Maak

6 Den Jeezas lef fahn deh ahn gaahn bak hoam, an ih disaipl dehn gaahn wid ahn tu. 2 Den ih gaan da di sinagag pahn di Sabat an ih staat teech di peepl, bot moas a dehn mi sopraiz wen dehn mi hyaa how ih teech. Dehn seh: “Da weh dis man laan aala dehnya tingz fram? Ahn how komz hihn ga dis wizdom, ahn da how hihn ku du dehnya miraklz? 3 Dis da noh di kyaapenta? Ahn fi hihn ma da noh Mayri; ih breda dehn da noh Jaymz, Joazef, Joodas, ahn Saiman? An ih sista dehn noh liv eena fi wee siti tu?” Soh dehn mi kwait ofendid sayka weh ih mi-di seh ahn du. 4 Bot Jeezas tel dehn: “Wahn prafit geh aana evriway ih goh eksep da ih oan hoamtong an eena ih oan hows.” 5 Soh bikaaz a dat, hihn neva du lata miraklz deh. Ih mi jos lay ih han pahn wahn fyoo sik peepl ahn kyoar dehn. 6 Hihn mi onli sopraiz fi si dat di peepl neva ga fayt. Den ih gaahn tu di vilij dehn rong da ayrya deh fi teech.

7 Ih kaal di 12 apasl dehn ahn sen dehn owt too bai too, an ih gi dehn atariti oava di wikid spirit dehn. 8 Ih aalso gi dehn inschrokshanz noh fi kehr eniting pahn di chrip; no bred, no leda bag, no moni, bot onli wahn stik. 9 Ih tel dehn fi goh rait soh, onli wid di sandalz ahn kloaz weh dehn mi gat aan. 10 Den ih tel dehn: “Enitaim unu goh da sombadi hows, stay deh til unu lef fahn da siti. 11 An if di peepl da wahn plays noh welkom unu er lisn tu unu, den wen unu di lef, shayk aaf di dos fahn aafa unu fut fi shoa dat dehn mi geh wahn waanin.” 12 Den di disaipl dehn gaahn preech tu di peepl ahn tel dehn fi ripent fahn dehn sinz, 13 ahn dehn jraiv owt wahn lata deemon ahn put ail pahn di sik peepl ahn kyoar dehn.

14 Now King Herod mi geh fi hyaa bowt dis, kaaz peepl evriway mi-di taak bowt Jeezas; dehn mi-di seh: “Jan di Baptis mi rayz op bak fahn di ded, ahn dat da wai hihn ku du dehndeh miraklz.” 15 Bot ada peepl mi-di seh: “Hihn da Ilaija di prafit.” Ahn sohn ada peepl mi-di seh: “Hihn da laik wan a di oal taim prafit dehn.” 16 Bot wen Herod geh fi hyaa bowt Jeezas, ih seh: “Ai mi giv di aada fi chap aaf Jan hed, ahn now hihn rayz op bak fahn di ded.” 17 Yu si, Herod mi marid Heroadyas; shee da-mi di waif a ih breda Filip. Ahn sayka shee, Herod mi sen fi ares Jan ahn fi chayn ahn op ahn put ahn eena jayl. 18 Kaaz Jan mi-di tel Herod: “Ih gens di laa fi mek yu marid yu breda waif.” 19 Soh Heroadyas mi gat it een fi Jan an ih mi waahn kil ahn, bot shee kudn du it. 20 Herod mi rispek Jan, hihn mi noa dat Jan da-mi wahn raichos ahn hoali man. Soh ih mi-di kip ahn sayf. Ih mi aalwayz laik hyaa weh Jan ga fi seh, soh afta ih lisn tu Jan, ih neva noa weh fi du.

21 Bot wen Herod mi-di selibrayt ih bertday, Heroadyas fainali si wahn apachooniti fi kil Jan. Hihn mi ga wahn big fees an ih invait di hai govament ofishal dehn, ahn di militeri komanda dehn, ahn di big taim peepl fahn Gyalilee. 22 Ahn Heroadyas daata kohn daans fi dehn, ahn Herod ahn dehn wan weh mi-di eet wid ahn mi onli pleez. Soh di king tel di yong gyal: “Aks fi eniting weh yu waahn, an Ai wahn gi yu.” 23 Ih eevn swayr tu ahn: “Eniting yu aks mi fa, Ah wahn gi yu, eevn op tu haaf a mi kingdom.” 24 Soh shee gaahn aks ih ma: “Weh Ah shuda aks fa?” Ih ma tel ahn: “Aks fi Jan di Baptis hed.” 25 Rait away shee gaahn bak tu di king ahn tel ahn: “Ah waahn yu gi mi Jan di Baptis hed pahn wahn chray rait now.” 26 Eevn doa di king mi geh sad wen ih hyaa dat, ih stil du weh shee mi waahn, sayka weh ih mi don mek wahn pramis ahn sayka ih ges dehn. 27 Soh rait away di king koman wan a ih gyaad dehn fi bring Jan hed. Soh di gyaad gaan, an ih chap aaf Jan hed eena di prizn, 28 an ih bring Jan hed pahn wahn chray. Den ih giv it tu di gyal, ahn shee kehr it tu ih ma. 29 Wen Jan disaipl dehn hyaa weh mi hapm, dehn kom ahn kehr ih badi ahn put ahn eena wahn toom.*

30 Wen di apasl dehn kohn bak, dehn tel Jeezas bowt aal weh dehn mi du ahn teech. 31 Wahn lata peepl mi-di kohn tu dehn, ahn dehn neva ga no taim fi res, noh eevn fi eet wahn meel. Soh Jeezas tel dehn: “Unu kom, mek wi goh ahn fain wahn plays fi deh bai wiself, soh dat wi ku tek wahn lee res.” 32 Soh dehn gaan eena di boat fi fain wahn plays weh dehn kuda mi deh bai dehnself. 33 Bot wahn lata peepl si wen dehn mi-di goh an adaz geh fi fain owt tu. Ahn peepl fahn aala di siti dehn ron gaahn pahn fut ahn reech deh heda dehn. 34 Wel, wen Jeezas get owta di boat, ih si wahn big krowd a peepl, an ih haat gaan owt tu dehn, kaaz dehn da-mi laik sheep widowt wahn shepad. An ih staat teech dehn wahn lata tingz.

35 Bai now da layt aftanoon, ahn di disaipl dehn kom op tu Jeezas ahn seh: “Nobadi liv rong ya, an ih don layt aredi. 36 Sen weh dehnya peepl, soh dat dehn ku goh bai sohnting fi eet da di faam dehn ahn di vilij dehn.” 37 Jeezas tel dehn: “Unu geh sohnting fi mek dehn eet.” Soh dehn aks ahn: “Yu waahn wi goh bai 200 denayriyai* wert a bred ahn gi di peepl fi mek dehn eet?” 38 Hihn aks dehn: “Humoch bred unu gat? Unu goh chek si.” Afta dehn gaahn chek, dehn tel ahn: “Wi onli ga faiv bred ahn too fish.” 39 Den ih tel di peepl fi goh sidong eena groops pahn di green graas. 40 Soh dehn gaan ahn sidong eena groops a 50 ahn 100. 41 Den ih tek di faiv bred ahn too fish an ih luk op tu hevn ahn seh wahn pryaa. Den ih brok di bred ahn giv ih disaipl dehn fi shayr owt tu di peepl, ahn den ih divaid op di too fish soh dat evribadi kuda mi get. 42 Soh aala dehn eet til dehn mi geh satisfai. 43 Den di disaipl dehn pik op 12 baaskit ful a lefoava bred an eni lefoava fish. 44 Di amonk a man weh mi eet di bred da-mi 5,000.

45 Den, rait away, ih tel ih disaipl dehn fi get eena di boat ahn goh heda ahn da di ada said a di see tuwaadz Betsayda, wail hihn stay bak ahn sen di krowd hoam. 46 Bot afta di peepl dehn lef, Jeezas gaan da wahn mongtin fi pray. 47 Now wen nait mi-di kom een, di boat mi deh midl a di see, bot hihn wan mi deh pahn lan. 48 Soh wen ih mi si ih disaipl dehn di fait fi kanchroal di boat bikaaz di breez mi-di bloa haad gens dehn, ih staat waak pahn di see tuwaadz dehn. Da mi nayli maanin* aredi. Den ih du laik ih mi wahn waak paas dehn. 49 Bot wen ih disaipl dehn si ahn di waak pahn di see, dehn hala: “Da weh dis now; dis da mosi wahn vizhan!” 50 Kaaz aala dehn mi si ahn, bot dehn mi frayd. Soh rait away, Jeezas tel dehn: “Ga korij! Da mee; noh frayd.” 51 Den ih get eena di boat wid dehn, ahn di breez stap bloa. Wen dehn si aala dat, dehn mi sopraiz, 52 kaaz dehn stil neva andastan di meenin a di mirakl weh Jeezas mi du wid di bred. Dehn stil kudn andastan di powa weh Jeezas mi gat.

53 Wen dehn get tu di ada said a di see, dehn gaan da Genesaret an anka di boat. 54 Bot az soon az dehn get owta di boat, di peepl rekonaiz Jeezas. 55 Den di peepl ron gaahn spred di nyooz, an evribadi staat bring sik peepl pahn schrecha tu Jeezas. 56 An eniway wehpaat hihn gaan, weda da eena di vilij dehn, di siti, er di konchrisaid, peepl wuda kehr di sik peepl da di maakit plays, ahn dehn wuda bayg ahn fi mek dehn jos toch di ej a ih kloaz. An evribadi weh mi toch ih kloaz geh heel.