Ru Iyobọ Ne Etẹn Ya Sẹtin Zin Egbe Ọlọghọmwa

 1. De vbene Jehova ya mobọ họn erhunmwu ọghe eguọmwadia ẹre hẹ?

U RẸNRẸN wẹẹ, e Jehova gha sẹtin loo ruẹ ya họn erhunmwu ọmwa ra? Ọ gha sẹtin loo ruẹ, ọ gha khọnrẹn wẹẹ ọdiọn, ọguọmwadia iwinna, arọndẹ ra ọtẹn nọ ya iyẹn wewe ẹre u khin. Ẹi vbe lele deghẹ igbama, enọwanrẹn, ọtẹn nokpia ra ọtẹn nokhuo ẹre u khin. Ọmwa nọ hoẹmwẹ e Jehova gha tu tie Jehova nọ ru iyobọ ne irẹn, e Jehova wa mobọ loo avbe ediọn kevbe etẹn ni ya ẹkoata gae, ya ru “iyobọ nọkhua” ne ọmwa nii. (Kọl 4:11) Te ugamwẹ ne ima rhie ne Jehova kevbe iyobọ ne ima ru ne etẹn ima, wa ya ima sọyẹnmwẹ. Ma gha sẹtin ru iyobọ ne iran, ne orhiọn iran mieke na sotọ vbe emianmwẹ ghaa vẹwae, vbe odekun ẹrhia gha sunu, ra vba ghaa zẹ iran kpokpo.

 2. Vbọzẹ nọ na lọghọ na sẹtin ru iyobọ ne emwa ọvbehe vbe emianmwẹ ghaa vẹwae khian?

² Ọ sẹtin gha lọghọ ne ima sẹtin ru iyobọ ne etẹn ima vbe emianmwẹ ghaa vẹwae. Vbe igiemwi ma sẹtin wa gha hoo ne ima ya tuẹ avbe ọse ima, sokpan ẹi gi ima ru rhunmwuda emianmwẹ nọ vẹwae. Ma sẹtin vbe gha hoo ne ima tie etẹn ne obọ ma sẹ ọre, ne iran do gu ima rri evbare vbe owa, sokpan ẹi vbe gi ima ru. Ma sẹtin gha hoo ne ima ru iyobọ ne emwa ọvbehe sokpan, ọna sẹtin gha lọghọ deghẹ ẹgbẹe ọghe ima rre uwu ibavbaro. Vbe uwu ena hia, te ima ye hoo ne ima ru iyobọ ne etẹn ima. Ọ wa ya ẹko rhiẹnrhiẹn e Jehova, vbe ima ghaa hia ne ima ru iyobọ ne etẹn ima vbene ẹtin ima sẹ. (Itan 3:27; 19:17) De iyobọ eso ne ima gha sẹtin ru ne iran?

 3. De emwi ne ima miẹn ruẹ vbe obọ ediọn ni rre iko ọghe Desi? (Jerimaia 23:4)

³ Emwi eso ne ediọn gha sẹtin ru. Adeghẹ ọdiọn ẹre u khin, hia ne u rẹn etẹn ni rre iko ruẹ. (Tie Jerimaia 23:4.) Ọtẹn Nokhuo Desi ne ima ka guan kaẹn vbe ako iruẹmwi nọ lae khare wẹẹ: “Ediọn ni rre ẹbu ọghe ima (field service group) wa deba mwẹ kevbe etẹn ọvbehe kporhu, iran vbe deba ima ru emwi ọvbehe.”b Ọna ẹre ọ zẹe ne iran na sẹtin ru iyobọ ne Desi vbe ẹghẹ ne COVID-19 ya gha vẹwae. E COVID-19 wa gbele emwa eso vbe ẹgbẹe ọre.

 4. Vbọzẹ ne ediọn na sẹtin ru iyobọ ne Desi, vbe ima miẹn ruẹ vbe ọna?

⁴ E Desi khare wẹẹ, “Rhunmwuda ne avbe ediọn na si mwẹ kẹ egbe, ọ na wa gha khuẹrhẹ mẹ ne I sẹtin tama iran vbene emwi ye mwẹ hẹ, I na vbe sẹtin gha fannọ otọ ẹko mwẹ ma iran.” Vbe ediọn a miẹn ruẹ vbe ọna? Vbene emwi nọ wegbe te sunu daa etẹn, uwa gha gbaroghe iran, uwa ghi vbe gha rhie igiọdu ne iran. Gu iran ru ọse. Adeghẹ emianmwẹ nọ vẹwae ma gu ruẹ sẹtin mu otuẹ gi iran, hia ne u gualọ odẹ ọvbehe ne u gha ya sẹtin nọ ẹmwẹ iran. E Desi khare wẹẹ, “Ugbẹnso vbe ẹdẹ ọkpa kẹkan, ediọn eso ghi tie mwẹ vbe efoni, eso ghi gie uhunmwu gu mwẹ. Avbe ako ọghe evbagbẹn nọhuanrẹn ne iran tie ma mwẹ, gele wa mu mwẹ ekhọe, agharhemiẹn wẹẹ avbe ako ne I ka rẹn nọ.”

 5. De vbene ediọn khian ya rẹn emwi ne etẹn gualọ, de odẹ eso ne iran gha ya sẹtin ru iyobọ ne iran?

⁵ Odẹ ọkpa ne u khian ya rẹn emwi ne etẹn gualọ, ọre deghẹ u na ya ẹwaẹn nọ iran ọta. (Itan 20:5) Iran mwẹ evbare ra, ukhunmwu, ra ọ mwẹ emwi ọvbehe ne iran gualọ ra? A gha rhie iran obọ sotọ vbe iwinna rhunmwuda emianmwẹ nọ vẹwae khian ra, ra iran i khian ghi miẹn igho ya ha osa owa? Iran gha hoo ne ima gu iran tama arriọba emwi eso ne iran gualọ ra? Etẹn ni rre uwu iko wa kpemehe emwi ne Desi gualọ. Rhunmwuda ne ediọn na rhie ẹre ma wẹẹ iran hoẹmwẹ ọnrẹn, kevbe ne iran na gha ya evbagbẹn nọhuanrẹn rhie igiọdu nẹẹn, ẹre ọ ru iyobọ ne Desi ya sẹtin la ọlọghọmwa nọ ghaa ye gberra. Ọ khare wẹẹ: “Ediọn keghi gu mwẹ na erhunmwu. Agharhemiẹn wẹẹ, I ma wa yerre emwi hia ne iran ta vbe iran na erhunmwu, sokpan I wa yerre vbene ọ ghaa ye mwẹ hẹ vbe iran na erhunmwu nii. Ọ na wa yevbe ne Jehova tama mwẹ wẹẹ, ‘I gu ruẹ rrọọ.’”​—Aiz 41:10, 13.

 6. De emwi ne etẹn ni rre uwu iko gha sẹtin ru ya ru iyobọ ne etẹn ọvbehe? (Ghee efoto nọ rre ipapa 23.)

⁶ Emwi ne etẹn ọvbehe gha sẹtin ru. Ma rẹnrẹn wẹẹ, avbe ediọn ẹre ọ khẹke nọ mu asanikaro vbọ gha de ọghe na gha gbaroghe etẹn. Sokpan e Jehova hoo ne ima hia gha rhie igiọdu kevbe iyobọ ne emwa ọvbehe. (Gal 6:10) Ọ gha khọnrẹn wẹẹ, emwi kherhe ma wa ru ne ima ya rhie igiọdu ne ọmwa ne egbe ma rran, ọ sẹtin ru iyobọ nẹẹn. Ọvbokhan sẹtin gbẹnnẹ emwi ye ekadi ra ọ ghi draw emwi nọ ya rhie igiọdu ne ọtẹn. Ọtẹn nọ ye re igbama, sẹtin ya gu ọtẹn nokhuo dẹ emwi vbe ẹki, ọ sẹtin vbe gha yo uhunmwu nẹẹn. Etẹn ọvbehe vbe uwu iko, sẹtin vbe le evbare ne ọtẹn ne egbe ma rran, iran ghi vbe muẹn gie ẹre? Ẹmwata nọ rrọọ ọre wẹẹ, emianmwẹ ghaa vẹwae, emwa hia vbe uwu iko ẹre ọ gualọ igiọdu. Ma sẹtin mudia vba gha zobọ nẹ vbe iko, ne ima mieke na tuẹ etẹn ima nikpia kevbe etẹn ima nikhuo, ọ gha khọnrẹn wẹẹ, Ọgua Arriọba ra videoconferencing ẹre ima ya do iko. Ediọn tobọ iran wa vbe gualọ igiọdu. Etẹn eso gbẹn elẹta gie ediọn nẹ ya kpọnmwẹ iran, rhunmwuda ẹi re iwinna ne kherhe ẹre avbe ediọn ru vbe ẹghẹ ne emianmwẹ ya vẹwae. Gele gele, te ọ wa khẹke ne ima ‘gha rhie ẹtin ye egbe iwu, ma ghi vbe gha ye egbe obọ’!​—1 Tẹs 5:11.

 7. De ọlọghọmwa eso ne odekun ẹrhia si?

⁷ Odekun ẹrhia sẹtin wa fi ẹdagbọn ọmwa werriẹ vbe udemwurri. Odekun ẹrhia gha sunu daa emwa, emwi ewe kevbe owa ọghe iran sẹtin wii iran, emwa iran ne iran hoẹmwẹ ọnrẹn sẹtin vbe wu. Emwi vbenian wa vbe sunu daa etẹn ima. Vbe ima khian ya sẹtin ru iyobọ ne iran hẹ?

 8. De emwi nọ khẹke ne ediọn kevbe uhunmwuta ẹgbẹe ru vbene odekun ẹrhia te sunu?

⁸ Emwi ne ediọn gha sẹtin ru. Ediọn, wa ru iyobọ ne etẹn ya mu egbe yotọ vbene odekun ẹrhia te sunu. Uwa hia na miẹn wẹẹ, etẹn hia ni rre uwu iko rẹn emwi nọ khẹke ne iran ru, ne iran ghẹ mieke na miẹn ikuanegbe kevbe vbene iran khian ya sẹtin tie ediọn hẹ vbe odekun ẹrhia gha sunu. E Margaret na guan kaẹn vbe ako iruẹmwi nọ lae, khare wẹẹ: “Ediọn keghi ya ọta guan vbe abọ ọghe evba gualọ vbe iko, iran na gi ima rẹn wẹẹ, erhẹn sẹtin ye mu vẹn vbe ẹdogbo ọghe ima. Iran na vbe tama ima wẹẹ, adeghẹ arriọba na wẹẹ ne ima kpa hin owa ima rre, ra ma na bẹghe ẹre wẹẹ, erhẹn mu vẹn vbe ẹdogbo ọghe ima, ọ khẹke ne ima kpa vbobọvbobọ.” Te ibude na wa rre ye ẹghẹ, rhunmwuda vbọ ghi rre uzọla isẹn vba, erhẹn na wa gele mu vẹn vbe ẹdogbo ọghe iran. Vbe iruẹmwi ẹgbẹe, dọmwadẹ uhunmwuta ẹgbẹe sẹtin ziro yan emwi ne ẹgbẹe ọghe iran gha ru, vbe odekun ẹrhia gha sunu. Deghẹ uwẹ vbe ivbuẹ na mu egbe yotọ, osi i khian si uwa gbe vbe odekun ẹrhia gha sunu.

 9. De emwi nọ khẹke ne ediọn ru vbene odekun ẹrhia te sunu, kevbe vbọ gha sunu nẹ?

⁹ Deghẹ ọtẹn nọ siẹnro ẹbu nọ koko yo ikporhu ẹre u khin, ọ ma khẹke ne u ka gi odekun ẹrhia sunu nẹ, u ke suẹn gha gualọ efon nọmba ọghe etẹn ra ehe ne iran dia. U ghi hia ne u gha mwẹ eke ne u gbẹnnẹ ehia yi, u ghi vbe gha ghee ẹre ke ẹghẹ ya fi ẹghẹ deghẹ eso rrọọ nọ fi werriẹ nẹ. Odekun ẹrhia gha ghi sunu, u ghi sẹtin tie etẹn ni rre ẹbu ruẹ, ne u mieke na rẹn iyobọ ne dọmwadẹ iran gualọ. U gha ghi rẹn emwi ne iran gualọ nẹ, u ghi tama ọtẹn nọ siẹnro ẹbu ediọn, ọtẹn na ẹre ọ khian ghi tama ọgbaroghe ọghe otako. Avbe etẹn na gha ku uhunmwu kugbe, iran ghi sẹtin ru iyobọ ne etẹn ni gualọ iyobọ. Vbe erhẹn nọ mu vẹn vbe ẹdogbo ọghe Margaret ghi dọyọ nẹ, ọgbaroghe ọghe otako ọghe iran ma vbiẹ vbe ọwara ughaẹdẹ 36, nọ ya gha ru iyobọ ne avbe ediọn, ne iran mieke na sẹtin ru iyobọ nọ khẹke ne etẹn 450 ni kpa hin owa ọghe iran rre. (2 Kọr 11:27) Rhunmwuda ọni, a keghi sẹtin gualọ owa ne etẹn hia ni ma gha mwẹ ehe ne iran khian dia.

10. Vbọzẹ nọ na ru ekpataki ne ediọn gha rhie igiọdu ne etẹn? (Jọn 21:15)

¹⁰ Ọ khẹke ne ediọn gha ya e Baibol rhie igiọdu ne etẹn, iran ghi vbe gha ru iyobọ nọ khẹke ne iran, ne orhiọn iran mieke na sotọ. (1 Pit 5:2) Odekun ẹrhia gha sunu, ọ khẹke ne iran hia na mien wẹẹ emwi rhọkpa ma sunu daa etẹn, iran ghi vbe hia na miẹn wẹẹ iran mwẹ evbare, ukpọn, kevbe ehe ne iran gha dia. Uhiẹn vbe uki eso gha gberra nẹ, te ọ ye khẹke ne ediọn gha rhie ẹre ma wẹẹ iran hoẹmwẹ etẹn na, iran ghi vbe gha ya e Baibol rhie igiọdu ne iran. (Tie Jọn 21:15.) Ọ mwẹ ọtẹn nokpia ọkpa na tie ẹre Harold, nọ re ọkpa vbe Agbaziro Ọghe Abotu. Ọtẹn na, ka rhie igiọdu ne etẹn ne odekun ẹrhia sunu daa nẹ, ọ khare wẹẹ, “Ọ wa rhie ẹghẹ orhiọn iran ke do sotọ. Emwi sẹtin suẹn gha zẹye kherhe kherhe, sokpan iran i ye mianmian ọmwa ne iran hoẹmwẹ ọnrẹn nọ wu, emwi ewe ne iran mwẹ nọ te yẹẹ iran, ra emwi nọ sunu nọ te miẹn iran uhunmwu. Avbe emwi na sẹtin ye gha ya iran khiẹ ke ẹghẹ ya fi ẹghẹ. Ọna ma rhie ma wẹẹ, iran i mwẹ amuẹtinyan, sokpan erriọ ye vbe emwi nọ wegbe gha sunu daa ọmwa.”

11. De iyobọ nọ khẹke ne ediọn gha ru ne avbe ẹgbẹe ne odekun ẹrhia sunu daa?

¹¹ Ediọn keghi lele ibude ne Baibol rhie ne ima, nọ khare wẹẹ, “gu enọ viẹ gha viẹ.” (Rom 12:15) Ọ khẹke ne ediọn gi etẹn ne odekun ẹrhia sunu daa rẹn wẹẹ, e Jehova kevbe etẹn ne iran gba ga wa ye hoẹmwẹ iran. Ọ khẹke ne ediọn vbe ru iyobọ ne avbe ẹgbẹe, ne iran mieke na gha ru emwi nọ gha ya iran sikẹ e Jehova sayọ, vbe na ghee erhunmwu na na, e Baibol na tie, iko na yo kevbe iwinna ikporhu iyẹn nọ maan. Ediọn gha vbe sẹtin rhie igiọdu ne evbibiẹ emọ, ne iran ru iyobọ ne ivbi iran ya rhie aro tua emwi ni ru ekpataki sẹ, ne odekun ẹrhia i khian sẹtin mu rhia. Evbibiẹ emọ, uwa gi ivbi uwa rẹn wẹẹ ọse iran ẹre Jehova khin, kevbe wẹẹ ẹi khian sẹ iran rae ẹdẹ. U ghi vbe gi iran rẹn wẹẹ ọkpa vbe ẹgbẹe ọghe Jehova ẹre iran khin kevbe wẹẹ, etẹn nikpia kevbe etẹn nikhuo mu egbe ne iran khian ya ru iyobọ ne iran vbe ẹghẹ ke ẹghẹ ne iran ya gualọ iyobọ.​—1 Pit 2:17.

12. De emwi ne etẹn gha sẹtin ru ne iran ya ru iyobọ ne etẹn ne odekun ẹrhia sunu daa? (Ghee efoto nọ rre ipapa 25.)

¹² Emwi ne etẹn ọvbehe gha sẹtin ru. Odekun ẹrhia gha sunu vbe eke nọ sikẹ ruẹ, nọ ediọn iyobọ ne u gha sẹtin ru. U sẹtin wẹẹ ne etẹn ni lẹẹ hin owa iran rre, ra etẹn ni do ru iyobọ ne etẹn ne odekun ẹrhia sunu daa, dia owa ruẹ ya. A sẹtin wẹẹ, ne u gha mu evbare kevbe emwi ọvbehe ne etẹn gualọ gi iran. Ọ gha khọnrẹn wẹẹ, eke nọ rree ẹre odekun ẹrhia na sunu, u gha ye sẹtin ru iyobọ. Odẹ vbo? U ghi gha mu ẹmwẹ iran ye erhunmwu. (2 Kọr 1:8-11) Odẹ ọvbehe ne u gha vbe ya ru iyobọ ye iwinna ne otu e Jehova ru ya gbaroghe etẹn ne odekun ẹrhia sunu daa, ọre vbe u ghaa ru iyobọ igho ye iwinna Arriọba nọ khian vbe uhunmwu otagbọn hia. (2 Kọr 8:2-5) Deghẹ u gha sẹtin mu okhian gha rrie eke ne odekun ẹrhia na sunu, u sẹtin nọ ediọn emwi ne u gha ru ne u ya ru iyobọ. Adeghẹ a na wẹẹ, ne u gha rrie evba ya ru iyobọ, a sẹtin vbe ma ruẹ emwi, vbe nọ dekaẹn iwinna ne u khian ya ru vba, ne u mieke na sẹtin ru iyobọ nọ khẹke.

13. De ọlọghọmwa eso ne etẹn ima werriẹ aro daa vbe otọ na na mu awua ye iwinna ima?

¹³ Ukpokpo wa ya agbọn lọghọ etẹn nibun vbe otọ na na mu awua ye iwinna ima. Avbe etẹn na wa vbe mwẹ ọlọghọmwa ughughan, iran i miẹn igho loo sẹ omwa, iran sẹtin gha khuọnmwi, emwa iran vbe uwu ẹgbẹe vbe wulo. Sokpan rhunmwuda na na mu awua ye iwinna ima, a sẹtin mien wẹẹ avbe ediọn i sẹtin mu otuẹ gie etẹn ya rhie igiọdu ne iran, a sẹtin vbe miẹn wẹẹ, iran i khian sẹtin zẹdẹ gu iran guan. Ọna ọre emwi nọ wa sunu daa Andrei ne ima guan kaẹn vbe ako iruẹmwi nọ lae. Ọ mwẹ ọtẹn nokhuo ọkpa vbe ẹbu ọghẹe (field service group) ne usẹ igho ghaa sẹ. Imọto ne ọtẹn nokhuo na ye keghi miẹn odekun. Avbe ọbo ebo na kha wẹẹ, a gha mwaan ẹre egbe vbe ehe ughughan kevbe wẹẹ, ẹi khian ghi sẹtin khian. Agharhemiẹn wẹẹ, a mu awua ye iwinna ima vbe ẹvbo nii kevbe wẹẹ emianmwẹ wa gha vẹwae, e Jehova bẹghe emwi hia nọ ghaa sunu, ọ na vbe loo ediọn ya ru iyobọ nọ khẹke ne ọtẹn na.

14. Ediọn gha mu ẹtin yan e Jehova, vbọ khian ya gha re igiemwi esi ne etẹn ọvbehe hẹ?

¹⁴ Emwi ne ediọn gha sẹtin ru. Andrei keghi na erhunmwu gie Jehova, ọ na vbe hia vbene ẹtin ẹnrẹn sẹ. Vbe Jehova a ghi ru? Ọ keghi ya etẹn ni gha sẹtin ru iyobọ, gbaroghe ọtẹn nokhuo na. Ẹghẹ ke ẹghẹ nọ ya rrie owa isinmwiegbe, etẹn eso ghi muẹn gha khian. Eso na vbe ru iyobọ igho nẹẹn. E Jehova ẹre ọ loo avbe etẹn na ya ru iyobọ nọ khẹke ne ọtẹn na, e Jehova na vbe fiangbe ẹrhiọn ne etẹn na loo ro. (Hib 13:16) Ediọn, adeghẹ a na mu awua ye iwinna ima vbe ẹvbo ne uwa ye, uwa tama etẹn ọvbehe ne iran ru iyobọ ne uwa. (Jer 36:5, 6) Sokpan nọ ghi wa ru ekpataki sẹ ọre na mu ẹtin yan e Jehova. Ọ gha sẹtin loo ruẹ ya ru iyobọ nọ khẹke ne etẹn.

15. Vbọ khian ya ima vbe etẹn gha mwẹ akugbe, ọ gha khọnrẹn wẹẹ, a zẹ ima kpokpo?

¹⁵ Emwi ne etẹn ọvbehe gha sẹtin ru. A gha mu awua ye iwinna ima, a ghi wẹẹ ne etẹn ni ma bun gbe gha si egbe koko vbe ehe ughughan. Rhunmwuda ọni, te ọ wa ru ekpataki ne ima hia gha rrọọ vbe ọfunmwegbe. Esu ẹre ọ khẹke ne ima gu khọn, ẹi re etẹn ima. Gha rhie aro gberra abakuru ọghe etẹn, uwa vbe ọtẹn ghaa mwẹ egbe ẹzọ, hia ne u ru adọlọ vbobọvbobọ. (Itan 19:11; Ẹfis 4:26) Ghẹ gha khẹ ne ọtẹn ka do tama ruẹ nẹ wẹẹ, irẹn gualọ iyobọ u ke ru ẹre nẹẹn. (Taitọs 3:14) Iyobọ na ru ne ọtẹn nokhuo nii keghi ya etẹn nikẹre ne iran koko yo ikporhu (field service group) sikẹ egbe sayọ. Iran na do yevbe ẹgbẹe ọkpa.​—Psm 133:1.

16. Zẹvbe nọ rre ebe Kọlose 4:3, 18, de odẹ eso ne ima gha ya sẹtin ru iyobọ ne etẹn ima na zẹ kpokpo?

¹⁶ Etẹn arriaisẹn nibun ẹre ọ wa ye ga e Jehova, agharhemiẹn wẹẹ avbe arriọba mu awua ye iwinna ima vbe ẹvbo iran. A mu eso ye eghan rhunmwuda ne iran na re Osẹe Jehova. Ọ khẹke ne ima gha mu ẹmwẹ iran kevbe ẹgbẹe ọghe iran ye erhunmwu. Ọ vbe khẹke ne ima gha na erhunmwu ne avbe etẹn ni mu arrọọ ọghe iran ye ikpadede, ne iran mieke na sẹtin ru iyobọ ne iran. Avbe etẹn na keghi rhie igiọdu ne etẹn na mu ye eghan, ne iran mu ẹtin yan e Jehova, iran kpemehe emwi ne iran gualọ, iran vbe sinmwi oseghe ne iran vbe ekọtu.c (Tie Kọlose 4:3, 18.) Ghẹ mianmian wẹẹ erhunmwu ne u na, wa mwẹ iyobọ nọkhua nọ ye!​—2 Tẹs 3:1, 2; 1 Tim 2:1, 2.

17. Vbua khian ya mu egbe yotọ khẹ ukpokpo hẹ?

¹⁷ Uwẹ vbe ẹgbẹe ruẹ gha sẹtin hia ne uwa mu egbe yotọ khẹ ukpokpo. (Iwinna 14:22) Sokpan ghẹ gha muẹn roro emwi dan nọ gha sẹtin sunu daa ruẹ vba ghaa zẹ ruẹ kpokpo. Nọghayayerriọ, gha ru emwi nọ gha ya ruẹ sikẹ e Jehova sayọ, u vbe ru iyobọ ne ivbuẹ ya ru vberriọ. Deghẹ osi na gha si ruẹ ugbẹnso, fannọ otọ ẹko ruẹ ma Osanobua. (Psm 62:7, 8) Uwẹ vbe ẹgbẹe ruẹ ghi gba ziro yan emwi eso nọ gha ya uwa mu ẹtin yan e Jehova.d Zẹvbe ne ima ka tae sin, u gha mu egbe yotọ khẹ odekun ẹrhia, ọ gha ru iyobọ ne ivbuẹ, erriọ khian vbe ru iyobọ ne iran vbe u gha mu egbe yotọ khẹ ukpokpo. Ọ gha ya iran gha mwẹ udinmwẹ, orhiọn iran ghi vbe sotọ rhunmwuda u ma iran re nẹ wẹẹ, ọ khẹke ne iran mu ẹtin yan e Jehova.

18. De afiangbe ne ima khian miẹn vbe odaro?

¹⁸ Ọfunmwegbe Osanobua wa mu ima orhiọn sotọ. (Fil 4:6, 7) Ọfunmwegbe na ẹre Jehova ya mu ima orhiọn sotọ vbe emianmwẹ ghaa vẹwae, vbe odekun ẹrhia gha sunu kevbe vba ghaa zẹ ima kpokpo. Ọ vbe loo avbe ediọn ya rhie igiọdu ne ima. Ọ vbe kie ẹkpotọ ne ima hia ya gha ru iyobọ ne egbe. Ọfunmwegbe ne ima mwẹ nian gha ru iyobọ ne ima ya werriẹ aro daa ọlọghọmwa ni sẹ ne ima werriẹ aro daa nian, uhiẹn ya sẹ egbe “orueghe nọkhua.” (Mat 24:21) Ọ gha sẹ ẹghẹ nii, ọ ma khẹke ne ima gha fian afianma, ma ghi vbe ru iyobọ ne etẹn ima ne orhiọn iran vbe sotọ. Orueghe nọkhua gha ghi fo nẹ, ma i khian ghi miẹn ọlọghọmwa rhọkpa nọ khian ya ima gha si osi. Ẹghẹ nii, orhiọn ima ghi gele do sotọ vbe etẹbitẹ, zẹvbe ne Jehova mwamwaẹn ke otọ gha dee.​—Aiz 26:3, 4.