Na Gbẹn Gie Ivbi E Hibru

9 Ile nẹdẹ ghaa mwẹ uhi ọghe ugamwẹ nọhuanrẹn na lele, kevbe ehe nọhuanrẹn na na ga vbe agbọn na. 2 Vbe a ghi bọ ibọkpọ, a keghi fian ughugha eva yọ. Erhan ọmukpa, eteburu kevbe ebrẹd na ya zọ ese gie Osanobua* kegha rre ughugha nokaro; a na gha tie ẹre Ehe Nọhuanrẹn. 3 Sokpan, ughugha nọ rre iyeke ekọtin nogieva vbe ibọkpọ nii, ẹre a ghaa tie ẹre Ehe Nọ Huan Sẹ. 4 Emwi nọ ghaa rre uwu ẹre kegha re emwi na ya giẹn eturari na ya igoru ru kevbe ẹkpẹti ile na ya igoru te ẹre egbe hia; emwi nọ ghaa rre uwu ẹkpẹti ile nii, kegha re akhe na ya igoru ru na viọ e mana yi, ọkpọ ọghe Erọn nọ gbe ukhu ladian, kevbe uhanhan okuta na gbẹnnẹ ẹmwẹ ile nii yi. 5 A keghi sa ama ọghe odibosa eva ne mose mose na tie ẹre kiẹrọb ye uhunmwu ẹkpẹti ile nii; iran keghi tan ifuẹn gue ugue ọghe ẹkpẹti nii, nọ re ugue ọghe adọlọ.* Sokpan, ẹ i re ẹghẹ na ẹre ima khian ya ta ẹmwẹ na, ta isi ẹre.

6 Vbe a ghi mwamwa emwi na hia nẹ vbenian, ẹghẹ hia ẹre avbe ohẹn ya gha la ughugha nokaro, ne iran ya gha winna iwinna nọhuanrẹn vba; 7 sokpan, ogie ohẹn ọkpa ẹre ọ la ughugha nogieva; uhukpa vbe ukpo ẹre ọ ya laọ. Ẹ i la evba vbe ẹ i re te ọ mu esagiẹn lele egbe; esagiẹn na ẹre ọ ya zọ ese ne egbe ẹre kevbe emwa hia ni ru orukhọ vbene iran ma na rẹn. 8 Odẹ vbenian ẹre orhiọn nọhuanrẹn ya rhie ẹre ma wẹẹ, a ma he gie odẹ na la la ehe nọhuanrẹn nii ma emwa, vbe ẹghẹ ne ibọkpọ nokaro nii na ye gha rrọọ. 9 Ibọkpọ na keghi re na ya gie ẹghẹ na ye na, kevbe wẹẹ, zẹvbe ne emwamwa na khare, a keghi ru izọhẹ kevbe izọese vbe evba. Sokpan, ena i sẹtin ya ekhọe ọmwa nọ rhie ugamwẹ nọhuanrẹn ne Osanobua khian enọ wa gba fo. 10 Emwi ne avbe izọhẹ kevbe izọese na dekaan ma gberra evbare, evba da, kevbe ilele ughughan na lele ọghe akpehuan.* Avbe uhi ni dekaan ikinnegbe ẹre ena hia khin, te a wa yi avbe uhi na, ne iran gha rre evba nẹ, ọ te sẹ ẹghẹ na khian ya dia emwi hia ye odẹ.

11 Vbọrhirhighayehẹ, vbe ẹghẹ ne Kristi ya rre zẹvbe ogie ohẹn ọghe emwi ni maan ni sunu nẹ, ọ na la uwu ibọkpọ nọ hin usi sẹ ibọkpọ nẹdẹ nii, kevbe ne emwi hia vbe gba na sẹ; ẹ i re obọ kẹkan ẹre a ya bọ ibọkpọ na, ẹ i vbe rre usun emwi ne Osanobua yi ye agbọn. 12 Vbe ọ la ehe nọhuanrẹn, ọ ma mu esagiẹn ọghe ẹwe kevbe ọghe ivbi ẹmila laọ, sokpan, esagiẹn ọghe egbe ẹre, ẹre ọ mu lele egbe nọ ya zọ ese ne ima uhukpa, ne ima mieke na miẹn imiẹnfan* ọghe etẹbitẹ; ẹ i khian ghi werriegbe zọ ese na. 13 Adeghẹ esagiẹn ọghe ẹwe kevbe ọghe ẹmila kevbe emuẹn ọghe ovbi ẹmila na giẹnrẹn, ne avbe ohẹn sanmwẹ yan emwa ne awua rre ọre egbe, sẹtin ya iran khian emwa ni huanrẹn, 14 inu ghi nọ ne esagiẹn ọghe Kristi, nọ ya egbe ẹre nẹi mwẹ orra zọ ese gie Osanobua lekpa orhiọn etẹbitẹ? Ẹ i re te ọ gha vbe kpe ekhọe ima huan hin avbe uyinmwẹ nẹi mwẹ esa rre, ne ima mieke na sẹtin gha rhie ugamwẹ nọhuanrẹn ne Osanobua nọ rrọọ ra?

15 Ọni ẹre ọ si ẹre na na miẹn wẹẹ, irẹn ọre ọmwa nọ rre uwu ẹkpo vbe ile ọghe ọgbọn, nọ mieke na ya uwu nọ wu dẹ iran werriegbe, ọ ghi fannọ iran hin obọ orukhọ ne iran ru rre, vbe ẹghẹ ne iran na gha rre ototọ ile nẹdẹ. Ẹghẹ nii, eyan ọghe afiangbe* ọghe etẹbitẹ ne Osanobua yan rẹn, ghi sẹ emwa na tiere obọ. 16 A gha ghi ta ile nẹ, uwu ọghe ọmwa nagbọn nọ rhie obọ ye ile nii keghi mwẹ esa, 17 rhunmwuda, uwu ẹre a ya mu olọ gbe ile, ugbẹnvbe a miẹn wẹẹ, ile nii i khian sẹtin gha mwẹ esa, vbene ọmwa nagbọn nọ rhie obọ yọ na ye rre agbọn. 18 Rhunmwuda ọni, esagiẹn ẹre a vbe ya mu olọ gbe ile nẹdẹ nii. 19 Vbe Mozis ghi ta ẹmwẹ Uhi hia ma Ivbi Izrẹl hia nẹ, ọ na ghi mu esagiẹn ọghe ivbi ẹmila kevbe ọghe ẹwe, kẹ kevbe amẹ, oru nọ baa, kevbe hisọp, ọ na sanmwẹ ọnrẹn ku ebe* ọghe ile nii kevbe emwa nii hia, 20 ọ na wẹẹ: “Ọna ọre esagiẹn ọghe ile ne Osanobua we ne uwa mu sẹ.” 21 Erriọ ẹre ọ vbe sanmwẹ esagiẹn nii yan ibọkpọ nii kevbe emwi hia na ghi loo nẹ vbe ugamwẹ nọhuanrẹn. 22 Vbene ẹmwata, zẹvbe ne Uhi khare, iyobe emwi hia ẹre a ya esagiẹn kpe huan; vbe ẹ i re te a vbe da esagiẹn kua, a i sẹtin ya orukhọ bọ emwa.

23 Nọnaghiyerriọ, te ọ khẹke na kpe avbe emwi ni re ama ọghe emwi ni rre ẹrinmwi huan vbe odẹ vbenian, sokpan, nọ ne emwi ni rre ẹrinmwi, ese nọ maan sẹ ẹre ọ khẹke na zọ yọ. 24 Rhunmwuda, e Kristi ma la ehe nọhuanrẹn na ya obọ ru, nọ re emwi nọ khọ ọghe ẹmwata nọ rrọọ, sokpan, ẹrinmwi ẹre irẹn wa gha rrie; ọni ẹre ọ si ẹre na na miẹn wẹẹ, vbene a wa guan na, irẹn wa rre ehe nọ na mudia ne ima nian vbe odaro Osanobua. 25 Ẹ i re te Kristi khian gha ya egbe ẹre zọ ese kugba ke ẹghẹ, vbene ogie ohẹn ya gha la ehe nọhuanrẹn vbe ukpukpo, nọ ya gha ya esagiẹn nẹi re ọghẹe zọ ese. 26 Akpawẹ erriọ nọ, ẹghẹ hia ẹre ọ gha te ya gha rri oya, ke na ya bu agbọn tu agbọn gha dee. Sokpan, irẹn keghi rhiegbe ẹre ladian uhukpa vbe ẹghẹ ufomwẹ agbọn, ọ na ya egbe ẹre zọ ese nọ ya kpe orukhọ kua, ẹ i khian ghi vbe dọlegbe ru ẹre. 27 Dọmwadẹ ọghẹe gha wu vbe ẹdẹ ọkpa; uhukpa ẹre ọmwa wu, iyeke ọni, a ghi bu ohiẹn ọnrẹn. 28 Erriọ vbe ye, uhukpa ẹre Kristi ya egbe ẹre zọ ese, nọ ya mu orukhọ ọghe emwa nibun gha rrie, ẹ i khian ghi werriegbe zọ ese na; ọ gha ghi werriegbe rre, ẹ i re iwinna orukhọ na rhie hin ẹre ọ khian ghi muẹn,* sokpan, te ọ khian rhiegbe ma emwa ni ya ekhọe hia rhie aro ye odẹ gha khẹ ọre, nọ do miẹn iran fan.