Heber

12 Perban enterem kel ras kita saksi si bagi embun i sekelilingta, marilah siambekken kerina baban ras dosa si nukah niding kita,+ tutuslah ateta kiam bas perlumban si itetapken man banta,+ 2 sitataplah Kalak si Ipilih guna mere kegeluhen ras Kalak si Erban Sempurna kinitekenta, eme Jesus.+ Perban keriahen ukur si itama i lebe-lebena, ngasup ia nggengken suina i tiang siksan,* la ia mela, gundari kundul ia i sebelah kanan tahta Dibata.+ 3 Sabar* ia ngadapi kalak erdosa+ si ngelawan ia alu ranan si ngerugiken kalak e. Ukurilah alu mbages kerna ia gelah ula latih ukur kena janah la kena putus asa.+

4 Bas erjuang ngelawan dosa e, lenga pernah kena erjuang seh asa ngamburken dareh. 5 Tuhu-tuhu enggo lupaken kena nasehat Dibata man kena selaku anak-anakNa, eme, “O NakKu, ula sepeleken persinget* Jahwe,* ntah pe ula putus asa sanga persingetiNa, 6 sebap persingeti Jahwe* kerina kalak si keleng ateNa, janah cambukNa* tiap kalak si alokenNa jadi anak.”+

7 Arus kena sabar* sebap e bagin arah persinget* Dibata guna kena. Ban Dibata kena bagi anakNa.+ Anak si apai kin si la persingeti bapakna?+ 8 Tapi adi kerina kena la ngaloken persinget e, berarti kena anak haram, labo anakNa. 9 Selain si e, bapakta si bas doni pe rusur persingetina kita, janah sihamati ia. Emaka la kin arus lebih patuh kita man Bapak si enggo milih kita alu kesah si badia gelah kita tetap nggeluh?+ 10 Ntisik ngenca kita persingeti bapakta si bas doni, persingetina kita menurut kai si akapna benar. Tapi persingeti Dibata kita guna kepentingenta gelah banci kita badia bagi Ia.+ 11 Memang sanga ipersingeti, labo lit persinget si erban meriah ukur, tapi erban ceda ate. Tapi kenca si e, kalak si ngaloken persinget dungna ngelakoken kai si benar janah datna upah, eme kedamen.

12 Emaka pegegehilah tan kena si lemah, bage pe tiwen kena si la ergegeh.+ 13 Alu nahe kena, tetaplah kena erdalan bas dalan si pinter+ gelah bagin si lemah* la reh kelekna* tapi malem dungna. 14 Usahakenlah erdame ras kerina kalak+ janah usahakenlah gelah badia.+ Ise pe si la badia labo banci ngidah Tuan.* 15 Hati-hatilah gelah ula lit sada pe gagal bas ngaloken kiniulin Dibata si luar biasa, alu bage la turah urat si lit racunna jenari erban masalah janah erban enterem kalak jadi najis.+ 16 Hati-hatilah gelah ula lit i tengah-tengah kena kalak si ngelakoken perbahanen seks si salah* ntah pe si la ngergai kai si badia bagi Esau si nukarken hakna selaku anak sintua perban sada mangkok pangan.+ 17 Teh kena maka bas pudi wari sanga warisina tena pasu-pasu, itulak ia. Amin pe cubakenna mindo man bapakna janahna tangis gelah bapakna berubah pikiren,+ tapi sia-sia kerina.

18 Labo kena reh ku gunung si banci idadap+ ras si gurlah alu api,+ gunung e ikelilingi alu embun si gelap si seh kel gelapna janah i je lit angin badai,+ 19 sora trompet si megang,+ bage pe sora kalak si sangana ngerana,+ janah sanga begi bangsa e sora e, minter pindona gelah ngadi sora e ngerana man kalak e.+ 20 Lanai kalak e ngasup megi perentah, “Binatang buas pe adi dadapna gunung e, arus ibenteri alu batu seh asa mate.”+ 21 Kai si teridah i je erban kebiaren, seh maka Musa pe ngataken, “Nggirgir kel aku perban biarna.”+ 22 Tapi dahi kena Gunung Sion+ bage pe kota Dibata si nggeluh, eme Jerusalem si lit i surga.+ I je melala kel* malekat 23 si pulung,+ lit ka perpulungen anak sintua si gelarna enggo itulis i surga, lit ka si benar si nggeluh sesuai ras kesah si badia+ si enggo iban jadi sempurna,+ lit ka Dibata si jadi Hakim man kerinana,+ 24 lit ka Jesus si jadi perantara+ bas perjanjin si mbaru,+ bage pe dareh si ipercikken si ulin asangken dareh Abil.+

25 Begiken kenalah sora si ngerana e. Sebap adi kalak si la megiken persinget Dibata si ipeseh i doni saja pe la selamat, apai ka kita adi la sibegiken sora si ngerana arah surga nari!+ 26 Sanga si e, mugur-ugur doni perban soraNa,+ tapi gundari enggo erjanji Ia, “Sekali nari Kuugur doni, labo saja doni, tapi langit pe.”+ 27 Kata “sekali nari” ncidahken maka kernepken Dibata kai si mugur-ugur si labo Ia erbanca, emaka si la mugur-ugur e tetap nge lit. 28 Perban sialoken Kerajan si la banci mugur-ugur, teruslah sialoken kiniulin Dibata si luar biasa si nampati kita mereken pelayanen si badia man baNa alu mbiar ras mehamat sesuai ras cara si erban Ia senang. 29 Dibatata bagi api si engkernepken.+