Inhānga Kahūich Yôhan

14 Uh an ngam ellōn yīö nöng haṙivlōn, ṙatö-ellōnre yin in ngam Tēv hēk ṙatö-ellōnre inrē in chu. 2 Pōyen nup chūökö nö i patī ngam yöng chu, yěn öt ōt öre anū-ö ngaich öthō chū-ö ngatī ṙô öich in yīö ngaich pöri chū-ö öich hòṅ kiröönngöre öich halēnkö chūök yīö. 3 Ngaich yēḵ chu min öich kiröönngöre öich halēnkö öp chūök yīö ngaich havan min chū-ö ngaich kumten yīö öich chuh patīre hòṅ öp chūök chu öich iyöng in e min yī-ö. 4 Akahakūö yin tö öp talöökö öp kū-ö chu kiröönngöre.

5 Ngö ṙô ngaich ang Tômas nö in ò: “Mā, hö-ö in īhö akahakūö tö öp chahūhu meh. Ngaich sitih inlahen min öi akahakūö tö ngam talöökö?”

6 Ngö ṙô ngaich ang Yēsū nö in ò: “Chū-ö chin talöökö, kanô-en hēk nômö inrē. Öt hěngtak tökô nö yihtöre nö in ngam Yöng, höng acha-a pöri tö mihôiṅ yip lamökngörit in chu nö chuh in ò. 7 Yēḵ yīö öre tökô-en mikahkūö tö chu ngaich tö akahakūö yī-ö tö ngam Yöng chu, löktö in ngih ṙētak yin min öi akahakūö tö ò, kô-en yin ngaich öi meūkö ò.”

8 Ngö ṙô ngaich ang Filip nö in ò: “Mā, hameukhömat ih man tö ngam Yöng ngaich möl min īhö ṙamölōn.”

9 Ngö ṙô ngaich ang Yēsū nö in ò: “Filip, ngaich chin öich höng marò-òten in yīö, sön më-eṅ öt akahakūö tö chu. Ngòh mameūkö chu mameuk ngam Yöng chu anga-aṅ ngaich kūö yòh më-eṅ öm ngö ṙô, ‘Hameukhömat ih tö ngam Yöng’? 10 Öt ṙatö-ellōnre öm tö ai tö ngam Yöng ai töng hěng? Hö-ö nun në ṙô chu nö lamöktö in chu, pön lamöktö in ngam Yöng chu ngam mi-im hinëngö nö in chu ngaich löktö in chu anga-aṅ nö la-evṙen tö minë la-enre. 11 Ṙatö-ellōnre yin in chu tö ai tö ngam Yöng chu ai töng hěng, hönglöö öi höng ṙatö-ellōnre in minë la-en chu. 12 Tökò-òṙô chin tö yīö, ngòh ṙamatö-ellōnre nö in chu, la-evṙen inrē min anga-aṅ tö në la-en chu mötlö ṙôken la-en min anga-aṅ, pò chu öich chuh in ngam Yöng. 13 Nup töng havëkö yīö i minë-eny chu ngatī inlahen min chū-ö hòṅ ngam Yöng nö teūngen tö nöönyöre nö löktö in ngam Kūön. 14 Yěn ōt havëkö yīö i minë-eny chu ngaich ngatī inlahen chū-ö.

15 Yēḵ yīö öi hangenlōn tö chu ngaich hang minë chööngö chu min yī-ö. 16 Havëkökūö ngam Yöng chin min ngaich hēk min anga-aṅ nö kētö hamòlṙen* yīö öp töng örheūheu min nö in yīö, 17 ngam kanô-en ngam töhet kumlēḵ ngam tötkô nö taneūngen ngih panam, pò ngih panam nöng öt meūkö e, ötrēhěn inrē nö akahakūö tö e. Akahakūö pöri yī-ö tö e kūö e nö örheūheu nö in yīö ngaich īnu yī-ö tö e. 18 Öt ṙāngen yīö chin höng haṙivlōn,* havan pöri min chū-ö hēk öich chuh in yīö. 19 Höng rahëichtöreṙen hēk ngaich öt meūkö chu min ngih panam, meūkö chu pöri min yī-ö pò chu öich aṅ, aṅ inrē min yī-ö. 20 Akahakūö min yī-ö hē e angū-ö sakāmö tö ai tö ngam Yöng chu ai töng hěng, ngaich hěng chū-ö öich in yīö. 21 Ngòh tö īnu tö minë chööngö chu ngaich hāngö u, anga-aṅ tö hangenlōn tö chu. Ngòh tö hangenlōn tö chu hangenlōn ngam Yöng chu tö ò hēk hangenlōn inrē min chū-ö tö ò ngaich hameuktöre min chū-ö in ò.”

22 Ngö ṙô ngaich ang Yūta (Hö-ö nö Iskaryôt) nö in ò: “Mā, asuh öp lāinyngen meh hòṅ hameuktöre öm in ih, hö-ö pöri öm ing panam?”

23 Ngö ṙô ngaich ang Yēsū nö sapṙô ò: “Yěn ōt tö hangenlōn tö chu ngaich lök in minë ṙô chu min anga-aṅ ngaich hangenlōn min ngam Yöng chu tö ò, chuh in ngam Yöng chu min ayī-ö ngaich iyöng in ò. 24 Ngòh töt hangenlōn tö chu öt lök in minë ṙô chu min anga-aṅ minë ahang yīö ṙô chu hö-ö anū-ö nö lamöktö in chu pön lamöktö in ngam Yöng ngam tamīnten chu.

25 Vë-eny nang yīö chin tö në ṙô hē chu öich ṙömöng in yīö. 26 Ngam hamòlṙen yīö pöri ngam töhet kumlēḵ ngam tö tīntu nö i minë-eny chu tö ngam Yöng, angū-ö min mahaköpten yīö tö në ṙô ngaich nup töng vahënyö chu ṙô öich in yīö fēḵlen yīö min angū-ö. 27 Ngam lanāmö kahëtö chu ṙāngen e chin öich in yīö, hö-ö chin öich sā tī ngih panam öich kētö ngam lanāmö öich in yīö. Uh ön ngam ellōn yīö nöng haṙivlōn, un rēhěn nö öt kalē-en tö kūö pinhë-eṅkūöre. 28 Ngaich yin öi hang ṙô chu tö chu öich kiröönngöre hēk havan min öich chuh in yīö. Yēḵ yīö öi hangenlōn tö chu ngaich ṙamlōn yī-ö tö chu öich havan öich chuh in ngam Yöngre, pò ngam Yöng nö kiröng tö chu. 29 Vë-eny nang yīö chin töngamuh urēhěkūö e nö ngatī, hòṅ e min yěn ngatī ngaich ṙatö-ellōnre yī-ö. 30 Hö-ö chin hēk hòṅ pōyen ṙô vë-ekūö yīö, pò öp rācha ngih panam nö yih ngaich öt kumlē-ěv anga-aṅ nö in chu.* 31 Hòṅ ngih panam pöri nö akahalōn tö chu öich hangenlōn tö ngam Yöng, lökten chū-ö öich ngatī inlahen öich sā nup chööngö kahëtö ngam Yöng nö in chu. Choholre, ta-a töi ngaich.