Markus

8 Sanga si e, lit ka enterem jelma si pulung, janah la lit pangan kalak e. Emaka dilo Jesus murid-muridna, nina, 2 “Mekuah ateku jelma si enterem e,+ enggo telu wari kalak e ras aku janah kai pe la lit si man panganenna.+ 3 Adi kusuruh kalak e mulih sanga melihe denga, pingsan kari kalak e bas perdalanen. Lit arah kalak e si rehna arah ingan si ndauh nari.” 4 Tapi ngaloi murid-muridna e, “Bas ingan si melungen enda, ja nari banci sidat roti gelah besur kalak e?” 5 Nungkun Jesus, “Piga roti si lit bas kena?” Nina kalak e, “Pitu.”+ 6 Emaka suruh Jesus jelma si enterem e kundul bas taneh. Kenca si e, buatna pitu roti e, katakenna bujur man Dibata, cepik-cepikkenna roti e, kenca si e berekenna man murid-muridna guna ibagiken, jenari bagiken kalak e man jelma si enterem.+ 7 Lit ka piga-piga ikan si kitik bas kalak e. Kenca ertoto, suruhna ka murid-murid mbagikenca. 8 Emaka man kalak e ngasa besur, janah pepulungna sisana dem pitu keranjang si galang buena.+ 9 Sanga si e, lit kira-kira 4.000 dilaki i je. Dung e suruh Jesus kalak e mulih.

10 Kenca si e, mis nangkihi Jesus perahu radu ras murid-muridna janah lawes kalak e ku daerah Dalmanuta.+ 11 I je reh kalak Parisi, mulai kalak e sijawapen ras Jesus. Pindo kalak e tanda surga nari arah ia guna nguji ia.+ 12 Emaka sedih kel ia janah nina, “Engkai maka kalak bas jaman enda mindo tanda?+ Situhuna kukataken, la lit tanda kai pe si ibereken pagi man kalak enda.”+ 13 Emaka tadingkenna kalak e, nangkih ka ia ku perahu janah nyebrang ku pantai si deban.

14 Tapi, lupa kalak e maba roti, kai pe la lit bas kalak e i perahu, sada roti ngenca.+ 15 Persingeti Jesus kalak e alu tegas, “Teruslah buka mata kena. Hati-hatilah man ragi kalak Parisi ras ragi Herodes.”+ 16 Sijawapen murid-murid e perban la lit roti kalak e. 17 Ngidah si e, nina Jesus, “Engkai maka sijawapen kena kerna la lit roti? Lenga kin teh kena ras angka kena? Lenga kin jelas bas pusuh kena? 18 ‘Lit mata kena tapi la erpengidah, lit cuping kena tapi la erpemegi.’ La kin inget kena, 19 sanga kucepik-cepikken lima roti+ man 5.000 dilaki, piga keranjang sisana si pepulung kena?” Ngaloi kalak e, “Sepulu dua.”+ 20 “Sanga kucepik-cepikken pitu roti man 4.000 dilaki, piga keranjang si galang sisana si pepulung kena?” Ngaloi kalak e, “Pitu.”+ 21 Emaka nina Jesus, “Lenga ka kin angka kena?”

22 Seh kalak e i Betsaida. I je taruhken kalak man bana sekalak dilaki si pentang, janah mindo kel kalak e gelah pepalem Jesus ia.+ 23 Emaka jemakna tan dilaki si pentang e janah babana ku darat kuta. Kenca cidurina matana,+ tamaken Jesus tanna ku dilaki e janah nina, “Kai si idahndu?” 24 Inen dilaki e ku lebe janah nina, “Kuidah jelma, tapi bagi batang kayu si erdalan-dalan.” 25 Tama Jesus mulihi tanna ku mata dilaki e, jenari jelas me pengidahna. Pengenenna enggo malem, janah banci idahna kerina alu jelas. 26 Emaka suruh Jesus ia mulih, nina, “Ula nai kam masuk ku kuta e.”

27 Jenari lawes Jesus ras murid-muridna ku kuta-kuta i Kesarea Pilipi. Bas perdalanen sungkunna murid-muridna, “Nina kalak, ise aku?”+ 28 Ngaloi kalak e, “Johanes Peridiken,+ nina si deban Elia,+ lit ka si ngataken salah sada nabi.” 29 Nungkun ka ia man kalak e, “Adi menurut kena, ise aku?” Nina Petrus, “Kam kap Kristus.”+ 30 Emaka larang Jesus kalak e alu tegas gelah ula ceritakenna man ise pe kerna ia.+ 31 Selain si e, mulai ajarkenna man kalak e maka Anak manusia arus ngadapi melala kiniseran janah itulak peminpin-peminpin ras imam-imam kepala bage pe ahli Undang-Undang Musa jenari ibunuh,+ janah keke kenca telu wari.+ 32 Alu terus terang kataken Jesus kerna si e. Tapi tarik Petrus ia ku samping janah persingetina ia.+ 33 Pudiken Jesus ia, inenna murid-muridna jenari persingetina Petrus, nina, “Laweslah ku pudiku, Setan! Perban kai si ukurindu labo perukuren Dibata tapi perukuren manusia.”+

34 Kenca si e, lebuhna jelma si enterem e ras murid-muridna janah nina, “Ise si atena ngikutken aku, lanai banci nggeluh man dirina sendiri, arus angkatna tiang siksanna* janah terus ikutkenna aku.+ 35 Sebap ise pe si atena nelamatken kesahna,* kebenen kesahna nge pagi, tapi ise pe si kebenen kesahna* perban aku ras perban berita si meriah, selamat nge pagi.+ 36 Situhuna, kai kin gunana adi sekalak jelma ndatken kerina si lit bas doni enda tapi kebenen kesahna?*+ 37 Situhuna, kai kin si banci bereken sekalak jelma ganti kesahna?*+ 38 Kalak bas jaman enda la setia* ras erdosa, ise pe arah kalak e si mela perban aku ras kata-kataku, Anak manusia pe mela pagi+ nandangi ia sanga reh Anak manusia e bas kemulian Bapakna ras malekat-malekat si badia.”+