Tok Blong Jeova i Wan Samting We i Laef

Ol Bigfala Poen Long Buk Blong Revelesen—Haf 2

?WANEM bambae i hapen long olgeta we oli wosipim Jeova God mo long olgeta we oli no wosipim hem? ?Wanem fiuja blong Setan mo ol rabis enjel blong hem? ?Wanem ol blesing we ol man blong obei long God bambae oli kasem long Wan Taosen Yia Rul blong Kraes? Ansa blong ol kwestin ya, mo blong sam narafala impoten kwestin bakegen, i stap long Revelesen 13:1–22:21.a Long ol japta ya, i gat ol 9 laswan vison blong ol 16 vison we aposol Jon i kasem klosap long en blong faswan handred yia.

Jon i raetem se: “Man we i ridimaot tok ya we God i givim, hem i save harem gud. Mo olgeta we oli harem tok ya, mo oli holem long tingting blong olgeta, olgeta ya tu bambae oli save harem gud.” (Rev. 1:3; 22:7) Sipos yumi ridim mo yumi mekem ol samting we yumi lanem long buk blong Revelesen oli wok long laef blong yumi, oli save gat paoa long hat blong yumi, mo oli save mekem bilif blong yumi long God mo Pikinini blong hem Jisas Kraes, i kam strong moa. Mo tu, oli mekem se yumi save putum tingting blong yumi i stap strong long ol gudfala promes blong fiuja.b—Hib. 4:12.

KAFSAEDEM SEVEN BESIN WE OLI FULAP LONG KROS BLONG GOD

(Rev. 13:1–16:21)

Revelesen 11:18 i talem se: “Ol man we oli no save [God] oli kros tumas, be naoia i taem blong [God i] kros long olgeta, . . . naoia i taem blong spolem ol man ya we oli stap spolem wol.” Blong soemaot from wanem kros blong God i kamaot, namba eit vison i tokbaot samting we “wan anamol . . . [we] i gat ten hon blong hem mo seven hed blong hem,” i stap mekem.—Rev. 13:1.

Long namba naen vison, Jon i luk ‘Smol Sipsip i stanap antap long bigfala hil ya Saeon,’ mo “i gat wan handred foti fo taosen man oli stap wetem hem.” Ol man ya, “God i pemaot olgeta finis, i tekemaot olgeta long ol narafala man.” (Rev. 14:1, 4) Biaen long hemia, i gat ol mesej we ol enjel oli talemaot. Long nekis vison, Jon i luk “seven enjel we oli stap tekem seven bigfala trabol i kam.” I klia se Jeova hem wan i givim oda long ol enjel ya blong oli kafsaedem “ol seven besin ya” we oli fulap long “kros blong God,” i go long ol defdefren haf blong wol blong Setan. Long ol besin ya, i gat ol toksave mo ol woning blong jajmen we God bambae i mekem i kamtru. (Rev. 15:1; 16:1) Tufala vison ya i soemaot ol smosmol save long saed blong ol narafala jajmen we Kingdom i mekem oli kamtru, taem namba tri trabol i kamaot mo namba seven pupu i krae.—Rev. 11:14, 15.

Ansa Blong Sam Kwestin Long Saed Blong Baebol:

13:8—?Wanem ya ‘buk blong ol man we oli gat laef, [we] i blong Smol Sipsip’? Buk ya i no wan trufala buk, be hem i wan pijatok nomo. Long buk ya, i gat nem blong olgeta ya nomo we bambae oli rul wetem Kraes long Kingdom blong hem long heven. Hemia i min se i gat nem blong ol Kristin we tabu spirit i makemaot olgeta we oli stap yet long wol, mo we oli putum tingting blong olgeta i stap strong long janis blong kasem laef long heven.

13:11-13—?Olsem wanem anamol ya we i gat tu hon blong hem, i wok olsem wan bigfala algita mo i mekem faea i aot long heven i kamdaon long wol? Anamol ya we i gat tu hon blong hem, mo i minim tufala bigfala politik paoa ya blong wol, Inglan mo Amerika, i toktok olsem wan bigfala algita. Samting ya i soemaot se hem i toktok blong mekem man i fraet, i fosem man, mo i mekem raf fasin blong fosem ol man blong oli agri long rul blong hem. Hem i mekem faea i aot long heven i kamdaon long wol taem hem i wok olsem wan profet, mo i talem se long tufala bigfala faet blong wol long ol yia 1900 hem i tekemaot paoa blong rabis fasin long wol ya, mo i winim rul blong Komunis.

16:17—?Wanem ya “win” we enjel i kafsaedem namba seven besin i go long hem? “Win” ya i pija blong tingting we i kamaot long Setan, “spirit ya we i stap mekem wok naoia long ol man we oli no obei long God.” Evriwan we oli haf blong rabis wol ya blong Setan, oli stap pulum rabis win ya we i gat posen long hem.—Efes. 2:2, NW.

Ol Lesen Blong Yumi:

13:1-4, 18. Wael “anamol” we i pija blong ol gavman blong man, i “kamaot long solwota,” hemia ol bigfala hip blong man we oli olsem solwota we i raf tumas. (Aes. 17:12, 13; Dan. 7:2-8, 17) Wael anamol ya we Setan i wokem mo i givim paoa long hem, i gat namba ya 666, we i makemgud se anamol ya i no stret nating. Taem yumi kasem save long mining blong wael anamol ya, hemia i givhan long yumi blong yumi no leftemap hem, yumi no folem hem, mo yumi no mekem wosip long hem, olsem we bighaf blong ol man oli mekem.—Jon 12:31; 15:19.

13:16, 17. Nomata ol hadtaem we yumi fesem long ol wok blong yumi evri dei, olsem maet taem yumi ‘pem samting no yumi salem samting,’ be yumi no mas letem wael anamol i fosem yumi mo i bos long laef blong yumi. Sipos yumi letem wael anamol ya i putum ‘mak long raet han blong yumi mo long fored blong yumi,’ yumi agri blong letem hem i kontrolem ol aksen blong yumi, mo i gat paoa long ol tingting blong yumi.

14:6, 7. Tok ya we enjel i talemaot, i tijim yumi se yumi mas talemaot gud nius blong Kingdom blong God we i stanap finis, wetem tingting ya se taem i sot tumas. Yumi mas givhan long ol Baebol studen blong yumi blong oli wokem fasin ya blong fraetgud long God, mo blong oli presem Jeova.

14:14-20. ‘Tekem kakae we i rere long garen,’ i minim wok ya blong hivimap olgeta man we bambae oli sef. Long en blong wok ya, bambae i taem blong enjel i sakem ol “frut blong rop ya grep, we i raep finis” oli go long “bigfala ples blong man i purumpurumbut long frut blong grep, blong mekem wota blong hem i kamaot.” Ples ya i minim kros blong God. Rop ya, we i minim ol gavman we Setan i yusum blong bos antap long ol man long wol, wetem ol rabis frut blong hem, ol grep, bambae oli lus blong olwe. Yumi mas gat strong tingting blong no letem rabis rop ya i gat paoa long yumi.

16:13-16. Ol “rabis devel” oli pija blong ol giaman tok blong ol rabis enjel, we oli wantem mekem se ol seven besin ya, we oli fulap long kros blong God, oli no gat paoa long ol king blong wol ya taem enjel i kafsaedem olgeta. Long defren fasin, oli fosem ol king ya blong go long wan rod we i agensem Jeova.—Mat. 24:42, 44.

16:21. Taem en blong wol ya i stap kam klosap moa, maet wok ya blong talemaot jajmen blong Jeova agens long rabis wol ya blong Setan i minim tu se bambae yumi talemaot ol strong tok blong soemaot jajmen blong God, we ol ston blong aes oli pija blong hem. Nating se i olsem, bighaf blong ol man bambae oli gohed nomo blong tok nogud long God.

KING YA WE I WIN LONG FAET, I RUL

(Rev. 17:1–22:21)

‘Bigfala Babilon,’ we i pija blong olgeta giaman skul long wol, i wan haf blong rabis wol ya blong Setan we i nogud olgeta. Namba 11 vison i soemaot Bigfala Babilon olsem wan “woman blong rod”—wan woman we i slip olbaot—we “i stap sidaon long wan anamol we i red we i red.” Ol “ten hon” blong anamol ya we i stap karem woman ya, bambae oli spolemgud hem. (Rev. 17:1, 3, 5, 16) Nekis vison i soemaot se woman blong rod ya i olsem “wan bigfala taon,” mo i talemaot se taon ya bambae i foldaon, ale hem i singaot ol man blong God blong oli “kamaot long hem” kwiktaem. Bambae plante man oli sore tumas taem bigfala taon ya i foldaon. Be olgeta long heven oli glad tumas, from we ‘Smol Sipsip bambae i mared.’ (Rev. 18:4, 9, 10, 15-19; 19:7) Long namba 13 vison, man we i sidaon long “waet hos” i go mekem faet long ol man blong evri kantri. Hem i spolemgud rabis wol blong Setan.—Rev. 19:11-16.

?Olsem wanem long “snek ya blong bifo, we nem blong hem ‘Setan’, no ‘Man we i stap agensem man’”? ?Wetaem bambae ol enjel oli “sakem hem i go long bigfala hol ya blong faea”? Namba 14 vison i tokbaot samting ya. (Rev. 20:2, 10) Tufala laswan vison oli givim sam smol save long saed blong laef long taem blong Wan Taosen Yia Rul blong Kraes. Taem ‘ol samting ya we Jisas i soemaot long Jon’ oli kasem en blong olgeta, Jon i luk ‘wan bigfala reva we i pas long medel blong rod,’ mo hem i harem wan gudfala tok we i singaot olgeta man we oli “tosta” oli kam.—Rev. 1:1; 22:1, 2, 17.

Ansa Blong Sam Kwestin Long Saed Blong Baebol:

17:16; 18:9, 10—?From wanem “ol king ya blong wol” oli sore tumas from samting ya we olgeta nomo oli spolemgud? Oli sore nomo from we Bigfala Babilon i no moa stap blong givhan long olgeta. Afta we ol king blong wol oli spolem Bigfala Babilon, oli tingbaot olsem wanem oli bin yusum hem blong haedem ol rabis wok blong olgeta blong spolem ol man. Bigfala Babilon i givhan long olgeta tu blong oli tekem ol yangfala oli go long faet. Mo tu, Bigfala Babilon i mekem bigfala wok ya blong pulum ol man oli stap aninit long paoa blong ol king ya.

19:12—?Olsem wanem Jisas nomo i save long nem blong hem, be ol narafala man nogat? I luk olsem se nem ya i minim posisen mo spesel wok we Jisas i glad blong mekem long dei blong Masta, olsem ol spesel wok ya we Aesea 9:6 i tokbaot. Hem nomo i save nem ya, be ol narafala man nogat, from we hem nomo i kasem ol spesel wok ya mo hem nomo i kasem save se i olsem wanem blong holem wan hae posisen olsem. Be Jisas i serem sam long ol spesel wok ya wetem ol memba blong grup ya we oli olsem woman blong hem. From samting ya, i olsem se hem i ‘raetem niufala nem blong hem i stap long olgeta.’—Rev. 3:12.

19:14—?Hu bambae oli biaen long Jisas blong faet long Amagedon? Insaed long “kampani blong ol soldia blong heven,” we oli joen wetem Jisas blong mekem faet blong God, bambae i gat ol enjel wetem ol tabu man we oli win long faet blong olgeta mo oli kasem praes blong olgeta finis long heven.—Mat. 25:31, 32; Rev. 2:26, 27.

20:11-15 (NW)—?Hu olgeta we nem blong olgeta i stap long “buk blong laef”? Long buk ya, i gat nem blong olgeta we bambae oli kasem laef blong olwe. Long olgeta ya, i gat ol Kristin we tabu spirit i makemaot olgeta, ol memba blong bigfala kampani, mo ol man we oli bin stap tru long God mo we God i luk olgeta olsem ‘ol stret man we bambae oli laef bakegen.’ (Wok 24:15; Rev. 2:10; 7:9, NW) Ol man ‘we oli no stret we bambae oli laef bakegen,’ nem blong olgeta bambae i stap long “buk blong laef” nomo sipos oli mekem laef blong olgeta i laenap wetem ol save “we i stap long ol buk” we oli openem long Rul Blong Wan Taosen Yia. Be ing we oli yusum blong raetem ol nem ya oli save ravemaot. Nem blong olgeta we tabu spirit i makemaot olgeta, i save stap olwe nomo sipos oli stap tru long God gogo kasem we oli ded. (Rev. 3:5) Nem blong olgeta we oli kasem laef long wol i save stap olwe nomo sipos oli winim laswan traem long en blong wan taosen yia.—Rev. 20:7, 8.

Ol Lesen Blong Yumi:

17:3, 5, 7, 16. “Waes we i kam long heven” i givhan long yumi blong kasem save long “tokhaed blong woman ya, mo blong anamol ya [we i red we i red] we hem i stap sidaon long hem.” (Jem. 3:17) Anamol ya i pija blong Ligofneson fastaem, mo biaen hem i girap bakegen olsem Yunaeted Neson. Taem yumi kasem save long tokhaed ya, hemia i mas pusum yumi blong wok strong blong talemaot gud nius blong Kingdom blong God mo blong talemaot dei blong jajmen blong Jeova.

21:1-6. Yumi save sua fulwan se ol blesing we oli kamaot aninit long rul blong Kingdom, bambae oli rili kamtru. ?From wanem? From we Revelesen i tokbaot olgeta, i se: “Olgeta samting i [“kamtru,” NW] finis.”

22:1, 17. ‘Reva blong wota blong laef’ i pija blong rod we Jeova i wokem blong mekem ol man we oli obei long hem, oli kamgud bakegen long ol trabol we oli kasem from sin mo ded. Tede, yumi save kasem smol haf blong wota ya. !Yumi mas gat tangkiu mo folem tok ya we i singaot yumi blong kam mo “tekem wota ya blong laef, we i olsem presen”! !Mo yumi mas singaot ol narafala blong olgeta tu oli kam!

[Ol futnot]

[Tok blong pija long pej 31]

!Ol man we oli obei long rul blong Kingdom, bambae oli haremgud long ol nambawan blesing!