Wan Kwestin

?From wanem ol Witnes blong Jeova oli talem se namba ya 144,000 we i stap long buk blong Revelesen i wan trufala namba, i no wan pijatok?

Aposol Jon i raetem se: “Nao mi harem namba blong ol man we mak blong God i stap long olgeta. I gat wan handred foti fo taosen man olgeta.” (Revelesen 7:4) Insaed long Baebol, tok ya “ol man we mak blong God i stap long olgeta” i minim wan grup blong man we God i jusumaot olgeta long wol ya, blong oli rul wetem Kraes long heven antap long ol man we bambae oli laef long Paradaes long wol. (2 Korin 1:​21, 22; Revelesen 5:​9, 10; 20:6) Yumi gat plante defren risen blong talem se namba ya 144,000 i wan trufala namba. Wan long ol risen ya i stap long ol vas raonabaot long Revelesen 7:4.

Afta we aposol Jon i luk grup ya blong 144,000 man long wan vison, hem i luk wan narafala grup blong man. Jon i tokbaot seken grup ya olsem “wan bigfala kampani blong man, we i no gat man i save kaontem olgeta. Ol man ya oli kamaot long olgeta nesen, mo long olgeta laen, mo long olgeta kantri, mo long olgeta lanwis.” Bigfala kampani ya i minim ol man we oli pastru long “bigfala trabol,” we bambae i spolemgud rabis wol blong tede.​—Revelesen 7:​9, 14, NW.

Be makemgud olsem wanem Jon i soem tu defren samting long vas 4 mo long vas 9 blong Revelesen japta 7. Hem i talem se faswan grup, “ol man we mak blong God i stap long olgeta,” hem i gat wan stret namba. Be seken grup, hemia “bigfala kampani,” i no gat man i save kaontem hem. Taem yumi tingbaot samting ya, i stret nomo blong talem se 144,000 i wan trufala namba. Sipos namba ya 144,000 i wan pijatok nomo, mo i minim wan grup blong man we yumi no save stret namba blong hem, ale hemia i min se tufala grup ya we tufala vas i tokbaot, tufala i sem mak nomo. Taswe, ol vas raonabaot oli sapotem tingting ya se 144,000 i mas wan trufala namba.

Plante man blong stadi Baebol, long taem bifo mo long taem blong yumi tu, oli gat semfala tingting​—hemia se namba ya i wan trufala namba. Eksampol, samwe 100 yia bifo, wan man Inglan we i raetem ol diksonari, nem blong hem Dr. Ethelbert W. Bulinger i tokbaot Revelesen 7:​4, 9 mo i talem se: “Hemia wan trutok nomo: i gat wan stret namba wetem wan namba we i no klia long semfala japta ya.” (The Apocalypse or “The Day of the Lord,” pej 282) I no longtaem i pas, Robert L. Thomas, Jr., wan tija blong Niutesteman long The Master’s Seminary long Yunaeted Stet, i raetem se: “I no gat wan strongfala risen blong talem se hem [namba ya 144,000] i wan pijatok.” Hem i ademap se: “[Namba ya] i wan stret namba [long Revelesen 7:4] we i defren long namba blong Revelesen 7:​9, we i no klia. Sipos namba ya [144,000] i wan pijatok nomo, hemia i min se i no gat wan namba long buk ya [Revelesen] we i tru.”​—Revelation: An Exegetical Commentary, Buk 1, pej 474.

Sam man oli talem se buk blong Revelesen i fulap long ol pijatok, taswe olgeta namba insaed long buk ya, wetem namba ya 144,000 tu, oli pijatok nomo. (Revelesen 1:​1, 4; 2:10) Be tingting ya i rong. I tru se insaed long buk blong Revelesen i gat plante namba we oli pijatok nomo, be i gat sam trufala namba tu. Eksampol, Jon i tokbaot “nem blong ol twelef aposol blong Smol Sipsip.” (Revelesen 21:14) Namba 12 we i stap long vas ya i wan trufala namba, hem i no wan pijatok. Mo tu, aposol Jon i tokbaot “wan taosen yia” rul blong Kraes. Baebol i soem klia nomo we namba ya tu i wan trufala namba.a (Revelesen 20:​3, 5-7) Olsem nao, blong save sipos wan namba long buk blong Revelesen i wan trufala namba no i wan pijatok, yumi mas lukluk ol narafala buk blong Baebol we oli tokbaot semfala samting, wetem ol vas raonabaot long vas ya.

Tingting ya se namba 144,000 i wan trufala namba mo i tokbaot wan smol namba blong man we i smol moa long ‘bigfala kampani,’ hem i laenap wetem sam narafala vas long Baebol. Eksampol, long vison we aposol Jon i kasem, hem i tokbaot ol 144,000 olsem ol man we God “i tekemaot olgeta long ol narafala man . . . olsem ol fas kakae blong garen.” (Revelesen 14:​1, 4) Tok ya “ol fas kakae blong garen” i minim wan smol haf, no grup, we God i jusum. Mo tu, taem Jisas i stap yet long wol, hem i tokbaot ol man we bambae oli rul wetem hem long Kingdom blong hem long heven, mo i singaot olgeta se “smol kampani.” (Luk 12:​32, NW; 22:29) Mo i tru, namba blong ol man we God i jusumaot long wol blong oli go rul long heven, i smol nomo taem yumi skelem wetem namba blong ol man we bambae oli laef long Paradaes long wol.

Taswe, ol vas raonabaot long Revelesen 7:4 mo ol defren poen we yumi luk antap, we oli stap insaed long Baebol, oli soem klia se namba ya 144,000 i wan trufala namba. Hem i minim ol man mo ol woman we bambae oli rul long heven wetem Kraes antap long wan paradaes long wol. Long paradaes ya, wan bigfala namba blong man we yumi no save kaontem olgeta bambae oli glad blong wosipim Jeova God.​—Ol Sam 37:29.

[Futnot]

[Tok blong makem poen pija long pej 31]

I gat 144,000 man nomo we bambae oli go long heven

[Tok blong pija long pej 31]

Man i no save kaontem “bigfala kampani”

[Foto Credit Line blong pija long pej 31]

Stars: Courtesy of Anglo-Australian Observatory, photograph by David Malin