe, oli agensem ol man we oli gat paoa antap long olgeta, mo oli no traem blokem nating ‘ol rabis samting we tingting blong olgeta i wantem’ mo ‘ol samting we ae blong olgeta i luk.’—Ridim 1 Jon 2:15-17.b

 7. ?From wanem yumi mas ‘lukaot gud long tingting’ mo hat blong yumi?

⁷ Tru ya, yumi mas ‘lukaot gud long tingting’ mo hat blong yumi. Yumi mekem olsem taem yumi yusum waes we yumi kasem long God blong jusum gud ol fren blong yumi, samting we yumi ridim, samting we yumi lukluk long televisin, long ol muvi mo long Intenet, ol pleplei, mo samting we yumi lesin long hem. (Prov. 4:23) Aposol Pol i talem se: “Yufala i mas lukaot gud, blong bambae i no gat ol man oli kam fasem yufala long rabis tok ya we i folem waes blong man. Ol tok ya i blong giaman nomo, i stap kamaot long ol devel we oli stap olbaot long wol ya fastaem, i no kamaot long Kraes.” (Kol. 2:8) Moa we dei blong Jeova i kam klosap, moa we yumi mas folem advaes ya, from we “faea” blong dei ya bambae i bonem olgeta “stamba samting” blong wol blong Setan gogo oli ronaot. Long dei ya bambae oli no naf blong stanap strong, from kros blong God bambae i hot we i hot. Yumi tingbaot ol tok blong Malakae 4:1 we i talem se: “I gat dei i stap kam, we mi bambae mi bonem ol praod man mo ol man nogud long faea, olsem we man i bonem gras, we i bon we i bon olgeta, i no moa save gru bakegen. Long taem ya, bambae mi bonem olgeta evriwan, we bambae i no moa gat wan i stap.”

‘Wol Wetem Evri Samting Blong Hem Bambae i Lus’

 8. ?Olsem wanem bambae wol wetem evri samting blong hem oli “lus”?

⁸ ?Wanem mining blong tok blong Pita se ‘wol wetem evri samting blong hem bambae i lus’? Tok ya we oli tanem i kam “lus” i save minim tu, se “faenemaot” mo mekem i “kam long klia ples.” Pita i stap talem se, long taem blong bigfala trabol, Jeova bambae i mekem ol fasin blong wol blong Setan oli kam long klia ples. Bambae i klia se wol blong Setan i agensem Jeova mo Kingdom blong hem, mo i stret nomo we wol ya i lus. Wan profet tok long saed blong taem ya, long Aesea 26:21, i talem se: “Bambae hem i kamaot long haos blong hem long heven, bambae i kam panisim ol man long wol ya from ol sin blong olgeta. Fasin ya we man i kilim man i ded be i haedem samting ya, bambae i no moa save haed, graon bambae i soemaot blad ya we i ron.”

 9. (a) ?Wanem samting we yumi mas sakemaot, mo from wanem? (b) ?Yumi mas traehad blong kam gud moa long wanem samting, mo from wanem?

⁹ Ol man we oli letem wol ya mo spirit blong hem i jenisim fasin blong olgeta, bambae oli no save haedem ol rabis fasin blong olgeta long dei blong Jeova. Olgeta nomo bambae oli kilkilim olgeta i ded bakegen. Blong talem stret, maet ol raf fasin we plante man oli stap lukluk long televisin, ol muvi, mo ol video gem, i stap mekem tingting blong olgeta i rere from taem ya we ‘man bambae i girap i holem fren blong hem, nao i kilim hem i ded.’ (Sek. 14:13) Yes, i impoten tumas we yumi sakemaot ol muvi, ol buk, ol video gem, mo olgeta narafala samting we oli lanem yumi blong laekem ol fasin we God i no laekem, ol fasin olsem flas tingting mo raf fasin. (2 Saml. 22:28; Sam 11:5) Defren olgeta, yumi mas traehad blong kam gud moa long ol fasin we oli olsem frut blong tabu spirit blong God, from we ol fasin ya bambae oli givhan long yumi blong stap sef long bigfala dei blong Jeova.—Gal. 5:22, 23.

“Niufala Skae Mo Niufala Wol”

10, 11. ?Wanem ya “niufala skae” mo “niufala wol”?

¹⁰ Ridim 2 Pita 3:13. “Niufala skae” no heven, i pija blong Kingdom blong God long heven. Hem i stanemap Kingdom ya long yia 1914, long ‘taem ya we rul blong ol man we oli no laen blong Isrel i finis.’ (Luk 21:24) Gavman ya blong God, hemia Jisas Kraes mo ol 144,000 man we oli rul wetem hem. Bighaf blong olgeta ya, oli kasem nambawan blesing ya finis blong laef bakegen long heven. Buk blong Revelesen i tokbaot olgeta ya we God i jusumaot se oli olsem “bigfala taon ya we i tabu, we hemia niufala Jerusalem ya. Hem i kamaot long God, i aot long heven i kam, mo hem i flas gud, i olsem woman we bambae i mared, we oli flasemgud hem blong i go mitim man blong hem.” (Rev. 21:1, 2, 22-24) Long taem bifo, gavman blong ol man Isrel i stap long taon ya Jerusalem. Long sem fasin, niufala Jerusalem, hemia woman we bambae i mared, i joen wetem Man ya we bambae i mared long hem, blong oli kam gavman ya we bambae i rul long niufala wol. Taem gavman ya i tekem aksen blong stretem ol trabol long wol, bambae i olsem se taon ya i “aot long heven i kam.”

¹¹ “Niufala wol” hemia wan niufala kampani blong ol man long wol. Ol man ya oli glad blong obei long Kingdom blong God. Tede ol man blong God oli harem gud tumas blong fren gud wetem God, olsem we oli stap long wan paradaes finis. Be blesing ya bambae i moa gud yet taem oli stap long wan prapa paradaes, long naesfala “wol ya we bambae i kamtru.” (Hib. 2:5) ?Yumi mas mekem wanem blong stap long niufala wol ya?

Yu Mas Rere From Bigfala Dei Blong Jeova

12. ?From wanem dei blong Jeova bambae i mekem ol man long wol oli sek nogud?

¹² Pol mo Pita tufala tugeta i talemaot se dei blong Jeova bambae i kam “olsem wan man blong stil,” i min se long fasin we i haed mo i mekem man i sek. (Ridim 1 Tesalonaeka 5:1, 2.) Nating se ol tru Kristin oli wantem tumas blong luk dei ya, olgeta tu bambae oli sek long hem. (Mat. 24:44) Be ol man long wol bambae oli sek nogud long hem. Pol i talem se: “Taem ol man oli stap talem se, ‘Olgeta samting i kwaet, i gud nomo [“!Pis mo seftaem!,” NW],’ long taem ya nao bambae bigfala trabol i save kasem olgeta, i spolem olgeta. Bambae trabol ya i kasem olgeta wantaem nomo, olsem we woman i harem we bak blong hem i soa blong i bonem pikinini. Mo olgeta bambae oli no save ronwe.”—1 Tes. 5:3.

13. ?Yumi mas mekem wanem blong yumi no letem tok ya “pis mo seftaem” i trikim yumi?

¹³ “Pis mo seftaem” ya we ol man bambae oli talemaot, i wan giaman tok nomo we i kamaot long ol rabis enjel. Ol man blong Jeova bambae oli no bilivim tok ya. Pol i talem se: “Yufala i no moa stap long tudak, mo i no stret blong Dei ya bambae i kam kasem yufala olsem we man blong stil i mekem yufala i sek. Yufala evriwan i man blong delaet, mo yufala i stap mekem ol fasin blong delaet.” (1 Tes. 5:4, 5) Taswe yumi mas stap long laet, longwe long tudak blong wol blong Setan. Pita i talem se: “Ol fren. Yufala i kasem finis ol tok blong wekemap yufala, taem trabol ya i no kamtru yet. From samting ya, yufala i mas lukaot gud. Sipos no, ol man ya we oli no holem stret fasin, bambae oli pulum yufala long ol krangke tok blong olgeta, nao bambae yufala i aot long sef ples ya we yufala i stap long hem, yufala i foldaon.”—2 Pita 3:17.

14, 15. (a) ?Olsem wanem yumi save se Jeova i gat respek long yumi? (b) ?Wanem ol tok blong Baebol we yumi mas tinghevi long olgeta?

¹⁴ Jeova i talem long yumi blong “lukaot gud.” Be hem i no talem samting ya nomo. Hem i givim moa save long yumi long saed blong fiuja. Hem i ‘talem finis ol tok’ mo save long saed blong ol bigfala samting we bambae oli hapen. Tru ya, Jeova i gat respek long yumi mo i kaen long yumi.

¹⁵ Be sore tumas, samfala oli no tinghevi long ol advaes we yumi stap kasem se yumi mas lukaot gud oltaem, mo samfala oli no trastem advaes ya nating. Oli talem se: ‘Yumi harem ol tok ya plante yia finis.’ Taem ol man ya oli toktok olsem, oli stap tok agens long slef ya we i stret mo waes. Be i gud oli tingbaot se, oli stap tok agens long Jeova mo Pikinini blong hem tu. Jeova i talem se: “Yu mas wet long [dei ya].” (Hab. 2:3) Jisas tu i talem se: “Yufala i mas lukaot gud, from we yufala i no save wanem dei, mi, mi Masta blong yufala, bambae mi kamtru long hem.” (Mat. 24:42) Mo Pita tu i talem se: “Yufala i mas luklukgud long laef blong yufala. Taem yufala i stap wet long Dei ya blong God blong i kamtru, yufala i mas tabu, yufala i man blong God, mo yufala i mas mekem ol fasin we hem i wantem. Mo yufala i mas gohed blong wok blong mekem Dei ya i kamtru kwik.” (2 Pita 3:11, 12) !Slef ya we i stret mo waes mo Hed Kampani blong hem, bambae oli neva kam slak blong obei long ol strong tok ya!

16. ?Wanem tingting we yumi neva mas gat, mo from wanem?

¹⁶ ‘Rabis slef’ nomo i ting se Masta blong hem i stap tektaem tumas. (Mat. 24:48) Rabis slef ya i haf blong grup ya we 2 Pita 3:3, 4 i tokbaot. Pita i talem se long ol las dei, sam man “bambae oli laf” long olgeta we oli obei long ol tok ya blong tingbaot dei blong Jeova se i klosap. Ol man ya we oli “wantem ol samting nogud,” oli no tingbaot ol samting long saed blong Kingdom fastaem. Oli stap tingbaot olgeta nomo mo ol samting we oli wantem. !Yumi neva mas gat ol nogud tingting olsem! Tingting ya blong no wantem obei long God i save pulum trabol i kam long yumi isi nomo. I moa gud we yumi tingbaot ‘longfala tingting blong Masta blong yumi olsem janis blong yumi blong God i sevem yumi.’ Yumi mekem olsem taem yumi stap bisi long wok blong talemaot Kingdom mo pulum ol man oli kam disaepol blong Kraes. Yumi no tingting tumas long wanem taem stret ol samting we Jeova i promes blong mekem bambae oli kamtru. Jeova nao bambae i meksua se ol samting oli kamtru long stret taem blong olgeta.—2 Pita 3:15; ridim Ol Wok 1:6, 7.

Trastem God Ya We i Save Sevem Yu

17. ?Tok ya we Jisas i talem long ol tru Kristin se oli mas aot long Jerusalem, i gat paoa long olgeta olsem wanem, mo from wanem?

¹⁷ Long yia 66 K.T., ol ami blong Rom oli maj i kam insaed long Judia. Biaen, ol tru Kristin oli mekem samting we Jisas i talem, oli lukaot janis blong aot long Jerusalem mo ronwe. (Luk 21:20-23) ?From wanem oli tekem aksen kwiktaem olsem? I klia se oli tingbaot woning blong Jisas oltaem. Oli save finis se taem oli ronwe bambae oli kasem hadtaem, olsem Jisas i talem. Be oli save tu se Jeova bambae i no lego ol man blong hem.—Sam 55:22.

18. ?Olsem wanem ol tok blong Jisas long Luk 21:25-28 i gat paoa long tingting blong yu, long saed blong bigfala trabol we i stap kam?

¹⁸ Yumi tu yumi mas trastem Jeova fulwan, from we hem nomo i save sevem yumi taem bigfala trabol we man i neva luk samtaem, i kasem wol ya. Samtaem afta we bigfala trabol ya i stat, be bifo we Jeova i spolem wol blong Setan fulwan, bambae plante man oli “save ded from fraet, mo from we oli stap harem nogud long ol samting we bambae oli save kam kasem wol ya.” Yes ol enemi blong God bambae oli seksek from we oli fraet tumas. Be ol man we oli stap tru long Jeova bambae oli no save fraet. Olgeta ya, bambae oli glad tumas from we oli save se i no longtaem God bambae i sevem olgeta.—Ridim Luk 21:25-28.

19. ?Nekis stadi i eksplenem wanem?

¹⁹ !Tru ya, olgeta we oli stap longwe long ol fasin blong wol ya mo “ol stamba samting” blong hem, bambae oli gat wan nambawan fiuja! Be nekis stadi i eksplenem se, blong kasem laef, yumi mas mekem moa i bitim we yumi stap longwe long ol fasin nogud. Yumi mas traehad tu blong wokem ol fasin we Jeova i glad long olgeta, mo blong mekem ol wok we i stret long tingting blong hem.—2 Pita 3:11.

[Ol futnot]

?Yu Yu Save Eksplenem?

• ?Ol samting ya oli pija blong wanem?

‘Skae mo wol’ we i stap naoia

“Ol stamba samting”

“Niufala skae mo niufala wol”

• ?From wanem yumi trastem God fulwan?

[Tok blong pija long pej 13]

?Yu save mekem wanem blong ‘lukaot gud long tingting’ mo hat blong yu mo stap longwe long ol fasin blong wol ya?

[Tok blong pija long pej 14]

?Olsem wanem yumi soemaot we yumi tingbaot ‘longfala tingting blong Masta blong yumi olsem janis blong yumi blong God i sevem yumi’?