Emwa ọghe Osanobua keghi “so ihuan oghọghọ” rhunmwuda, iran ya ekhọe hia gbọyẹmwẹ ye emwi ne Osanobua ru ne iran. Ẹmwata ni rre uwu e Baibol kevbe avbe eyan ne Osanobua ru, kẹ kevbe emwi ne ima ya aro yi rhunmwuda izọese adẹwerriegbe ọghe Jesu keghi ya “orhiọn [ima] sotọ.” Ma ghaa guan vbekpa avbe emwi na, ẹko ghi gha sẹ ima ọyẹnmwẹ! (Psm 34:8; 133:​1-3) Emwi eva na wa mobọ rẹn eguọmwadia e Jehova yi vbe paradais ọghe orhiọn na, ọre ahoẹmwọmwa kevbe akugbe. Ahoẹmwọmwa kevbe akugbe na, ya ima rẹn vbene emwi khian gha ye hẹ vbe agbọn ọgbọn, rhunmwuda ẹghẹ nii, ẹre akugbe kevbe ahoẹmwọmwa ne eguọmwadia e Jehova mwẹ khian na wegbe sẹ. (Kọl 3:14) Ọmwa ghaa hoo ne irẹn gha mwẹ oghọghọ kevbe isọkẹn, ọ khẹke nọ gha die paradais ọghe orhiọn ne ima ye. Ọ gha khọnrẹn ne unu agbọn gha ta yo ta rre, iran i khian sẹtin mu ima eni rhia, rhunmwuda e Jehova miẹn ima yi, ma vbe gu etẹn ne ima gba ga rrọọ vbe ọfunmwegbe.​—Aiz 65:15. w24.04 21 ¶7-8

De vbene ima hia khian ya sẹtin ru iyobọ ne Ivbi Otu e Kristi ni re okhiọnkpa, ni gha hoo ne iran ru orọnmwẹ? Odẹ ọkpa ne ima khian ya ru ọna, ọre ne ima gha begbe vbe ẹmwẹ ne ima ta. (Ẹfis 4:29) Ma sẹtin nọ egbe ima wẹẹ: ‘I gha miẹn etẹn ni gha hoo ne iran ru orọnmwẹ, I ya iran gbogiẹ ra? I gha miẹn ọtẹn nokpia kevbe ọtẹn nokhuo ni re okhiọnkpa, vbe iran ghaa gu egbe guan, I roro ẹre vbe ekhọe mwẹ wẹẹ, te iran eva hoo ne iran suẹn gha si egbe obọ ra?’ (1 Tim 5:13) Deba ọni, ọ ma khẹke ne ima gha ru emwi nọ gha ya Ivbi Otu e Kristi ni re okhiọnkpa gha roro ẹre wẹẹ, ọ mwẹ emwi eso nọ wii iran, rhunmwuda we iran ma ru orọnmwẹ. Ne ima gha te ya gha ta egbe ẹmwẹ vberriọ, gi ima gualọ ẹkpotọ ne ima khian ya gha tian Ivbi Otu e Kristi ni re okhiọnkpa! Gia kha wẹẹ, ọ mwẹ ọtẹn nokpia ọkpa kevbe ọtẹn nokhuo ọkpa ne ima rẹnrẹn; ma na gha roro ẹre wẹẹ, ọ gha wa deyọ, deghẹ iran eva na rọnmwẹ egbe, vbọ khẹke ne ima ru? E Baibol wẹẹ, ne ima gha mu ọghe emwa ọvbehe roro. (Rom 15:2) Avbe okhiọnkpa nibun ma hoo ne emwa ọvbehe gha tama iran ọmwa ne iran gha sẹtin rhie, ra ne iran gha sẹtin rọnmwẹ, rhunmwuda ọni, ọ khẹke ne ima gha begbe. (2 Tẹs 3:11) Eso sẹtin gha hoo na gu iran gualọ ọmwa, sokpan ọ ma khẹke ne ima gha gualọ ọmwa ne iran, vbe ẹ i re te iran tama ima ne ima ru vberriọ.​—Itan 3:27. w24.05 24-25 ¶14-15

Vbe agbọn Esu ne ima sẹ fi, ọlọghọmwa sẹtin wa fi ẹdagbọn ima werriẹ vbe udemwurri. Vbe ima gha te khian ẹmwẹ agbọn ima hẹ akpawẹ ẹ i re Jehova! Adeghẹ ima na bẹghe vbene Jehova ya ru iyobọ ne ima hẹ, ọ ghi ya ima gha mwẹ ilẹkẹtin wẹẹ, “e Jehova rrọọ!” (Psm 18:46) E Devid ghi tae nẹ wẹẹ, “e Jehova rrọọ,” ọ na ghi tie Jehova “Okuta mwẹ.” Vbọzẹ nọ na ya e Jehova ya gie okuta nọ re emwi nẹi mwẹ arrọọ? E Baibol loo ẹmwẹ na ighẹ “okuta” ya gie Jehova, ne ima mieke na rẹn aro ọmwa ne Jehova gele khin. Ẹmwẹ na mobọ wa ladian vbe ako evbagbẹn nọhuanrẹn na na rho e Jehova zẹvbe Osa ne Oghodua. Ako nokaro na na gie Jehova zẹvbe “Okuta” ọre ebe Diuteronomi 32:4. Vbe Hanna na erhunmwu gie Jehova, ọ keghi kha wẹẹ, “A i miẹn okuta nọ yevbe Osanobua mwa.” (1 Sam 2:2) Habakọk keghi tie Jehova “Okuta mwẹ.” (Hab 1:12) Ọsian nọ gbẹn ebe Psalm 73 keghi kha wẹẹ, “Osanobua ọre okuta mwẹ.” (Psm 73:26) Uhiẹn, e Jehova vbe tie egbe ẹre okuta.​—Aiz 44:8. w24.06 26 ¶1, 3