?From Wanem Spesel Presen Ya i Gud Tumas?

I gat sam presen we yumi luk se oli spesel from we man we i givim, i wan haeman no i wan man we yumi tinghae long hem. Sam narafala presen, maet oli no sas tumas, be yumi laekem from we wan famle no wan gudfala fren blong yumi i givim. Hemia nao samting we i hapen long Jordan, we yumi tokbaot hem finis. ?Olsem wanem samting ya i joen wetem presen ya ransom?

Faswan samting, Baebol i talem se: “God i gat wan pikinini nomo blong hem, be hem i sanem hem i kam long wol ya, blong i mekem rod blong yumi, blong yumi kasem laef.” (1 Jon 4:9) Samting ya i mekem se presen ya i spesel tumas. I no gat man we i hae moa bitim God. Wan man blong raetem sam, i tokbaot hem se: “Ol man oli mas save se yu, we nem blong yu Jehova, yu nomo yu Hae God blong olgeta ples long wol.” (Ol Sam 83:18, NW) I no gat wan narafala man we i save givim wan presen olsem.

Seken samting, God i “Papa blong” yumi. (Aesea 63:16) ?From wanem? Hem i givim laef long yumi. Mo tu, oltaem hem i lukaot gud long yumi olsem wan papa we i lukaot gud long ol pikinini blong hem. Wan taem, God i singaot ol man blong hem se Efrem, mo i askem se: “?Efrem i wan gudfala boe blong mi, mo wan pikinini we mi stap mekem i gud long hem? . . . Hemia nao risen from wanem gat blong mi i soa tumas from hem. Tru ya, bambae mi sore long hem.” (Jeremaea 31:20, NW) Tede, God i gat sem filing long ol man we oli stap wosipim hem. Hem i God ya we i gat olgeta paoa mo i wokem heven mo wol, mo hem i Papa mo Fren blong yumi. ?Yu no ting se eni presen we hem i givim long yumi i spesel tumas?

I gat sam presen we yumi luk se oli spesel from we man we i givim, i givim wetem lav, be i no from we narafala i fosem hem. Wan man we i no selfis, hem i givim presen mo i no wet se narafala i mas givimbak wan presen long hem.

God i lavem yumi taswe hem i givim Pikinini blong hem, blong i ded from yumi. Baebol i talem se: “God i gat wan pikinini nomo blong hem, be hem i sanem hem i kam long wol ya, blong i mekem rod blong yumi, blong yumi kasem laef. Long samting ya nao, God i soemaot fasin blong hem blong lavem yumi.” (1 Jon 4:9) ?Olsem wanem? ?Hemia wan samting we God i mas mekem? !Nogat! “Ransom we Kraes Jisas i pem” i soemaot se God “i kaen tumas” long yumi.—Rom 3:24, NW.

?From wanem presen ya i soemaot se hem “i kaen tumas”? Baebol i eksplenem se: “God i lavem yumi tumas, mo i soemaot samting ya long yumi long fasin ya we Kraes i ded blong sevem yumi, long taem ya we yumi stap mekem i nogud yet.” (Rom 5:8) God i gat bigfala lav, taswe hem i wantem halpem ol man we oli slak, oli nidim help, mo oli gat sin. Yumi no mekem wan samting blong God i lavem yumi. Mo bambae yumi neva save pembak hem from lav ya. Presen blong hem i soemaot se hem i gat bigfala lav.

I gat sam presen we yumi luk se oli spesel from we man we i givim, i lego sam samting blong i save givim presen ya. Taem wan man i glad blong lego wan samting we hem i tinghae tumas long hem, nao i givim long yumi, yumi luk se presen ya i sas tumas.

God i “givim stret Pikinini blong hem, wan nomo we hem i gat.” (Jon 3:16, NW) Hem i givim wan man we hem i lavem tumas. Long ol yia we God i stap wokem heven mo wol, Jisas i wok wetem hem mo hem i “stap mekem hem i glad.” (Ol Proveb 8:30) Jisas i “Pikinini blong [God] we hem i lavem tumas,” mo “hem i pija blong God ya we yumi no save luk hem.” (Kolosi 1:13-15, NW) I neva gat tu man we tufala i fren gud olsem.

Nating se i olsem, God “i no holemtaet stret Pikinini blong hem.” (Rom 8:32) Jehova i givim beswan samting we hem i gat. Mo blong mekem olsem, hem i mas lego wan samting we hem i lavem tumas.

I gat sam presen we yumi luk se oli spesel from we yumi rili nidim. Yu traem tingbaot sipos yu yu sik tumas we klosap yu ded, be yu no save pem ol meresin from we oli sas tumas. !Be sipos wan man i pem ol meresin ya nao i givim long yu, bambae yu glad tumas long hem! Bambae yu luk se presen ya i gud we i gud.

“Olgeta man we oli joen long Adam oli ded. Long sem fasin, olgeta man we oli joen long Kraes bambae oli laef bakegen.” (1 Korin 15:22, NW) Yumi evriwan i kamaot long Adam, taswe yumi stap “ded,” yumi no save ronwe long sik mo ded, mo yumi no save fren gud wetem God mo stap klin long fes blong hem. Mo from we yumi sinman, yumi no save mekem yumi mo ol narafala oli “laef bakegen.” Baebol i talem se: ‘I no gat wan long olgeta i save pemaot laef blong wan brata, no i save givim wan ransom long God from hem. Olgeta samting we man i save givim, neva bambae i naf long samting ya.’ (Ol Sam 49:7, 8) Yumi rili nidim help, from we yumi no save pem praes blong ransom. Sipos God i no givhan long yumi, bambae yumi blong lus nomo.

Jehova i gat bigfala lav long yumi, taswe hem i glad blong pem “meresin” we yumi nidim, blong mekem se tru long Jisas, ‘olgeta man bambae oli laef bakegen.’ ?Olsem wanem ransom i mekem samting ya? “Blad blong Jisas Pikinini blong God, bambae i stap wasemaot olgeta sin blong yumi.” Yes, bilif we yumi gat long blad blong Jisas, i openem rod blong God i fogivim yumi mo yumi save kasem laef we i no save finis. (1 Jon 1:7; 5:13) ?Mo ransom i save mekem wanem long ol famle mo fren blong yumi we oli ded finis? “Wan man nomo i mekem se ded i kasem olgeta man. Long sem fasin, wan man nomo i mekem se olgeta dedman oli save laef bakegen.”—1 Korin 15:21, NW.a

I no gat wan narafala man we i save givim wan presen olsem sakrefaes blong Jisas, no we i givim wan presen olsem from we hem i lavem yumi tumas. I no gat wan man we i save mekem olsem Jehova, we i lego wan samting we i sas tumas long hem, blong givim long yumi. Mo i no gat wan presen we yumi nidim tumas olsem sakrefaes ya, we i mekem yumi fri long sin mo ded. Yes, i no gat wan presen we i spesel tumas olsem ransom.