Labo ate Jahwe asal tek saja kita man turang seninata. Ate Jahwe, tek kita man kalak e perban enggo buktikenna ia terteki. Perlu waktu ras usaha gelah banci tek man sekalak jelma. Uga carana gelah banci kam tek man turang seninandu? Perlu tuhu-tuhu tandaindu kalak e. Ngeranalah kam ras kalak e bas perpulungen. Aturken waktundu erberita ras kalak e. Sabarlah kam man kalak e, bereken kesempaten man kalak e guna mbuktiken maka ia banci terteki. Tangtangna banci saja la banci mis turikenndu kerna perasanndu man kalak si mbaru denga tandaindu. Tapi kenca kena reh deherna, reh nukahna kapndu nuriken perasanndu. (Luk. 16:10) Tapi, uga adi lit turang senina si erban kam kecewa? Ula mis lanai atendu erteman ras ia. Selain si e, ula pediat perbahanen sekalak turang senina erban lanai kam tek man turang senina si deban. w22.09 4 par. 7-8

Sekalak pertua si gelarna Miko pernah iakapna la mehuli perbahanen piga-piga turang senina si lit tanggung jawapna. Tapi, tetap ia tenang janah usahakenna ngendaliken perasanna. Rusur ia ertoto, pindona kesah si badia ras gegeh guna tetap megenggeng. Idaramina ka informasi bas publikasi si banci nampati ia. Kai pelajarenna? Adi akapndu la mehuli perbahanen turang senina man bandu, tetaplah kam tenang ras kendalikenlah perasanndu. Banci saja labo tehndu engkai maka pengerana ntah pe perbahanen kalak si deban la mehuli. Emaka ertotolah kam man Jahwe. Pindolah penampatNa gelah banci angkaindu perukuren kalak si deban. Ula min akapndu sengaja kalak si deban ngelakoken si la mehuli man bandu janah ampunilah ia. (Kua. 19:11) Ingetlah, iteh Jahwe situasindu, janah iberekenNa kam gegeh gelah banci tetap megenggeng.—Peng. 5:8. w22.11 21 par. 5

Ertemanlah ras kalak si engkelengi Jahwe. Teman si ipilihndu mbelin kel pengaruhna man kemajunndu secara rohani. (Kua. 13:20) Bagenda nina Julien si gundari ngelayani jadi pertua, “Sanga aku nguda denga, kompak aku ras teman-temanku erberita. Semangat kel kalak e janah sampatina aku nggejapken maka meriah kel erberita. . . . Kuteh ka maka sedekah enda la melala temanku si mehuli perban ras temanku si sebaya ngenca aku erteman.” Uga adi bas runggun, lit kalak si mereken pengaruh si la mehuli man bandu? Iteh Paulus maka bas runggun Kristen abad pertama, lit kalak si perukuren ras perbahanenna la bagi kalak Kristen. Emaka, persingetina Timotius gelah ula erteman ras kalak e. (2 Tim. 2:​20-22) Hubungenta ras Jahwe seh kel ergana. Enggo mbelin kel usahata gelah banci rembak ras Jahwe. Emaka, ula sipediat ise pe ncedai hubungenta ras Jahwe. w22.08 5-6 par. 13-15