Tes Yu Memri

Yoo don reed aala Di Wachtowa magazeen fi dis yaa? Wel, mek wi si if yu ku ansa dehnya kweschan:

How wi wahn benifit if wi spen taim di taak tu, lisn tu, ahn tink bowt Jehoava?

Wi wahn mek beta disizhanz, bee beta teechaz, ga schranga fayt, ahn wi lov fi Jehoava wahn groa schranga.—w22.01, payj 30-31.

How wi benifit wen wi laan fi chros Jehoava ahn di bradaz weh hihn apoint fi tek di leed eena ih aaganaizayshan?

Now da di taim fi laan fi chros di way how Jehoava du tingz ahn noh dowt di dairekshan ahn disizhanz weh wi geh fahn di eldaz. Den wen di grayt chribyulayshan kohn, wi wahn redi fi obay eevn wen wi geh inschrokshanz weh mait noh mek sens tu wee, er weh mait bee haad fi andastan.—w22.02, payj 4-6.

Weh di aynjel mi meen wen ih tel Zakaraiya bowt wahn “plom lain eena [Govna] Zerobabel han”? (Zech. 4:8-10)

Dis vizhan mi shoa Gaad peepl dat eevn doa di templ neva az byootiful az di wan weh Salaman mi bil, dehn mi wahn finish bil it an ih mi wahn bee akaadn tu Gaad standadz.—w22.03, payj 16-17.

How wi ku set wahn gud egzampl “bai di way how [wi] taak”? (1 Tim. 4:12)

Wi ku du dat wen wi taak eena wahn kain way ahn shoa rispek tu peepl eena di minischri, wen wi sing wid aala wi haat, wen wi koment regyula da meetin, wen wi taak di chroot eena wahn way weh schrentn adaz, ahn wen wi noh taak eena wahn way weh insolt adaz.—w22.04, payj 6-9.

Wai di bees weh Revilayshan 13:1, 2 taak bowt gat aala di feechaz a di foa bees (govaments) weh Danyel chapta 7 taak bowt?

Di bees eena Revilayshan 13 noh reprizent jos wan govament er wan werl powa, laik Roam. Instead, dis wail bees reprizent aala di govament dehn weh rool oava hyoomanz op tu tudeh.—w22.05, payj 9.

Wat da wahn impoatant way how wi ku shoa dat wi chros eena Gaad jostis?

If sohnbadi insolt wi, ofen wi, er sin gens wi, wi chrai noh fi stay beks er hoal malis. Wi lef di mata eena Jehoava han. Hihn wahn geh rid a aala di prablemz weh sin kaaz.—w22.06, payj 10-11.

Weh wahn brada shuda memba wen ih di pray da wahn meetin?

Wi noh fi yooz pryaa fi karek er teech di kangrigayshan er fi mek eni anonksment. Wi noh need fi seh wahn ‘lang pryaa,ʼ espeshali da di biginin a wahn meetin. (Mach. 6:7)—w22.07, payj 24-25.

How “di peepl weh du bad tingz wahn geh joj”? (Jan 5:29)

Dehn noh wahn geh joj bays pahn di bad tingz weh dehn mi du bifoa dehn ded. Insted, dehn wahn geh joj bays pahn dehn atichood ahn kandok afta dehn geh rezorek.—w22.09, payj 18.

Da wahn kanvenshan eena Septemba 1922, weh Brada Rutherford mi inkorij di bradaz ahn sistaz fi du?

Da wahn kanvenshan da Cedar Point, Ohio, U.S.A., hihn mi seh: “Di King don di rool! Unu ga di asainment fi preech ahn tel evribadi bowt dis. Soh, advataiz, advataiz, advataiz, di King an ih Kingdom!”—w22.10, payj 3-5.

Wat da chree wayz how Isaiah chapta 30 shoa wi dat Gaad help wi fi noh giv op?

Dis chapta shoa wi dat hihn (1) lisn tu wi pryaaz an ansa dehn, (2) gaid wi, ahn (3) bles wi now an eena di fyoocha.—w22.11, payj 9.

Wai wi ku seh dat Psalm 37:10, 11, 29 mi kohn chroo eena di paas ahn wahn kohn chroo agen eena di fyoocha?

Di werdz weh Dayvid mi rait diskraib how gud tingz mi stan fi di nayshan a Izrel wen Salaman da-mi king. Jeezas mi koat fahn vers 11 wen hihn mi prafesai bowt wahn paradais eena di fyoocha. (Mach. 5:5; Look 23:43)—w22.12, payj 8-10, 14.