Trutok Long Saed Blong Amagedon

“Trifala devel . . . i go luk ol king blong evri ples long wol, . . . trifala i tekem ol king oli kam wanples long ples ya we long lanwis blong ol laen blong Isrel nem blong hem ‘Amagedon.’”(Mifala nomo i jenisim raeting ya.)—REVELESEN 16:14, 16.

AMAGEDON i nem blong wan ples. Be i luk olsem se ples ya i no wan prapa ples long wol.

?Ale, wanem stret mining blong tok ya “Amagedon”? ?From wanem plante taem ol man oli yusum tok ya taem oli stap tokbaot wan samting we i hapen, olsem wan bigfala faet?

Oli Kam Wanples Long Ples Ya We Nem Blong Hem Amagedon

Long lanwis Hibru tok ya Har–Magedon i minim “Bigfala Hil long Megido.” Nating se i no gat wan prapa hil we nem blong hem i olsem, be i gat wan ples we nem blong hem Megido. Hemia wan ples we ol rod oli joejoen, long not blong ples we ol man Isrel bifo oli stap long hem, long saed i go long wes. Bifo, oli mekem plante bigfala faet klosap long ples ya. Taswe, ol man oli joenem nem ya Megido wetem ol faet.a

I no ol faet we ol man oli mekem long Megido we oli impoten blong yumi save. Yumi mas save from wanem ol man oli mekem ol faet ya. Megido i wan haf blong Promes Lan we Jehova God i givim long ol man Isrel. (Eksodas 33:1; Josua 12:7, 21) Jehova God i mekem promes long ol man Isrel se bambae hem i faet agensem ol enemi blong olgeta, mo hem i mekem olsem we hem i talem. (Dutronome 6:18, 19) Long Megido, Jehova i mekem wan merikel blong givhan long ol man Isrel blong oli winim ol ami blong ol man Kenan. Hemia ol ami blong King Jabin, we Siseraha i komanda blong olgeta.—Jajes 4:14-16.

Taswe, tok ya “Har–Magedon,” no “Amagedon,” i gat bigfala mining. Nem ya i joen wetem wan faet. Long faet ya, bambae tufala ami we i gat bigfala paoa tufala i faet agensem tufala.

Profet tok we i stap long Revelesen i tokbaot se i no longtaem Setan mo ol rabis enjel blong hem, bambae oli pulum ol gavman blong singaot ol ami blong olgeta oli kam wanples blong oli mekem faet. Bambae olgeta oli gat wan tingting nomo, hemia blong spolem ol man blong God mo blokem wok we ol man blong God oli stap mekem. Be God bambae i winim olgeta mo i kilim i ded plante milian man.—Revelesen 19:11-18.

Baebol i tokbaot God se ‘oltaem hem i mekem i gud long man. Hem i no save kros kwik, mo fasin blong hem blong lavem man i gudfala tumas.’ ?Ale, from wanem bambae God i kilim plante man i ded? (Nehemaea 9:17) Blong kasem save long ol samting we God bambae i mekem, yumi mas ansa long trifala kwestin ya: (1) ?Hu i statem bigfala faet ya? (2) ?From wanem God i joen long faet ya? (3) ?Amagedon bambae i mekem wanem gudfala samting long wol mo long ol man?

 1. ?HU I STATEM BIGFALA FAET YA?

God i no statem bigfala faet ya blong Amagedon. Be bambae God i protektem ol man blong hem long ol man we oli wantem spolem olgeta. “Ol king blong evri ples long wol” no ol lida blong wol, olgeta nao oli statem faet ya. ?From wanem oli girap agensem ol man blong God? Setan nao i gat paoa long ol man blong gavman mo ol man blong ami, olsem we wan pikinini i pulpulum doli blong hem olbaot. Bambae Setan i pulum olgeta ya blong agensem bigwan ol man we oli wosipim Jehova God.—Revelesen 16:13, 14; 19:17, 18.

Tede long sam kantri, ol man oli ting se i impoten we oli fri blong tokbaot wanem we oli wantem mo oli fri blong joen long wanem skul we oli wantem. Taswe, maet yumi ting se ol gavman bambae oli no save mekem i strong long ol jos mo oli no save spolem wan jos. Be ol gavman oli mekem olsem finis long ol yia 1900 mo oli stap mekem olsem tede tu.b I gat tu bigfala samting we bambae i mekem se fasin blong ol gavman blong agensem ol man blong God long taem blong Amagedon, i defren long fasin we oli stap mekem tede. Fas samting, se bambae ol gavman oli agensem ol man blong God long olgeta ples long wol. Seken samting, se bambae God i tekem aksen we i bigwan moa i bitim ol narafala taem bifo. (Jeremaea 25:32, 33) Baebol i tokbaot faet ya se hem i “bigfala Dei blong God ya we i gat olgeta paoa.”

 2. ?FROM WANEM GOD I JOEN LONG FAET YA?

Jehova i tijim olgeta we oli wosipim hem blong oli gat pis mo oli lavem ol enemi blong olgeta. (Maeka 4:1-3; Matiu 5:43, 44; 26:52) Hemia nao from wanem taem ol gavman oli girap agensem olgeta, bambae oli no yusum ol tul blong faet blong protektem olgeta. Sipos God i no mekem wan samting blong sevem ol man blong hem, bambae oli ded evriwan. Mo hemia bambae i spolem gudfala nem blong Jehova God. Sipos ol gavman oli kilim i ded olgeta man blong Jehova, bambae i luk olsem se Jehova i no lavem olgeta, i no gat stret fasin, mo i no gat paoa blong givhan long ol man blong hem. !Bambae God i no save letem samting ya i hapen!—Ol Sam 37:28, 29.

God i no wantem se wan man i lus, taswe hem i talemaot fastaem wanem we bambae hem i mekem. (2 Pita 3:9) Ol stori we i stap long Baebol oli soemaot se oltaem God i faet blong ol man blong hem, taem ol man oli agensem olgeta. (2 King 19:35) Baebol i talem se bambae God i mekem i sem mak taem Setan mo ol man we hem i yusum, oli traem spolem ol man blong God. Bambae Jehova i tekem aksen mo i yusum paoa blong hem blong agensem olgeta. Yes, Tok blong God i talemaot longtaem finis se bambae Jehova i spolem ol rabis man. (Ol Proveb 2:21, 22; 2 Tesalonaeka 1:6-9) Long taem ya, olgeta we oli agensem ol man blong God, bambae oli save se oli stap faet agensem Hae God ya we i gat olgeta paoa.—Esikel 38:21-23.

 3. ?AMAGEDON BAMBAE I MEKEM WANEM GUDFALA SAMTING LONG WOL?

Plante milian man bambae oli pastru long bigfala faet ya blong Amagedon from we God i sevem olgeta. Afta long faet ya, bambae i gat pis long fulwol.—Revelesen 21:3, 4.

Buk blong Revelesen i tokbaot se wan “bigfala hip blong ol man,” we i no gat man i save kaontem olgeta, bambae oli pastru long bigfala faet ya. (Revelesen 7:9, 14) Bambae God i lidim olgeta, nao bambae oli givhan blong mekem wol ya i kam Paradaes bakegen olsem we Jehova i wantem fastaem.

?Olsem wanem? ?Yumi save wetaem ol gavman bambae oli girap agensem ol man blong God?

[Ol futnot]

[Tok blong pija long pej 6]

Jehova God i faet blong sevem ol man blong hem bifo

[Tok blong pija long pej 7]

Long bigfala faet blong Amagedon, bambae Jehova i faet blong sevem ol man blong hem