Wan Kwestin

?Taem aposol Jon i raetem se ‘lav we i stret gud olgeta i sakemaot fraet i go longwe,’ hem i minim wanem long tok ya ‘lav we i stretgud olgeta’ mo wanem ya ‘fraet’ we lav i sakemaot?

Aposol Jon i raetem se, “Man i no save fraet sipos hem i gat lav. Be lav we i stretgud olgeta i sakemaot fraet i go longwe, from we fraet i holem man olsem we i no moa fri. Yes, man we i fraet, lav blong hem i no stretgud olgeta yet.”​—1 Jon 4:18, NW.

Ol vas raonabaot long vas ya, oli soemaot we Jon i stap tokbaot fasin fri blong toktok​—hemia fasin fri blong toktok long God we i joen wetem lav we yumi gat long Hem. Yumi luk samting ya taem yumi ridim vas 17 (NW ): “Long rod ya nao lav blong yumi i kam stretgud olgeta finis, nao bambae yumi no fraet blong toktok long dei blong jajmen.” Taem wan Kristin i gat dip lav long God mo i harem save se God i lavem hem, samting ya bambae i gat paoa long fasin blong hem blong toktok wetem God long prea, we hem i no fraet.

Tok ya “lav we i stret gud olgeta” i gat bigfala mining. Long Baebol, tok ya “stret gud” i no minim oltaem se wan samting i stret gud fulwan, no gat. Be plante taem hem i minim wan samting we i kasem fulmak blong hem. Wan eksampol, long Bigfala Toktok antap long Hil, Jisas i talem se: “Be fasin blong yufala i mas stret gud, olsem fasin blong Papa blong yufala long heven.” Jisas i talem long ol man blong hem se sipos oli lavem ol man we oli laekem olgeta nomo, i olsem se lav ya we oli gat i no fulwan, oli sot long lav, mo lav ya i no gud. Oli mas mekem lav blong olgeta i kam stret gud, olsem se oli soemaot lav ya go kasem ful mak blong hem, taem oli laekem ol enemi blong olgeta tu. Long sem fasin, taem Jon i tokbaot “lav we i stret gud olgeta,” hem i stap tokbaot lav long God we i kamaot long hat blong yumi, we hem i fulwan olgeta, mo we i gat paoa long olgeta haf blong laef blong yumi.​—Matiu 5:46-48; 19:20, 21.

Taem wan Kristin i toktok wetem God long prea, hem i luksave se hem i gat sin mo i no stret gud. Be, sipos lav we Kristin ya i gat long God i fulwan mo hem i harem save se God tu i lavem hem fulwan olgeta, bambae hem i no gat tingting ya se God i no laekem hem mo bambae hem i no fraet long God. Be, bambae hem i fri blong toktok, bambae hem i glad blong talemaot wanem we i stap long hat blong hem, mo bambae i askem God blong fogivim hem tru long ransom sakrefaes blong Jisas Kraes. Hem i sua fulwan se God i glad blong lesin long wanem we hem i askem.

?Olsem wanem wan man i save gat “lav we i stret gud olgeta” mo ‘sakemaot’ fraet ya se God bambae i panisim hem? Aposol Pol i talem se: “Be man we i stap folem ol tok blong God, hemia man we i lavem God long fasin we i stret gud.” (1 Jon 2:5) Tingbaot: ?Sipos God i lavem yumi long taem we yumi sinman yet, yu ting se bambae hem i laekem yumi moa sipos yumi rili tanem tingting blong yumi mo “stap folem ol tok blong [Hem]”? Yes, hem i save mekem olsem. (Rom 5:8; 1 Jon 4:10) Tru ya, sipos yumi gohed blong holem bilif blong yumi, yumi save gat sem filing olsem aposol Pol we i talem tok ya long saed blong God se: “God i no holemtaet stret Pikinini blong hem, i letem hem i ded blong sevem yumi evriwan. Hem i givim stret Pikinini blong hem finis, blong i sevem yumi. Bambae hem i no moa save holemtaet ol narafala samting blong hem, bambae i givim olgeta oli kam nomo long yumi.”​—Rom 8:32.