Ketangkasen

19 Kenca si e, kubegi sora si megang tempa-tempa sora mahluk si enterem arah surga nari. Nina, “Pujilah Jahwe!*+ Dibatata kap keselamaten, kemulian, ras gegeh, 2 perban penghakimenNa benar ras adil.+ Enggo ihukumNa pelacur si mbelin e. Pelacur e kap si ncedai doni alu perbahanen seksna si salah,* enggo balasNa kematen budak-budakNa si ibunuh pelacur e.”+ 3 Nina sora e pedua kaliken, “Pujilah Jahwe!*+ Asap api si nutung pelacur e terus nangkih seh rasa lalap.”+

4 Pertua-pertua si 24 e+ ras empat mahluk si nggeluh+ sujud nembah Dibata si kundul i tahta, nina, “Amin! Pujilah Jahwe!”*+

5 Terbegi ka sada sora arah tahta e nari, nina, “Pujilah Dibatata, o kena kerina budak-budak+ si mbiar man baNa, kalak si biasa-biasa saja, bage pe kalak si penting.”+

6 Janah, kubegi bagi sora si enterem, bagi sora air terjun si galang, janah bagi sora lenggur si megang. Nina sora-sora e, “Pujilah Jahwe,*+ sebap Dibatata Jahwe,* Si Madakuasa,+ enggo mulai merentah jadi raja!+ 7 Ersuraklah, ermeriah ukurlah, janah simuliakenlah Ia, perban enggo seh waktuna perjabun Anak Biri-Biri, janah pengantenna si diberu enggo dung ersikap. 8 Enggo ibereken man penganten si diberu e baju linen si halus, ersinar, ras bersih gelah pakena. Linen si halus e ngertiken perbahanen si benar si lakoken kalak si badia.”+

9 Nina malekat e man bangku, “Tulisken: Ermeriah ukurlah kalak si iundang ku acara man-man berngi bas kerja perjabun Anak Biri-Biri e.”+ Nina ka, “Kata-kata enda tuhu-tuhu arah Dibata nari.” 10 Sujud aku nembah man bana i lebe-lebe nahena. Tapi nina, “Ula! Ula bage!+ Sembahlah Dibata!+ Aku pe budak bagi kam, ras bagi turang seninandu si erdahin guna mereken kesaksin kerna Jesus.+ Sebap tujun nubuat-nubuat eme ersaksi kerna Jesus.”+

11 Jenari kuidah langit terbuka. Nenlah! Lit sada kuda mbentar.+ Si nangkih kuda e igelari Setia+ ras Benar.+ Ia ngakimi janah erperang guna keadilen.+ 12 Matana bagi gara api,+ bas takalna melala mahkota. Bas ia lit tertulis sada gelar, ise pe la metehsa selain ia. 13 Pakena baju si arah darat si lit noda* dareh, ia igelari Kata+ Dibata. 14 Pasuken tentera i surga pe ngikutken ia alu nangkih kuda mbentar. Pake kalak e kain linen si halus, mbentar, ras bersih. 15 Arah babahna, ndarat pedang si gedang, si ntelap,+ si pakena guna engkernepken bangsa-bangsa. Permakanina kalak e alu tongkat besi.+ Perjakina ka ingan meras anggur si ngertiken rawa si mbelin Dibata Si Madakuasa.+ 16 Bas bajuna si arah darat, bas bagin pahana lit tertulis sada gelar: Raja kerina raja ras Tuan kerina tuan.+

17 Jenari kuidah ka sada malekat tedis i lebe-lebe matawari. Alu sora megang dilona kerina perik si kabang i langit, nina, “Mari, pulunglah ku jenda ku acara man-man berngi si mbelin si iban Dibata.+ 18 Alu bage banci pan kena daging raja-raja, daging komandan-komandan tentera, daging kalak si megegeh,+ daging kuda-kuda ras kalak si nangkihisa,+ bage pe daging kerina kalak, eme daging kalak si bebas ntah pe budak, kalak si biasa-biasa saja ntah pe kalak si penting.”

19 Kenca si e, kuidah pulung binatang buas ras raja-raja i doni bage pe pasukenna. Pulung kalak e guna erperang ngelawan si nangkih kuda e ras pasukenna.+ 20 Itangkap binatang buas e radu ras nabi-nabi palsu+ si erban mukjizat-mukjizat i lebe-lebe binatang e. Itipu nabi-nabi e kalak si ngaloken tanda binatang buas e+ bage pe si nembah patungna.+ Jenari kalak e ibenterken nggeluh-nggeluh ku danau api si gurlah si lit belerangna.+ 21 Si debanna ibunuh alu pedang si gedang si ndarat arah babah si nangkih kuda e,+ kerina perik mangani daging kalak e seh asa besur.+