Machyu

12 Wahn taim, Jeezas an ih disaipl dehn mi-di waak chroo di weet feel dehn pahn di Sabat. Ih disaipl dehn mi hongri, soh dehn staat tu pik aaf di hed fahn di weet an eet dehn. 2 Wen di Farisee dehn si dis, dehn tel ahn: “Yu disaipl dehn di du weh dehn shudn du pahn di Sabat.” 3 Hihn aks dehn: “Unu neva reed bowt weh Dayvid an ih soaljaz du wen dehn mi hongri? 4 Ih gaan eena di hows a Gaad ahn hihn ahn di man dehn eet di hoali bred.* Dehn neva ga no rait fi eet di bred, onli di prees dehn kuda mi eet it. 5 Unu neva reed eena di Laa dat pahn di difrent Sabat dehn di prees dehn kuda mi werk eena di templ ahn stil neva gilti ner brok di Laa a di Sabat? 6 Bot Ah di tel unu, di wan weh moa impoatant dan di templ deh ya. 7 Bot, if unu mi andastan weh di skripcha meen weh seh, ‘Ah waahn peepl shoa mersi, insteda aafa op sakrifais,’ unu wudn kandem di inosent wan dehn. 8 Kaaz di Son a man ga atariti oava di Sabat.”

9 Afta Jeezas lef fahn deh, ih gaan da fi dehn sinagag, 10 an ih meet wahn man weh mi ga wahn kripl han. Dehn mi waahn akyooz Jeezas, soh dehn aks ahn, “Yu tink ih gens di Laa fi kyoar sombadi pahn di Sabat?” 11 Jeezas tel dehn: “If unu mi ga wahn sheep an ih jrap eena wahn big hoal pahn di Sabat, wich wan a unu wudn grab di sheep ahn tek ahn owt? 12 Wahn man way moa impoatant dan wahn sheep! Soh ih noh gens di Laa fi du sohnting gud pahn di Sabat.” 13 Den Jeezas tel di man: “Schrech owt yu han.” Soh di man schrech owt ih han, an ih han geh bak gud laik di ada wan. 14 Bot di Farisee dehn lef fahn deh ahn gaahn mek planz fi kil Jeezas. 15 Wen Jeezas geh fi fain owt bowt dis, ih lef fahn deh. Wahn lata peepl mi staat fala ahn, an ih kyoar aala di sik wan dehn. 16 Bot ih mi gi dehn schrik aadaz noh fi tel enibadi da hoo hihn. 17 Dis mi hapm soh dat weh Aizaiya di prafit mi seh kohn chroo; ih mi seh:

18 “Dis da mai servant weh Ai chooz, di wan weh Ah onli lov, di wan weh Ah pleez wid!* Ah wahn giv ahn mi spirit, ahn hihn wahn shoa di peepl a di nayshan dehn wat da chroo jostis. 19 Hihn noh wahn kwaaril ner showt, ahn nobadi wahn hyaa fi hihn vais pahn di mayn schreet dehn. 20 Hihn noh wahn finish brok aaf wahn pees a graas weh ben, an ih noh wahn finish owt wahn lamp if di flaym soon owt. Hihn wahn bee laik dis til ih karek evriting weh rang. 21 Eena fi hihn naym, di peepl a di nayshan dehn wahn put dehn hoap.”

22 Den afta dat, sohn peepl mi bring wahn man tu Jeezas hoo kudn si ner taak bikaaz ih mi ga wahn deemon eena ahn, an Jeezas kyoar di man. 23 Wel, di krowd kudn bileev weh dehn mi-di si ahn dehn staat seh: “Ah wanda if dis da di Son a Dayvid?” 24 Wen di Farisee dehn hyaa dis, dehn seh: “Dis man geh rid a di deemon dehn wid di help a Biyelzibob,* di roola a di deemon dehn.” 25 Bot Jeezas mi don noa weh dehn mi-di tink, soh ih tel dehn: “Wahn kingdom weh di fait gens ihself noh wahn mek it, ahn wahn siti er famili* weh di fait gens ihself noh wahn mek it needa. 26 Jos laik dat, if Saytan jraiv owt Saytan, den ih di fait gens ihself; how ih kingdom wahn mek it? 27 Moroava, if Ai jraiv owt di deemon dehn wid di help a Biyelzibob, den da hoo di help fi unu disaipl dehn fi jraiv dehn owt? Dat da wai fi unu oan disaipl dehn wahn joj unu. 28 Bot if da chroo di spirit a Gaad dat Ai ku jraiv owt deemonz, den di Kingdom a Gaad deh ya an unu noh eevn noa it. 29 Er how enibadi ku brok eena di hows a wahn schrang man ahn teef ih tingz anles ih tai ahn op fers? Da onli soh ih wahn ku teef ih tingz. 30 Hooeva noh deh pahn mai said deh gens mi, ahn hooeva noh di gyada peepl wid mi di skyata dehn.

31 “Bikaaz a dis Ah di tel unu, Gaad wahn fergiv wahn persn fi evri kaina sin, eevn if ih taak gens eniting weh hoali, bot hooeva taak gens di hoali spirit, Gaad noh wahn fergiv ahn. 32 Fi egzampl, if sombadi seh sohnting gens di Son a man, Gaad wahn fergiv ahn; bot hooeva taak gens di hoali spirit, Gaad noh wahn fergiv ahn. Hihn noh wahn fergiv ahn eena dis sistem* ner eena di fyoocha.

33 “If unu luk afta wahn chree, ih wahn gi gud froots, bot if unu noh luk afta it, ih wahn gi bad froots. Di froot shoa if di chree gud er nat. 34 Fi unu pa da sohn paiznos snayk, how unu ku taak gud tingz wen unu wikid? Kaaz wateva ful op wahn persn haat, dat da weh ih wahn taak bowt. 35 Di gud man seh gud tingz kaaz ih ga gud tingz eena ih haat, bot di bad man taak bad tingz kaaz ih ga loan bad tingz eena ih haat. 36 Ah di tel unu, evribadi wahn gi wahn akonk tu Gaad pahn Jojment Day fi evri yoosles ting weh dehn seh; 37 bikaaz if yu taak gud tingz, den Gaad wahn seh dat yoo da wahn raichos persn, bot if yu seh bad tingz, den Gaad wahn joj yu.”

38 Den fi ansa ahn, som a di skraib ahn Farisee dehn seh: “Teecha, wi waahn si wahn mirakl.” 39 Jeezas ansa dehn: “Unu da wahn wikid jenarayshan weh noh faytful tu Gaad, ahn yet unu waahn si wahn mirakl. Unu noh wahn si notn; di onli mirakl unu wahn si da weh mi hapm tu Joana di prafit. 40 Kaaz jos laik how Joana mi deh eena di beli a wahn big fish fi chree dayz ahn chree naits, di Son a man wahn deh eena di grayv fi chree dayz ahn chree naits. 41 Di peepl a Niniveh wahn rayz op bak fahn di ded pahn Jojment Day lang wid dis jenarayshan ahn kandem dehn, bikaaz di peepl a Niniveh mi ripent wen Joana mi preech tu dehn. Bot sombadi grayta dan Joana deh ya. 42 Di kween a Sheeba wahn rayz op bak fahn di ded pahn Jojment Day lang wid dis jenarayshan, ahn shee wahn kandem dehn. Kaaz shee mi kohn fahn faar fi hyaa di wizdom weh Salaman mi gat. Bot sombadi grayta dan Salaman deh ya.

43 “Wen wahn deemon kom owta wahn man, di deemon paas chroo difrent dezert di saach fi wahn plays fi res an ih noh fain non. 44 Den ih seh, ‘Ah gwehn bak da mi hows weh Ah mi lef,’ ahn wen ih get deh, ih fain dat nobadi di liv eena di hows bot dat ih kleen ahn wel fiks op. 45 Den di deemon goh ahn fain sevn ada spirit weh moa wikid dan hihn. Wen dehn get eena di hows, dehn liv deh, ahn di man en op eena wahn sichuwayshan weh wers dan di wan bifoa. Dat da how ih wahn bee wid dis wikid jenarayshan tu.”

46 Wail Jeezas mi-di taak tu di krowd, ih ma an ih yonga breda dehn reech. Dehn mi-di stan op owtsaid kaaz dehn mi waahn taak tu ahn. 47 Den sombadi tel ahn: “Teecha! Yu ma ahn yu breda dehn di stan op owtsaid di wayt fi taak tu yu.” 48 Jeezas ansa ahn seh: “Hoo da mai ma, ahn hoo da mai breda dehn?” 49 Den ih point tu ih disaipl dehn ahn seh: “Dehn da mai ma ahn mai breda dehn! 50 Kaaz enibadi weh du di wil a mai hevnli Faada, da mi breda, mi sista, ahn mi ma.”