Kejadin

45 Megi si e, lanai terkuasai Jusup perasanna, emaka suruhna kerina pelayanna+ ndarat. Sanga kataken Jusup ise ia situhuna, ia ras senina-seninana+ ngenca si lit i je.

2 Kenca si e tangis Jusup janah megang kel sorana. Sorana tangis e ibegi kalak Mesir bage pe kalak si lit i rumah raja Mesir. 3 Dungna nina Jusup man senina-seninana, “Aku enda Jusup. Nggeluh denga nge bapak?” Lanai teh senina-seninana e ngataken kai pe perban senggetna kalak e. 4 Emaka nina Jusup man senina-seninana, “Mari, terdeheren kena ku jenda.” Emaka deheri kalak e ia.

Dung e nina, “Aku Jusup, senina kena, si enggo dayaken kena ku Mesir.+ 5 Tapi ula kena mbiar ras ula kena situduh-tuduhen perban enggo dayaken kena aku ku jenda. Dibata nge si erban aku leben seh ku jenda asangken kena guna nelamatken kesah kena.+ 6 Enda tahun si peduaken kelihen terjadi i negri enda,+ janah lit denga lima tahun nari. Sanga si e pagi la lit kalak si mbajak ntah pe si rani. 7 E me sebapna iban Dibata aku leben ku jenda guna nelamatken kena alu cara si luar biasa, gelah tetap kena nggeluh+ janah keturunen kena banci tetap lit i doni.* 8 Emaka, Dibata si benar nge si erbanca aku ku jenda, labo kena. Gelah banci banNa aku jadi kepala penasehat raja ras penguasa i rumah raja bage pe i belang-belang negri Mesir.+

9 “Emaka mislah kena mulih, bagendalah ning kena man bapak, ‘Enggo pilih Dibata anakndu Jusup jadi penguasa i belang-belang Mesir.+ Mislah kam reh ku jenda.+ 10 Tadinglah kam i taneh Gosen, gelah ndeher kam ras aku radu ras anak-anakndu, kempu-kempundu, asuh-asuhenndu, bage pe kerina si lit bas kam. 11 Kubereken pagi pangan man bandu bage pe man keluargandu, gelah kerina si lit bas kam la keri janah la kena kelihen,+ sebap lit lima tahun nari dekahna kelihen e.’ 12 Kena bage pe adekku Benyamin enggo ngidah maka aku nge si ngerana e.+ 13 Emaka ceritaken kenalah man bapak kerna kehamaten si mbelin si kudat bas Mesir ras kerina si enggo idah kena. Mislah baba kena bapak ku jenda.”

14 Kenca si e dakep Jusup adekna Benyamin janah tangis ia. Benyamin pe tangis janahna ndakep Jusup.+ 15 Dung e ema Jusup kerina seninana janah tangis kalak e kerina, kenca si e ercakap-cakap kalak e.

16 Berita kerna kerehen senina-senina Jusup seh ku rumah raja. Meriah ukur raja ras pelayan-pelayanna megi si e. 17 Emaka nina raja man Jusup, “Kataken man senina-seninandu gelah penangkihna barang-barang ku keledena* jenari suruh ku negri Kanaan. 18 Legi bapak kena ras keluarga kena, baba ku jenda. Kubereken pagi barang-barang si mejile si lit i Mesir, banci pan kena* hasil si mejilena* arah negri enda.+ 19 Suruh ka gelah baba kalak e+ gereta-gereta+ arah Mesir guna maba anak-anakna, diberu-diberuna, bage pe bapak kena ku jenda.+ 20 La padah ukuri kerna erta-erta kena,+ sebap kerina si mehulina si lit i Mesir jang kena kap.”

21 Bage me si lakoken anak-anak Israel. Bereken Jusup gereta-gereta bagi si perentahken raja. Selain si e, bereken Jusup ka persedian pangan man kalak e guna bas perdalanen. 22 Bereken Jusup tersada baju si mbaru man abang-abangna, tapi man Benyamin berekenna 300 logam pirak ras lima baju+ si mbaru. 23 Kirimken Jusup ka man bapakna sepuluh kelede guna maba barang-barang si mejile arah Mesir ras sepuluh kelede beruna si maba gandum ras roti bage pe pangan-pangan si debanna si perluken bapakna pagi bas perdalanen. 24 Peberkat Jusup senina-seninana. Muat lawes kalak e, nina Jusup, “Ula kena rubat bas dalan.”+

25 Lawes kalak e arah Mesir nari. Kenca si e seh kalak e i negri Kanaan jenari jumpa ras bapakna Jakup. 26 Dung e, ceritaken kalak e man bapakna, nina, “Nggeluh denga Jusup Pak, ia si erkuasa i belang-belang negri Mesir.”+ Tapi la diate bapakna perban la ia tek megi kai si kataken kalak e.+ 27 Sanga ceritaken kalak e man bapakna kerina si kataken Jusup man kalak e, janah sanga idahna gereta-gereta si kirim Jusup guna ngelegi ia, semangat ka Jakup mulihi. 28 Emaka nina Israel, “Gundari enggo tek aku! Anakku Jusup nggeluh denga! Arus aku lawes ku jah, kuidah ateku ia ope aku mate!”+