Sitih Inlahen Öm Mihôiṅ Haṙamlōn Yāvē Öm inup Ṙô Re?

Hē Yāvē nö vīlö ngòh tarik ngaich kē-ěkūö ò anga-aṅ tö ngam tövai inlōnti, heuneū-eu ṙô ò nö ṙò-òv. Lökngöre ang min Yāvē, yēḵ hī höng lök inlahen ṙô re öi ṙò-òv? Heūṅ, lökngöre an! (Vë-evkūö Yāköp 1:​26.) Kūö yòh öi hòṅ chumkūöṙen tö nup ṙô re yěi ṙò-òv, hòṅ Yāvē min nö ṙamlōn?

1. Hòṅ sitih inlahen ṙô öi yěi vë-ekūö holre?

Tölṙô hī an ngam Paipöl öi ‘kö hangëken höö, haruhkö alaha höö inrē.’ (1 Tösalònikē 5:​11) Ōt hòng mikahkūö meh tö hòṅ hareuskö alaha tö meh? Sitih inlahen öm min hareuskö alaha ò? Mihôiṅ öm vë-eny nang ò tö meh öt nyatngö mat tö nup kanihngen ò. Mihôiṅ inrē öm vë-eny nang ò tö meh öm ṙamlōn tö nup tölöök la-en ò. Ōt nun minë ṙô aṅmat ngam Paipöl tö reuslöre alaha tī tö hī. Asuh öp min hameuktö meh öm in ò? Um vaichngö tö ngih: Kô-en in öi hòṅ ṙò-òv, mötlö pöri ngam inlahen hī hòṅ ngëichkö inlahen ṙô re yěi ṙò-òv. Lökten in yěi vë-ekūö holre, ngaich hòṅ hangenlōn hēk ṙēmö ṙô yěi ṙò-òv.​—Inchōḵ-oṙô 15:1.

2. Asuh nup ṙô tötkô nö löknyö elvāng hī?

Ngö ṙô an ngam Paipöl: “Un töchōichu ṙô, löknyö elvāng yīö.” (Vë-evkūö Efisös 4:​29.) Tö ngö manah angū-ö tö hī ötkô chökhu ṙô hēk ötlēkôre inrē tö yip holre. Ötkô öi miṙēḵngö yip holre tö nup ṙô re hēk tölngenre öi hachōichngö minë-eny cha.​—Vë-evkūö Inchōḵ-oṙô 16:28.

3. Hòṅ sitih Inlahen ṙô öi yěi ṙò-òv, hòn reuslöre alaha yip hamang ṙô hī?

Yěn ellōn hī min nup ṙô, anū-ö min kumnyī nö löknyö elvāng hī. (Lūkös 6:​45) Lökten in hòṅ chaphöt nup tölöök ṙô öi ellōnre. Nup ṙô töng het, nup töng ööilōn yip hamang hēk nup töng ineū-euv inrē. (Filipī 4:8) Yēḵ hī hòṅ ngatī inlahen chahaphöt tö nup tölöök ṙô öi ellōn re, ngaich hòṅ chumkūöṙen ayī-ö öi katöllö holre, maheukre inrē tö nup inṙamlōn. (Inchōḵ-oṙô 13:20) Tötṙanāngen inrē angū-ö nö in hī öi hòṅ urěh afītöre tö nup ṙô re, ngaich möl öi ṙò-òv. Pön mihôiṅ min yip hol hī nö ṙamlōn hēk chök inrē tö nup ṙô hī öi ṙò-òv. Ngö ṙô an ngam Paipöl: “Hĕng tak ap umuh tökësô sā sanët tö saphötvökūö, kētö lanööken vah pöri ngam litāk tö akaha.”​—Inchōḵ-oṙô 12:18.

MIKAHTÖKŪÖRE HĒK

4. Ṙap nup ṙô re man yěm ṙò-òv

Hēṙu in ṙung öi yahnyi ṙô tö nup ṙô re, ngaich haṙivlōn öi unôichngöre. (Yāköp 3:2) Vë-evkūö Kalatī 5:​22, 23, ngaich kakkö minë intöönö yamih:

• In ngih miröökö, asuh nup tinrīken tö hòṅ havëka tö meh yěm vë-ekūötēv, hòṅ meh min öm ṙap nup ṙô re yěm ṙò-òv? Sitih inlahen ön në tinrīken min nö yöölen tī tö meh?

Vë-evkūö 1 Kòrin 15:33, ngaich kakkö ngih intöönö yamih:

• Sitih inlahen nup min inṙamlōn hēk yip katöllö meh hol meh nö lökngöre tī tö inlahen ṙô meh öm ṙò-òv?

Vë-evkūö Mumkahten 3:​1, 7, ngaich kakkö ngih intöönö yamih:

• Söö in yěi hēṙu öt ṙò-òv hēk ěhten yěi höng unôichngöre öi ṙò-òv. Ihē öi tölōn meh min öi söö yěi ngatī inlahen?

5. Ṙô tö nup tölöök inlahen yip tahëng

VITIŌ: Ṙô Tö Nup Töreuslöre Alaha tī Man Tö Yip Töhëng (4:​07)

• Asuh ök sin tötlöng inlahen ngam prötör ngaich kūö yòh anga-aṅ nö hòṅ halööktitre?

• Asuh nuk la-en ò kūö ò nö hòṅ halööktitre?

Vë-evkūö Mumkahten 7:​16, ngaich kakkö ngih intöönö yamih:

• Kūö yòh öi hòṅ urěh ngëichköre, yěi hòṅ kakken nup tötlöng inlahen yip tahëng?

Vë-evkūö Mumkahten 7:​21, 22, ngaich kakkö ngih intöönö yamih:

• Yěm akahalōn töp holre nö ötlēkôre tö meh. Lohten min öm yīhi tanānyö. Sitih inlahen ön min në miröökö nö hayööken meh?

6. Ṙēmö ṙô man yěm vë-ekūö yip aṅ patīre

VITIŌ: Haköpkö Ngam Pinīhö Ngam Hanangenlōn Töm Minlēḵṙen (3:​08)

• Asuh öp min mahayööken meh öm hangenlōn ṙô öm vë-ekūö yip aṅ patī re?

Vë-evkūö Efisös 4:​31, 32, ngaich kakkö ngih intöönö yamih:

• Tö hòṅ sitih inlahen nup min ṙô tö ṙônyu tö hī, hòṅ ngam hanangenlōn nö köp nö el ngam mikūönö?

Keuheūtnyö ṙô re ang Yāvē nö vë-eny ngam mufē re tö inlahen ngam Kūönre, ang Yēsū. Vë-evkūö Mëtiv 17:5, ngaich kakkö ngih intöönö yamih:

• Sitih inlahen öm min asīnken Yāvē, yěm hòṅ vë-ekūö yip aṅ patīre?

MINË HAKÖP HĪ NGAICH

Mihôiṅ min yip hol hī nö chök tö nup ṙô hī hēk mihôiṅ nö sā tö le-ënö tö u. Lökten in öi hòṅ chumkūöṙen tö nup ṙô re yěi ṙò-òvö, nup ṙētak hī öi ṙò-òvö hēk inlahen ṙô hī inrē yěi ṙò-òvö.

Sitih ṙô öm më-eṅ?

• Höng hòṅ asuh nup ṙô lamöknyö rōi ngam litāk hī?

• Asuh nup ṙô tötkô nö löknyö rōi ngam litāk hī?

• Hòṅ sitih inlahen öi hòn reuslöre alaha yip hol hī tö nup ṙô hī?

NGËICHKÖ NË INRĒ

Hòṅ sitih inlahen öi hòṅ nup ṙô hī nö vāyö hināngö tö yip tahëng reuslöre alaha tī inrē tö cha?

Chumkūöṙen Man Tö Nup Ṙô Re (8:​04)

Mikahtökūöre, sitih inlahen öm min yěm hòṅ ṙūöhöngre tö nup tö chōich ṙô?

“Tölöng Öng Ngam Rinūtngövah?” (El vepsāit töhakööpö)

Yēḵ hī min örheūheu kakkö inlahen yip tahëng, ngaich mihôiṅ min öi yahnyi ṙô tö nup tötlöng inlahen cha. Sitih inlahen öi min lāköre tö u?

Sitih Inlahen Öich Ṙūöhöngre Töm Vinë-eng Nang? (2:​36)

Tötlamëkôre sin ngam tarik tö holre, öt lööṙen anga-aṅ nö halööktitre. Mikahtökūöre man tö inlahen tī Yāvē nö hayööken ò.

“Chumkūöṙen Chin Ngaich Öich Afēkö Öp Chö-önyre Öich Aṅ” (Chūökamahati-HI, Òktopör-Tisempör 2013)