Tölöök Inhānga Kahūich Mëtiv

24 Hē Yēsū nö kunyi-inyre nö ṙa-ang el ngam töhet chūök, ngaich yihtöre yik mahaköp nö in ò ngaich hameukhömat ò cha-a tö vanāyö vinī-i ngam töhet chūök. 2 Ngö ṙô ngaich ang Yēsū nö in cha: “Röh öi pingangkūö öi meuk në nö ṙòkhöre? Tökò-òṙô Chin tö yīö, öt hěng hang min ihong tö ṙa-ayö nö hachaphen höö öp töt suktu min.”

3 Hē ò nö ūichhaka nö ikui ök Rôngö Òliv, ngaich ulāikenre yik mahaköp nö yihtöre nö hatöönan, nö ngö ṙô: “Vë-eny nang ih man, ihē ön min në ṙô nö teung, asuh öp min minkahngö yanīhi* meh hēk asuh inrē öp minkahngö manāngen në taṙòkhöre nö ikūö ngih panam?”*

4 Ngö ṙô ngaich ang Yēsū nö sapṙô cha: “Haṙēmngenre yin hòṅ yīö öt halō-oikūö tö tarik, 5 tön pōyen yip min yamih nö i minë-eny chu nö ngö ṙô, ‘Chū-ö chin Kristū,’ ngaich maṙôngö halō-ongkūö min cha-a tö tarik. 6 Hang kinyūngö yin min, ineūkö kinyūngö inrē. Uh pöri yī-ö öi pa-ekūö, tön tö hòṅ yih nun anū-ö, öl pöri min öp manāngen nö yih.

7 Pò në panam min nöng la-al höö hēk pūlngö inrē nöng la-al höö, yöng inyāchö öp min, kumyeūnö inrē nö ṙōlkang chūök. 8 Anū-ö nun min ranehtökūö* në kanihngen.

9 Hē e min yip tarik nö kē-ě yīö pön hòṅ ötlēḵken yīö hēk fëlngen yīö inrē, surīkhu yī-ö min inrē tö taṙòkhöre tarik töpòkūö ngam minë-eny chu. 10 Rö-ö pöri nöng anū-ö, pön pōyen min yip tarik ṙamūöhöngre tö ngam Tēv* hēk hachīlngövah höö min cha-a, surīkhen höö inrē. 11 Maṙôngö yip min tö minyôny aṅ pròfět ngaich pōyen halō-ongkūö min tö tarik; 12 ufovngöre inrē min ngam hanangenlōn yip tömaṙôngö, kūö ṙanūöhlö ṙôken ngam ötlanöökö.* 13 Anga-aṅ pöri ngòh tököp nöng möi* nö söl manā-aṅ, anga-aṅ min tö hayöökaṙen. 14 Ahangka min ngih tölöök inhangkö ngam Pūlngö nö i në taṙòkhöre panam nö inmeukhömat taṙòkhöre tarik, ngaich möl min öp manāngen nö yih.

15 Lökten, yēḵ yīö min öi meuk ngam yöng sin-òkkūö ngam Tēv nö sökhak nö im chūök töhet, sā ineūkö e tök pròfět Tanīěl (hökngen öp vamë-ekūö e nö akaha elmat), 16 ngaich yip mi-i Yūta hökngen cha nö ilööṙen nö falngöre nö chuh kui rôngö. 17 Ngaich yip tarik mi-i kui nup patīre hökngen cha nö un yônti nö kē-ěre nup chehenre nö lātaṙeū nö el patī, 18 ngaich yěn ōt yip tarik më-el panô-òṅ ip hē e, hökngen cha nö un havan nö kē-ěre kinṙum re. 19 Höng yöng kanihngen pöri min! yip puyōsö tö yip mahapō kūönre inrē yöngnyīö, hē u anū-ö sakāmö! 20 Lökten yin vë-ekūötēv hòṅ ngam fanalngö yīö nö öt hē el laneūichö, uh rēhěn ngam fanalngö yīö nö el ṙētak Sakāmö Haneūheu; 21 pön öt töngatī-ivö yöng tökiröng ötkanôlò min, öt rēhěn hēten tö ranehlö ngih panam, öt rēhěn nö unôichngöre min nö hēk. 22 Yēḵ nup sakāmö pöri min nö öt hakūöni ròtòng, lohten nö öt hěngtak öre tö öt kò-òngvah; kūö yip tö katöllöng pöri min në sakāmö nö hakūöni ròtòng.

23 Yěn hěngtak öp tarik tö ngö ṙô nö in yīö hē u anū-ö sakāmö, ‘Yěh meuk! Ihih an Kristū,’ hēk, ‘Umu-a inrē!’ uh yī-ö hòṅ ṙatö-ellōnre tö ṙô cha. 24 Tön pōyen yip min tö minyôny Kristū hēk tö minyôny pròfět chamòhòlre ngaich hameuknyö nup tökiröng pinngangkūö, kūö cha nö hòṅ halō-ongkūö yip tö katöllöng tö ngam Tēv. 25 Lökten chin öich urěhnyòre öich vë-eny nang yīö tö u hòṅ yīö öi hīnöre. 26 Lökten, yēḵ yip tarik min nö ngö ṙô tö yīö, ‘Yěh meuk! El tönyalnyi apa,’ ngaich uh yī-ö öi kunyi-inyre; hēk yěn ngö ṙô cha-a, ‘Yěh meuk! El nup lātuhēt öp uròhò,’ uh yī-ö öi ṙatö-ellōnre. 27 Pön sā mineūkö ngam hanyālö angū-ö nö löklö lā chūhöt ngaich meūkö nö lā sūng, ngatī inlahen yanīhi* min ngòh Kūön tarik hē ò min nö yih. 28 Pön i chūök nup alaha yip kupah min, in e min nup matēṙö nö hamūlöre.

29 Ilööṙen min nö sangulköti mat ngam tavūöi, unôichrit nup kanihngen hē u anū-ö sakāmö, öt yāngö mat inrē min ngam chingëṅt, suktöre inrē min minë taneūsömat nö ṙa-ang el halīöngö, minë kanôlò ngam halīöngö min inrē nö kayīna. 30 Ngaich möl min nö meūkö minë minkahngö ngòh Kūön tarik nö el halīöngö, ngaich kōk elngòhre min vē taṙòkhöre tarik i kūö ngih panam tökūö miṙivlōnre, ngaich meuk tö yīhi ngòh Kūön tarik min cha-a nö löktö el halīöngö nö holtö kumlēḵre, kanôlò re inrē. 31 Ngaich tīnngö yip ma-ahānga re min anga-aṅ nö holtö tö pōitô fanöö, ngaich cha-a min nö hamūl yip tö katöllöng tö ò nö ṙā-ang in nup tö fën lā-a kuföt, löktökūö im manā-angkūö ngam halīöngö söl im tahëng.

32 Haköp ngam inchōḵ-oṙô yin im anychīr chōn: Yēḵ ngam tö tufömngöre pak ngam chōn nö ayallöre ngaich meunynyi rōi minë chōn, ngaich ilöö akahalōn yī-ö tö ranöhta ngam sikehngö. 33 Ngatī yī-ö, yēḵ yīö meuk minë minkahngö nö teungtökūö, akahalōn ngaich yī-ö tö ngam kūön tarik nöng röhta yanīhi nöng ikūö inkūp. 34 Tökò-òṙô Chin tö yīö hanöng sā në ṙô nö öl nö ṙòkhöre nö teungtakūö öthō min ngih michaplö nö chuhngöre. 35 Chuhngöre an min ngam halīöngö, ngih panam inrē, öt chanuhuvṙen pöri në ṙô chu.

36 Öt hěngtak pöri tö akahalōn töp sakāmö angū-ö ṙētak inrē, ötrēhěn yip ma-ahānga el halīöngö, ötrēhěn ngam Kūön, höng ngam Yöng tö akahalōn. 37 Pön sā ṙētak nuk sakāmö Nō-a, ngatī yanīhi* min ngòh Kūön tarik. 38 Sā nuk sakāmö urēhěkūö ök ṙanööingö, nyā-avkūö yik tarik, òk inrē, hapīhö, hanöng sā Nō-a nö öl nö yôklö nö el ök chōng. 39 Hanöng sāha yanīhi ngam ṙanööingö nö öl nö keuheūtngöre tī nö haṙööingen cha, ngaich cha-a nöng öt chumkūöṙen tö e, ngatī öp min yanīhi ngòh Kūön tarik. 40 Nët tak min nap tarik më-el panô-òṅ; hěngtak min öp tö kē-ě ngaich hěngtak öp tö ṙa-ayö. 41 Nët tak min nap kikānö kumṙīöt nö aṅtī tö kuntīre; hěngtaka öp tö kē-ě hěngtak öp tö ṙa-ayö nö in cha. 42 Lökten yin aṅhaṅti, tön öt akahalōn yin töp sakāmö hē yanīhi ngam Mā.

43 Yēḵ ngam yöngkūö ngam patī öre nö akahalōn tö ṙētak* yanīhi öp mu-ulāiya, ngaich aṅhaṅtī anga-aṅ pön sōtö ngam patīre nö tiṙōli. 44 Lökten yin, öi hīnöre öi lēntöhëichṙen, pön öp hē yīö öt mufē-ěvö tö yanīhi ò, hē e min ngam Kūön tarik nö yih.

45 Achīö aich cha-a tökô-en hēk tö akaha mahalanṙen më mahayōm nup aṅ patī öp yöngṙen re, ngaich lööngö ṙētak tī nö kētö nyā-aṅkūö cha? 46 Tö ṙamlōn öp min anga-aṅ mahalanṙen yěn meūkö nö ngatī la-en hē yanīhi öp yöngṙen re! 47 Tökò-òṙô Chin tö yīö, vīlöng min anga-aṅ nö mahayōm nup taṙòkhöre chehen öp yöngṙen ò.

48 Yēḵ ngòh tötlöök pöri mahalanṙen nö ngö ṙô nö ellōnre, ‘Ha-āṅ tö yīhire öp mā chu,’ 49 fël yik holre inrē anga-aṅ mahalanṙen, nyā, òk ka-eūt inrē nö in yik mihiyōi aṅ, 50 hē e min ngam mā ò nö yih ip sakāmö hē ò nö öt hööka, ip ṙētak inrē hē ò nö öt akahalōn tö yanīhi ò, 51 Kētu min ngam tökiröng öt inkôlò ò ngaich kavaltu min anga-aṅ nö in yip mahanyatkö elmat ngaich in e min nöng peuiny kiṙīöt kui kanapre inrē.