Kaheuk sakāmö in ṙung öi kē minë tö ṙōlkangen fësla. Ōtre minë fësla tö lööṙen tö sā ngih, asuh öp min nāsta hī hēk iṙē-ang mat öi min öi haṙòh. Ōtre pöri nup fësla tö kihngen nö kē-ě tö hī, kūö hī öt akahakūö tö inlahenre yěi hòṅ kēḵ u. Pöi yěi kēḵ u min anū-ö fësla ngaich mihôiṅ min nö lökngöre ngam el alaha hī, ngam ṙanamlōn hī hēk lökngöre inrē yip aṅ patī hī, mihôiṅ inrē min angū-ö nö lökngöre tī tö ngam inlahen hī öi ha-önyö Yāvē. Ṙòkhöre in öi lōnu töre öi kēḵ nup fësla nup tö yöölen tī tö hī hēk tö yip aṅ patī hī inrē. Möthë öi lōnu tö Yāvē nö ṙamlōn nö in nup töng kahë hī fësla. (Rōm. 12:1, 2) Yēḵ meh öm hòṅ kēḵ öp tölöng fëslare, ngaich hòṅ urěh më-eṅ hòṅ mikahtökūöre töp inlahen e. Kūö yòh angū-ö nö tötṙanāngen? Fēkö inlahen öp töhěng tak tarik tö īnu tö ngam tökiröng invah. Chuh in öp tòktör anga-aṅ nö hameuktöre. Ilööṙen hòng min ngam tòktör nö le-ënan nöng öt hatöönö ò tö inlahen ngam invah ò hēk höng öt cheköpö ò inrē? Öthō öp min tö akaha tòktör nö ngatī inlahen. Ngatī inlahen min më-eṅ öm löngö kahë tö fëslare, yěm urěh öm mikahtökūöre tö inlahen öp kahëre fësla. w25.01 pěch 14 përa 1-3

Ta-a töi kakkö ngam miṙēlōn Yāvē. Asuh öp mikahkūö hī lökten in e? Sā maheuk hī tö Yāvē ‘nö öt lōnu tö tö hěnghang tak tarik nö kapah.’ (2 Pīt. 3:9) Sitih inlahen ang Yāvē nö hameukten e? Ta-a töi chumkūöṙen ngëichkö inlahen ò nö in yik tarik tököölö fālen. Fāluṙen ök misī Rācha Tāvit pô ò nö asěha hēk fëlngö ök tö hěngtak tarik. Holtö ellōnre pöri anga-aṅ nö halööktitre, lökten ang Yāvē nö hameuktö ngam miṙēlōnre nö aṙēlen ò. (2 Sa. 12:1-12) Pōyen inrē nuk tötlēn kahëken ök Rācha Manasē irò-òtö nômö ò nö aṅ. Ik sā ò pöri nö halööktitre, ngaich meuk ellōn ò ang Yāvē hēk hameuktö ngam miṙēlōnre inrē nö aṙēlen ò. (2 Kin. 33:9-16) In në inchōḵ elmat in akahakūö tö Yāvē yěn chöönyu nö hameuktö ngam miṙēlōnre ngach öthō anga-aṅ nö öt hameukten e. Mihôiṅ öi ṙatö-ellōnre tö Yāvē min nö öthō nö öt hachohlö yik tarik hamò-en nuk vanaichöre hēk yik tökô-en ellōn inrē nö halööktitre. w24.05 pěch 4 përa 12

Unôichrit inlahen ò nö ṙānyö yik tarikre nö ṙā-ang Aikup, vīlö yik kūönṙô anga-aṅ tö la-evṙen nö el ngam töhet chūök. Hěnghöre kē-ěkūö yik lēvi inrē tö nuk tö nôlta la-en nö el ngam töhet chūök. Yik tarik pöri tö la-evṙen nö el ngam töhet chūök hēk tö röhta inrē nö in e, möḵlö chumkūöṙen hòng ang Yāvē tö cha tö yik tahëng? Hö-ö öt ngatī. Öt tö hěngheuh an Yāvē nö atöltuṙen. Kētö ṙātak taṙòkhöre ang Yāvē nö hanôlö ò Pòrô nö tö röhta hēk tö marôvat. Tö sā Yāvē nö chumkūöṙen tö më taṙòkhöre aṅ Israel nö hòṅ meuk ngam taṙul hēk tö ngam tameūyö ikui ngam töhet chūök, pòrô nöng öp töng yòh kamngö chūök cha. (Man. 40:38) Meuk ngam taṙul misī yik aṅ Israel yěn kē-ěyö nö ṙā-ang kui ngam töhet chūök, ngaich unôichrit e inrē cha-a nö kiröön nö kumtö nuk chehenre. (Kin. 9:15-23) Ngatī ayī-ö töngamuh pòrô öp töng kamngö chūök hī iyöng, mihôiṅ ayī-ö öi ṙatö-ellōnre tö Yāvē nö hangenlōn tö hī, chumkūöṙen tö hī hēk örheūheu inrē min anga-aṅ nö laklen hī. w24.06 pěch 4 përa 10-12