Raneh Chitri Yik Aṅ Kòrin

15 Kahōlö, haköpkö lōn yīö chin tö e angū-ö tölöök inhānga ngam ahangnyö chu öich in yīö ngaich hō-en e yī-ö hē e hēk söl ing töngamuh yī-ö öi sökhak öi lā in e. 2 Hayöökaṙen yī-ö min öi löktö in ngih tölöök inhānga, höng haköptīre pöri yī-ö öi kiṙapken e, hòn öt yëḵngen ngam inlahen yīö öi ṙatö-ellōnre.

3 Lökten nup ṙô haköp chu ngaich asölten u chū-ö öich in yīö ngaich ngam tötṙanāngen nö in u nö ṙòkhöre sā kinūichngö e nö imat ngam līpöre, chö-öinytö nup tökööl hī an Kristū nö kapah, 4 hēk lāpi anga-aṅ, ngaich sā kinūichngö e nö imat ngam līpöre misī tö ò nö hachohlöng im linūöi sumkam. 5 Hameuktöre anga-aṅ nö ikūö Kīfös* hēk ikūö yik tö nëtsīön tak inrē. 6 Ngaich unôichrit e anga-aṅ nö hameuktöre im töhěng ṙētak nö ikūö yik prötör töpōyen tö tö 500, ṙōltit tak yip töngamuh in cha tö ōt nö in hī, rīkre pöri ngaich yik tökapah. 7 Unôichrit e hēk anga-aṅ nö hameuktöre nö ikūö Yāköp hēk ikūö yik tanīnöṙô nö ṙòkhöre. 8 Im manā-aṅ anga-aṅ nö hameuktöre nö ikūö chu öich höng sā ṙēngen öp nyīö töfötnyu nö urēhěkūö ngam ṙētakre.

9 Manā-angkūö kanūöṅnö chin in yip tanīnöṙô, ötrēhěn inrē öich kô tanīnöṙô invëka, pò chu öich öt lamëken ngam māṅ ngam Tēv. 10 Kūö ngam tökiröng miṙēḵlōn ngam Tēv pöri chū-ö öich ngatī inlahen töngamuh ngaich öt yanëngen ngam inlahen ò nö hameuktö ngam tökiröng miṙēḵlōnre nö in chu, pò chu öich mötlö inlahen öich la-evṙen tö yip tahëng, rö-ö pöri anū-ö nö pòkūö tī chu, pön pòkūö ngam tökiröng miṙēḵlōn ngam Tēv ngam mi-in chu. 11 Yěi pòrô kakkö inlahen chu hēk kakkö inlahen cha, höng angū-ö ngih ṙô tö ahangka tö hī ngaich ṙatö-ellōnre inrē yī-ö öi in e.

12 Yěn angū-ö tö ahangka inlahen Kristū tö ò nö hachohlöng nö ṙā-ang in yik tökapah ngaich sitih inlahen yip rīkre in yīö nö vënyen yik tökapah nö öt hachohlöng? 13 Yěn öt hachohlöng yip tökapah ngaich tö ngö manah chěi angū-ö tö Kristū nö öt hachohlöng nö ṙā-ang in yip tökapah. 14 Yěn öt hachohlöng ang Kristū ngaich höng kô-en nöng yanëngen ngam inlahen hī öi ahānga hēk höng yanëngen inrē ngam ṙinatö-ellōn yīö. 15 Rö-ö nöng angū-ö pò hī öi sā tö minyôiny-aṅ öi vënyö inlahen ngam Tēv tö ò nö hachohlen Kristū, pön yēḵ ngih ṙô nö tökô-en tö inlahen yip tökapah nö öt hachohlöng ngaich tö ngö manah chěi angū-ö tö ngam Tēv nö öt hachohlen Kristū. 16 Lökten yēḵ yip tökapah min nö öt hachohlöng, ngaich ngatī inrē ang Kristū nö öt hachohlöng. 17 Ngaich yēḵ Kristū nö öt hachohlöng ngaich höng yanëngen ngam ṙinatö-ellōn hēk höng söl ing töngamuh yī-ö öi köp öi in nup tököölre. 18 Ngaich yik tö ngaich nö kapah mahaköp nö in Kristū, ngatī inrē min cha-a nöng öt ōttit. 19 Yēḵ hī min öi höng in ngih inlahenre töngamuh öi aṅ öi in Kristū maheūṅkkuvö ngaich min ayī-ö höng manā-angkūö yanāichö.

20 Angū-ö pöri ngih tökô-en ngam inlahen Kristū nö hachohlöng nö ṙā-ang in yip tökapah, anga-aṅ an ngòh lanòh ṙòng nö ṙamā-ang in yip tökapah. 21 Löktö i tö hěngtak tarik ngam kinpaha nö yih, lökten nö löktö i ngòh tö hěngtak tarik min nö hachohlöng yip tökapah. 22 Sā inlahen yip taṙòkhöre nö kapah nö lökngen in Ātöm, ngaich ngatī min yip taṙòkhöre nö aṅ nö löktö in Kristū. 23 Kö lööngö inlahen inlēnlö pöri min nö i ngòh tö hěngtak: urěh Kristū ngam lanòh nö ṙòng, ngaich unôichrit e yip mi-in Kristū yip tö hachohlöng min ip ṙētak yanīhi ò. 24 Ngaich im manā-aṅ, hē ò min ngaich nö ha-etngen në taṙòkhöre inyööngö, minā-aṅ hēk kumlēḵ ngaich möl min anga-aṅ nö kēten ngam Pūlngö nö eltī ngam Tēv ngam Yöng ò inrē. 25 Lökten sin anga-aṅ nö hòṅ hayöng nö rācha, hanöng saha ngam Tēv nö öl nö vīten yip tö kunyaha elmat nö rööntukui tö ò. 26 Ngam manā-aṅ tö kunyaha elmat, ngam tö ahëtiyö min, angū-ö an ngam kinpaha. 27 “El röön ò nun ngaich në taṙòkhöre” tö tī ngam Tēv, yēḵ ò pöri ngaich nö ngö ṙô, ‘el röön ò nun ngaich në taṙòkhöre,’ inmeuktö ngam Tēv ngaich nö kēten nup taṙòkhöre nö elkatòh ò, ngaich öt nôlhöt anga-aṅ nö in u. 28 Yēḵ në taṙòkhöre pöri min ngaich nö elkatòh ngam Kūön ò ngaich ngatī inrē min ngam Kūön nö tumṙeūtöre nö elkatòh ngam Tēv, ngam kamëten nup taṙòkhöre nö elkatòh ò, hòṅ ngam Tēv nöng anga-aṅ tökeuheūttöre nö in nup taṙòkhöre.

29 Ngaich sitih inlahen min cha-a yip kamëḵ ngam vinôkö nö chö-öinyten tö ngam kinpaha? Yěn öt hachohlöng min yip tökapah ngaich kūö yòh min cha-a nö kēḵ ngam vinôkö nö chö-öinyten ngam kinpaha? 30 Kūö yòh öi rih ayī-ö öi höng kaheuk ṙētak öi keun kanihngenre? 31 Kahōlö, sā ngam inlahen chu öich kô-en eū-eu yīö in ngam Mā hī Kristū Yēsū, ngatī kanô-en ngih inlahen chu öich kaheuk sakāmö la-al ngam kinpaha. 32 Yēḵ chu öich sā inlahen yip tahëng tarik* öich i Efisös öich la-al nup aṅ el inchōn töṙeūla ngaich asuh öp yanöölen chu? Yěn öt hachohlöng min yip tökapah ngaich, “ta-a töi nyā hēk òk inrē, tön töng kapah in huṙöich.” 33 Ui hachīlöre, ötkòlô tī yin vē tötlöök hol tö tölöök inlahen.* 34 Chikötlöre yin la-evṙen tö minë tölöök ngaich ui iṙūöhen in ngam tökööl, pò yip rīkre tarik nö öt īnu tö mikah elmatre tö inlahen ngam Tēv, hōten yīö pöri chū-ö öi sirōngkūö lökten öich ngatī ṙô.

35 Ōtre pöri lohten yip tö ngö ṙô: “Sitih inlahen yip min tökapah nö hachohlöng? Sitih inlahen min öp alaha cha yěn hachohlöng?” 36 Ō më-eṅ tökulō-ov tarik! Hanöng saha öp taneūich meh nö öl nö urěh nö kapah ngaich öt aṅhlö angū-ö. 37 Ngam taheūichtö meh, hö-ö nö angū-ö tö sīöp nö kun chōn, pön töhěng nö kulöl, yěn pòrô angū-ö nö kulöl sāiny hēk kulöl nup tahëng inrē. 38 Ngam tölöng pöri nö imat ngam Tēv ngaich asīöp ngam kulöl anga-aṅ ngaich yēḵ ò nö vīngöre nö kun chōn ngaich harīkngöre mineūkö angū-ö tö nup tahëng kun chōn. 39 Öt hěngren nun minë alaha nö ṙòkhöre, harīkngöre minë alaha tarik, harīkngöre minë alaha töṙeūla, harīkngöre minë alaha nup chehechōn hēk harīkngöre minë alaha nup kāḵ. 40 Yip aṅ el halīöngö, harīkngöre nup alaha cha tö nup alaha yip mi-iyöng kūö ngih panam, harīkngöre vanāyö alaha më aṅ el halīöngö hēk harīkngöre vanāyö alaha më mi-iyöng kūö ngih panam. 41 Harīkngöre vanāyö an ngam tavūöi hēk harīkngöre vanāyö ngam chingëṅt hēk harīkngöre vanāyö minë taneūsömat, rö-ö pön harīkngöre vanāyö ngam töhěng taneūsömat tö minë tahëng taneūsömat.

42 Ngatī ṙēngen yip tö hachohlöng nö ṙā-ang im kinpaha. Im tö chahū-uyö ngam alaha nö teūichtu ngaich hachohlöng nö in ngam töt chahū-uyö. 43 Teūichtu an nö in ngam töt minlēḵken ngaich hachohlöng nö im inpōilö. Teūichtu an nö im öt kumlē-en ngaich hachohlöng nö im kumlēḵ. 44 Teūichtu an ngam tö nehngenre alaha ngaich hachohlöng angū-ö nö im töt meūkö alaha. Sā ngam tö nehngenre alaha nö ōt, ngatī ngam tötmeūkö alaha nö ōt. 45 Ngö kinūichngö an inrē: “Ngam raneh tarik Ātöm, tö aṅ anga-aṅ nö tarik.” Ngam manā-aṅ pöri Ātöm kamëtö ngam nômö ngam tötmeūkö alaha. 46 Rö-ö pöri ngam raneh alaha nö töt maneūken, urěh pöri ngam tö nehngenre alaha ngaich unôich ngam alaha tötmeūkö. 47 Löktö ing panam ngam raneh tarik hēk tövī-i misī nö löktö im tumlat, ngaich löktö el halīöngö ngam tahëng. 48 Sā ò anga-aṅ ngòh tövī-i nö löktö im tumlat, ngatī ṙēngen inrē yip tahëng nö vī-i nö löktö im tumlat hēk sā ò anga-aṅ ngòh lamöktö el halīöngö, ngatī ṙēngen inrē yip tahëng nö lamöktö el halīöngö. 49 Sā ṙēngen hī ayī-ö öi sā vīni-i ò öi löktö im tumlat misī, ngatī ayī-ö öi sā vīni-i ò öp lamöktö el halīöngö.

50 Kahōlö, angū-ö ön ṙô chu tö ngam alaha hēk tö ngam mahām nö ötkô nö amīnu tö ngam Pūlngö ngam Tēv hēk ötkô ngam tö chahū-uyö nö amīnu tö ngam töt chahū-uyö. 51 Yěh meuk! Vë-eny nang yīö Chin töp töhěng töhet töt mikahkūö: Öt ṙòkhöre in min öi kapah, ṙòkhöre pöri min ayī-ö öi haṙī-ingre, 52 sā pinnyöpömat, hē öp manā-aṅ min ṙô öp fanöö nö fööka. Föörö min öp fanöö ngaich hachohlöng min yip tökapah nö im töt chahū-uyö alaha ngaich haṙī-ingre min ayī-ö. 53 Lökten ngih tö chahū-uyö alaha nö hòṅ chumhenlöre tö ngam töt chahū-uyö ngaich ngih alaha töng kapah ngaich hòṅ chumhenlöre tö ngam töt kinpahavö. 54 Yēḵ ngam tö chahū-uyö nö chumhenlöre tö ngam töt chahū-uyö ngaich yēḵ ngam töng kapah nö chumhenlöre tö ngam töt kinpahavö, ngaich möl min nö teungtakūö ṙô ngih tö kūichiyö: “Urāngen ön min ngam kinpaha nö ngeūktu.” 55 “Ō kinpaha, isuh öp minhôiṅyö meh? Ō kinpaha, isuh öp chanöökö meh?” 56 Ngam tökööl an chanöökö, ngam kamëtö ngam kinpaha ngaich ngam kamëtö minhôiṅyö ngam tökööl nö ngam Chööngö.* 57 Kētö nööinyö ngam Tēv pöri ngam kamëtö minhôiṅyö hī im Mā hī Yēsū Kristū!

58 Lökten kahōlö yī-ö hanangenlōn chu, hakööpöre ui hanlöinyken hēk örheūheu nö pōyen nup la-en yīö öi i linöökölōn ngam Mā, pò yīö akahakūö tö nup la-enre im Mā nö öt chanök alaha.