Lukaot Long “Voes Blong Ol Strenja”

“Oli no save folem man we oli no save hem oli mas ronwe long hem, from we oli no save voes blong [“ol strenja,” NW ].”​—JON 10:5.

1, 2. (a) ?Meri i mekem wanem taem Jisas i singaot hem long nem blong hem? ?Samting we i hapen long taem ya i soemaot klia wanem tok we Jisas i talem bifo finis? (b) ?Olsem wanem yumi save stap klosap long Jisas oltaem?

AFTA we Jisas i laef bakegen, hem i luk wan woman i stap stanap klosap long beregraon we hem i bin stap long hem. Jisas i savegud woman ya. Hemia Meri we oli kolem woman Magdala. Klosap tu yia bifo, hem i bin ronemaot wan devel long woman ya. Stat long taem ya, Meri i wokbaot wetem Jisas mo ol aposol blong hem, hem i stap givhan long olgeta blong kasem samting we oli nidim blong stap laef. (Luk 8:​1-3) Be, long dei ya we Jisas i stap luk Meri, Meri i stap krae. !Hem i harem nogud tumas from we hem i bin stap taem oli kilim Jisas i ded, mo naoia dedbodi blong Jisas tu i lus! Ale, Jisas i toktok long hem i askem se: “Woman. ?Yu yu stap krae from wanem? ?Yu stap lukaot hu?” Meri i ting se man ya i man blong lukaot long plantesen blong tri ya olif nao hem i talem se: “Sipos yu karemaot bodi blong hem, mo yu putum hem samples, plis yu talem long mi, blong mi save go karem hem.” Nao Jisas i talem se: “Meri.” Wantaem nomo, Meri i haremsave voes blong Jisas. Wetem bigfala glad hem i talem se. “Tija.” Hem i holem Jisas, i putum tufala han blong hem i goraon long hem.​—Jon 20:​11-18.

² Stori ya we i tajem filing blong yumi, i soemaot gud samting we Jisas i bin tokbaot bifo finis. Hem i bin talem se hem i olsem man blong lukaot long sipsip, mo ol disaepol blong hem oli olsem ol sipsip. Mo tu, hem i bin talem se man blong lukaot long sipsip i stap singaot ol sipsip blong hem wanwan long nem blong olgeta, mo olgeta oli save voes blong hem. (Jon 10:​3, 4, 14, 27, 28) Tru ya, Meri i haremsave voes blong Man ya we i lukaot long hem, Kraes, olsem we ol prapa sipsip oli haremsave voes blong man we i lukaot long olgeta. Mo tede tu, ol disaepol blong Jisas oli save voes blong hem. (Jon 10:16) Sora blong ol sipsip i naf blong haremsave voes blong man we i lukaot long olgeta, mo samting ya i mekem se oli save stap klosap long man ya oltaem. Long sem fasin, sipos yumi gat fasin luksave long saed blong spirit, yumi save wokbaot oltaem folem trak blong leg blong Gudfala Man blong Lukaot long sipsip, Jisas Kraes.​—Jon 13:15; 1 Jon 2:6; 5:20.

 3. ?Parabol blong Jisas long saed blong ol sipsip i mekem yumi tingbaot wanem kwestin?

³ Olsem toktok ya blong Jisas i soemaot, fasin blong ol sipsip blong haremsave voes blong ol man, i mekem se oli luksave ol fren blong olgeta. Mo fasin ya i mekem se oli naf blong luksave ol enemi blong olgeta tu. I impoten tumas we yumi tu yumi gat fasin ya, from we yumi gat plante enemi we oli wantem trikim yumi. ?Hu ya ol enemi ya? ?Wanem ol trik blong olgeta? ?Olsem wanem yumi save blokem olgeta? Blong faenemaot ansa long ol kwestin ya, yumi mas lukluk long ol narafala samting we Jisas i talem long parabol blong hem long saed blong ol sipsip.

“Man We i No Pas Long Doa”

 4. ?Pijatok blong Jisas i soem se ol sipsip oli folem hu? ?Be oli no save folem hu?

⁴ Jisas i talem se: “Man we i pas long get, hem i man blong lukaot long sipsip. Man we i stap lukaot long get, oltaem hem i stap openem get long man ya, mo ol sipsip oli haremsave voes blong hem. Oltaem hem i stap singaot ol sipsip blong hem wanwan long nem blong olgeta, nao i lidim olgeta i go afsaed. Mo taem hem i tekem olgeta oli goaot long yad, hem i stap go fastaem mo ol sipsip ya oli stap folem hem, from we oli save voes blong hem. Be oli no save folem man we oli no save hem oli mas ronwe long hem, from we oli no save voes blong [“ol strenja,” NW ].” (Jon 10:​2-5) Makemgud se tri taem Jisas i yusum tok ya “voes.” Tu taem hem i tokbaot voes blong man blong lukaot long sipsip. Namba tri taem hem i tokbaot “voes blong ol strenja.” ?Ol strenja ya oli hu?

 5. ?From wanem yumi no wantem soem kaen fasin long strenja ya we Jon japta 10 i tokbaot?

⁵ Jisas i no stap tokbaot ol strenja we yumi glad blong tekem olgeta oli kam long haos blong yumi. Blong tokbaot gudfala fasin ya blong tekem man i kam long haos blong yumi, ol faswan Baebol long olfala lanwis blong bifo oli yusum wan tok we i minim “lavem ol strenja.” (Hibrus 13:2) Be long pijatok blong Jisas, i no gat wan man i singaot strenja ya i kam. Mo tu, hem i “no pas long doa, blong go insaed long yad blong sipsip, be hem i klaem long fenis blong go insaed.” Yes, hem i “man blong stil mo blong kilim man.” (Jon 10:1) ?Hu ya faswan man we Baebol i talem se hem i man blong stil mo man blong kilim man? Hemia Devel Setan. Yumi luk samting ya long buk blong Jenesis.

Fastaem We Man i Harem Voes Blong Strenja

6, 7. ?From wanem i stret blong talem se Setan i wan strenja mo wan stilman?

⁶ Jenesis 3:​1-5 i tokbaot faswan taem we man i harem voes blong strenja long wol ya. Ol vas ya oli talem se Setan i yusum wan snek blong toktok long faswan woman ya Iv, blong lidim hem i go krangke. I tru, Baebol i no yusum tok ya “strenja” long saed blong Setan. Be ol samting we Setan i mekem oli sem mak long strenja we Jisas i tokbaot long pijatok blong hem long Jon japta 10. Traem tingbaot sam samting.

⁷ Jisas i talem se strenja ya i no go stret long ol sipsip, hem i pas long wan narafala rod. Long sem fasin, Setan i yusum wan snek blong toktok long Iv. Fasin ya blong haed i soemaot se Setan i wan man blong giaman we i kam olsem wan stilman nomo. Mo tu, long pijatok blong Jisas strenja ya i wantem stilim ol sipsip oli aot long han blong man ya we i lukaot long olgeta. Be hem i moa nogud i bitim wan man blong stil, from we hem i wantem ‘kilim ol sipsip oli ded mo spolem evri samting’ tu. (Jon 10:10) Long sem fasin, Setan tu i stil. Hem i giaman long Iv, nao i olsem we hem i stilim Iv i aot long han blong God. Mo tu, Setan i mekem se olgeta man oli kasem ded. Taswe, hem i wan man blong kilim man i ded tu.

 8. ?Olsem wanem Setan i twistim tok blong Jeova mo i givim tingting se Jeova i wantem spolem tufala nomo?

⁸ Wan samting we i soemaot klia se Setan i wan man blong giaman, hemia fasin blong hem blong twistim ol tok blong Jeova mo pulum Iv blong ting se Jeova i wantem spolem hem nomo. Hem i askem long Iv se: “?Olsem wanem long frut blong ol tri long ples ya? ?I tru we God i blokem olgeta se i tabu, yutufala i no save kakae, no i no tru olsem?” Setan i mekem olsem we hem i sapraes long fasin blong God. I olsem we hem i talem se: ‘God i stap mekem i strong tumas long yutufala.’ Hem i gohed se: “[God] i save se sipos yutufala i kakae frut ya, bambae ae blong yutufala i open.” Makemgud tok ya: ‘God i save.’ I olsem we Setan i talem se: ‘Mi mi save ol samting we God i save. Mi save wanem i stap long tingting blong hem, hem i wantem spolem yutufala nomo.’ (Jenesis 2:​16, 17; 3:​1, 5) Sore tumas, Iv mo Adam tufala i no ronwe long strenja ya. Tufala i lesin long hem nao tufala i pulum trabol i kam long tufala mo long olgeta pikinini blong tufala.​—Rom 5:​12, 14.

 9. ?From wanem yumi mas save se bambae i gat voes blong strenja tede?

⁹ Tede tu, Setan i stap yusum sem fasin ya blong traem lidim ol man blong God oli go krangke. (Revelesen 12:9) Hem i “stamba blong ol giaman toktok,” mo olgeta we oli giaman long ol man blong God blong lidim olgeta oli go krangke, oli ol pikinini blong hem. (Jon 8:​44) Naoia bambae yumi tokbaot sam fasin we oli olsem voes blong strenja tede.

Voes Blong Strenja Tede

10. ?Wanem wan fasin we i olsem voes blong strenja?

¹⁰ Ol giaman tijing. Aposol Pol i talem se: “Bambae yufala i no letem ol narafala tijing i tekemaot yufala long rod we i stret.” (Hibrus 13:9) ?Wanem kaen tijing ya? Pol i talem se ol tijing ya oli save ‘tekemaot yumi long rod we i stret.’ I klia se hem i stap tokbaot ol tijing we oli save mekem se yumi no moa stanap strong long bilif blong yumi. ?Voes blong hu i stap talemaot ol narakaen tijing ya? Pol i talem long wan grup blong ol Kristin elda se: “I gat taem i stap kam, we sam man blong yufala bambae oli save girap, oli giaman nomo blong lidim ol man blong Jisas oli biaen long olgeta, oli go krangke.” (Ol Wok 20:30) Tru ya, samting ya i hapen long taem blong Pol. Mo tede tu, samfala we fastaem oli joen long Kristin kongregesen oli girap “oli giaman” long ol sipsip blong traem lidim olgeta oli go krangke. Maet oli giaman stret, no maet oli talem ol toktok we haf nomo i tru mo haf i giaman. Olsem aposol Pita i talem, oli yusum “ol tok we i luk olsem i tru be hem i no tru”​—yes, yumi save ting se ol tok blong olgeta i tru, olsem giaman mane we i luk olsem i tru. Be ol tok ya i nating nomo olsem we giaman mane i nating nomo.​—2 Pita 2:​3, NW.

11. ?Wanem tok blong 2 Pita 2:​1, 3 i soemaot fasin blong ol man blong apostasi mo samting we oli wantem mekem?

¹¹ Pita i soemaot sam moa fasin blong ol man blong apostasi,a i se: “Bambae oli kam long fasin haed, nao oli pulum sam man oli biaen long olgeta, blong traem mekem ol man blong God oli seraot.” (2 Pita 2:​1, 3, NW ) Long pijatok blong Jisas, stilman i no pas ‘long doa, be hem i klaem long fenis blong go insaed’ long yad blong ol sipsip. Long sem fasin, ol man blong apostasi oli kam long fasin haed no long rod we i no stret. (Galesia 2:4; Jud 4) ?Oli wantem mekem wanem? Pita i talem se: “Bambae oli . . . traem yusum yufala nomo.” Tru ya, nomata se ol man blong apostasi oli talem olsem wanem, be trufala tingting blong ol strenja ya we yumi no singaot olgeta oli kam, i blong “stil, mo blong kilim ol sipsip oli ded, mo blong spolem evri samting.” (Jon 10:10) !Yu mas lukaot blong no foldaon long trik blong ol strenja ya!

12. (a) ?Olsem wanem voes blong strenja i save kamaot long ol fren blong yumi? (b) ?Olsem wanem ol trik blong Setan oli sem mak long ol trik blong strenja tede?

¹² Ol rabis fren. Voes blong strenja i save kamaot long olgeta we yumi stap kampani wetem olgeta. Ol yangfala nao we ol rabis fren oli gat moa paoa long olgeta. (1 Korin 15:33) Yumi no mas fogetem se Iv nao we Setan i kam luk hem fastaem. Hemia from we Iv i yangfala moa long Adam, mo hem i no gat plante save long saed blong laef. Setan i pulum Iv blong ting se Jeova i stap mekem i nogud long hem from we i stap blokem hem tumas. Be tingting ya i no stret. Samting we i tru se, Jeova i lavem tufala ya we hem i wokem tufala, mo i stap lukaotgud long tufala. (Aesea 48:17) Sem mak tede, strenja i save traem pulum yufala ol yangfala, blong yufala i ting se papa mama blong yufala oli stap mekem i nogud long yufala, oli stap blokem yufala tumas. ?Strenja ya i save mekem wanem long yu? Wan Kristin gel i talem se: “Blong smoltaem, ol yangfala long klas blong mi oli mekem bilif blong mi i kam slak. Oli stap talem se jos blong mi i strong tumas, i stap mekem we mama papa blong mi tufala i blokem mi tumas.” Be, samting we i tru se papa mama blong yu, tufala i lavem yu. Taswe, taem ol fren blong yu long skul oli traem pulum yu blong no moa trastem papa mama blong yu, yu no mas letem olgeta oli lidim yu yu go krangke olsem we Iv i letem Setan i lidim hem.

13. ?Wanem waes fasin we Deved i folem? ?Olsem wanem yumi save mekem olsem Deved?

¹³ Long saed blong ol rabis fren, Deved i raetem Sam ya se: “Mi mi no save go stap wetem ol man blong giaman. Mi no gat bisnes nating wetem ol man ya we oli gat tu tingting [“we oli haedem prapa fasin blong olgeta,” NW ].” (Ol Sam 26:4) Bakegen, vas ya i makemgud fasin blong ol strenja. ?Wanem fasin? Oli haedem prapa fasin blong olgeta, olsem we Setan i haed taem hem i yusum wan snek blong toktok long Iv. Tede, sam man blong mekem rabis fasin long saed blong seks oli yusum Intenet blong haedem fes blong olgeta mo blong haedem rabis tingting blong olgeta. Maet oli toktok long yu long Intenet, oli talem se oli yangfala olsem yu. Be hemia wan trik. Olgeta ya oli bigman finis, we oli wantem spolem yu nomo. Ol yangfala, plis lukaotgud. Ol man olsem oli save spolem yu long saed blong spirit.​—Ol Sam 119:101; Ol Proveb 22:3.

14. ?Olsem wanem sam ripot long niuspepa mo televisin oli olsem voes blong strenja?

¹⁴ Ol giaman ripot. Sam ripot long niuspepa mo televisin long saed blong ol Witnes blong Jeova oli gud mo oli tru. Be sam narafala ripot oli olsem voes blong strenja we i tok agens long ol Witnes blong Jeova. Olsem nao, long wan kantri, giaman ripot i kamaot se ol Witnes oli bin givhan long Hitler long Wol Wo Tu. Long wan narafala kantri, ripot i kamaot se ol Witnes oli stap brekemdaon ol jos haos. Long plante kantri lelebet, giaman ripot i kamaot se i tabu blong ol Witnes oli tekem pikinini blong olgeta i go luk dokta mo blong givim meresin long pikinini. Narafala ripot i talem se plante Witnes oli satem ae nomo long ol bigfala sin we sam narafala Witnes oli mekem. (Matiu 10:22) Nating se oli talemaot ol nogud ripot ya, be ol man we oli savegud yumi oli save se ol tok ya blong agensem yumi i giaman nomo.

15. ?From wanem i no waes blong bilif long evri samting we yumi luk long niuspepa mo long televisin?

¹⁵ ?Yumi mas mekem wanem sipos yumi harem voes blong strenja we i stap tok agens long yumi? I gud yumi folem advaes blong Ol Proveb 14:15 se: “Man we i no gat hed, hem i save bilif long evri samting, be man we i gat hed, hem i stap lukluk gud long rod we bambae i folem.” I no waes blong bilif long evri samting we yumi luk long niuspepa mo long televisin. Hemia i no min se yumi sakemaot olgeta tok blong niuspepa mo televisin evriwan. Be yumi mas luksave se “olgeta man blong wol ya oli stap long paoa blong Setan.”​—1 Jon 5:19.

“Traem Olgeta Fastaem”

16. (a) ?Olsem wanem fasin blong ol sipsip i soemaot se tok blong Jisas long Jon 10:4 i stret? (b) ?Baebol i talem se yumi mas mekem wanem fastaem?

¹⁶ ?Olsem wanem blong save sipos voes we yumi harem hem i voes blong wan fren no voes blong wan enemi? Jisas i talem se ol sipsip oli folem man blong lukaot long olgeta “from we oli save voes blong hem.” (Jon 10:4) I no fes blong man ya we i pulum ol sipsip blong folem hem, be voes blong hem nomo. Wan buk long saed blong ol kantri blong Baebol, i tokbaot wan man we i go blong lukluk ol ples ya. Man ya i talem se ating ol sipsip oli luksave man we i lukaot long olgeta from klos blong hem, i no from voes blong hem. Be man blong lukaot long sipsip i no agri, i talem se ol sipsip oli haremsave voes blong man. Blong pruvum samting ya, hem i givim klos blong hem long wan strenja. Nao strenja we i werem klos blong man blong lukaot long sipsip, hem i singaot ol sipsip oli kam. Be ol sipsip oli no kam. Oli no save voes blong man ya. Nao prapa man blong lukaot long ol sipsip ya i putum klos blong strenja. Hem i singaot ol sipsip, nao wantaem nomo oli ron i kam long hem. Taswe, nating sipos man i luk olsem wan man blong lukaot long sipsip, be samting ya i no naf blong pulum ol sipsip blong folem hem. Oli lesin fastaem long voes blong man ya, olsem we oli skelem voes ya blong luk sipos hemia prapa man blong lukaot long olgeta. Tok blong God i talem se yumi mas mekem sem mak. Yumi mas ‘traem fastaem ol profet we oli stap talem se spirit blong God i stap long olgeta blong faenemaot se spirit we i stap long olgeta i kamaot long God, no nogat.’ (1 Jon 4:1; 2 Timoti 1:13) ?Wanem bambae i givhan long yumi blong mekem olsem?

17. (a) ?Olsem wanem blong savegud voes blong Jeova? (b) ?Taem yumi savegud Jeova bambae yumi naf blong mekem wanem?

¹⁷ I klia se, sipos yumi savegud voes blong Jeova, hemia ol save we hem i talemaot, bambae yumi naf moa blong haremsave sipos wan voes i voes blong strenja. Baebol i soemaot olsem wanem blong lanem fasin ya, i se: “Bambae yufala i save harem voes . . . biaen long yufala, . . . we . . . i talem se, ‘Hemia rod. Yufala i folem.’ ” (Aesea 30:21) “Voes” ya biaen long yumi, hem i kamaot long Baebol. Taem yumi ridim Baebol, i olsem we yumi harem voes blong Nambawan Man ya blong Lukaot long Sipsip, hemia Jeova. (Ol Sam 23:1) Taswe, moa we yumi stadi Baebol, moa we bambae yumi haremsave voes blong God. Nao from we yumi savegud God olsem, bambae yumi haremsave wantaem nomo voes blong strenja.​—Galesia 1:8.

18. (a) ?Sipos yumi save voes blong Jeova bambae yumi mekem wanem? (b) ?Folem tok blong Matiu 17:​5, from wanem yumi mas obei long voes blong Jisas?

¹⁸ ?Sipos yumi save voes blong Jeova, bambae yumi mekem wanem? Bambae yumi lesin long voes ya, be bambae yumi go moa. Bambae yumi obei long voes ya tu. Ridim bakegen Aesea 30:21. Tok blong God i talem se: “Hemia rod.” Yes, taem yumi stadi Baebol, yumi harem ol tok blong Jeova we i soemaot rod long yumi. Nekis tok long vas ya se: “Yufala i folem.” Jeova i wantem se yumi wok folem samting we yumi harem. Taswe, sipos yumi mekem ol samting we yumi lanem i wok long laef blong yumi, yumi stap soemaot se yumi obei long voes blong Jeova, yumi no harem voes ya nomo. (Dutronome 28:1) Blong obei long voes blong Jeova yumi mas obei long voes blong Jisas tu, from we Jeova nao i talem long yumi blong mekem olsem. (Matiu 17:5) ?Jisas we i Gudfala Man blong Lukaot long sipsip, i talem long yumi blong mekem wanem wok? Hem i tijim yumi blong pulum ol man oli kam disaepol mo i tijim yumi blong trastem “slef ya we i stret mo waes.” (Matiu 24:​45, NW; 28 : 18-20) Blong kasem laef we i no save finis, yumi mas obei long voes blong hem.​—Ol Wok 3:23.

“Oli Mas Ronwe Long Hem”

19. ?Yumi mas mekem wanem taem yumi harem voes blong strenja?

¹⁹ ?Yumi mas mekem wanem taem yumi harem voes blong strenja? Yumi mas mekem olsem ol sipsip oli mekem. Jisas i talem se: “Oli no save folem man we oli no save hem [“strenja,” NW ] oli mas ronwe long hem.” (Jon 10:5) Taswe, yumi mas mekem tu samting. Fastaem, yumi ‘no folem’ strenja ya. Yes, yumi agensem ol strenja fulwan. Long Grik lanwis we oli raetem Baebol long hem fastaem, tok we oli yusum long ples ya i strong moa i bitim ol narafala tok we oli stap yusum blong soem fasin agens. (Matiu 24:35; Hibrus 13:5) Narafala samting we yumi mas mekem, se yumi “mas ronwe long hem,” yumi mas tanem baksaed long hem. Hemia nomo stret rod blong folem, taem tijing blong wan man i no laenap wetem voes blong Gudfala Man blong Lukaot long sipsip.

20. ?Bambae yumi mekem wanem taem yumi harem voes blong (a) ol man blong apostasi, (b) ol rabis fren, (c) ol giaman ripot?

²⁰ Taswe, taem yumi harem voes blong ol man blong apostasi, yumi mas mekem olsem Baebol i talem se: “Yufala i mas lukaot gud long olgeta we oli wantem mekem yufala i seraot, mo we oli wantem spolem bilif blong ol man. Yufala i no mas go klosap long olgeta. Olgeta oli stap agens long ol tok ya we yufala i kasem finis long ol man we oli tijim yufala long hem.” (Rom 16:17; Taetas 3:10) Long sem fasin, ol yangfala Kristin we oli save kasem trabol from ol rabis fren oli mas folem advaes we Pol i givim long yangfala Timoti, se: “I nogud yu folem [“yu mas ronwe long,” NW ] ol krangke fasin blong ol yangfala.” Mo taem yumi luk sam giaman ripot long niuspepa no long televisin, yumi save tingbaot narafala advaes ya we Pol i givim long Timoti se: “Bambae [olgeta we oli lesin long voes blong ol strenja] oli gowe long [trutok] blong go lesin long ol kastom stori ya we oli no tru. Oltaem, nomata wanem samting i kamtru long laef blong yu, be tingting blong yu i mas klia gud.” (2 Timoti 2:22; 4:​3-5) Nomata se voes blong strenja i swit we i swit, be yumi mas ronwe long hem from we hem i save spolem bilif blong yumi.​—Ol Sam 26:5; Ol Proveb 7:​5, 21; Revelesen 18:​2, 4.

21. ?Wanem blesing i stap fored long olgeta we oli no lesin long voes blong ol strenja?

²¹ Ol Kristin we tabu spirit i makemaot olgeta, oli no lesin long voes blong ol strenja. Long rod ya, oli soem se tok blong Gudfala Man blong Lukaot long sipsip long Luk 12:32 i stret long olgeta. Jisas i talem se: “Yufala ol sipsip blong mi, yufala i no plante, be yufala i no fraet. Papa blong yufala i glad tumas blong tekem yufala i kam man blong hem, we hem i King blong yufala.” Sem mak long “ol narafala sipsip.” Olgeta tu oli wantem tumas blong harem tok ya blong Jisas se: “Yufala i kam. Papa blong mi i mekem i gud tumas long yufala. Taem hem i no mekem wol ya yet, be hem i makemaot ol ples blong yufala finis long niufala wol we naoia bambae i kam, we hem i king long hem. Yufala i kam tekem ples ya blong yufala.” (Jon 10:16; Matiu 25:34) !Yes wan nambawan blesing i stap fored long yumi sipos yumi no lesin long “voes blong ol strenja”!

[Futnot]

?Yu Yu Rimemba?

• ?Olsem wanem fasin blong Setan i sem mak long fasin blong strenja we Jisas i tokbaot long parabol blong man blong lukaot long sipsip?

• ?Wanem ol samting tede we oli olsem voes blong strenja?

• ?Olsem wanem blong haremsave voes blong strenja?

• ?Yumi mas mekem wanem taem yumi harem voes blong strenja?

[Tok blong pija long pej 15]

Meri i haremsave voes blong Kraes

[Tok blong pija long pej 16]

Strenja i no go stret long ol sipsip

[Tok blong pija long pej 18]

?Yumi mekem wanem taem yumi harem voes blong ol strenja?