Pōyen nun minë töt ṙanāngen la-en hayōmken më mahayööken töla-evṙen nö el ngam māṅ. Kirööngen minlēḵṙen misī ang Pôl tö vē tö ngatī la-en prötör. Lökten anga-aṅ nö kakken më mahayööken töla-evṙen nö holtö më minṙöinylen, hē ò nö kūichtö chitri yik Kristīön aṅ Filipī. (Filip. 1:1) Pōyen yip prötör yip tö ngaich nö vōkö, tö ṙònghöichṙen töngamuh nö in ngam la-en mahayööken töla-evṙen, pòrô nö ṙālö hēk tököinyö ṙēḵti inrē. Teūngen cha-a tö ṙanamlōnre nö in ngih la-en. Tö sā Tēvön, ik sā ò 18 samyeūheu ṙēḵti ngaich vīlöng anga-aṅ nö mahayööken töla-evṙen. Ngatī inrē ang prötör Luīs nö mahayööken töla-evṙen unôichrit ò ngaich nö 50 samyeūheu ṙēḵti. Sitih mufē ang prötör Luīs tö ngih la-enre? Ngöṙô anga-aṅ, “Teūngen chin tö ngam tökirööngen ṙanamlōn, yēḵ chu öich hayööken më holmaneukre el ngam māṅ. Hangenlōn cha-a tö chu, ngaich ngatī chū-ö inrē öich hameuktöre hangenlōn tö cha öich in nup inlahenre öich hayööken cha.” Pōyen yin më mahayööken töla-evṙen tö ngatī mufē. Yēḵ meh öm töhěngtak öm prötör tö ngaich inrē öm kēḵ ngam vinôkö, öl pöri öm kētöre im la-en mahayööken töla-evṙen, mihôiṅ öm vī nup tö ngatī chö-önyre yěm hòṅ kū-ö urěh? w24.11 pěch 14 përa 1-3

Ik sā Rācha Hësikiā ngam aṅ Yūta nö 39 samyeūheu ngaich vahav anga-aṅ töp tökiröng invah. Vënyö ngam ṙô Yāvē ang pròfět Isayā nö in ò, tö ò nö ötlööken min tö ngam invah re hēk kapah inrē min anga-aṅ. (2 Rā. 20:1) Kô-en ang Hësikiā hē e nö öt mahaheukku töre min nö lööken tö ngam invah re. Angū-ö ngaich ngih lāinyngen ò nö kalē-ě miṙivlōn hēk peuny inrē. Hē e anga-aṅ nö peunyhökūö Yāvē tö inyööken re. Aṙē-ělōn ang Yāvē nö meuk ngam inlahen Hësikiā nö peunyhökūö ò nö havëkö inyööken re töp lökten ò nö ngöṙô nö in ò: “Ngaich chin hang ṙô meh vë-ekūö chu, meuk nuk mak mat meh chin. Yĕh meuk, lööken man tö tī chu.” Aṙē-ělōn ang Yāvē tö Hësikiā, lökten ò nö löktö in Isayā tī nö kilēngôre nö in ò, tö ò min nö ṙūöhlö ṙôken ngam samyeūheu ò hēk laklen Yērusalem inrē tö yik aṅ Asīriā. (2 Rā. 20:4-6) Asuh öp haköplö hī. Yěn ōt tö ngatī invah meh nö töt lin-ënen ngaich mihôiṅ öm vë-ekūö Yāvē. Yēḵ meh hòṅ peuny, ngaich mihôiṅ më-eṅ öm peunyhökūö ò öm vë-eny nang ò tö öp mufē re. Kētu ṙinatu-ellōn in tö ngam Paipöl tö Yāvē nö ‘Tēv neūkölōn hēḵ mahangëken hī inrē’ el kanihngen—2 Kòr. 1:3, 4. w24.12 pěch 24 përa 15-17

Yěn ha-aṅlöng min yip tarik ip tufömngöre panam, ngaich holtö ṙamlōnre min ayī-ö öi ha-öinytö yīhi cha keuheūtngöre chūök ngam ṙanamlōn hē e! Asehkūö man tö hī öi löktö in minë vahī kūö kuntī Yāvē min öi mikahtökūöre tö ò, irôken kumchiken öi min ip hē e. (Sal. 104:24; Isa. 11:9) Yē hī inrē min ṙòkhöre öi het öi öt falūṙen, ngaich holtö ṙanamlōn re min ayī-ö löklōn Yāvē. Tökiröng ön angū-ö nö inkòlô hī. Kēngen minë inkòlôre hòng min më-eṅ tö kūö lōnre öm ‘hòṅ kumchikngenre kēken tökööl’? (Hep. 11:25) Hö-ö öt ngatī! Nup inlahen hī töngamuh öi harööḵngenre in nup inlahenre, mööḵngöre tö u min mup inkòlô hī öi el öp tufömngöre panam. Köplōn, tö ngam inlahen hī min öi rö-ö höng meukken re öi örheūheu aṅ el öp peretāis. Pön kô-en angū-ö min nö ngatī ip yamih ṙētak. Ṙën anū-ö nö teungten nö ngatī, pò Yāvē nö kēten ngam hanangenlōnre kūönre nö chö-öinyten hī! w25.01 pěch 29 përa 12