Aks

21 Ih mi haad fi tel dehn gudbai, bot wen wi fainali geh di chaans fi separayt wiself fahn dehn, wi get pahn di ship ahn sayl schrayt tu Kos, den di neks day wi reech Roadz, ahn fahn deh wi gaan da Patara. 2 Ahn da Patara wi fain wahn ship weh mi gwehn da Foneesha, soh wi get pan it ahn lef. 3 Pahn di lef han said, wi kuda mi si di ailan a Saipros, bot wi mi jos paas bai ahn sayl schrayt tu Siriya. Den wi kom aaf da Taiya, wehpaat di ship dak fi anload evriting weh mi deh pan it. 4 Afta wi get aaf, wi saach fi di disaipl dehn, ahn wen wi fain dehn wi mi stay wid dehn fi sevn dayz. Bot dehn mi chrai haad fi kanvins Paal noh fi goh da Jeroosalem bikaaz a weh di hoali spirit mi tel dehn. 5 Soh wen da mi taim fi lef, wi kantinyu pahn wi jerni, bot aala dehn, lang wid di uman ahn pikni dehn, gaahn wid wi til wi reech owtsaida di siti. An aala wi neel dong pahn di beech ahn pray. 6 Ahn wi seh gudbai tu wan anada. Den wi get pahn di ship, ahn dehn gaahn bak hoam.

7 Afta dat, wi lef Taiya ahn reech da Tolemayas, ahn wi get aaf deh fi greet di bradaz ahn stay wid dehn fi wan day. 8 Soh di neks day wi lef ahn gaan da Seezareeya, ahn wi gaan da Filip hows ahn stay wid hihn. Filip da-mi wahn preecha a di gud nyooz, an aalso wan a di sevn man weh di apasl dehn mi chooz eena Jeroosalem. 9 Dis man mi ga foa daata weh neva marid,* ahn dehn mi ga di gif fi prafesai. 10 Ahn wail wi mi dehdeh, wahn prafit weh naym Agabos kohn dong fahn Judeeya. 11 Ih kohn tu wi, an ih tek Paal belt ahn tai op fi hihn oan han ahn fut dehn wid it ahn seh: “Dis da weh di hoali spirit seh, ‘Di Jooz eena Jeroosalem wahn tai op di man weh oan dis belt jos laik dis, ahn dehn wahn han ahn oava tu di peepl fahn ada nayshanz.’” 12 Now wen wi hyaa dis, wee ahn di wan dehn weh mi dehdeh staat tu bayg Paal noh fi goh da Jeroosalem. 13 Den Paal ansa dehn ahn seh: “Wai unu di baal ahn chrai diskorij mi?* Ai noh onli redi fi goh da prizn bot Ah aalso redi fi ded da Jeroosalem fi di naym a di Laad Jeezas.” 14 Wen wi riyalaiz dat wi kudn chaynj ih main, wi giv op* ahn seh: “Da Jehoava wil, soh mek ih hapm.”

15 Afta dat, wi mek preparayshan fi wi jerni ahn wi gaan da Jeroosalem. 16 Som a di disaipl dehn fahn Seezareeya mi gaahn wid wi tu. Dehn kehr wi da Manaysn hows wehpaat wi mi wahn stay. Hihn da-mi fahn Saipros ahn da-mi wan a di erli disaipl dehn. 17 Wen wi get da Jeroosalem, di bradaz mi gi wi wahn waam welkom. 18 Di neks day, Paal gaahn wid wi fi meet wid Jaymz, an aala di eldaz mi dehdeh. 19 An afta Paal greet di bradaz, ih staat tu tel dehn eena deetayl bowt aala di tingz weh Gaad mi du fi di ada nayshan dehn chroo fi hihn minischri.

20 Afta dehn hyaa dat, dehn staat tu aana Gaad, bot dehn tel ahn: “Mi brada, wi ga towznz a bileevaz monks di Jooz dehn, an aala dehn faytful tu di Laa. 21 Bot dehn mi hyaa wahn rooma bowt yoo dat yu di teech di Jooz weh liv monks di ada nayshan dehn fi goh gens di Laa a Moaziz. Dehn hyaa dat yu di tel di Jooz dat dehn noh need fi serkomsaiz dehn chiljren ner fala di kostom dehn. 22 Weh wi ku du? Dehn wahn definaytli hyaa dat yu deh ya. 23 Du weh wi tel yu fi du: Wi ga foa man weh mi mek wahn vow. 24 Now kehr dehnya man wid yu an aala unu mos tek paat eena di Jooish kleenin chradishan, ahn yoo pay fi mek dehn shayv dehn hed. Den evribadi wahn noa dat di rooma dehn da noh chroo, ahn dat yoo di obay di Laa. 25 Now az tu di bileeva dehn fahn monks di ada nayshanz, wi mi mek wahn disizhan ahn rait it eena wahn leta tu dehn. Wi mi disaid dat dehn need fi kip weh fahn eniting weh mi geh sakrifais tu aidol; dehn need fi kip weh fahn blod ahn fahn eni animal weh mi geh schrangl,* ahn dehn need fi kip weh fahn sekshwal imoraliti.”*

26 Soh di neks day Paal ahn di foa man dehn gaahn tek paat eena di Jooish kleenin chradishan. Dehn gaan eena di templ fi seh pahn wich day di sevn dayz a kleenin mi wahn finish, soh dat di prees kuda aafa wahn sakrifais fi eech wan a dehn pahn da day.

27 Now wen di sevn dayz mi soon don, di Jooz fahn Aysha si Paal eena di templ. Wel, dehn ster op di hoal krowd gens ahn, an dehn ares ahn. 28 Soh dehn staat tu hala seh: “Unu man fahn Izrel, kohn help wi! Dis da di man weh di teech evribadi aal oava di plays bowt tingz weh disrispek fi wee peepl ahn wi Laa ahn dis plays. Pahn tap a dat, ih eevn bring sohn Greek peepl eena di templ ahn disrispek dis hoali plays.” 29 Dehn mi seh dis kaaz erliya dehn mi si wahn disaipl fahn Efisos, weh mi naym Chrofimos, wid Paal eena di siti. Dehn mi tink dat Paal bring ahn eena di templ. 30 Now big raiyat brok owt eena di hoal siti, ahn di peepl staat tu ron tuwaadz di templ ahn grab Paal ahn jreg ahn owtsaida di templ, ahn rait away dehn kloaz di doa dehn. 31 Dehn mi-di chrai fi kil ahn, bot di aami komanda geh fi hyaa dat di hoal a Jeroosalem mi ga big raiyat di goh aan. 32 Soh rait away, di aami komanda kehr sohn soalja ahn sohn aami aafisa wid ahn, an dehn ron gaahn fi si weh di hapm. Wen di peepl si di aami komanda ahn di soalja dehn, dehn stap beet Paal.

33 Den di aami komanda ares Paal an aada dat dehn chayn ahn op; den ih aks Paal da hoo hihn ahn weh ih mi du. 34 Bot di krowd staat tu hala aal kaina difrent tingz. Soh di komanda neva geh di hoal stoari kaaz a how di peepl mi-di goh aan. Den ih aada ih soalja dehn fi kehr Paal eena di ayrya weh di ada soalja dehn stay. 35 Bot wen Paal get da di step dehn, di soalja dehn mi haftu bak ahn bikaaz di peepl mi-di chrai fi hert ahn. 36 Di peepl mi-di fala dehn di showt seh: “Kil ahn!”

37 Wen Paal mi soon get wehpaat di soalja dehn stay, ih aks di aami komanda: “Ah ku taak tu yu fi wahn lee bit?” Di komanda aks ahn: “Yoo ku taak Greek den? 38 Wahn wail agoa, wi mi ga wahn Eejipshan weh mi staat op wahn ribelyan gens di govament, ahn hihn ahn 4,000 man wid wepan* gaan eena di wildanes. Now, tel mi sohnting, da neva yoo dat?” 39 Soh Paal tel ahn: “Ai da wahn Joo fahn di siti a Tarsos eena Silaisya. Ai da wahn sitizn fahn wahn impoatant siti. Soh Ah di bayg yu, pleez mek Ah taak tu di peepl.” 40 Den di komanda gi Paal permishan fi taak tu di peepl. Soh Paal stan op pahn di step dehn ahn put op ih han fi get di peepl fi kwaiyet dong. Den di hoal plays geh kwaiyet, an ih staat tu taak tu dehn eena di Heebroo langwij. Ih tel dehn: