¿Achkë ütz nqaʼän rchë chë taq nqaskʼij ruwäch le Biblia kan kʼo nqatamaj chqä kan nqarayij nqaʼän?

Josué najin nuskʼij ruwäch jun rollo ri kʼo ri Pixaʼ chwäch; ri tzʼaq kʼo chrij Jericó xetzaq, ye kʼa rachoch Rahab ma xtzaq ta; Josué, taq najin wä nchʼö rkʼë Jehová, rujtobʼan ruqʼaʼ chkaj

JOSUÉ kʼo wä chë nukʼwaj ri tinamït Israel chwäch ri ulew ri rutzujun Dios chkë. Reʼ jun nimaläj samaj ri rukʼwan kʼïy kʼayewal. Ye kʼa Jehová xukʼuqbʼaʼ rukʼuʼx chqä xuʼij che rä: «Ma taxiʼij awiʼ chqä ma kamayamoʼ». Chqä xuʼij che rä Josué chë we nuskʼij chqä nusmajij ri Pixaʼ tzʼibʼatäl qa, xttok jun ajnaʼoj winäq chqä jontir ri xtuʼän ütz xttel chwäch (Josué 1:7, 8).

Röj, rma yoj kʼo chpan ‹ri rukʼisbʼäl taq qʼij›, kan kʼïy kʼayewal yeqïl chqä (2 Timoteo 3:1). We nqajoʼ chë ütz yojbʼä pa qakʼaslemal achiʼel Josué, nkʼatzin nqasmajij ri naʼoj xuyaʼ qa Jehová che rä. Rma riʼ nkʼatzin nqaskʼij ruwäch le Biblia ronojel qʼij chqä yeqasmajij pa qakʼaslemal ri naʼoj ye kʼo chpan. Ke riʼ, röj chqä xkoj ok ajnaʼoj taq winäq.

Ye kʼa kʼïy chqë röj ma qataman ta achkë rubʼanik nqankʼuj ruwäch le Biblia o ma nqa ta chqawäch nqaʼän riʼ. Tapeʼ ke riʼ, kʼo chë ma nqamestaj ta chë ri natjoj awiʼ chrij le Biblia kan janina ruqʼij. Rma riʼ, ütz nqatzʼët ri peraj «Keʼaksaj re naʼoj reʼ». Chriʼ xkeqïl utziläj taq naʼoj ri yojkitoʼ rchë kan kʼo nqatamaj chqä rchë kan nqarayij nqaskʼij ruwäch le Biblia.

Ri salmista xuʼij: «Kinakʼwaj chpan rubʼey ri apixaʼ, rma kan janina nqa chi nwäch» (Salmo 119:35). Rït chqä kan xtqa chawäch xtatjoj awiʼ chrij Ruchʼaʼäl Dios. Chqä kan kʼïy na wä utziläj taq naʼoj xkeʼawïl rma xtatjoj más awiʼ chrij le Biblia.

Tapeʼ rït ma kan ta nakʼwaj bʼey chwäch jun mamaʼ tinamït achiʼel Josué, ye kʼa kʼo wä chë napabʼaʼ awiʼ chkiwäch nimaʼq taq kʼayewal. Rma riʼ, tabʼanaʼ achiʼel xuʼän Josué: ütz ütz tatjoj awiʼ chrij le Biblia chqä tasmajij ri naʼoj pa akʼaslemal. We xtaʼän riʼ, ütz xkabʼä pa akʼaslemal chqä xkatok jun ajnaʼoj winäq.

KEʼAKSAJ RE NAʼOJ REʼ

Naʼäy tabʼanaʼ jun chʼonïk. Chpan le Biblia ruyon runaʼoj Dios yeqïl, y xetzʼibʼäx qa rchë chë yojkitoʼ pa qakʼaslemal. Rma riʼ, taq xtaskʼij ruwäch le Biblia, takʼutuj atoʼik che rä Dios rchë nqʼax chawäch ri naskʼij, rchë ma namestaj ta ri natamaj chqä rchë yeʼasmajij ri naʼoj pa akʼaslemal (Esdras 7:10).
Tabʼanaʼ qa kʼutunïk chawäch. Taq xtaskʼij ruwäch le Biblia chqä ri publicaciones yeʼelesan pä chpan le Biblia, takʼutuj qa chawäch reʼ: «¿Achkë nukʼüt chi nwäch chrij Jehová ri xinskʼij qa? ¿Achkë rubʼanik rukʼwan riʼ rkʼë ri qäs nutzjoj le Biblia? ¿Achkë rubʼanik yenksaj re versículos reʼ rchë yentoʼ nikʼaj chik?».
Kachʼobʼon chrij ri naskʼij. Taq najin naskʼij ruwäch jun wuj, kataneʼ jubʼaʼ y kachʼobʼon chkij re kʼutunïk reʼ: «¿Achkë nnaʼ rkʼë ri najin ntamaj? ¿Achkë rma ke riʼ nnaʼ? ¿Nuʼän chwä chë yichʼobʼon chrij ri bʼanatajnäq pä pa nukʼaslemal, ri najin nbʼanatäj wkʼë komä, o rkʼë jubʼaʼ, ri xtbʼanatäj wkʼë chi nwäch apü? ¿Achkë rubʼanik yensmajij re naʼoj reʼ pa nukʼaslemal?» (Job 23:5; Salmo 49:3). Kachʼobʼon chqä chrij we yakowin naqʼalajsaj achkë rma Jehová nuʼij chkë rusamajelaʼ chë tkiyaʼ qa rubʼanik jujun naʼoj, chqä achkë kʼayewal nukʼän pä we ma nanmaj ta tzij (Deuteronomio 32:28, 29).
Tabʼanaʼ che rä chë achiʼel ta kan natzʼët ri najin naskʼij. Jun tzʼetbʼäl. Tqatzʼetaʼ ri tzijonem chrij José. ¿Yakowin natzʼët taq xkʼayïx äl kimä ruchʼalal chkë ri ismaelitas? ¿Nakʼaxaj achkë nkiʼij? ¿Achkë uxlaʼ yeʼasäq? (Génesis 37:18-28). Chqä ütz naʼän chë achiʼel ta yït jun chkë ri winäq riʼ, y takʼutuj qa chawäch: «¿Achkë nkichʼöbʼ ri winäq riʼ? ¿Achkë nkinaʼ?». Taq yojchʼobʼon chkij kʼutunïk achiʼel reʼ, más kʼïy xtqatamaj chqä más jaʼäl xtqanaʼ xtqatjoj qiʼ chrij le Biblia.
Keʼaksaj jontir toʼïk ri ye kʼo rchë natjoj awiʼ. Tatzʼetaʼ achkë ye kʼo pa qachʼaʼäl, chwäch wuj o pa Internet, chqä tatamaj yeʼaksaj. Ma taxiʼij ta awiʼ nakʼutuj atoʼik we ma yakowin ta yeʼaksaj. Jujun chkë ri toʼïk ye kʼo, ya riʼ ri YAKBʼÄL WUJ PA INTERNET Watchtower chqä ri wuj Toʼïk richin yeʼakanoj tzijonem. Chriʼ xkeʼawïl jalajöj kiwäch tzijonem chqä kiqʼalajsaxik kʼïy versículos rchë le Biblia. Chqä ri wuj Toʼïk richin nqʼax chawäch ri Ruchʼabʼäl ri Dios xkarutoʼ rchë xtatamaj akuchï xekʼojeʼ wä jujun tinamït, achkë junaʼ xebʼanatäj ri yerutzjoj le Biblia, achkë pajbʼäl chqä etabʼäl xekiksaj ri winäq ojer qa o xa bʼa achkë chik na jun.
Takamluj kitzʼetik ri naʼoj más kejqalen chpan jun tzijonem. Reʼ xkarutoʼ rchë ma xtamestaj ta ri xatamaj. Jun chik ri xkatoʼö, ya riʼ natzjoj chkë ri nikʼaj chik ri xaskʼij qa. Takʼutuj qa chawäch reʼ: «¿Achkë rubʼanik xtinksaj re naʼoj reʼ taq xtintzjoj le Biblia?». Ri naʼän riʼ xkarutoʼ rchë ma xtamestaj ta ri naʼoj más kejqalen chqä xkakowin xkeʼatoʼ nikʼaj chik rkʼë ri xatamaj.